რეალურად, სალომე ზურაბიშვილი აბსოლუტურად ხელმოცარული პოლიტიკოსია – რასაც ის ცდილობს არის იმ გამოუვალი მდგომარეობიდან გამოსავლის მოძებნა, რომელიც რადიკალურ ოპოზიციას, ექსტრემისტულ დაჯგუფებებს აქვთ შექმნილი, – ამის შესახებ პარლამენტის საპროცედურო საკითხთა და წესების კომიტეტის თავმჯდომარემ, დავით მათიკაშვილმა ჟურნალისტებთან განაცხადა.

მისი თქმით, “სალომე ზურაბიშვილის და კოლექტიური “ნაცმოძრაობის” არავის არ სჯერა.”

„რეალურად, ამ სიტუაციიდან გამოსავალი არ არსებობს, ამიტომ არანაირი აქტიურობა, რითაც ის კვლავ ცდილობს, თავისი უცხოელი დავალებების მიმცემები კვებოს, არ გამოუვა. რატომ? – პირველი და მნიშვნელოვანი მიზეზი არის ის, რომ სალომე ზურაბიშვილის და “კოლექტიური ნაცმოძრაობის” არავის არ სჯერა. რეალურად, მათ არანაირი ელექტორალური მხარდაჭერა არ აქვთ ჩვენს ქვეყანაში. ეს ძალიან კარგად გამოჩნდა რამდენიმე დღის წინ იქ, სადაც მცდელობა ჰქონდათ, რომ აქცია ჩაეტარებინათ. იქ მყოფი მცირე საზოგადოება სალომე ზურაბიშვილს სტვენით და შეძახილებით გამოეხმაურა. იგივე შეგვიძლია ვთქვათ “კოლექტიური ნაცმოძრაობის” ყველა ე.წ ლიდერზე, რადგან მათი პოლიტიკური გზა ფაქტობრივად, კრახით არის დასრულებული და ამ მოცემულობიდან გამოსვლაში ეს ფსევდო მიმართულებები, დაპირებები და იმის ინსცენირება თითქოს ისინი კიდევ აქტიურ პოლიტიკაში არიან, არაფრის მომცემია. ეს არის მხოლოდ და მხოლოდ პასუხის მსგავსი იმ ძალების, იგივე “დიფ სთეითისადმი”, საიდანაც ეს ადამიანები საქართველოში იმართებიან”, – განაცხადა მათიკაშვილმა.

პარლამენტის დროებითი საგამოძიებო კომისიის თავმჯდომარემ, თეა წულუკიანმა, „ნაციონალური მოძრაობის“ რეჟიმის მიერ დაზარალებულ კახა დაბრუნდაშვილს მიმართა, რომელიც, კუდ-ის იმდროინდელი მაღალჩინოსნების, დათა ახალაიას, ოლეგ მელნიკოვის, გერონტი ალანიასა და სხვების მიერ მასა და მის მეგობარ ვამეხ აბულაშვილზე ძალადობის საქმის შესახებ საუბრობდა.

როგორც წულუკიანმა აღნიშნა, დაბრუნდაშვილი და აბულაშვილი იმავე ხევში წაიყვანეს საცემად, სადაც ოთხი თვის შემდეგ, 2006 წლის იანვრის ბოლოს, სანდრო გირგვლიანი იპოვეს.

მისივე განცხადებით, სტრასბურგის სასამართლოში შეტანილ საჩივარში ეწერა, რომ გირგვლიანი ხევში თავისით აღმოჩნდა და ეკალ-ბარდებზე გადაიჩეხა, რასაც მაშინდელი იუსტიციის მინისტრის მოადგილე, თინა ბურჯალიანიც ამტკიცებდა.

„ეს იგივე ხევია, სადაც სანდრო გირგვლიანი აღმოჩნდება თქვენს შემდეგ, ოთხი თვის თავზე, 2006 წლის იანვრის ბოლოს. სტრასბურგის სასამართლოში როდესაც ეს საქმე შემოვა, იქ წერია, რომ სანდრო გირგვლიანი, თურმე, ამ ხევში თავისით აღმოჩნდა, ეკალ-ბარდებზე გადაიჩეხა. ქალბატონი თინა ბურჯალიანი, იუსტიციის მინისტრის ზურაბ ადეიშვილის მოადგილე, რომელიც სტრასბურგში ჩამობრძანდა, წარსდგა სასამართლოს წინაშე, მე ვიყავი ამის მოწმე, იქ ვმუშაობდი, ამტკიცებდა ისე, რომ არ რცხვენოდა, რომ თურმე, მაყვლის ეკალ-ბარდებზე გადაჩეხილა სანდრო გირგვლიანი ამ ხევში სადაც თქვენ ჰყვებით, რომ ოთხი თვით ადრე გაგისწორდნენ ფიზიკურად და ასე მიაყენა თავის თავს უნებლიეთ ის ჭრილობები, რამაც მისი სიკვდილი გამოიწვია.“ – განაცხადა თეა წულუკიანმა.

