თბილისიდან მტკიცე ნებისყოფის და SOS ნიშანია, ოპოზიციური პარტიის ერთ-ერთმა ლიდერმა, ელენე ხოშტარიამ შიმშილობა დაიწყო, – ამის შესახებ ევროპარლამენტარმა, რასა იუკნევიჩიენემ სოციალურ ქსელში დაწერა.

მისი თქმით, საჭიროა სასწრაფოდ გადაწყვეტილებების მიღება.

„ჩვენთვის, ევროკავშირისთვის თბილისიდან მტკიცე ნებისყოფის და SOS ნიშანია. ოპოზიციური პარტიის ერთ-ერთმა ლიდერმა, ელენე ხოშტარიამ შიმშილობა დაიწყო. ივანიშვილის რეჟიმმა ოპოზიციის ლიდერების უმეტესობა უკვე დააპატიმრა. სასწრაფოდ საჭიროა გადაწყვეტილებების მიღება“, – დაწერა რასა იუკნევიჩიენემ.

„დროას“ ლიდერმა, ელენე ხოშტარიამ რუსთაველის გამზირზე შიმშილობა 27 ივნისს დაიწყო და განაცხადა, რომ მზად არის, „თავი შეწიროს რეჟიმს“.

„ლელო – ძლიერი საქართველოს” ლიდერი მამუკა ხაზარაძე რუსთავის მე-12 პენიტენციური დაწესებულებიდან წერილს ავრცელებს, რომელიც სოციალურ ქსელში მის პირად გვერდზე განთავსდა.

როგორც ხაზარაძე წერს, ქვეყნის სრული გათავისუფლებისთვისა და გაერთიანებისთვის ბრძოლა გრძელდება.

ამასთან, ხაზარაძის თქმით, ეს ქვეყანა თავისუფალი ხალხის ასაშენებელია და არა მშიშარების.

„წერილი შვილებს, არამარტო ჩემსას. ანას, ნიკას, ელენეს, სოფოს, იოანეს, ასეთ წერილს პირველად გწერთ ყველას – ჩემს ხუთივე შვილს.

მადლობით მინდა დავიწყო ასეთები რომ ხართ – მართლები, ლაღები და თავისუფლები, უბრალოები და არაფრით გამორჩეულები, გარდა თქვენი ინდივიდუალიზმისა.

ბევრი უსამართლობის და წინააღმდეგობის, ხშირ შემთხვევაში გადაულახავის დროსაც, ერთხელაც არ გითქვამთ, რომ ქვეყანა დაგვეტოვებინა, იცოდით რა, რომ ამის შესაძლებლობა სულ გვქონდა.

მადლობა, რომ არც თქვენ გაგჩენიათ სურვილი სხვა ქვეყანაში ცხოვრების იმიტომ, რომ ზუსტად იცით და გრძნობთ, რომ ამ ქვეყანას დიდი მომავალი აქვს. იცით და ამაყობთ ამ ქვეყნის ტრადიციით და ისტორიით. იცით და გრძნობთ, რომ თუ თქვენ არა, სხვა ვერავინ უშველის ამ მართლაც უნიკალურ საქართველოს. თავისუფლები ხართ და ამიტომ ვარ ამაში ასე დარწმუნებული. თავისუფალმა ადამიანებმა მოიტანეს ეს ქვეყანა დღემდე. თავისუფლებას ერთი განსაკუთრებული თვისება აქვს – რაც უფრო ვიწროვდება შენს გარშემო სივრცე, უფრო ძლიერდება ეს გრძნობა. დღეს, ამ ოთხ კედელში გამოკეტილი, ამას განსაკუთრებული ძალით ვგრძნობ.

