ილონ მასკის თანაშემწეებმა აშშ-ის მთავრობის ადამიანური რესურსების სააგენტოში კარიერულ საჯარო მოხელეებს კომპიუტერული სისტემები ჩაუკეტეს, რომელიც შეიცავს მილიონობით ფედერალური თანამშრომლის პირად მონაცემებს.

ამის შესახებ ინფორმაციას  Reuters-ი  სააგენტოს თანამშრომლებზე დაყრდნობით ავრცელებს.

მედიის ცნობით, ილონ მასკმა, რომელსაც ტრამპმა დაავალა, შეამციროს 2.2-მილიონიანი სამოქალაქო სამთავრობო სამუშო ძალის ზომა, დაუყოვნებლივ განათავსა თანამოაზრეები „პერსონალის მართვის სამსახურში“.

„ჩვენ არ გვაქვს ხილვადობა, თუ რას აკეთებენ ისინი კომპიუტერსა და მონაცემთა სისტემებთან. ეს დიდ შეშფოთებას ქმნის. ზედამხედველობა არ არსებობს. ეს ქმნის რეალურ კიბერუსაფრთხოების და ჰაკერულ შედეგებს“, – აღნიშნა ერთ -ერთმა ოფიციალურმა პირმა.

დონალდ ტრამპის განცხადებით, ევროკავშირისთვის ტარიფების დაწესებას გეგმავს.

„ვაპირებ თუ არა ევროკავშირისთვის ტარიფების დაწესებას? გულწრფელი პასუხი გინდათ თუ პოლიტიკური? აბსოლუტურად. ევროკავშირი საშინლად გვექცევა”, – განუცხადა ჟურნალისტებს აშშ-ის პრეზიდენტმა, დონალდ ტრამპმა.

მისი თქმით, ევროკავშირისთვის ტარიფების დაწესება აშშ-ს სავაჭრო დეფიციტის გამოსწორების საშუალებას მისცემს.

„ისინი ჩვენს ავტომობილებს არ იღებენ. ჩვენს სოფლის მეურნეობის პროდუქტებს არ იღებენ. არაფერს იღებენ. ევროკავშირთან დიდი დეფიციტი გვაქვს. ასე რომ, ევროკავშირთან დაკავშირებით რაღაც ძალიან მნიშვნელოვანს გავაკეთებთ”, – აღნიშნა აშშ-ის პრეზიდენტმა.

ამასთან, თეთრი სახლის განცხადებით, დღეიდან აშშ კანადიდან და მექსიკიდან იმპორტზე 25%-იან ტარიფებს, ხოლო ჩინეთიდან იმპორტზე 10%-იან ტარიფებს დააწესებს.

„ხვალიდან ეს ტარიფები ძალაში შევა. ეს დაპირებებია, რომელიც პრეზიდენტმა გასცა და შეასრულა”, – განაცხადა თეთრი სახლის პრესსპიკერმა, კეროლაინ ლივიტმა.

უკრაინის მთავარი სადაზვერვო სამმართველო სლოვაკეთის პრემიერ-მინისტრის, რობერტ ფიცოს განცხადებებს გამოეხმაურა, რომელმაც „ქართული ლეგიონის“ მებრძოლები სლოვაკეთის საპროტესტო აქციებში მონაწილეობაში დაადანაშაულა.

„უკრაინის თავდაცვის სამინისტროს დაზვერვის მთავარი სამმართველო ოფიციალურად იუწყება, რომ მის სტრუქტურაში დანაყოფი, სახელწოდებით „ქართული ეროვნული ლეგიონი“ არ არსებობს“, – ნათქვამია განცხადებაში.

სადაზვერვო სამმართველოს განცხადებაში აღნიშნულია, რომ ჰიბრიდული და საინფორმაციო ოპერაციები, რომლებიც მიზნად ისახავს ევროპის ქვეყნებში სიტუაციის გაუარესებას, უკრაინისთვის უკიდურესად სერიოზულ საფრთხეს წარმოადგენს.

დაზვერვის სამსახურმა ასევე ხაზგასმით აღნიშნა, რომ „ქართული ლეგიონი“ არის მრავალეროვნული აქტიური ოპერაციული ქვედანაყოფი, რომელიც უშუალოდ მონაწილეობს ბრძოლებში ფრონტის ყველაზე ცხელ რაიონებში და არ ახორციელებს არანაირ ჰიბრიდულ ქმედებებს ევროკავშირის ტერიტორიაზე.

„ქართული ლეგიონის“ ლიდერის, მამუკა მამულაშვილის მიმართ ფიცოს ბრალდებებთან დაკავშირებით სადაზვერვო სამსახური წერს, რომ მას არანაირი კავშირი არ აქვს უკრაინის დაზვერვასთან და არ იღებს რაიმე დავალებას და ბრძანებას მისგან.

„აღნიშნულმა პირმა უკრაინის თავდაცვის სამინისტროს დაზვერვის მთავარი სამმართველოს საერთაშორისო ლეგიონთან კონტრაქტი 2023 წლის აპრილში შეწყვიტა და არ გაუხანგრძლივებია“, – აღნიშნულია უკრაინის დაზვერვის მთავარი სამმართველოს განცხადებაში.

სლოვაკეთის ხელისუფლება უკრაინაში მებრძოლი „ქართული ლეგიონის“ მეთაურს, მამუკა მამულაშვილს შესაძლო სახელმწიფო გადატრიალების მცდელობაში ადანაშაულებს და  მას ქვეყანაში შესვლას უკრძალავს.

