არის მცდელობა, მოაწყონ არჩევნების საბოტაჟი, მნიშვნელოვანია, ხვალ ჩვენმა მოქალაქეებმა ამას შესაბამისი პასუხი გასცენ, – ამის შესახებ საქართველოს პარლამენტის თავმჯდომარე შალვა პაპუაშვილმა ბრიფინგზე განაცხადა.

პაპუაშვილის თქმით, არის მცდელობა, წაართვან საარჩევნო უფლება მოქალაქეებს და არჩევნების საბოტაჟით მოახდინონ გავლენა მოქალაქეების მონაწილეობაზე.

„ხვალ იმართება ადგილობრივი თვითმმართველობის არჩევნები. როგორც იცით, საქართველოს მოქალაქეები აირჩევენ 64 მუნიციპალიტეტის მერს, საკრებულოების 2 000-ზე მეტ წევრს. ხვალინდელი არჩევნებისთვის უკვე დარეგისტრირებულია 28 საერთაშორისო და სადამკვირვებლო ორგანიზაცია, 27 ადგილობრივი სადამკვირვებლო ორგანიზაცია, 73 მედია არის აკრედიტებული არჩევნებზე დაკვირვებისა და გაშუქების მიზნით. ჯამში, 2 500-ზე მეტი დამკვირვებელი მედიაწარმომადგენელი იქნება, ვისაც ექნება შესაძლებლობა, დააკვირდეს და გააშუქოს ხვალინდელი არჩევნები. იცით, რომ 12 პარტია იღებს მონაწილეობას ადგილობრივი თვითმმართველობის არჩევნებში. კანდიდატების რაოდენობაც არის დიდი, მათ შორის დედაქალაქში ცხრა მერობის კანდიდატი არის წარმოდგენილი“, – აღნიშნა პაპუაშვილმა.

მისივე თქმით, წინასაარჩევნო გარემომ მეტწილად მშვიდ ვითარებაში ჩაიარა.

„ყველას გვქონდა შესაძლებლობა, რომ ეწარმოებინა საარჩევნო კამპანია, ჰქონოდა კომუნიკაცია მოქალაქეებთან და გაეცნოთ საკუთარი გეგმები. ნახეთ, რომ ტრადიციულად ოპოზიციამ არ ისარგებლა იმ შესაძლებლობით, რომ რეგიონში ჰქონოდა აქტიური კომუნიკაცია მოქალაქეებთან. „ქართულ ოცნებას“ ყოველდღიური კომუნიკაცია ჰქონდა ადგილზე – სოფელ-სოფელ, ყველა უბანში, ყველა ოჯახში. ჩვენი კანდიდატები, ჩვენი პარტიის წარმომადგენლები ეკონტაქტებოდნენ ჩვენს მოქალაქეებს, რათა გაეცნოთ ჩვენი გეგმები, მოესმინათ მოქალაქეების მოსაზრებები. ჩვენი საერთო დაკვირვებაა, მათ შორის ადგილზე ჩვენი პარტიის წარმომადგენლების მხრიდან, რომ ოპოზიცია პასიური იყო რეგიონებში, თბილისში მეტნაკლებად ვხედავთ აქტივობას, თუმცა, ისევე როგორც შარშან, ამჯობინეს სტუდიებიდან საარჩევნო კამპანიის წარმოება და არა უშუალოდ მოქალაქეებთან შეხვედრა. ამასთან, ჩვენ ვნახეთ და ვხედავთ, რომ არის მცდელობა კიდევ ერთხელ, რომ საბოტაჟი არჩევნების მოაწყონ. ამ მხრივ, განსაკუთრებული მდგომარეობაა ამ შემთხვევაში, ვინაიდან ვნახეთ, რომ პირდაპირ გამოცხადებულია არჩევნების საბოტაჟი არა მხოლოდ მასში მონაწილეობაზე უარის თქმით, რაც განაცხადა ორმა ბარიერგადალახულმა პარტიამ, არამედ არჩევნების პარალელურად, ძალადობრივი აქციის დაანონსებით და არჩევნების ჩაშლის მუქარით.

