ჩვენ ვართ ევროპული ერი. ჩვენი ისტორია, ჩვენი კულტურა, ჩვენი იდენტობა ყოველმხრივ ევროპულია, მაგრამ ევროპულმა ბიუროკრატიამ უნდა აღიაროს ჩვენი უფლება სუვერენიტეტზე და დემოკრატიაზე, – ამის შესახებ საქართველოს პრემიერ-მინისტრმა ირაკლი კობახიძემ კონსერვატიული პოლიტიკური მოქმედების კონფერენციაზე სიტყვით გამოსვლისას განაცხადა.

მთავრობის მეთაურის თქმით, იყო პროევროპული, არ ნიშნავს იყო ანტიქართული.

„დღეს დასავლეთი დგას გზაჯვარედინზე, არა მხოლოდ პოლიტიკური, არამედ ცივილიზაციური დასავლეთიც, რომელიც ეფუძნება ქრისტიანულ და დემოკრატიულ ღირებულებებს. ჩვენ აქ იმისათვის შევიკრიბეთ, რომ დავიცვათ ჩვენი იდენტობა და ღვთისგან მონიჭებული უფლება ვიყოთ ის, ვინც ვართ. ჩვენ არ ვკამათობთ დასავლეთთან, რადგან თავად ვართ დასავლეთის ნაწილი — ჭეშმარიტი დასავლეთის, თავისუფლების, რწმენისა და ოჯახური ღირებულებების დასავლეთის და არა იმ Deep State-ის, რომელიც ცდილობს, მსოფლიო არაფრად აქციოს და თავი ყველაფრის მმართველად ჩათვალოს. ჭეშმარიტი, ღირებულებებზე დაფუძნებული დასავლეთი, ჩვენი დასავლეთი, ჯერ კიდევ ცოცხალია. ის ცოცხალია ისეთ ქვეყნებში, როგორიცაა უნგრეთი და ის ცოცხალია მილიონობით ადამიანის გულში მთელს ევროპაში და მის მიღმაც, ყველას გულში ვინც დაიღალა იმის მოსმენით, რომ საკუთარი სამშობლოს სიყვარული დანაშაულია.
ჩვენ ვართ ევროპული ერი. ჩვენი ისტორია, ჩვენი კულტურა, ჩვენი იდენტობა ყოველმხრივ ევროპულია, მაგრამ ევროპულმა ბიუროკრატიამ უნდა აღიაროს ჩვენი უფლება სუვერენიტეტზე და დემოკრატიაზე. იყო პროევროპული, არ ნიშნავს იყო ანტიქართული. ჩვენ გვწამს ერებისგან შემდგარი ევროპის, თავისი ძლიერი იდენტობით და სიამაყით ვდგავართ მათ გვერდით, უნგრეთში და მის მიღმაც, ვინც ჯერ კიდევ მიიჩნევს, რომ პატრიოტიზმი არის ღირსება და არა ცოდვა“, – განაცხადა პრემიერ-მინისტრმა.

საქართველოს გმირი, საერთაშორისო პატრიოტი, ადამიანი, რომელმაც მოიგო არჩევნები არის ირაკლი კობახიძე, – განაცხადა უნგრეთის პრემიერ-მინისტრმა ვიქტორ ორბანმა კონსერვატიული პოლიტიკური მოქმედების კონფერენციაზე სიტყვით გამოსვლისას.

ვიქტორ ორბანის შეფასებით, ირაკლი კობახიძე ლიბერალური მოძრაობების წინააღმდეგ წავიდა, დაამარცხა ყველა და უმსხვილესი ეკონომიკური ზრდის მომტანია ქვეყანაში.

„ძვირფასო მეგობრებო, 20% ამ ქვეყნისა არის რუსული დათვის მიერ წაღებული, მაგრამ მან ბრიუსელს არ დაუხარა თავი, გახდა ახალი დიდი ბრიტანეთი და გახდა ძლიერი, წარმატებული ლიდერი თავის ქვეყანაში“, – აღნიშნა უნგრეთის პრემიერ-მინისტრმა.