ეს ქვეყანა თავისუფალი ხალხის ასაშენებელია და არა მშიშარების. მხოლოდ თავისუფალ ადამიანებს შეუძლიათ შექმნან რაიმე ღირებული, ინოვაცია, ბიზნესი თუ ხელოვნება. მშიშარა ადამიანზე საწყალი და უბედური არ არსებობს ქვეყანაზე არავინ. მადლობა ირინას თქვენი ასეთი აღზრდისთვის! მადლობა ყველა დედას თავისუფლებისმოყვარე შვილების აღზრდისთვის!

მიყვარხართ!

ბრძოლა გრძელდება ქვეყნის სრული გათავისუფლებისთვის და გაერთიანებისთვის. დიახ, რუსული რეჟიმის ჩამოშორება მხოლოდ ნაწილია დიდი მიზნის მისაღწევად, რასაც ქვეყნის გაერთიანება ჰქვია.

ბედნიერი ვარ, რომ ამ ბრძოლის ნაწილი ვარ, ჩემს ოჯახთან და თანამებრძოლებთან ერთად! მინდა, მოგიწოდოთ – კითხვა “გვეშველება რამე?” უნდა ამოვიღოთ სასაუბრო ლექსიკონიდან.

პასუხი არის ერთი – დიახ, გვეშველება! ამაყად და ხმამაღლა უნდა ვიძახოთ და ვიმეოროთ – ჩვენ გავიმარჯვებთ!

ერთად საქართველოსთვის!

ერთად თავისუფლებისთვის!” – წერს ხაზარაძე.

შრომითი კუთხით ჩვენ ვცდილობთ, რომ მიგრანტებთან დაკავშირებით იყოს სწორი საკანონმდებლო რეგულაციები, – განუცხადა ჟურნალისტებს პარლამენტში საპროცედურო საკითხთა და წესების კომიტეტის თავმჯდომარემ, დავით მათიკაშვილმა, რომელმაც „შრომითი მიგრაციის შესახებ“ კანონში განხორციელებულ ცვლილებებზე განმარტება გააკეთა.

„ჩვენ ვქმნით ისეთ პირობებს, რომ არალეგალი მიგრანტების თავშეყრის ადგილი არ იყოს საქართველოში და ამ მხრივ მოხდეს რეგულაციების გამკაცრება. ხდება კანონმდებლობის სრულყოფა, რომელიც მიგრაციასთან დაკავშირებულ პრობლემატიკას მოაგვარებს“, – აღნიშნა მათიკაშვილმა.

პარლამენტმა, მესამე მოსმენით, დაჩქარებული წესით, „შრომითი მიგრაციის შესახებ“ კანონში ცვლილება განიხილა და 84 ხმით მხარი დაუჭირა.

პარლამენტის ვიცე-სპიკერმა და „ხალხის ძალის“ თავმჯდომარე სოზარ სუბარმა, პრემიერ-მინისტრ ირაკლი კობახიძის პარლამენტში ყოველწლიური მოხსენებით გამოსვლისას, პრემიერს კითხვებით მიმართა.

სოზარ სუბარმა ისაუბრა მაგისტრალური პროექტების შესახებ, რომლებიც მნიშვნელოვანია საკმაოდ დიდი რეგიონის განვითარებისთვის.

