2022 წლის ივნისიდან ინფლაცია 1%-ზე დაბალია, მაშინ როცა გაცილებით განვითარებულ ქვეყნებში, როგორიც არის აშშ ან ევროკავშირის ქვეყნები, თვის ინფლაცია წინა თვესთან შედარებით 3%-ის ფარგლებშია, – განაცხადა ექსპერტმა სოსო არჩვაძემ საქსტატის მიერ გამოქვეყნებული ეკონომიკურ მონაცემების კომენტირებისას.

„ინფლაციის ასეთი დაბალი მაჩვენებელი ჩვენ უკვე ორწელიწადნახევარზე მეტია, რაც გვაქვს. 2022 წლის ივნისიდან ინფლაცია 1%-ზე დაბალია, მაშინ როცა გაცილებით განვითარებულ ქვეყნებში, როგორიც არის აშშ ან ევროკავშირის ქვეყნები, 3%-ის ფარგლებშია თვის ინფლაცია წინა თვესთან შედარებით. ჩვენთან არის ორმხრივად პოზიტიური ტენდენცია – ერთი მხრივ, მაღალი ეკონომიკური ზრდა და მეორე მხრივ, დაბალი ინფლაცია. საბოლოო ჯამში, ეს გვაძლევს იმ პოზიტიურ ეფექტს, რომ მოსახლეობის რეალური შემოსავლები იზრდება საკმაოდ მაღალი ტემპით, გვაქვს დასაქმების მაჩვენებლის მატება, საშუალო ხელფასის მატება და ეს არა ნომინალურ, არამედ რეალურ განზომილებაშიც საკმაოდ მაღალია“, – განაცხადა არჩვაძემ.

სტატისტიკის ეროვნული სამსახურის ინფორმაციით, 2024 წლის დეკემბერში, წინა თვესთან შედარებით, ინფლაციის დონემ საქართველოში 0.7%, ხოლო წლიური ინფლაციის დონემ 1.9% შეადგინა.

სტატისტიკის ეროვნული სამსახურის აღმასრულებელი დირექტორის, გოგიტა თოდრაძის განცხადებით, ინფლაციის მაჩვენებლის ფორმირებაში ყველაზე მეტად წვლილი სურსათისა და უალკოჰოლო სასმელების ჯგუფმა შეიტანა.

უკრაინის პრეზიდენტის მრჩევლის განცხადება, რომელმაც ქვეყანაში მიმდინარე პროცესებზე ისაუბრა, თბილისში პოლიტიკური შეფასებების თემაა. მმართველი გუნდი ქვეყნის შიდა საქმეებში ჩარევისა და არეულობის შემოტანის მცდელობაზე საუბრობს.

მათი განცხადებით, ეს არ არის პირველი შემთხვევა, როდესაც პოდოლიაკი საქართველოს ინტერესების საწინააღმდეგო განცხადებებს აკეთებს.

პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარე, გივი მიქანაძე ამბობს, რომ ეს არ არის პირველი შემთხვევა, როდესაც უკრაინის ხელისუფლების წარმომადგენლები ცდილობენ, ქვეყნის შიდა პროცესებში ჩაერიონ.

“პოდოლიაკის განცხადება არის მორიგი მცდელობა იმისა, რომ უკრაინის ხელისუფლების წარმომადგენლებმა გარკვეულწილად მოახდინონ ერთგვარი მცდელობა იმისა, რომ შიდა პროცესებში ჩაერიონ და რაღაცნაირად შეუწყონ ხელი, რომ ის მუხტი, რომელიც მილევად რეჟიმშია აქციებთან მიმართებით, რაღაცნაირად გაამყარონ. თავისი ამ განცხადებით, მათ კიდევ ერთხელ დაადასტურეს, რომ მათი მიზანია საქართველოში იყოს ის ხელისუფლება, რომელიც იქნებოდა მეორე ფრონტის გახსნის ინიციატორი და იმ პროცესებში ჩართული, რომლისკენაც უკრაინელმა მაღალჩინოსნებმა არაერთხელ მოგვიწოდეს. გვესმის, რომ მათ გეგმებში არ იყო “ქართული ოცნების” გამარჯვება, მაგრამ მათ მოუწევთ პატივი სცენ საქართველოს მოსახლეობის უდიდესი ნაწილის არჩევანს. ეს არის საქართველოს მოსახლეობს გადაწყვეტილება და ამ გადაწყვეტილების საფუძველზე, სწორედ მოსახლეობის მიერ ლეგიტიმაცია მიცემული ხელისუფლება გააგრძელებს ამ ქვეყნის აღმშენებლობას და უსაფრთხოების გაძლიერებას”, – განაცხადა გივი მიქანაძემ.

