შარლ მიშელმა 17 ოქტომბერს ისრაელის საკითხზე ევროპული საბჭოს საგანგებო სამიტი მოიწვია, რომელიც ვიდეოფორმატის რეჟიმში გაიმართება.

ევროკავშირის საბჭოს პრეზიდენტის განცხადებით, ტერორს გამართლება არ აქვს.

„ისრაელის წინააღმდეგ „ჰამასის“ მიერ განხორციელებულ სასტიკ ტერორისტულ თავდასხმებს ათასობით უდანაშაულო ადამიანის სიცოცხლე შეეწირა. მძევლები დაუყოვნებლივ და ყოველგვარი წინაპირობის გარეშე უნდა გათავისუფლდნენ. ჩვენ სოლიდარობას ვუცხადებთ ისრაელს და ტერორისტული თავდასხმების დროს დაღუპულთა ოჯახებს.

ისრაელს აქვს უფლება დაიცვას თავი საერთაშორისო კანონმდებლობის, კერძოდ კი საერთაშორისო ჰუმანიტარული კანონმდებლობის სრული დაცვით. ღაზის სექტორში განვითარებული ტრაგიკული მოვლენები, რომელიც გამოწვეულია განხორციელებული ალყისა და ძირითადი საჭიროებების ნაკლებობით, დაბომბვით გამოწვეული ნგრევით, საერთაშორისო საზოგადოებაში საზოგადოებისთვის განგაშის ზარია.

მსურს მოვიწვიო ევროპული საბჭოს საგანგებო სხდომა, რომელიც გაიმართება ვიდეოკონფერენციის რეჟიმში სამშაბათს, 17 ოქტომბერს. უაღრესად მნიშვნელოვანია, რომ ევროპულმა საბჭომ, ხელშეკრულებებისა და ჩვენი ღირებულებების შესაბამისად, დაადგინოს ჩვენი საერთო პოზიცია და ჩამოაყალიბოს მოქმედების მკაფიო ერთიანი სტრატეგია, რომელიც ასახავს განვითარებული მოვლენებისა და არსებული სიტუაციის სირთულეს“, – აღნიშნა მიშელმა.

მისივე განმარტებით, ამ კონფლიქტს აქვს გავლენა და მოჰყვება შედეგები, მათ შორის ევროკავშირში.

„ევროკავშირი ყოველთვის იყო და ყოველთვის უნდა იყოს მშვიდობისა და საერთაშორისო სამართლის მტკიცე დამცველი, როგორც ეს იყო რუსეთის აგრესიული ომის შემთხვევაში უკრაინის წინააღმდეგ. ევროკავშირმა უნდა იმუშაოს ჰუმანიტარული დახმარების გაწევისა და კონფლიქტის რეგიონული ესკალაციის, ჰუმანიტარული სამართლის ნებისმიერი დარღვევის თავიდან აცილების მიმართულებით.

მნიშვნელოვანია რეგიონულ აქტორებთან ჩართულობა, რადგან მათ შეუძლიათ ეფექტიანი როლის შესრულება. ჩვენთვის მნიშვნელოვანია გრძელვადიანი და მდგრადი მშვიდობის ძიების გზები. მიმდინარე კონფლიქტს შეიძლება ჰქონდეს ჩვენი საზოგადოებებისთვის უსაფრთხოების თვალსაზრისით სერიოზული შედეგები. თუ ჩვენ არ ვიქნებით ფრთხილად, კონფლიქტს აქვს პოტენციალი გააძლიეროს დაძაბულობა საზოგადოებაში და ექსტრემიზმი.

და ბოლოს, არსებობს მიგრაციისა და დიდი რაოდენობით ხალხის გადაადგილების მაღალი რისკი მეზობელ ქვეყნებში, რომლებმაც უკვე მიიღეს ლტოლვილების მნიშვნელოვანი რაოდენობა. თუ ფრთხილად არ მოხდება პროცესების გაანალიზება, მაშინ არსებობს ევროპისკენ მიგრაციის შემდგომი ტალღების მაღალი რისკი. აუცილებელია, ყველა ამ გამოწვევას ერთად გადავხედოთ. ჩვენი ერთობა ჩვენი ძალაა“, – განაცხადა მიშელმა.