ბიძინა ივანიშვილის ყელზე ყულფი ვიწროვდება – გუშინ, როდესაც პოლიტპატიმრების მშობლები აქციას მართავდნენ, პარალელურად საბანკო ბარათები გაეთიშათ რეჟიმის, ბიძინა ივანიშვილის ბოროტ თოჯინებს, პოლიტიკური დევნის ინსტრუმენტებს – მურუსიძეს და ჩინჩალაძეს, – ამის შესახებ პარტია „ფედერალისტების“ ერთ-ერთ ლიდერმა, თამარ ჩერგოლეიშვილმა მეხუთე პრეზიდენტთან, სალომე ზურაბიშვილთან შეხვედრის შემდეგ ჟურნალისტებს განუცხადა.

მისივე თქმით, ოპოზიცია ძალაუფლების გადაბარებას თავისუფალი არჩევნების გზით მიაღწევს.

„დღეს, ძალიან კარგი დღე გვქონდა. ჩვენ ყველანი ვხედავთ, რომ ბიძინა ივანიშვილის ყელზე ყულფი ვიწროვდება. სიმბოლურია, რომ გუშინ, როდესაც პოლიტპატიმრების მშობლები აქციას მართავდნენ, პარალელურად საბანკო ბარათები გაეთიშათ რეჟიმის, ბიძინა ივანიშვილის ბოროტ თოჯინებს, პოლიტიკური დევნის ინსტრუმენტებს – მურუსიძეს და ჩინჩალაძეს. ეს კარგი იყო.

ასევე, ძალიან საინტერესო იყო სახელმწიფო დეპარტამენტის განცხადება. თქვენ ძალიან კარგად იცით, რომ ჯეი დი ვენსს ხშირად იყენებს ხოლმე „ქართული ოცნება”, როგორც ამერიკასთან დალაგების ინსტრუმენტს და ძალიან სიმბოლური იყო ისიც, რომ ჯეი დი ვენსის სიტყვებით უპასუხა სახელმწიფო დეპარტამენტმა. დღეს კიდეც შათირიშვილი გამოაგორეს, რომელიც ისევ „დიფ სთეითზე“ რაღაცებს როშავდა, “ქართული ოცნების” ლოიალისტების დასამშვიდებლად, რომლებიც ძალიან ნერვიულობენ. ძალიან კარგად ვხედავთ და კვლევებიც ამას ადასტურებს, რომ “ქართული ოცნების” ლოიალისტები არიან ძალიან მძიმე მდგომარეობაში, ისინი ბიძინა ივანიშვილისგან კრიზისის გადაწყვეტას ელოდებიან. პირველ რიგში, ადგილობრივი პროტესტით და შემდეგ დასავლეთის წნეხით, ჩვენ კრიზისი გავაგრძელეთ და ბიძინა ივანიშვილმა ეს კრიზისი ვერ მოაგვარა. აუცილებლად მივაღწევთ რეჟიმის ჩამოშლას და ძალაუფლების გადაბარებას თავისუფალი არჩევნების გზით. ეს ჩვენს ქვეყანაში პოლიტიკურ დევნას დაასრულებს”, – განაცხადა თამარ ჩერგოლეიშვილმა.

მივდივართ არჩევნებისკენ, რეჟიმის ჩამოშლისკენ, ეს არის რთული, გრძელი გზა, მაგრამ ჩვენი პოლიტიკური გაგებით, ეს არის ერთადერთი გზა, რომელიც მიგვიყვანს ბოლომდე, – ამის შესახებ საქართველოს ყოფილმა პრეზიდენტმა, სალომე ზურაბიშვილმა განაცხადა.

ზურაბიშვილის თქმით, უცხოელი პარტნიორებისგან ბოლო ორი დღის განმავლობაში გაკეთებული განცხადებები აჩვენებს, რომ ოპოზიციის კოორდინაციამ შედეგი გამოიღო.