ცნობისთვის, მიხეილ პოდოლიაკმა თქვა, რომ საქართველოს მოქალაქეების უმრავლესობა არ არის დაინტერესებული იმ პოლიტიკით, რომელსაც “ქართული ოცნება” ატარებს.

აუცილებლად გაგრძელდება თანამშრომლობა ოპოზიციურ პარტიებსა და სალომე ზურაბიშვილს შორის. მასთან თანამშრომლობა გარდაუვალია, – ამის შესახებ „ნაციონალური მოძრაობის“ წევრმა, ირაკლი ფავლენიშვილმა განაცხადა.

ფავლენიშვილმა ასევე სამომავლო გეგმებზე ისაუბრა.

„ზურაბიშვილი საერთაშორისო პარტნიორების უდიდესი ნაწილისთვის გახლავთ ადამიანი, რომელსაც ესაუბრებიან, როგორც საქართველოს წარმომადგენელს. ამიტომაც გარდაუვალი გახლავთ ოპოზიციისთვის მასთან თანამშრომლობა და მასთან ერთად ყოფნა. მით უმეტეს, როცა დიქტატურა მყარდება ქვეყანაში, ყველა ძალა, რომელიც ებრძვის ამ დიქტატურას, ფაქტობრივად, ვალდებულიც ხდება, ითანამშრომლონ, მინიმალურ დონეზე მაინც კოორდინაცია ჰქონდეთ ერთმანეთთან. ეს უპრეცედენტო საპროტესტო ტალღის დაკვეთაც არის. ამიტომ აუცილებლად გაგრძელდება თანამშრომლობა ოპოზიციურ პარტიებსა და სალომე ზურაბიშვილს, პრეზიდენტს შორის. გეგმები გახლავთ ბრძოლა, რათა ეს რეჟიმი დასრულდეს, დაინიშნოს ახალი, თავისუფალი არჩევნები, მათ შორის პოლიტიკური პატიმრების გათავისუფლება არის პრიორიტეტული. თანამშრომლობას რაც შეეხება, მაგალითად, მნიშვნელოვანია საერთაშორისო აქტივიბები, რადგან კარგად გვესმის, რომ საქართველოს საკითხი არის ძალიან მნიშვნელოვანი ევროპის უსაფრთხოებისთვის. ამიტომ, ოპოზიციას ხშირად დასავლელ პარტნიორებთან კონსოლიდირებული პოზიციები აქვს და წერილებსაც ვაგზავნით, შეხვედრებსაც ვმართავთ. მათ შორის, ამ კონტექსტშიც შეიძლება, თანამშრომლობა გაგრძელდეს. ქვეყნის შიგნით ჩვენი კაპიტალი, რესურსი რაც გვაქვს, რითაც შეგვიძლია, დიდ ეროვნულ წინააღმდეგობას დავეხმაროთ, ამ მხრივაც ვაქტიურობთ, თუმცა დღეს ისეთი ვითარებაა, როდესაც მთავარი ორგანიზატორები არიან რიგითი მოქალაქეები. უბრალოდ, ჩვენი გამოცდილებიდან გამომდინარე, პოლიტიკურ პარტიებს აქვთ მეტი რესურსი, გარკვეულ აქტივობებში მივიღოთ მონაწილეობა, მათ შორის ვიყოთ რიგითი ორგანიზატორებიც. რა თქმა უნდა, ყველაზე მთავარი მაინც არის ის პოლიტიკური აქტივობები, რომლებსაც საერთაშორისო ფრონტსა და ქვეყნის შიგნით ვახორციელებთ, რათა მოხდეს ამ რეჟიმის დელეგიტიმაცია“, – განაცხადა ფავლენიშვილმა.

კითხვაზე, ხომ არ არის შესაძლებელი, რომ ოთხ ოპოზიციურ პარტიასა და სალომე ზურაბიშვილს შორის ალიანში შედგეს, ფავლენიშვილმა აღნიშნა:

„ჯერჯერობით ქვეყანაში პარტიული და პოლიტიკური პროცესი არის მკვდარი, რადგან ქვეყანაში დიქტატურა როდესაც მყარდება, საჯარო სამსახურებში წმენდაა დაწყებული, ოპოზიციური პოლიტიკური პარტიები, ფაქტობრივად, გადაკეტილია და არჩევნებს აზრი აღარ აქვს, ამ დროს რაიმე ალიანსსა და პოლიტიკურ ბლოკებზე საუბარი უბრალოდ არაადეკვატური იქნებოდა. ამიტომ ჯერ გვაქვს პროგრამა, მინიმუმი და უმნიშვნელოვანესი ამოცანა, რომ ამ რეჟიმის დემონტაჟი მოხდეს“.