გერმანია ისრაელიდან თავისი მოქალაქეების სამხედრო თვითმფრინავებით ევაკუაციას იწყებს. მედიის ინფორმაციით, გერმანიის არმია ისრაელიდან თავის მოქალაქეებს სამხედრო თვითმფრინავებით გაიყვანს.

გერმანული საინფორმაციო სააგენტოს ცნობით, გერმანიიდან ისრაელის მიმართულებით ამაღამ ორი A400M სამხედრო თვითმფრინავი მიემგზავრება  ისრაელის 100 000-ზე მეტ მაცხოვრებელს აქვს გერმანიისა და ისრაელის ორმაგი მოქალაქეობა.

„ჰამასის“ ლიდერი ისმაილ ჰანიე აცხადებს, რომ პალესტინელები არ დატოვებენ ღაზას ან დასავლეთ სანაპიროს და არ გადავლენ ეგვიპტეში. ეს განცხადება „ჰამასის“ ლიდერმა მას შემდეგ გააკეთა, რაც ისრაელის არმიამ ღაზის ჩრდილოეთ ნაწილის მცხოვრებლებს სამხრეთით ევაკუაციისკენ მოუწოდა.

„არ იქნება ღაზის დატოვება და არ იქნება დასავლეთ სანაპიროს დატოვება. არ მოხდება ღაზიდან ეგვიპტეში გადასვლა“, – განაცხადა „ჰამასის“ ლიდერმა.

სხვა არაბულ ქვეყნების მსგავსად, ეგვიპტე აცხადებს, რომ პალესტინელებუ თავიანთ მიწებზე უნდა დარჩნენ და რომ ის მუშაობს ღაზის სექტორში ჰუმანიტარული დამხარების მიწოდების უზრუნველსაყოფად.

„მივმართავ ჩვენს ძმებს ეგვიპტეში: ჩვენი გადაწყვეტილებაა ჩვენს მიწაზე დარჩენა“, – განაცხადა ჰანიემ სატელევიზიო მიმართვისას.

ევროკავშირში აცხადებენ, რომ ღაზას სექტორისთვის ჰუმანიტარულ დახმარებას სამჯერ გაზრდის. ამის შესახებ „ბიბისი“ იტყობინება.

„ევროკავშირი უკვე არის ყველაზე დიდი უცხოელი დონორი პალესტინელი ხალხისთვის“, – აღნიშნულია ინფორმაციაში.

ევროკომისიის პრეზიდენტის ურსულა ფონ დერ ლაიენის თქმით, გაეროსთან მჭიდრო თანამშრომლობა მიმდინარეობს, რათა ღაზას სექტორში მყოფ მშვიდობიან მოსახლეობას დახმარება გაუწიონ.

„ჰუმანიტარული დახმარების გასამმაგება ხელს შეუწყობს იმის უზრუნველყოფას, რომ ღაზაში მყოფი მშვიდობიანი მოქალაქეები უზრუნველყოფილი იყვნენ ძირითადი საჭიროებებით“, – თქვა კრიზისების მართვის კომისარმა იანეზ ლენარეიმ.

ომი, რომელიც ახლა დაიწყო ისრაელ-„ჰამასის“ შორის, დიდი ხნის მომზადებული ომია, – ამის შესახებ „ქრონიკას“ საზოგადოებრივი ორგანიზაცია „პოლიტიკური არჩევანის“ დამფუძნებელმა, რომან კაკულიამ განუცხადა.

„დღეს, მსოფლიოს დიდი ნაწილი ისრაელის მხარეს არის. ეს არ არის კონფლიქტი, რომელიც მოგვარდება ომის გარეშე, ამ კონფლიქტის მშვიდობიანი მოგვარება უკვე გამორიცხულია. მაგრამ, მილიარდზე მეტია მოსახლეობის რაოდენობა იმ ქვეყნებში, რომლებიც ახლა ისრაელს უპირისპირდებიან. ისრაელს ამერიკის დახმარების იმედია აქვს, მაგრამ როგორც უკრაინის შემთხვევაში, ამერიკამ გამოხატა პოზიცია, რომ მისი სამიზნე, დაახლოებით 2027 წლისთვის არის ჩინეთი და მისი რესურსები მობილიზებული უნდა იყოს იქითკენ, დღეს ამას ვერ იტყვის. რომ წარმოვიდგინოთ, რომ ეს ომი 6 თვის განმავლობაში გაიწელა, რესურსების დიდი ნაწილი აღმოჩნდება იმათ სასარგებლოდ, რომლებიც მილიარდიანი ქვეყნები არიან.