დონალდ ტრამპის ადმინისტრაცია განიხილავს აშშ-ის საერთაშორისო განვითარების სააგენტოს (USAID) შემცირებას და სახელმწიფო დეპარტამენტის კონტროლის ქვეშ მოქცევას. ამის შესახებ ინფორმაციას „როიტერი“ ავრცელებს.

გავრცელებული ცნობით, „ეროვნული უსაფრთხოების საბჭომ“ (NSC) მიმდინარე კვირაში უმასპინძლა დისკუსიებს ამ თემაზე, მაგრამ საბოლოო გადაწყვეტილებები მიღებული არ არის.

„როიტერთან“ ერთ-ერთი წყარო ამბობს, რომ თეთრი სახლი იკვლევს იურიდიულ უფლებამოსილებებს, რომლითაც აშშ-ის პრეზიდენტმა, დონალდ ტრამპმა შეიძლება გამოიყენოს აღმასრულებელი ბრძანება USAID-ის დამოუკიდებლობის დასასრულებლად.

„როიტერი“ წერს, რომ გაურკვეველია, აქვს თუ არა ტრამპს ასეთი ბრძანების გაცემის და კონგრესის გვერდის ავლის უფლებამოსილება. გავრცელებული ინფორმაციით, ახლად შექმნილი მთავრობის ეფექტურობის დეპარტამენტის ოფიციალური პირები, ტრამპის მრჩეველი მილიარდერი ილონ მასკის ხელმძღვანელობით, ასევე მონაწილეობდნენ საუბრებში და სტუმრობდნენ USAID-ის შტაბ-ბინას ვაშინგტონის ცენტრში ამ კვირაში.

აშშ-ში, ქალაქ ფილადელფიაში მცირე ზომის სამედიცინო-საევაკუაციო თვითმფრინავი აფრენიდან მალევე ჩამოვარდა.

თვითმფრინავის ბორტზე ექვსი ადამიანი იმყოფებოდა, მათ შორის ეკიპაჟის ოთხი წევრი, პაციენტი ბავშვი და პაციენტის დედა.

მექსიკის საგარეო საქმეთა სამინისტროს განცხადებით, თვითმფრინავის ბორტზე მყოფი ექვსივე ადამიანი მექსიკის მოქალაქეა.

გავრცელებული ინფორმაციით, ავიაკატასტროფის შედეგად, ბორტზე მყოფი ყველა ადამიანი დაიღუპა.

აშშ-ის პრეზიდენტის, დონალდ ტრამპის განცხადებით, მის ადმინისტრაციას უკვე ჰქონდა „ძალიან სერიოზული“ დისკუსია რუსეთთან უკრაინაში ომის შესახებ.

აშშ-ის პრეზიდენტის თქმით, უკრაინის საკითხზე მოლაპარაკებას რუსეთის პრეზიდენტთან, ვლადიმერ პუტინთან გამართავს.

„ჩვენ ვისაუბრებთ და ვფიქრობ, რაღაც მნიშვნელოვანი იქნება. ჩვენ გვინდა ამ ომის დასრულება. მე რომ პრეზიდენტი ვყოფილიყავი, ეს ომი არ დაიწყებოდა“, – განაცხადა ტრამპმა ოვალურ კაბინეტში ჟურნალისტებთან.

ტრამპმა არ უთქვამს, ვინ იყო მისი ადმინისტრაციიდან რუსებთან კონტაქტში, მაგრამ ამტკიცებდა, რომ ორივე მხარე „უკვე საუბრობს“. კითხვაზე, ესაუბრა თუ არა პირდაპირ პუტინს, ტრამპმა უპასუხა: „არ მინდა ამაზე ლაპარაკი“.

თეთრი სახლი ეხმიანება კონგრესში უმცირესობის ლიდერის, ჰაკიმ ჯეფრისის განცხადებას, რომელმაც დააანონსა, რომ „დემოკრატები“ „რესპუბლიკელების“ დღის წესრიგს „ქუჩებში“ გაუწევენ ბრძოლას. ინფორმაციას ამის შესახებ ტელეკომპანია Fox News-ი ავრცელებს.

„როდესაც პრეზიდენტი ტრამპი კონცენტრირებულია ქვეყნის გაერთიანებასა და ამერიკელი ხალხის მიერ მოცემული მანდატის შესრულებაზე, კონგრესის უმცირესობის ლიდერი, ჰაკიმ ჯეფრისი აქეზებს ძალადობას და ხალხს მოუწოდებს, „ქუჩებში“ გაილაშქრონ პრეზიდენტ ტრამპის დღის წესრიგის წინააღმდეგ,“ – განაცხადა თეთრი სახლის პრესისმდივნის მოადგილემ, კუშ დესაიმ Fox News Digital-თან საუბრისას.

„ეს გაუწონასწორებელი ძალადობრივი რიტორიკა საშიშია. ლიდერმა ჯეფრისმა დაუყოვნებლივ უნდა მოიხადეს ბოდიში“, – დასძინა თეთრი სახლის წარმომადგენელმა.

მანამდე ცნობილი გახდა, რომ აშშ-ის კონგრესის „დემოკრატებმა“ ტრამპის ადმინისტრაციის მიერ განხორციელებულ სწრაფ ცვლილებებზე საპასუხოდ სრულმასშტაბური წინააღმდეგობის გაწევა გადაწყვიტეს.