„დღეს ჩვენ განვიხილეთ ორი თემა. პირველი არის პატიმრების ოჯახების ახალი წამოწყება, მათი კოორდინირება. როგორც ჩანს, ეს ფორმატი შეიქმნა. მინდა, წინააღმდეგობის პლატფორმისგან გამოვუცხადო სოლიდარობა და ხაზი გავუსვა, რომ ამ კოორდინაციის ორი მიზანი რჩება უცვლელი. ახალი, თავისუფალი და გამჭვირვალე არჩევნების მზადება, ასევე სინდისის პატიმრების გათავისუფლება. იმასაც უნდა გავუსვა ხაზი, რომ სინდისის პატიმრების მდგომარეობა, წამება და ცუდი მოპყრობა არის ჩვენი მუდმივი თემა უცხოელ პარტნიორებთან. ახლა უკვე კოორდინაციის ფორმატში. ძალიან ნიშანდობლივია, რომ ამან უკვე შედეგი მოიტანა და გუშინდელი დღეს იყო ძალიან ძლიერი დარტყმა მმართველ პარტიაზე, რეჟიმზე, რადგან წამოვიდა სხვადასხვა კუთხიდან სერიოზული, მკაცრი რეაქციები. ერთი მხრივ კაია კალასისგან და მარტა კოსისგან. ასევე ჰელსინკის კომისიის ორპარტიული განცხადება იყო, რომელიც ანაკლიის პორტის საკითხს და იქ ჩინელების შემოყვანას ეხმაურება. ესეც მკაცრი განცხადებაა. აშშ-ის სახელმწიფო დეპარტამენტის პრესსპიკერის კომენტარი, რომელიც კიდევ ერთხელ ახსენებს რეჟიმს, რა უნდა გაააკეთოს, თუ სურს გაუმჯოიბესება აშშ-სთან ურთიერთობები. ასევე დიდი ბრიტანეთის ახალი სანქციები და ოდირის განცხადება ფარაზე. ეს ხუთივე განცხადება არის ძალიან დიდი დარტყმა რეჟიმისთვის. ნიშანდობლივია, რომ პირველად სასამართლო სისტემა დასანქცირდა ბრიტანეთისგან და სწორედ ის ადამიანები, რომლებიც არიან პასუხისმგებლები სინდისი პატიმრების დაკავებაზე და მათ ციხეში ყოფნაზე. ეს განცხადებები არის უკვე ერთი ნაბიჯი გამარჯვებისკენ. ჩვენ ასე მივდივართ არჩევნებისკენ, რეჟიმის ჩამოშლისკენ. ეს არის რთული, გრძელი გზა, მაგრამ ჩვენი პოლიტიკური გაგებით, ეს არის ერთადერთი გზა, რომელიც მიგვიყვანს ბოლომდე“, – განაცხადა ზურაბიშვილმა.

თბილისის მერის, კახა კალაძის განცხადებით, საქართველო არის დამოუკიდებელი ქვეყანა და თვითონ გადაწყვეტს, ვისთან ჰქონდეს ურთიერთობები.

ამის შესახებ კახა კალაძემ ჟურნალისტებს „ჰელსინკის კომისიის“ წევრების მიერ გამოქვეყნებული განცხადების პასუხად უთხრა, რომელშიც გამოთქმულია შეშფოთება „ქართული ოცნების“ გადაწყვეტილების შესახებ, ანაკლიის ღრმაწყლოვან პორტის კონტროლი „გადასცეს ჩინეთის კომუნისტურის პარტიის მიერ მხარდაჭერილ, აშშ-ის მიერ დასანქცირებულ კონგლომერატს“.

„საქართველო არის დამოუკიდებელი ქვეყანა, სუვერენული სახელმწიფო და თვითონ გადაწყვეტს, ვისთან ჰქონდეს ურთიერთობები, რა ტიპის ურთიერთობები ჰქონდეს და რა სავაჭრო ურთიერთობები. ეს არ არის „ჰელსინკის კომისიის“ საქმე“, – განაცხადა კახა კალაძემ.

რაც შეეხება აშშ-თან ურთიერთობების დალაგებას, თბილისის მერი ამბობს, რომ ხელისუფლებისთვის მთავარი არის ქართველი ხალხი.