ვნახეთ, რომ პარტიების კოორდინირებული მოქმედება არასამთავრობო ორგანიზაციების წარმომადგენლებთან, მედიის ზოგიერთ წამომადგენელთან, რომლის მცდელობაც არის, წაართვან საარჩევნო უფლება მოქალაქეებს და არჩევნების საბოტაჟით მოახდინონ გავლენა მოქალაქეების მონაწილეობაზე. მათ შორის ვხედავდით პარადოქსულ განცხადებებს, როდესაც საუბარია დამხობაზე და ცდილობენ, წინასიტყვა – მშვიდობიანის დამატებით რაღაცნაირად კანონთან თითქოს შესაბამისობაში მოიყვანონ, რაც არის სრული აბსურდი. აქვე მივუთითებ, რომ ამაზე მათ შორის სტრასბურგის სასამართლოს პრაქტიკაც არსებობს ერთ-ერთ საქმეში, რომელიც თურქეთს ეხებოდა, სადაც ერთ-ერთი ორგანიზაცია საუბრობდა ლეგიტიმურ ჯიჰადზე, ლეგიტიმურ ძალადობაზე და ზუსტად წინსართი – ლეგიტიმურის დამატებით ცდილობდა თითქოს ამისთვის მიეცა ისეთი ფორმა, რომელიც შესაძლოა, დაცული ყოფილიყო სიტყვის გამოხატვის უფლებით. სტრასბურგის სასამართლოს მიღებული აქვს ამაზე გადაწყვეტილება. ასე რომ, ამ ტერმინოლოგიის გამომგონებლები მინდა, დავარწმუნო, რომ ისინი ვერანაირად ვერ გაექცევიან პასუხისმგებლობას ამ ტერმინოლოგიასთან დაკავშირებით. ნათქვამი სიტყვა უკვე არის, ვერაფერს შეცვლიან. საუბრობენ დამხობაზე, საუბრობენ 4-ში დაწყებასა და დასრულებაზე. ამ შემთხვევაში, „ლელოს“ ვგულისხმობ, რომელსაც სურს, რომ ორივე ფლანგზე ითამაშოს, საუბრობს არჩევნებზე დილით და საღამოს დამხობაში მონაწილეობაზე. ჩვენ ვიხილეთ პირდაპირი საბოტაჟი არჩევნებისა, რომ მომხდარიყო არჩევნების საბოტაჟი. მნიშვნელოვანია, რომ ხვალ ჩვენმა მოქალაქეებმა შესაბამისი პასუხი გასცენ ყველა ამ წამოწყებას“, – განაცხადა შალვა პაპუაშვილმა.

ხმას თუ „ოცნებას“ მისცემთ, ხმას აძლევთ მის მიერ ხელოვნურად შექმნილ დაპირისპირებასა და ქაოსს, ჩვენ გვჭირდება სიმშვიდისა და სამართლიანი წესრიგის დაბრუნება, – ამის შესახებ „გახარია საქართველოსთვის“ ერთ-ერთმა ლიდერმა,  ბერდია სიჭინავამ განაცხადა.

მისი თქმით, არჩევნებზე არ მისვლა იქნება დაკარგული შანსი, რასაც უკან ვეღარ დავაბრუნებთ.

„ხვალ 4 ოქტომბერია, არჩევნების დღე. არჩევნებში მონაწილეობა არის ჩვენი, საქართველოს მოქალაქეების კონსტიტუციური უფლება და ამავდროულად, ვალდებულება, პასუხისმგებლობა, რაც ერთმანეთის და ჩვენი ქვეყნის საერთო მომავლის წინაშე გვაკისრია. არჩევნებზე არ მისვლა და შენი ხმის არ გამოყენება ნიშნავს, რომ შენი ხმა აჩუქე მოძალადე, მოღალატე, მატყუარა, ხალხის ფულის ქურდ „ოცნებას“, რასაც ისევ შენივე წინააღმდეგ გამოიყენებს.

ამიტომ, ყველანი უნდა მივიდეთ არჩევნებზე და ხმა მივცეთ: ოკუპანტებისთვის მოხდილი ბოდიშის წინააღმდეგ; ეროვნული ინტერესების მოღალატე „ოცნების“ წინააღმდეგ; ახალგაზრდებზე, ქალებზე მოძალადე – „ოცნების“ მჩაგვრელი რეჟიმის წინააღმდეგ; უდანაშაულო ადამიანების ციხეში გამოკეტვის წინააღმდეგ; ხალხის ფულის ქურდი „ოცნების“ წინააღმდეგ; ქვეყნიდან ახალგაზრდების გაქცევის წინააღმდეგ; „ოცნების“ მფარველობის ქვეშ მყოფი კრიმინალის და ნარკომანიის წინააღმდეგ; ქართველების ერთმანეთთან ხელოვნური დაპირისპირების და შექმნილი ქაოსის წინააღმდეგ; საქართველოს ევროპული მომავლის შეჩერების წინააღმდეგ.