გთხოვთ, საქართველოში გამგზავრებამდე გაითვალისწინოთ, არსებობს თუ არა თქვენს კონკრეტულ შემთხვევაში ფაქტორები, რომლებიც შესვლაზე უარის თქმის რისკს ზრდის, – ამის შესახებ მოქალაქეებისადმი მიმართვას საქართველოში პოლონეთის საელჩო ავრცელებს.

ამასთან, საელჩო მათ აფრთხილებს ჯარიმების თაობაზე, რომელიც, შესაძლოა, დემონსტრაციებში მონაწილეობისთვის უცხოელებს დაეკისროთ.

„საქართველოში შესვლაზე უცხოელებისთვის, მათ შორის ევროკავშირის წევრი ქვეყნების მოქალაქეებისთვის უარის თქმის მრავალი შემთხვევის გამო, გთხოვთ, საქართველოში გამგზავრებამდე გაითვალისწინოთ, არსებობს თუ არა თქვენს კონკრეტულ შემთხვევაში ფაქტორები, რომლებიც ზრდის შესვლაზე უარის თქმის რისკს: ეს შეიძლება მოიცავდეს დემონსტრაციებში მონაწილეობას ან მათ სიახლოვეს ყოფნას, ასევე სოციალურ ქსელებში გარკვეულ აქტივობას. შეგახსენებთ, რომ საქართველოს ხელისუფლებას აქვს სუვერენული უფლება შეაფასოს უცხოელის შესვლის რისკ-ფაქტორები და ასევე, შესვლაზე უარის თქმის გადაწყვეტილება შეიძლება საქართველოში ბინადრობის ნებართვის მფლობელებზეც გავრცელდეს. ასევე გვსურს აღვნიშნოთ, რომ დემონსტრაციებში მონაწილეობისთვის, თუნდაც სავარაუდო მონაწილეობისთვის, უცხოელებს შეიძლება მძიმე ჯარიმები დაუწესდეთ, ხოლო საქართველოში ხელახლა შესვლა შეიძლება დაუყოვნებლივ გადახდას მოიცავდეს“, – ნათქვამია განცხადებაში.

სამართლის უზენაესობის გარეშე ვერავითარი წესებზე დაფუძნებული მსოფლიო წესრიგი ვერ იარსებებს, სამართლის უზენაესობას კი თანამედროვე სამყაროში უმძიმესი კრიზისული პერიოდი უდგას, – წერს ფილოსოფოსი ზაზა შათირიშვილი.

მისი განცხადებით, ერთ-ერთი ინსტიტუტი, რომლის პასუხისმგებლობაა საერთაშორისო დონეზე სამართლის უზენაესობის დაცვა, ინტერპოლია, თუმცა, გიორგი ბაჩიაშვილის შემთხვევამ დაადასტურა, რომ ინტერპოლი აშკარად მოკლებულია შესაძლებლობას, „დიპ სტეიტის“ აგენტების მიმართ დამოუკიდებელი და ობიექტური გადაწყვეტილებები მიიღოს.

„პოლიტიკოსები და პოლიტოლოგები ხშირად საუბრობენ „წესებზე დაფუძნებულ მსოფლიო წესრიგზე“, რაცწლიდან წლამდე სულ უფრო კარგავს აქტუალობას. სამართლის უზენაესობის გარეშე ვერავითარი წესებზე დაფუძნებული მსოფლიო წესრიგი ვერ იარსებებს, სამართლის უზენაესობას კი თანამედროვე სამყაროში უმძიმესი კრიზისული პერიოდი უდგას. სამწუხაროდ, თითზე ჩამოსათვლელიც კი აღარ დარჩა ინსტიტუტები, რომლებიც საერთაშორისო დონეზე სამართლის უზენაესობას განუხრელად დაიცავენ.

ერთ-ერთი ინსტიტუტი, რომლის პასუხისმგებლობა სწორედ საერთაშორისო დონეზე სამართლის უზენაესობის დაცვაა, ინტერპოლი გახლავთ. თუმცა, ბაჩიაშვილის შემთხვევამ დაადასტურა, რომ პოლიტიკური ინტერესების გავლენით კომპრომისების დაშვება ინტერპოლსაც უწევს. კერძოდ, ინტერპოლი აშკარად მოკლებულია შესაძლებლობას „დიპ სტეიტის“ აგენტების მიმართ დამოუკიდებელი და ობიექტური გადაწყვეტილებები მიიღოს.

