ოპოზიცია, რომელიც არის ძალიან მძიმე მდგომარეობაში, თითქოს ქვეყანაში უბედურების მოხდენას დიდი გულიმოდგინებით ელოდებოდა და პირველივე წუთებიდან დაიწყეს პოლიტიკაზე სპეკულირება, – ამის შესახებ პარლამენტის საპროცედურო საკითხთა კომიტეტის თავმჯდომარემ, ირაკლი ქადაგიშვილმა განაცხადა.

მისივე თქმით, საზოგადოება ხედავს, რომ ხდება ბუნებრივი სტიქიის შედეგად გამოწვეული ტრაგედიისა და ტრაგიკული შედეგებით სპეკულირება პოლიტიკოსების მხრიდან.

„ჩვენ გვეუბნებიან, რომ ამ სპეკულაციისათვის მაქსიმალურად გამოვიყენებთ, მათ შორის პარლამენტს, ჩვენ ვეუბნებით, რომ თქვენ კანონით მონიჭებული უფლებები გამოიყენეთ, მაგრამ არ ვიქნებით სპეკულაციის თანამონაწილეები. ეს არის ჩვენი პასუხი. ვნახეთ, რომ სტქიქიის მოხდენის წუთებიდან ბრალდებების სერია დაიწყო. მდგომარეობა არის ასეთი, რომ ოპოზიცია, რომელიც არის ზოგადად ძალიან მძიმე მდგომარეობაში, გაუაზრებელი და მავნე პოლიტიკური გზავნილებით, თითქოს დიდი გულიმოდგინებით ელოდებოდა, რომ რაიმე უბედურება მომხდარიყო ქვეყანაში და პირველივე წუთებიდან დაიწყეს პოლიტიკაზე სპეკულირება. მომხდარი უბედურების მაშინვე პოლიტიკაზე გადათარგმნა დაიწყეს“, – განაცხადა ქადაგიშვილმა.

პარლამენტში დროებითი საგამოძიებო კომისიის შექმნის ინიციატივა ურეიტინგო ოპოზიციური ძალების რამენაირად პოლიტიკური დღის წესრიგის ზედაპირზე არსებობის მიზანს ემსახურება, – ამას ჩვენ არც აწმყოში და არც მომავალში ხელს არ შევუწყობთ! – ასე უპასუხა “ქართული ოცნების” უმრავლესობის დეპუტატმა ბექა ოდიშარიამ შოვის სტიქიის შედეგებზე პარლამენტის საგამოძიებო კომისიის შექმნასთან დაკავშირებით დასმულ კითხვას.

როგორც ოდიშარიამ აღნიშნა, მომხდარს შს სამინისტრო იძიებს და თუ საჭირო გახდება, გამოძიებაში პროკურატურაც ჩაერთვება.

“თუ შედეგი იმდაგვარი დადგება, რომ საზოგადოებისთვის კითხვები დარჩება, შემდეგ შეიძლება საგამოძიებო კომისიის შექმნაზე ვიმსჯელოთ.

როგორ წარმოგიდგენიათ გამოძიების პროცესში მყოფი გამომძიებლებისა და მოწმეების პარლამენტში დაბარება, მათ წინაშე პოლიტიკური კონცერტებისა და კორდებალეტების მოწყობა, როგორც ეს ოპოზიციას ხელეწიფება. ეს არც ჭირისუფლის ინტერესს და არც იმ გულწრფელი ადამიანების ინტერესს არ ემსახურება, ვინც დაღუპულთა ოჯახებს და მთელს საქართველოს თანაუგრძნობენ.

საგამოძიებო კომისიის შექმნა მხოლოდ ხელმოცარული პოლიტიკოსების ინტერესებს ემსახურება, რომ რამენაირად ნეგატიური დღის წესრიგი შექმნან და ასეთ დღის წესრიგზე იტივტივონ”, – განაცხადა ბექა ოდიშარიამ.

