არ შეგვიძლია პროევროპელი ქართველების 80% მარტოდ მივატოვოთ მიტაცებულ რეჟიმთან ბრძოლაში, – ამის შესახებ ევროპარლამენტარი ვიოლა ფონ კრამონი “ტვიტერის” პირად გვერდზე წერს.

“საქართველოს კონსტიტუციის პატივისცემის მიუხედავად, პრეზიდენტი ზურაბიშვილი პრორუსული მთავრობის მიერ განხორციელებული იმპიჩმენტის პროცედურის წინაშე დგას.

არ შეგვიძლია პროევროპელი ქართველების 80% მარტოდ მივატოვოთ მიტაცებულ რეჟიმთან ბრძოლაში. საქართველოს მომავალი ევროკავშირში რჩება”, – წერს ფონ კრამონი.

მისივე თქმით, საქართველოს პრეზიდენტი ისჯება ევროპული ძალისხმევისთვის იგი „ ისჯება ოლიგარქისა და მისი ჩინოვნიკების მიერ“.

„ხუთი თვის წინ, საქართველოს პრეზიდენტი, სალომე ზურაბიშვილი მტკიცედ იდგა აქ, მისი ქვეყნის ევროპული მომავლის დასაცავად. პრეზიდენტი ზურაბიშვილი აკეთებს იმას, რის გაკეთებაზეც საქართველოს ხელისუფლება უარს ამბობს. აახლოებს თავის ქვეყანას ევროკავშირთან. პრეზიდენტი, რომელიც თავის ხალხის მსგავსად, სისხლით ხორცამდე ევროპელია, მკაცრად იცავსკონსტიტუციის 78-ე მუხლს: მიიღოს ყველა ზომა ევროპის კავშირში საქართველოს სრული ინტეგრაციის უზრუნველსაყოფად. ამ ძალისხმევისთვის იგი ახლა ისჯება ოლიგარქისა და მისი ჩინოვნიკების მიერ.

ძვირფასო კოლეგებო. განგაშით გამცნობთ, საქართველო ოდესღაც ევროპული იმედის სხივი, ახლა სწრაფად მიემართება ავტორიტარული პრორუსული მმართველობისკენ. სასამართლო და კანონის უზენაესობა დარღვეულია და ახლა იარაღად არის გამოყენებული იმ ფარსში, რომელსაც იმპიჩმენტს ეძახიან. ჩვენ არ შეგვიძლია და ხელს არ ჩავიქნევთ საქართველოზე, არ დავტოვებთ საქართველოს 80 პროცენტზე მეტს მარტო ჩრდილოვანი რეჟიმის პირისპირ. საქართველო გახდება ევროპული კავშირის წევრი“, – განაცხადა კრამონმა.

მადლობელი ვართ, რომ საქართველო ჩვენ გვერდით დგას როგორც პოლიტიკურ, ოფიციალურ დონეზე, ისე ადამიანურ, მეგობრულ დონეზე, – ამის შესახებ საქართველოში ისრაელის ელჩმა, ჰადას მეიცადმა განაცხადა.

როგორც ელჩმა აღნიშნა, საქართველოს მხარდაჭერა ძალიან ძლიერია.

„პირველივე დღიდან იყო საჯარო დაგმობა, სოლიდარობა, რომლიც დადასტურდა საჯაროდაც და პირად შეხვედრებზეც, რომელიც მქონდა პრემიერ-მინისტრთან, პრეზიდენტთან, სხვადასხვა მინისტრებთან, პარლამენტის სპიკერთან. დღეს მქონდა სხვა შეხვედრები პარლამენტში ისრაელი-საქართველოს მეგობრობის ჯგუფის წევრებთან, რომელსაც გივი მიქანაძე ხელმძღვანელობს. ჩვენ მადლობელი ვართ, რომ საქართველო ჩვენ გვერდით დგას როგორც პოლიტიკურ, ოფიციალურ დონეზე, ისე ადამიანურ, მეგობრულ დონეზე“, – განაცხადა ელჩმა.