„ოცნების“ წინააღმდეგ თითოეული არ მიცემული ხმა, არის „ოცნების“ გამარჯვება. ამიტომ, პოლიტიკური გემოვნების მიუხედავად, მოგმართავთ ოპოზიციურად განწყობილ მოქალაქეებს, არჩევნებზე არ მისვლა იქნება დაკარგული შანსი, რასაც უკან ვეღარ დავაბრუნებთ.

ასევე მინდა, მივმართო ჯერ კიდევ „ოცნების“ მხარდამჭერებს, თუ თქვენ ხმას მისცემთ „ოცნებას“, თქვენ ხმას აძლევთ „ოცნების“ მიერ ხელოვნურად შექმნილ შუღლს, დაპირისპირებასა და ქაოსს.

ჩვენ გვჭირდება სიმშვიდისა და სამართლიანი წესრიგის დაბრუნება ჩვენს ქვეყანაში, ჩვენს ქალაქებში, ქუჩებსა და ოჯახებში.

ბოლოს, მინდა, გავიმეორო უდიდესი ქართველის, ილიას ჭავჭავაძის სიტყვები: „ვისაც ხელი მიგიწვდებათ, ყველანი უნდა მიხვიდეთ არჩევანზე და თქვენი მოქალაქური, კაცად კაცური მოვალეობა გადაუხადოთ თქვენს მშობელს ქალაქსა“, – განაცხადა სიჭინავამ. 

მინდა, ყველას მოვუწოდო, თბილისელებს, ძალიან დიდი მნიშვნელობა აქვს, თბილისი არ გავატანოთ „ქართულ ოცნებას“ და კახა კალაძეს, არჩევნებზე არმისვლა ნიშნავს, რომ თქვენს ხმას ნებაყოფლობით ჩუქნით „ქართულ ოცნებას“, რომელმაც ეს ქვეყანა ძალიან მძიმე მდგომარეობაში შეიყვანა, – ამის შესახებ პარტია „ლელო – ძლიერი საქართველოს“ ლიდერმა, მამუკა ხაზარაძემ გნაცხადა.

მისი თქმით, პროტესტი და არჩევნები ერთმანეთს ხელს არ უშლის.

„ამოცანა არის იმ საარჩევნო კამპანიის ბოლომდე მიყვანაა, რომელიც ჩვენმა მაჟორიტარებმა და საერთო კანდიდატმა, ირაკლი კუპრაძემ თბილისში და არამარტო თბილისში ჩაატარა. კარდაკარი წარმატებულად ჩატარდა. თქვენ იცით, რომ გარემო არის ძალიან დაძაბული, მაგრამ მინდა, ყველას მოვუწოდო, თბილისელებს, ძალიან დიდი მნიშვნელობა აქვს, თბილისი არ გავატანოთ „ქართულ ოცნებას“ და კახა კალაძეს. არჩევნებზე არმისვლა ნიშნავს, რომ თქვენს ხმას ნებაყოფლობით ჩუქნით „ქართულ ოცნებას“, რომელმაც ეს ქვეყანა ძალიან მძიმე მდგომარეობაში შეიყვანა. პროტესტი და არჩევნები ერთმანეთს ხელს არ უშლის. ჩემი თხოვნაა, მობრძანდით არჩევნებზე და ხმა დაუჭირეთ საერთო კანდიდატს, ირაკლი კუპრაძეს და ჩვენს მაჟორიტარებს, რომ „ქართულ ოცნებას“ საქართველო ყველა მუნიციპალიტეტი ხელში არ ჩავუგდოთ. ეს არის ძალიან მნიშვნელოვანი, ყველა ბრძოლის მეთოდი გამოყენებული უნდა იყოს“,- განაცხადა მამუკა ხაზარაძემ.

არავის ვურჩევთ, გარისკოს და დაუპირისპირდეს სახელმწიფო სისტემას და კანონს, რომლისგანაც ყველა სამართალდამრღვევი უმკაცრეს პასუხს მიიღებს, – ამის შესახებ საქართველოს პრემიერ-მინისტრმა, ირაკლი კობახიძემ მთავრობის ადმინისტრაციაში დღეს გამართულ ბრიფინგზე განაცხადა.

კობახიძის თქმით, საქართველო განაგრძობს მშვიდობიან და სტაბილურ განვითარებას, რაზეც საქართველოს მთავრობა და მისი თითოეული უწყება სრულ პასუხისმგებლობას იღებს.