ასე მოხდა გიორგი ბაჩიაშვილის შემთხვევაშიც, როდესაც ინტერპოლმა საქართველოს ხელისუფლებას სრულიად უსაფუძვლოდ უთხრა უარი მის მიმართ წითელი ცირკულარით ძებნის გამოცხადებაზე. ბაჩიაშვილის შემთხვევას წინ უსწრებდა „დიპ სტეიტის“ მიერ სხვა უცხოელი აგენტების მფარველობა ინტერპოლის გამოყენებით. კერძოდ, ინტერპოლს 2014 წელს უარი ათქმევინეს მიხეილ სააკაშვილზე საერთაშორისო ძებნის გამოცხადებაზე, ხოლო 2015 წელს ჯერ დავით კეზერაშვილს, შემდეგ კი ზურაბ ადეიშვილს გაუუქმეს გამოცხადებული ძებნა.

დავიტოვოთ იმედი, რომ ამერიკაში ტრამპი „დიპ სტეიტის“ შესუსტებას შეძლებს, რაც პოლიტიკური წნეხისგან განთავისუფლებაში ინტერპოლსაც დაეხმარება.” – წერს ზაზა შათირიშვილი.

პრემიერ-მინისტრი ირაკლი კობახიძე დღეს, ბუდაპეშტში კონსერვატიული პოლიტიკური მოქმედების კონფერენციაში მიიღებს მონაწილეობას.

ღონისძიებას უნგრეთის პრემიერ-მინისტრი ვიქტორ ორბანი გახსნის. კონსერვატიული პოლიტიკური მოქმედების რიგით მეოთხე კონფერენციაზე, დღეს დაგეგმილია საქართველოს მთავრობის მეთაურის სიტყვით გამოსვლა.

საქართველოს მთავრობის ადმინისტრაციის უფროსის, ლევან ჟორჟოლიანის განცხადებით, ირაკლი კობახიძე გამოსვლისას შეეხება იმ პრობლემატიკას, რომელიც ეხება ღირებულებების აღრევას თანამედროვე სამყაროში.

„ბუდაპეშტი მასპინძლობს კონსერვატიულ პოლიტიკურ მოქმედებათა კონფერენციას, სადაც იკრიბებიან მსოფლიო ლიდერები, პოლიტიკური პარტიის წარმომადგენლები, რომლებსაც აერთიანებს კონსერვატიული ღირებულებები. ძალიან მნიშვნელოვანია, რომ ამ კონფერენციას ჩვენი ქვეყნის მეგობართან, უნგრეთის პრემიერ-მინისტრ ვიქტორ ორბანთან ერთად გახსნის და მისასალმებელი სიტყვით გამოვა საქართველოს პრემიერ-მინისტრი. საქართველოს პრემიერ-მინისტრი შეეხება იმ პრობლემატიკას, რომელიც ეხება ღირებულებების აღრევას თანამედროვე სამყაროში, დასავლურ ცივილიზაციაში, ორმაგ სტანდარტებს. ასევე ვისაუბრებთ იმაზე, თუ როგორ ვუცავთ ქართველები, ქართული საზოგადოება, ქართული სახელმწიფო მთავრობასთან ერთად იმ ღირებულებებს, რომლებიც მრავალი საუკუნეა, ჩვენი განუყოფელი ნაწილია”, – განაცხადა ლევან ჟორჟოლიანმა.

უნგრეთში პრემიერ-მინისტრი დელეგაციასთან ერთად იმყოფება, რომლის შემადგენლობაშიც არიან საგარეო საქმეთა მინისტრი მაკა ბოჭორიშვილი და მთავრობის ადმინისტრაციის უფროსი ლევან ჟორჟოლიანი.

კონსერვატიული პოლიტიკური მოქმედების კონფერენცია ორდღიანია და ის უნგრეთის დედაქალაქ ბუდაპეშტში 29-30 მაისს გაიმართება.