„ჩვენთვის ყველაზე მთავარი არის ქართველი ხალხი, ჩვენი სამშობლო და ჩვენი ქვეყნის ინტერესები. მერე არის ყველაფერი დანარჩენი, სხვა ქვეყნებთან ურთიერთობები. რა არის ამაში გაუგებარი? მარტივად, ვაკვირდებით პროცესებს, ვართ მოლოდინის რეჟიმში. გულწრფელად ვიტყვი: იმ პოლიტიკის გამო, იმ მხილების გამო, რომელიც „ქართულმა ოცნებამ“, ამ პატარა ქვეყანამ დაიწყო და მთელ მსოფლიოს დაანახა, რა არის „დიფ სთეითი“, სამი წლის წინ, როდესაც ჩვენ ამაზე ვსაუბრობდით, თქვენ მაშინ ქილიკობდით, არ გჯეროდათ. როდესაც ტრამპი გახდა პრეზიდენტი, პირდაპირ თქვა, რომ მისი მთავარი ამოცანაა, დაამარცხოს „დიფ სთეითი“. ჩვენ ვგულშემატკივრობთ ამაში, რომ მან მოახერხოს „დიფ სთეითის“ დამარცხება, რაც არ იქნება მარტივი“, – აღნიშნა კახა კალაძემ.

ჩეხეთის საელჩოს მინდა ვუთხრა, რომ საქართველოში ის დრო არასდროს დაბრუნდება, როცა ხალხს ქუჩაში კლავდნენ, ციხეებში აუპატიურებდნენ. ეს ყველაფერი ჩაბარდა წარსულს“, – განაცხადა დედაქალაქის მერმა მედიასთან ჩეხეთის საელჩოს მიერ გაკეთებული განცხადების შეფასებისას.

კახა კალაძის თქმით, სწორედ ჩეხეთის საელჩო და კონკრეტული ელჩები აფასებდნენ საქართველოს დემოკრატიის შუქურად მაშინ, როცა ხელისუფლება ადამიანებს ქუჩაში კლავდა და აუბედურებდა.

„პირდაპირ ვიტყვი, რომ საქართველო დემოკრატიის შუქურა არ ყოფილა. დემოკრატიის შუქურა ჩვენ ერთი გვყავდა – მიხეილ სააკაშვილი. ეტყობა აერიათ. ამის თქმა უნდოდათ და ვერ გაბედეს. ეს ადამიანი კლავდა, აუბედურებდა ხალხს. პარლამენტში საგამოძიებო კომისია შექმნილია. რა თქმა უნდა, ძალიან მძიმედ მოსასმენია კონკრეტული ფაქტები, რასაც ამ კომისიაზე განიხილავენ, რაზეც ჩვენ ინფორმაცია გვქონდა. მათი შეხედულებით, ეს იყო დემოკრატიის შუქურა. სწორედ ჩეხეთის საელჩო და კონკრეტული ელჩები, მაღალი თანამდებობის პირები აფასებდნენ ასე, რომ დემოკრატიის შუქურა იყო საქართველო მაშინ, როდესაც ხალხს ქუჩაში კლავდნენ, აუბედურებდნენ, ციხეებს ავსებდნენ. ეს ყველაფერი ჩაბარდა წარსულს.

ჩეხეთის საელჩოს მინდა ვუთხრა, რომ საქართველოში ის დრო არასდროს დაბრუნდება, როცა ხალხს ქუჩაში კლავდნენ, ციხეებში აუპატიურებდნენ. თუ ვინმეს უნდა საკუთარ თავზე გამოცადოს, თავიანთ ოჯახებზე გამოცადონ ეს ყველაფერი და არა ქართველმა ხალხმა“, – განაცხადა თბილისის მერმა.

საქართველოს ხელისუფლებამ ე.წ. დიფ სთეითზე საუბარი დაიწყო მაშინ, როდესაც ამას ვერავინ ბედავდა და გულწრფელად მქონდა მოლოდინი, რომ  ტრამპის ახალი ადმინისტრაცია ამისთვის საქართველოს ხელისუფლებას მადლობას გადაუხდიდა, – ამის შესახებ დედაქალაქის მერმა, კახა კალაძემ მედიასთან ფილოსოფოს ზაზა შათირიშვილის ანალიტიკურ წერილზე საუბრისას განაცხადა.

კახა კალაძის თქმით, დღეს არსებობს ძალიან ბევრი შეკითხვა და გარკვეული ვაკუუმიც არის შექმნილი პოლიტიკურ ველზე.