რაც შეეხება შოვის სტიქიის თემაზე ინტერპელაციის წესით შს მინისტრის ვახტანგ გომელაურის დაბარებას, როგორც ოდიშარიამ აღნიშნა, შს სამინისტრო ერთ-ერთი ყველაზე წარმატებული უწყებაა, რომელიც აპოლიტიკურ ინსტიტუციად ჩამოყალიბდა და ყოველთვის დროულად და ადეკვატურად მოქმედებს.

მისივე შეფასებით, გომელაური სამინისტროს ყველა ქვედანაყოფს კარგად ხელმძღვანელობს.

“გარდა იმისა, რომ ვახტანგ გომელაური არის ძალიან ადამიანური, არის მაღალპროფესიონალი და საკითხს ყოველთვის დამჯერებლად და აღელვების გარეშე უხსნის საზოგადოებას, პარლამენტს.

თუ “ნაციონალური მოძრაობა” პარლამენტში სპექტაკლს არ მოაწყობს, ვახტანგ გომელაური არცერთ კითხვას უპასუხოდ არ დატოვებს“ , – აღნიშნა ოდიშარიამ.

საქართველოს პრემიერ-მინისტრმა ირაკლი ღარიბაშვილმა ამერიკის შეერთებული შტატების საგანგებო და სრულუფლებიან ელჩთან საქართველოში კელი დეგნანთან გამოსამშვიდობებელი შეხვედრა გამართა.

შეხვედრისას მხარეებმა ხაზი გაუსვეს საქართველოსა და აშშ-ს შორის არსებულ სტრატეგიული პარტნიორობის მნიშვნელობას და მიმოიხილეს თანამშრომლობის პრიორიტეტული დღის წესრიგი.

მთავრობის მეთაურმა აშშ-ის ელჩს მადლობა გადაუხადა გაწეული საქმიანობისთვის და წარმატებები უსურვა.

მთავრობის ადმინისტრაციაში გამართულ შეხვედრას აშშ-ის საელჩოს ეკონომიკური განყოფილების ხელმძღვანელი ჯინ ფოსტერი ესწრებოდა.

„ქართულ ოცნებას“ გამოძიების ეშინია, კითხვების დასმაც კი გააშიშვლებს მათ ბრალეულობას და პასუხისმგებლობას, – ამის შესახებ „სტრატეგია აღმაშენებლის“ ერთ-ერთმა ლიდერმა, სერგო ჩიხლაძემ განაცხადა.

როგორც მან აღნიშნა, იმისთვის, რომ შოვში მომხდარი ტრაგედიის მიზეზი ობიექტურად დადგინდეს, ერთადერთი ბერკეტი არის საპარლამენტო მექანიზმი.

„არც შოთაძის პროკურატურა, არც გომელაურის შსს არ გამოიძიებს არც პრემიერ-მინისტრის, არც სხვა რომელიმე მინისტრის, არც მინისტრთა კაბინეტის პასუხისმგებლობის საკითხებს შოვის ტრაგედიასთან მიმართებით. ერთადერთი საგამოძიებო, ობიექტური და ყოვლისმომცველი მექანიზმი არის საპარლამენტო მექანიზმი. „ქართულ ოცნებას“ გამოძიების ეშინია. კითხვების დასმაც კი გააშიშვლებს მათ ბრალეულობას და პასუხისმგებლობას, როგორიც არის, რატომ არ იქნა შეტყობინების სისტემები 11 წლის განმავლობაში დანერგილი? ასევე, ტექნიკა- ვერტმფრენები და დრონები დროულად შეძენილი? ტრაგედიის მოხდენიდან ყველზე კრიტიკულ საათებში რატომ არ მოხდა სწრაფი რეაგირება. რატომ არ შეიკრიბა უსაფრთხოების საბჭო? სად იყო პრემიერ-მინისტრი და მინისტრთა კაბინეტი თითქმის ერთი დღის განმავლობაში? პირველ ღამეს რატომ შეჩერდა სამაშველო ღონისძიებები და ასე შემდეგ. სულ მცირე, ამ კითხვებზე პასუხის გაცემა მოუწევს პრემიერ-მინისტრს და მინისტრებს“, – განაცხადა ჩიხლაძემ.