საქართველოს მოქმედ ხელისუფლებას ბევრჯერ აქვს დამტკიცებული თავისი პარტნიორობა ამერიკის შეერთებული შტატების მიმართ. მე ვახსენე ავღანეთის მისია. მათ შორის, როდესაც ნატოს ჯარი გამოვიდა ავღანეთიდან, საქართველოს მარშრუტი დავუთმეთ მათ ამისთვის და ლოჯისტიკურად უზრუნველვყავით, რომ უფრო სწრაფ ვადებში გამოსულიყვნენ. არის ბევრი სხვა, მათ შორის დღემდე მიმდინარე თანამშრომლობები სხვადასხვა უწყებებს შორის, – განაცხადა შალვა პაპუაშვილმა გადაცემაში „იმედი LIVE“.

პარლამენტის თავმჯდომარის თქმით, საუბრები იმ ნაბიჯებზე, რომლებიც თბილისმა ვაშინგტონთან ურთიერთობების გასაუმჯობესებლად უნდა გადადგას მანტრასავით ისმის, თუმცა კონკრეტიკა არცერთ შეხვედრაზე არ ჟღერდება.

პაპუაშვილმა კიდევ ერთხელ შეაფასა პრეზიდენტ ტრამპის მილოცვა და მეორე დღეს აშშ-ის საელჩოს მიერ გავრცელებული განცხადება.

„გუშინდელმა მილოცვამ პრეზიდენტ ტრამპის მხრიდან აჩვენა – არის სურვილი, რომ გონივრული მიდგომა იყოს საქართველოსა და ქართველი ხალხის მიმართ. სამწუხაროა, რომ რაღაცნაირად ასეთი არაკორექტული გზავნილებით ხდება შემდეგ დაჩრდილვა იმ პოზიტიური მოლოდინებისა, რომლებიც ზოგადად გვაქვს.

ხომ შეუძლებელია რაღაც ტექნიკური ხასიათის შეუთავსებლობები იყოს. აქ ჩანს, რომ ერთგან ერთი დინება, მეორეგან მეორე დინებაა. მათ შორის, ჩვენც საჯარო თუ არასაჯარო წყაროებიდან ვხედავთ და გვაქვს ინფორმაცია, რომ ეს არის რთული პროცესი იმ არაფორმალური გავლენების წინააღმდეგ ბრძოლისა, რომელიც დაისახა პრეზიდენტმა ტრამპმა. ჩვენ ერთ რამ ვიცით, და ეს უკვე დადასტურდა, მათ შორის ამ მილოცვით და შემდეგ გამოლოცვით, თუ რამდენად სუსტდება დიფ სთეითი ამერიკაში

ზოგიერთი ელჩი ცდილობს იდიოტებად გამოიყვანოს ქართველი ხალხი და ამერიკის პრეზიდენტი მათ შორის, როდესაც მხრებს იჩეჩავენ და დიფ სთეითს ეძებენ მაგიდის ქვეშ და ჭიქაში. მაგრამ საბოლოო ჯამში პირიქით გამოსდით ხოლმე – საკუთარ თავს მიემართება ხოლმე შემდეგ ეს თავის დაშტერება.

პირველი ამოცანა, რაც პრეზიდენტმა ტრამპმა დაისახა არის დიფ სთეითის დამარცხება. ერთ-ერთ ელჩს თუ დავუჯერებთ, რომელიც საქართველოში რეზიდირებს, გამოდის რომ ტრამპი ქარის წისქვილებს ებრძვის, მაგრამ ასე არ არის“, – განაცხადა პაპუაშვილმა.

აშშ-ის საელჩო საქართველოში „ქართულ ოცნებასთან“ კომუნიკაციის შესახებ განცხადებას ავრცელებს. მასში აღნიშნულია, რომ პარტიის საპატიო თავმჯდომარემ ბიძინა ივანიშვილმა ელჩ დანიგანთან შეხვედრაზე უარი თქვა. „ქართული ოცნების“ საპატიო თავმჯდომარის მიერ გავრცელებულ საპასუხო განცხადებაში ბიძინა ივანიშვილი აღნიშნავს, რომ პირადი შანტაჟის ფონზე ელჩთან შეხვედრა და სახელმწიფო საქმეებზე საუბარი არასწორად მიაჩნია.