„არ მინდა წერილის დეტალურად განხილვა, თუმცა, ერთი რამ ცხადია – ჩვენ ბევრჯერ განვაცხადეთ და ახლაც ვადასტურებთ მზაობას, რათა ურთიერთობები გადაიტვირთოს და საქართველო-ამერიკის ურთიერთობები ახალი ფურცლით დაიწყოს. ძალიან  ცუდია ის, რაც დღეის მდგომარეობით არსებობს და გვაქვს მოლოდინი, რომ ეს მდგომარეობა შეიცვლება. ჩვენ ცოტა ადრე, სამი წლის წინ დავიწყეთ „დიფ სთეითზე“ საუბარი. მაშინ ამას ვერავინ ბედავდა და, გულწრფელად გეტყვით, რომ მოლოდინი მქონდა, როდესაც ტრამპის ადმინისტრაცია მოვიდა, საქართველოს ხელისუფლებას მადლობას ეტყოდა ამ ყველაფრისთვის. დღეს არის ის მოცემულობა, რომ ტრამპი ებრძვის „დიფ სთეითს“, ეს ხომ ჩვენი მოგონილი არ არის. ამაზე როდესაც ვსაუბრობდით, ჩვენ დაგვცინოდნენ, მაგრამ, როდესაც ტრამპი პრეზიდენტი გახდა, მთელმა მსოფლიომ გაიგო, რომ თურმე არსებობს „დიფ სთეითი“ – ჩრდილოვანი ძალა, რომელიც მართავს მსოფლიოს“, – განაცხადა კახა კალაძემ.

მისივე თქმით, დღეს ბევრი განცხადება კეთდება „დიფ სთეითთან“ ბრძოლის შესახებ, თუმცა ნაკლებად იდგმება კონკრეტული ნაბიჯები.

„დღეს ვართ მოლოდინის რეჟიმში, არის გარკვეული ვაკუუმი. არსებობს ძალიან ბევრი კითხვა, მაგალითისთვის, ბაიდენის ადმინისტრაციამ ბიძინა ივანიშვილი დაასანქცირა იმის გამო, თითქოს მას რაღაც ურთიერთობა ჰქონდა რუსეთთან. დღეს კი რას ვხედავთ, ახლად არჩეული პრეზიდენტი დონალდ ტრამპი, თავისი ადმინისტრაციით, პირდაპირ მართავს მოლაპარაკებებს რუსეთთან, საუბრობს ურთიერთობების გადატვირთვაზე, სავაჭრო ურთიერთობის გაღრმავებაზე და, ამავე დროს, ბიძინა ივანიშვილი ისევ დასანქცირებულია. „მაგნიტსკის“ სიაში არის ჩვენი შინაგან საქმეთა მინისტრი ვახტანგ გომელაური და არავის მოუხსნია ეს სანქციები. ეს მარტო ჩვენთან მიმართებაში არ ხდება. ნახეთ, რა ხდება სხვადასხვა ქვეყანაში – იგივე რუმინეთში, სადაც არჩევნები აბსურდული მიზეზით გააუქმეს. აშშ-ის ადმინისტრაციამ ეს ყველაფერი დაგმო, მაგრამ რეალური ქმედება არ მოჰყოლია. ამასთანავე, უნგრეთის პრემიერ-მინისტრის ადმინისტრაციის უფროსი არის დასანქცირებული და ეს სანქციები არ მოხსნილა. იმის თქმა მინდა, რომ ბევრ განცხადებას ვისმენთ „დიფ სთეითთან“ ბრძოლის შესახებ და რომ ის დამარცხდება, მაგრამ, ჯერჯერობით ეს მხოლოდ ლაპარაკად რჩება და კონკრეტიკა არ არსებობს.

დაველოდოთ, ჩვენ ვგულშემატკივრობთ აშშ-ის ახალ ადმინისტრაციას იმაში, რომ დაამარცხებს „დიფ სთეითს“ და, თუ ეს მართლაც მოხდა, რა თქმა უნდა, შედეგები საქართველოზეც აისახება. ტრამპმა არაერთხელ განაცხადა პრიორიტეტების შესახებ, ესენია უკრაინაში ომის დასრულება და „დიფ სთეითის“ დამარცხება. აქედან ჯერ არც ერთი მომხდარა და არც მეორე. ამიტომ დაველოდოთ პროცესებს“, – განაცხადა თბილისის მერმა.

ამასთანავე მან აღნიშნა, რომ „ქართული ოცნება“ ატარებს პრაგმატულ ეროვნულ პოლიტიკას, რომელიც საქართველოს ინტერესებს ემყარება და ასე გააგრძელებს მომავალშიც.

„ჩვენთვის ყველაზე მნიშვნელოვანი არც ამერიკაა და არც ევროპა. ჩვენთვის ყველაზე მნიშვნელოვანია ჩვენი ხალხი და ჩვენი ქვეყანა“, – განაცხადა კახა კალაძემ.