ამასთან, ირაკლი კობახიძემ მოუწოდა ყველა პოლიტიკურ პარტიას და სხვა გაერთიანებას, გაემიჯნონ შეკრებას, რომლის მიზანიც საქართველოს კონსტიტუციური წყობილების დამხობა ან ძალადობით შეცვლაა.

„მოვუწოდებთ ყველა პოლიტიკურ პარტიას და სხვა გაერთიანებას, ვიდრე ჯერ კიდევ არის დრო, ქმედითად გაემიჯნონ შეკრებას, რომლის მიზანი საქართველოს კონსტიტუციური წყობილების დამხობა ან ძალადობით შეცვლაა. ყველას მინდა შევახსენო, რომ დღეს საქართველო, მისი კონსტიტუციური სისტემა და სახელმწიფო ინსტიტუტები, მათ შორის სამართალდამცავი სტრუქტურები არის ძლიერი და ერთ მუშტად შეკრული, როგორც არასდროს. აქედან გამომდინარე, არავის ვურჩევთ, გარისკოს და დაუპირისპირდეს სახელმწიფო სისტემას და კანონს, რომლისგანაც ყველა სამართალდამრღვევი უმკაცრეს პასუხს მიიღებს. საქართველო განაგრძობს მშვიდობიან და სტაბილურ განვითარებას, რაზეც საქართველოს მთავრობა და მისი თითოეული უწყება სრულ პასუხისმგებლობას ვიღებთ,“- განაცხადა ირაკლი კობახიძემ.

საარჩევნო პროცესი იყო კონკურენტული და თვისებრივად თავისუფალი როგორც ადმინისტრაციული რესურსის გამოყენებისგან, ისე მუქარისგან, ზეწოლისგან და ძალადობისგან, – ამის შესახებ საქართველოს პრემიერ-მინისტრმა, ირაკლი კობახიძემ მთავრობის ადმინისტრაციაში გამართულო პრესკონფერენციაზე განაცხადა.

პრემიერის თქმით, ხვალ შედგება უმნიშვნელოვანესი არჩევნები, სადაც საქართველოს მოქალაქეები თავიანთი ქალაქებისა და სოფლების განვითარების ბედს განსაზღვრავენ.

„დღეს სრულდება საარჩევნო კამპანია და გვსურს, შევაჯამოთ წინასაარჩევნო პროცესები. როგორც მოგეხსენებათ, არჩევნებში მონაწილეობს 12 პოლიტიკური გაერთიანება, რომელთაც მიეცათ შესაძლებლობა, თავისუფლად და თანასწორ პირობებში წარემართათ საარჩევნო კამპანია. საარჩევნო პროცესი იყო კონკურენტული და თვისებრივად თავისუფალი როგორც ადმინისტრაციული რესურსის გამოყენებისგან, ისე მუქარისგან, ზეწოლისგან და ძალადობისგან.

მადლობა გვინდა გადავუხადოთ საქართველოს ცენტრალურ საარჩევნო კომისიას წინასაარჩევნო პროცესების მაღალ დონეზე ადმინისტრირებისათვის, აგრეთვე სამართალდამცავ უწყებებს საარჩევნო კამპანიის მიმდინარეობისას მოქალაქეთა უსაფრთხოების დაცვისათვის.

ხვალ შედგება უმნიშვნელოვანესი არჩევნები, სადაც საქართველოს მოქალაქეები თავიანთი ქალაქებისა და სოფლების განვითარების ბედს განსაზღვრავენ. მოხარული ვართ, რომ გასული წლების განმავლობაში ადგილობრივი თვითმმართველობა იქცა ხელისუფლების რგოლად, რომელიც საზოგადოებაში გამორჩეულად მაღალი ნდობით სარგებლობს. ეს არის მიღწევა, რომელსაც ჩვენი ქვეყნის თითოეული მოქალაქე განსაკუთრებულად უნდა გაუფრთხილდეს. დარწმუნებული ვართ, ჩვენი თანამოქალაქეები ხვალ გააკეთებენ ისეთ არჩევანს, რომელიც ჩვენი ქალაქებისა და სოფლების, თითოეული მუნიციპალიტეტის წინსვლასა და განვითარებას ყველაზე უკეთ უზრუნველყოფს.

საქართველოს მთავრობის სახელით, მსურს ვთხოვო თითოეულ ჩვენს თანამოქალაქეს, თითოეულ ამომრჩეველს, გამოავლინოს მაღალი სამოქალაქო პასუხისმგებლობა და ხმა მისცეს ადგილობრივი თვითმმართველობის არჩევნებში“, – განაცხადა პრემიერმა.