თუ ეს კონფლიქტი მალე ვერ მოგვარდა, მაშინ დღის წესრიგში დგება, რომ გლობალური სამხრეთის გადაწყობა მივიდეს საბოლოო წერტილამდე. ამას დასჭირდება ბევრი დრო იმისათვის, რომ ის ძალები, რომლებიც მსოფლიოს ახალი ფორმატის შექმნაზე ლაპარაკობენ, უნდა მოახერხონ კონცენტრირება აზია-წყნარი ოკეანის ტერიტორიაზე. ამ შემთხვევაში ისრაელის პრობლემა იქნება ძალიან რთული პრობლემა. მთელი მილიარდიანი მოსახლეობა მას დაუპირისპირდება. ამერიკა ვერ შეძლებს ხანგრძლივ ვადიან პერიოდში ისეთი ტიპის მხარდაჭერა აღმოუჩინოს ისრაელს, რომელიც დღეს სახეზეა“, – აღნიშნა რომან კაკულიამ.

აშშ-ის სახელმწიფო მდივანმა კონგრესმენები გააფრთხილა, რომ უახლოეს კვირებში აზერბაიჯანი შესაძლოა სომხეთში შეიჭრას. ამის შესახებ Politico წყაროებზე დაყრდნობით წერს.

როგორც მათ გამოცემას უთხრეს, ენტონი ბლინკენმა ეს თემა დემოკრატი კონგრესმენების მცირე ჯგუფთან 3 ოქტომბერს, ტელეფონით განიხილა.

სახელმწიფო მდივანმა და კანონმდებლებმა განიხილეს ზომები, რომელიც აშშ-მ შეიძლება საპასუხოდ მიიღოს. კერძოდ, ბლინკენმა განაცხადა, ვაშინგტონი ბაქოს სამხედრო დახმარებას შეუწყვეტს.

როგორც Politico წერს, სახელმწიფო დეპარტამენტში ამ თემაზე კომენტარის გაკეთებაზე უარი განაცხადეს, თუმცა ხაზგასმით აღნიშნეს, რომ აშშ მხარს უჭერს სომხეთის სუვერენიტეტსა და ტერიტორიულ მთლიანობას.

გაეროს ბავშვთა ფონდის (UNICEF) მონაცემებით, გასული შაბათის შემდეგ ღაზის სექტორში 700-ზე მეტი ბავშვი დაიღუპა, 2450 კი დაშავდა.

„ბავშვების მკვლელობა უნდა შეწყდეს“, – განაცხადა UNICEF-ის პრესსპიკერმა, ჯეიმს ელდერმა.

დღეს ისრაელის თავდაცვის არმიამ („ცახალი“) ღაზას მოსახლეობას სექტორის სამხრეთისკენ ევაკუაციისკენ კიდევ ერთხელ მოუწოდა და უსაფრთხო საევაკუაციო მარშრუტების რუკა გამოაქვეყნა.

სარაკეტო დარტყმა ისრაელზე 7 ოქტომბერს, ადგილობრივი დროით 06:30 საათზე განხორციელდა. მომხდარზე პასუხისმგებლობა ტერორისტულმა ორგანიზაცია „ჰამასმა“ აიღო. ორგანიზაციაში ისრაელის წინააღმდეგ ახალი სამხედრო ოპერაციის დაწყების შესახებ განაცხადეს. ისრაელის თავდაცვის ძალებმა „ომისთვის მზადყოფნის მდგომარეობა“ გამოაცხადა და ღაზას სექტორში „ჰამასის“ ობიექტებზე იერიში დაიწყო.