ამერიკის პრეზიდენტის მიერ მიხეილ ყაველაშვილისთვის გაგზავნილ წერილს მიესალმება „ქართული ოცნება“. მმართველ გუნდში ამბობენ, რომ გზავნილში ნათლად ჩანს განწყობა, რაც ქვეყნებს შორის დადებითი მიმართულებით, ურთიერთობების გადატვირთვის წინაპირობა უნდა გახდეს.

პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარის, გივი მიქანაძის განცხადებით, ეს გზავნილი მიუთითებს პრეზიდენტ ტრამპისა და მისი ადმინისტრაციის განწყობას, რომ ითანამშრომლოს საქართველოს მთავრობასთან.

“ეს არის მნიშვნელოვანი გზავნილების შემცველი მოლოცვა, რომელიც ცალსახად მიუთითებს პრეზიდენტ ტრამპისა და მისი ადმინისტრაციის განწყობაზე, რომ ითანამშრომლოს საქართველოს მთავრობასთან. უნდა ველოდოთ იმ გადატვირთვის კომპონენტს, რაზედაც არაერთხელ, საჯაროდ განვაცხადეთ. ვფიქრობთ, ეს იქნება უმნიშვნელოვანესი დასაწყისი ორმხრივი ურთიერთობების პოზიტიურ დინამიკაში განვითარებაში”, – განაცხადა გივი მიქანაძემ.

საქართველოს პრეზიდენტს ქვეყნის დამოუკიდებლობის დღე ტრამპმა გუშინ, დღის ბოლოს მიულოცა. ტექსტში ასევე ნათქვამი იყო, რომ ამერიკის „ადმინისტრაცია ერთგულია, განამტკიცოს საქართველოს მთავრობასთან მშვიდობიანი და ნაყოფიერი ურთიერთობები.“ „სამომავლოდ ველოდები ჩვენს ქვეყნებს შორის ეკონომიკური კავშირების გაღრმავებას სამართლიანი ვაჭრობის მხარდაჭერისა და ორმხრივი თანამშრომლობის არეალის გაფართოების გზით“ – წერს ამერიკის პირველი პირი ქართველ კოლეგას.

დღეს ვართ დამოუკიდებელი, როგორც არასდროს, შეგვიძლია, თავად განვსაზღვროთ საკუთარი ბედი და აღარ ვართ დამოკიდებული იმ მანკიერ განზრახვებზე, რაც შეიძლება გარედან ჰქონდეთ ჩვენი ქვეყნის მიმართ. არ დავუშვებთ არავითარ პრინციპულ კომპრომისებს დამოუკიდებლობისა და სუვერენიტეტის ხარჯზე, – ამის შესახებ საქართველოს პრემიერ-მინისტრმა, ირაკლი კობახიძემ პირველი არხის გადაცემაში „აქტუალური თემა“ განაცხადა.

მთავრობის მეთაურმა აღნიშნა, რომ ქვეყანამ დამოუკიდებლობის აღდგენის შემდეგ რთული გზა გაიარა, მათ შორის იყო ოთხი ომი და სისხლიანი ავტორიტარიზმის, აგენტურის მმართველობა, რომელმაც ქვეყანას სუვერენიტეტი დააკარგვინა, თუმცა „ქართულმა ოცნებამ“ ქვეყანას სუვერენიტეტი დაუბრუნა და დღეს საქართველო არის დამოუკიდებელი საკუთარ გადაწყვეტილებებში.