თქვენ მე თქვენს ხელისუფლებაში გეშლებით. კეზერაშვილი, რომელიც მართლა მათხოვარი მოვიდა ხელისუფლებაში და მილიარდერი წავიდა და ასევე, კარგად მახსოვს თქვენი ლიდერიც, რა ქონებით მოვიდა და რა ქონებით წავიდა მისი ოჯახი, – ამის შესახებ თავდაცვის მინისტრმა, ჯუანშერ ბურჭულაძემ პარლამენტის პლენარულ სხდომაზე განაცხადა, რითაც მის შვილთან დაკავშირებით „ლელოს“ დეპუტატის, სალომე სამადაშვილის მიერ დასმულ კითხვას უპასუხა.

მინისტრის თქმით, გავრცელებული ინფორმაცია, რომ მის შვილს რუსეთის მოქალაქესთან ერთად ბიზნესი აქვს, მოგონილი ტყუილია და ცილისწამებაზე სასამართლოში სარჩელიც აქვს შეტანილი.

„ეს იყო ცილისწამება ჩემს წინააღმდეგ. მე ამაზე სარჩელიც მაქვს შეტანილი. კონკრეტული ფიზიკური პირისგან ვითხოვ ბოდიშს. თქვენი მეგობრები იმალებოდნენ სარჩელის არმიღებაზე რამდენიმე თვე. ბოლოს მიიღეს. მე არ პროცესს, რა თქმა უნდა, მოვიგებ, იმიტომ, რომ ეს იყო აბსოლუტურად მოგონილი ტყუილი. რაც შეეხება დედაჩემს – არ მინდა ამაზე ვისაუბრო, მითუმეტეს, ამ ტრიბუნიდან, მაგრამ ერთი ხელშეკრულების ფარგლებში, თქვენი ხელისუფლების დროს, ერთი ნასყიდობით აქვს რამდენიმე მილიონი აღებული. ის, რომ შპს-ში დედაჩემი იყოს მონაწილე… რამდენიმე შპს-ს დამფუძნებელი და დირექტორია. ეს ხდება ოღონდ 1995 წლიდან. თქვენ გეშლებით მე თქვენს ხელისუფლებაში. კეზერაშვილი, რომელიც მართლა მათხოვარი მოვიდა ხელისუფლებაში და მილიარდერი წავიდა და ასევე, კარგად მახსოვს თქვენი ლიდერიც რა ქონებით მოვიდა და რა ქონებით წავიდა მისი ოჯახი. თუ ვინმეს რამე საშუალება ჰქონდა, მათ შორის, 90-იან წლებში, ყველაზე დიდი ქონების პრივატიზაცია რუსთაველის გამზირზე მოხდა ჩემი ოჯახის მიერ. ასე რომ ეს საკითხი ძალიან გთხოვთ, დახურეთ. კიდევ ვიმეორებ, ბოდიშის მოხდაც მოუწევს თქვენს მეგობარს ტელევიზიიდან. ამას აუცილებლად მივაღწევთ“, – განაცხადა მინისტრმა.

ცნობისთვის, „ლელოს“ დეპუტატმა, სალომე სამადაშვილმა ჯუანშერ ბურჭულაძეს ასე მიმართა: „მაინტერესებს თქვენ, როგორც ამ ქვეყნის თავდაცვის მინისტრი, ქვეყნის, რომლის 20% რუსეთის მიერ არის ოკუპირებული, არ გრცხვენიათ და არ გერიდებათ, რომ თქვენს შვილს რუსეთის მოქალაქესთან ერთად ბიზნესი აქვს და რუსულ აბანოებს აშენებს ჩვენს ქვეყანაში? უკეთესი ბიზნესი თქვენმა შვილმა ვერ იშოვა?“

პარლამენტის მიერ იუსტიციის უმაღლესი საბჭოს წევრების არჩევა მეხის გავარდნა იყო ოღონდ „ნაცმოძრაობისთვის“. იცით, პარადოქსი რა არის? ასეთი მანევრებით რომ გვიწევს ევროპული რეკომენდაციის ერთ-ერთი პუნქტის შესრულება, ამაში ხელს გვიშლის რადიკალური ოპოზიცია, – ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ განაცხადა.

მდინარაძის თქმით, მმართველმა გუნდმა რადიკალური ოპოზიციისგან დამოუკიდებლად მოახერხა რეკომენდაციის შესრულება.