„ბატონო პრემიერო, აქ შევეხები მაგისტრალურ გზებს, რომლებზეც უკვე ისაუბრეთ. რამდენიმე მაგისტრალური გზა გადის ქვეყანაში, აღმოსავლეთ-დასავლეთის დამაკავშირებელი. ესენია: ქვეშეთი-კობის გვირაბი, რომელიც მალე დასრულდება; თბილისიდან ბათუმთან დამაკავშირებელი გზა; დაწყებულია და იგება კახეთის გზა და სადახლოს და წითელი ხიდის მიმართულებითაც მალე უნდა დაიწყოს პროექტი. პარალელურად, არის ბევრი გზა, რომელთა გაკეთებაც ძალიან მნიშვნელოვანია ქვეყნის რეგიონების განვითარებისთვის. ერთ-ერთ ასეთი გზის პროექტზე მინდა გავამახვილო თქვენი ყურადღება, რომელიც გამზადებულია (იმ ეტაპზე იყო ყველაფერი მისული, რომ დონორების მოძიებაც უნდა დაწყებულიყო, მაგრამ პროექტი გაჩერდა პანდემიის გამო). ლაპარაკია წყალტუბო-ცაგერი-ლენტეხის გზასა და შემდეგ, ლენტეხი-მესტიის გვირაბზე. მესმის, რომ ძალიან ძვირი ჯდება ეს პროექტი, მაგრამ ძალიან მნიშვნელოვანია საკმაოდ დიდი რეგიონის განვითარებისთვის და საუკუნეების განმავლობაში მოემსახურება მოსახლეობას. იქნებ, ამ პროექტის განახლებაზე იფიქროთ და სამომავლო პრიორიტეტებში გაითვალისწინოთ“, – აღნიშნა სოზარ სუბარმა.

სოზარ სუბარის პასუხად პრემიერ-მინისტრმა განაცხადა, რომ მაგისტრალური პროექტების, კონკრეტულად კი, ლენტეხი-მესტიის დამაკავშირებელი გვირაბის მშენებლობასთან დაკავშირებით კომპლექსური მსჯელობაა საჭირო.

„რაც შეეხება ლენტეხი-მესტიის დამაკავშირებელ გვირაბს, საკმაოდ ძვირადღირებული პროექტია – მილიარდი ჯდება მისი განხორციელება. სწორედ ამიტომ, მაღალი ხარჯებიდან გამომდინარე, რთულია გადაწყვეტილების მიღება. ამ საკითხზე კომპლექსურად დაგვჭირდება მსჯელობა“, – აღნიშნა პრემიერმა ირაკლი კობახიძემ.

თუკი რაიმე იქნება გასათვალისწინებელი, ვდებთ პირობას ქართველი ხალხისა და ერთმანეთის წინაშე, რომ არცერთ შემთხვევაში უპირატესად არ გავითვალისწინებთ არავის, გარდა ქართველი ხალხისა, – განაცხადა პარლამენტის პლენარულ სხდომაზე საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ და პარტიის აღმასრულებელმა მდივანმა მამუკა მდინარაძემ პრემიერ-მინისტრ ირაკლი კობახიძის წლიური ანგარიშის წარდგენის შემდეგ.

მამუკა მდინარაძის თქმით, „ქართული ოცნების“ გუნდი წარმოადგენს ქართველ ხალხს, მხოლოდ და მხოლოდ ქართველ ხალხს და არავის სხვას.

„როდესაც ჩვენ ვსაუბრობთ წარსულის, მშობლების, ოჯახების პატივისცემაზე, წლების განმავლობაში ათეულობით მილიონი დოლარით თუ ევროთი ფინანსდებოდა ამის საწინააღმდეგო არაერთი კამპანია, ამიტომაც ჩვენ უნდა ვთქვათ, რომ წარსულის პატივისცემაზე დაფუძნებული ზრუნვა მომავალზე არის იმის გარანტი, რომ მომავალმა თაობებმაც პატივი სცენ საკუთარ წარსულს და ღირსეული მომავალი უზრუნველყონ.

თუ ჩვენ არ ვცემთ ჩვენს მშობლებს, ჩვენს ბებიებსა და ბაბუებს, ჩვენს წარსულს, ჩვენს ტრადიციებს პატივს, ვერ უზრუნველყოფთ ჩვენი შვილებისა და ჩვენი მომავალი თაობების ღირსეულ მომავალს და ეს შვილებიც სხვანაირად, სწორად ამ ღირებულებებზე ვერ გაიზრდებიან.