ქართულ საზოგადოებას ძალიან კარგად ახსოვს, ვინ არის პოდოლიაკი და რა განცხადებებს აკეთებდა 2022 წლის განმავლობაში. მისი განცხადება ყოველთვის აღქმული იქნება, როგორც ჩვენი ქვეყნის, ქართველი ხალხის ინტერესების საწინააღმდეგო განცხადება, – ამის შესახებ პარლამენტის იურიდიულ საკითხთა კომიტეტის თავმჯდომარემ, არჩილ გორდულაძემ განაცხადა.

გორდულაძე გამოეხმაურა უკრაინის პრეზიდენტის ოფისის მრჩევლის, მიხაილ პოდოლიაკის განცხადებას, სადაც მან აღნიშნა: „საქართველოს მოქალაქეების აბსოლუტური უმრავლესობა ნამდვილად არაა დაინტერესებული პოლიტიკით, რომელსაც „ქართული ოცნება“ ატარებს“.

„მის განცხადებებში და, ზოგადად, უკრაინის ხელისუფლების ქმედებებში პირდაპირ იკითხებოდა ხოლმე არაკეთილსასურველი და არაკეთილსაიმედო ქმედებები ჩვენი ქვეყნის მიმართ. განსაკუთრებით ეს ეხებოდა მეორე ფრონტის გახსნის საკითხს. შესაბამისად, პოდოლიაკის განცხადებები აღქმულია და ყოველთვის აღქმული იქნება, როგორც ჩვენი ქვეყნის, ქართველი ხალხის ინტერესების საწინააღმდეგო განცხადება. მისი ნათქვამი ნებისმიერი სიტყვაც კი მხოლოდ ჩვენი ქვეყნის ინტერესების საწინააღმდეგოა. ჩვენ ხომ არ ვსაუბრობთ, რა გავლენები არსებობს უკრაინის ხელისუფლების შტოებში, რა გამოწვევები თუ დარღვევებია მათ ხელისუფლებაში. ჩვენ ვუფრთხილდებით უკრაინელ ერს. ომის ქარცეცხლიდან გამომდინარე, რაც ტრიალებს უკრაინაში, გარკვეული განცხადებების გაკეთებისგან თავს ვიკავებთ ხოლმე. ამის მიუხედავად, ეს ბატონები პირდაპირ ერევიან ჩვენი ქვეყნის შიდა საქმეებში. ამ დროს, როცა სცალიათ, საქართველოზე განცხადება გააკეთონ, სულ ორი ვარიანტია: ან არაჯეროვნად ასრულებენ დაკისრებულ მოვალეობებს და არ შეუძლიათ, იმუშაონ ისე, როგორც არის უკრაინელი ხალხის ინტერესებისთვის სასარგებლო, ან გარკვეული ძალების მხრიდან მითითებით პირდაპირ ცდილობენ, ჩვენს ქვეყანაში არეულობა შემოიტანონ. ეს არის ორი მოცემულობა, რომელზეც ქართულ საზოგადოებას შეუძლია, კარგად იმსჯელოს, რომელია ამ დაშვებიდან სიმართლე და, შემთხვევით, ორივე ხომ არ არის“, – განაცხადა არჩილ გორდულაძემ.

ჩინეთის პრეზიდენტი სი ძინპინი მიხეილ ყაველაშვილს საქართველოს პრეზიდენტის თანამდებობაზე მუშაობის დაწყებას ულოცავს. ინფორმაციას ჩინური მედია ავრცელებს.

„სი ძინპინმა აღნიშნა, რომ ჩინეთისა და საქართველოს დღევანდელი სტრატეგიული პარტნიორობა პოზიტიურ და მყარ დინამიკას ინარჩუნებს. ორივე მხარემ გააძლიერა პოლიტიკური ურთიერთნდობა, მიაღწია ნაყოფიერ შედეგებს „ერთი სარტყელი ერთი გზის“ თანამშრომლობის შექმნისას და საერთაშორისო დონეზე თანამშრომლობის ნაყოფიერ შედეგებს“, – აღნიშნულია ინფორმაციაში.

„მე დიდ მნიშვნელობას ვანიჭებ ჩინურ-ქართული ურთიერთობების განვითარებას და მზად ვარ ვიმუშაო პრეზიდენტთან [მიხეილ ყაველაშვილთან], რათა ქვეყნებს შორის არსებული ტრადიციული მეგობრობა, ურთიერთ სასარგებლო თანამშრომლობა გავაღრმაო, ხელი შევუწყო ჩინურ-ქართული ურთიერთობების განვითარებას და ადამიანების უკეთესი კეთილდღეობის შექმნას“, – აღნიშნული სი ძინპინის განცხადებაში.

ცნობისთვის, ჩინეთის ლიდერმა 31 დეკემბერს ყაველაშვილს ახალი წელი მიულოცა.