„წინა შემთხვევაში თანაგუნდელების მიმართ როგორი ბულინგი და საბოტაჟი იყო, გახსოვთ? ეს მხოლოდ იმიტომ მოხდა, რომ მათ მხარი დაუჭირეს ევრორეკომენდაციის შესრულებას. ეს პუნქტი სრულად დღეს შევასრულეთ და დავხურეთ. რაც შეეხება დღევანდელ კენჭისყრას, 85 ხმა ჩვენ გვქონდა და კარტებს გავშლი. ჩვენ გიორგი სოსიაშვილის პარლამენტში შემოსვლას ველოდებოდით. ფარული კენჭისყრა ხმის დაცულობას ნიშნავს და თქვენ გაინტერესებთ, ვინ მისცა ხმა იმისათვის, რომ ეს ადამიანი დააბულინგოთ, არასწორია. არ ვიცი, ვინ მისცა ხმა და თქვენთან ერთად ჭორაობას არ ვაპირებ. ვისზეც ეჭვი მაქვს, რომ ხმა მისცა, არ გეტყვით და თქვენს ყბაში არ ჩავაგდებ ბულინგისთვის“, – განაცხადა მდინარაძემ.

პარლამენტმა იუსტიციის უმაღლესი საბჭოს ორი არამოსამართლე წევრი აირჩია.

სალომე ზურაბიშვილი თავს ისაწყლებს და იიმედებს, სინამდვილეში, არც მოსაწყლების და არც იმედის საფუძველი აქვს, რადგან იცის, რომ კოლექტიური „ნაცმოძრაობა“ მხარს არ დაუჭერს იმპიჩმენტს, ასევე, „ოცნება“ მაგრად იქნება შემდეგი ოთხი წელიც და კიდე იმის შემდეგი ოთხი წელიც, – ამის შესახებ „ქართული ოცნების“ თავმჯდომარემ, საპარლამენტო უმრავლესობის ლიდერმა, ირაკლი კობახიძემ ჟურნალისტებს განუცხადა.

კობახიძის თქმით, „ქართული ოცნება“ არა მარტო 2024 წლის არჩევნების მოგებას, არამედ 2028-შიც აპირებს საპარლამენტო არჩევნებში გამარჯვებას.

„რაც შეეხება სალომე ზურაბიშვილს, არავითარი სამართლებრივი არგუმენტი – პირდაპირ თქვა, სირცხვილია, სამარცხვინოა. უზრდელობაა, როცა არგუმენტების გარეშე ასეთი ეპითეტებით მიმართავ საკონსტიტუციო სასამართლოს, როგორც ინსტიტუტს და მან თქვა, რომ ეს ინსტიტუტი აღარ ჰყავს ქვეყანას. ამას აკეთებს საქართველოს პრეზიდენტი. რით განსხვავდება ის სალომე სამადაშვილისგან ან ლევან ხაბეიშვილისგან? არაფრით, არც გუბაზ სანიკიძისგან განსხვავდება. თავს ისაწყლებს და იიმედებს, სინამდვილეში, არც მოსაწყლების და არც იმედის საფუძველი აქვს, რადგან ერთი – იცის, რომ კოლექტიური „ნაცმოძრაობა“ მხარს არ დაუჭერს იმპიჩმენტს და მეორე – „ოცნება“ მაგრად იქნება შემდეგი ოთხი წელიც და კიდე იმის შემდეგი ოთხი წელიც. კიდევ ერთხელ გავიმეორებ, ჩვენ არა მარტო 2024-ში ვაპირებთ არჩევნების მოგებას, 2028-შიც ვაპირებთ, რომ საპარლამენტო არჩევნებში გავიმარჯვოთ“, – აღნიშნა ირაკლი კობახიძემ.

საქართველოს პრეზიდენტმა, სალომე ზურაბიშვილმა საკონსტიტუციო სასამართლოს გადაწყვეტილებასთან დაკავშირებით გუშინ განაცხადა: „ისეთი დასკვნა დადო საკონსტიტუციო სასამართლომ, რომლისაც უნდა რცხვენოდეს. ყველა მოსამართლეს, რომელმაც ხელი მოაწერა, უნდა რცხვენოდეს“.