და როდესაც კითხვა ისმის, პრემიერ-მინისტრი წარმოადგენს კონკრეტულ ქართულ, ეროვნულ ინტერესებზე ორიენტირებულ ხედვებს და დეტალებში ჩადის აბსოლუტური გონიერებით და სიზუსტით, ამ დროს ვის წარმოადგენთ თქვენ, ჩვენ წარმოვადგენთ ქართველ ხალხს, მხოლოდ და მხოლოდ ქართველ ხალხს და არცერთი ჩვენგანი არავის სხვას.

და თუკი რაიმე იქნება გასათვალისწინებელი, ვდებთ პირობას ქართველი ხალხისა და ერთმანეთის წინაშე, რომ არცერთ შემთხვევაში უპირატესად არ გავითვალისწინებთ არავის, გარდა ქართველი ხალხისა.

და ვინ არის ეს გუნდი და ვინ ვართ ჩვენ. ვინ არის ჯერ „ქართული ოცნება“, „ქართული ოცნება“ არის აი ეს გუნდი, 41 ათასზე მეტი წევრი ამ გუნდისა ბიძინა ივანიშვილის და ირაკლი კობახიძის ხელმძღვანელობით, რომლებმაც 2011 წლიდან მოყოლებული დღემდე უღალატოდ მოაღწიეს და ასე თამამად შეუძლიათ ლაპარაკი.

და რა არის ჩვენი „ქართული ოცნება“. როდესაც ირაკლი კობახიძის იმ სიტყვებს უსმენთ, რომელიც ორიენტირებულია დემოგრაფიაზე, კორუფციის აღმოფხვრაზე და ა.შ. ეროვნულ საკითხებზე, რა პრიორიტეტები გვაქვს. ამ კითხვაზე პასუხამდე რომ მივიდე, რამდენიმე საკითხს ძალიან მოკლედ შევეხები და შემდეგ ძალიან კონკრეტულ პასუხს გავცემ ჩემივე დასმულ ამ კითხვას“, – აღნიშნა მამუკა მდინარაძემ.

ყველა ის საქმე, რომელიც დღეს წარმოვადგინეთ თქვენს წინაშე, ეფუძნება სწორედ იმ ნდობას, რომელიც საქართველოს პარლამენტმა გამოუცხადა საქართველოს მთავრობას, – ამის შესახებ საქართველოს პრემიერ-მინისტრმა ირაკლი კობახიძემ პარლამენტში დასკვნითი სიტყვით გამოსვლისას განაცხადა.

მთავრობს მეთაურმა დეპუტატებს მადლობა გადაუხადა ნდობისთვის, რომელიც მათ მთავრობას ჯერ წელიწად-ნახევრის წინ, გასული წლის თებერვალში და შემდეგ ნახევარი წლის წინ, საპარლამენტო არჩევნების შემდეგ გამოუცხადეს. 

„მადლობას გიხდით იმისთვის, რომ ჩვენ ყველა ერთად ვაკეთებთ საერთო საქმეს – ეს არის ჩვენი ქვეყნის ეროვნული ინტერესების დაცვა და სწორედ ამ გუნდის ერთიანობამ, ერთად დგომამ, საერთო გადაწყვეტილებებმა განაპირობა ის, რომ დღეს ჩვენი ქვეყანა ამაყობს თავისი დამოუკიდებლობით, სუვერენიტეტით, დღეს ჩვენი ქვეყანა არის დამოუკიდებელი და სუვერენული, როგორც არასდროს. რა თქმა უნდა, ჩვენი სურვილია, ყველამ ერთად განვაგრძოთ ზრუნვა ჩვენი ქვეყნის წინსვლასა და განვითარებაზე. წინ კიდევ ძალიან დიდი ამოცანები გვაქვს დასახული და ჩვენი ერთიანობით აუცილებლად ყველა მიზანს მივაღწევთ. კიდევ ერთხელ უდიდესი მადლობა ნდობისთვის, მხარდაჭერისთვის და დღევანდელი დღისთვის, თქვენი ყურადღებისთვის!” – განაცხადა ირაკლი კობახიძემ.