„გასული 35 წელი იყო ძალიან რთული ჩვენი ქვეყნისთვის, იყო ოთხი ომი – სამოქალაქო ომი, აფხაზეთში ომი, ცხინვალის რეგიონში ომი, შემდეგ კიდევ ერთი ომი 2008 წელს და ეს ყველაფერი დამოუკიდებლობის აღდგენიდან პირველი 20 წლის განმავლობაში გამოიარა ჩვენმა ქვეყანამ, ამის გარდა იყო სხვადასხვა ტიპის პრობლემები. თავიდან საკმაოდ მყიფე იყო ხელისუფლება, რადგან ახალი ჩამოყალიბებული იყო და არც დასცალდა შედგომა, როდესაც მოხდა ხელისუფლების გადატრიალება 1991 წლის ბოლოს. შემდეგ იყო შევარდნაძის ხელისუფლება, იქაც იყო თავისი პრობლემები და ამის შემდეგ, 2003 წლის რევოლუციის საფუძველზე, რომელიც სწორედ „დიფ სთეითმა“ მოაწყო გარედან, საქართველოში ჩამოყალიბდა სისხლიანი ავტორიტარიზმი, ქვეყანამ დაკარგა სუვერენიტეტი. რეალურად, ქვეყანას ჰყავდა გარედან დანიშნული ხელისუფლება ცხრა წლის განმავლობაში და ამან უმძიმესი პრობლემები გამოიწვია. კიდევ ერთხელ გავიხსენოთ – ეს იყო ადამიანების მკვლელობა, წამება, ეს იყო ბიზნესის რეკეტი, ტელევიზიების მიტაცება, ტოტალური მედიამონოპოლია, ჩვენი ქვეყნის ტერიტორიების 20%-ის დაკარგვა, ეს არის მხოლოდ მცირე ჩამონათვალი იმ პრობლემებისა, რომლებიც საქართველოში აგენტურის მმართველობამ გამოიწვია. თუმცა 2012 წლის შემდეგ ჩვენ დავიბრუნეთ სუვერენიტეტი. თავდაპირველად ეს სუვერენიტეტიც იყო ძალიან მყიფე და გახსოვთ პირველი რვა წელიწადი, მას შემდეგ რაც „ქართული ოცნება“ მოვიდა ხელისუფლებაში, ჩვენ გვიწევდა უამრავ კომპრომისზე წასვლა იმის გამო, რომ უნდა გვევლო ბეწვის ხიდზე. ძალიან ბევრი მტკივნეული გადაწყვეტილება იქნა მიღებული, მათ შორის იყო ე.წ. კოჰაბიტაცია, რომელიც მთლიანად გარედან იყო თავს მოხვეული „დიფ სთეითის“ მიერ. მაშინ, როდესაც იყო საუბარი დამნაშავეების დასჯაზე, პირდაპირ სახელები და გვარები იყო, რომ ეს შეგიძლია დაიჭირო, ეს არ შეგიძლია დაიჭირო. პირდაპირ გვარები ჰქონდა ჩამოწერილი მაშინ „დიფ სთეითს“ და ამას აკეთებდნენ ევროპული და ამერიკული ბიუროკრატიის ხელით.

აღალი რანგის პოლიტიკოსები, ჩინოვნიკები პირდაპირ გამოდიოდნენ ამერიკიდან და ევროპიდან და გვიკრძალავდნენ დამნაშავეების დასჯას. ასევე, იყო კოალიცია და ამ კოალიციაში დიდი დოზით იყვო წარმოდგენილი „დიფ სთეითის“ აგენტურა. ასე გამოვიარეთ პირველი ოთხი წელი, შემდეგ ასევე რთული იყო მომდევნო ოთხი წელი და, საბოლოო ჯამში, ბოლო ოთხი წელი იყო გადამწყვეტი ბრძოლა დამოუკიდებლობისა და სუვერენიტეტისთვის. ეს იყო საკვანძო ფაზა ამ ბრძოლაში და ჩვენ მოვახერხეთ, თვისებრივად, სუვერენიტეტის მოპოვება ჩვენი ქვეყნისთვის. დღეს ხედავთ, რომ ვართ ნამდვილად დამოუკიდებელი, როგორც არასდროს, შეგვიძლია, დამოუკიდებლად განვსაზღვროთ საკუთარი ბედი და აღარ ვართ დამოკიდებული ამ მანკიერ განზრახვებზე, რაც შეიძლება გარედან ჰქონდეთ ჩვენი ქვეყნის მიმართ. პატარა ქვეყანა ვართ და, რა თქმა უნდა, ანგარიშის გაწევაც მოგვიწევს ბევრი რამისთვის, მაგრამ ჩვენი მხრიდან არ იქნება დაშვებული რაიმე პრინციპული კომპრომისები, პირველ რიგში, დამოუკიდებლობისა და სუვერენიტეტის ხარჯზე“, – აღნიშნა პრემიერმა.

ჩვენი გუნდის განზრახვაა, რომ საგამოძიებო კომისიის საფუძველზე მოვამზადოთ სარჩელი, რომელიც შევა საკმაოდ მალე საკონსტიტუციო სასამართლოში და ვფიქრობთ, ყველანაირი საფუძველი იქნება მომზადებული, რათა კოლექტიური „ნაცმოძრაობა“, მასთან დაკავშირებული პარტიები, გამოცხადდეს არაკონსტიტუციურად საკონსტიტუციო სასამართლოს მიერ, – ამის შესახებ საქართველოს პრემიერ-მინისტრმა ირაკლი კობახიძემ პირველი არხის გადაცემაში – „აქტუალური თემა“ განაცხადა.

როგორც მთავრობის მეთაურმა აღნიშნა, სისხლიანმა რეჟიმმა ცხრა წლის განმავლობაში შეიწირა ათი ათასობით ადამიანის სიცოცხლე, ჯანმრთელობა და კეთილდღეობა, უშუალოდ შეეხო ათი ათასობით ადამიანს ეს რეჟიმი.

„150 ახალგაზრდა მარტო ქუჩაში მოკლეს, პირდაპირ საჩვენებელ მკვლელობებს აწყობდნენ შუა ქუჩაში, ციხეებში 140-ზე მეტი ადამიანი კვდებოდა წლის განმავლობაში. რომ ავიღოთ 2010-2011 წლების სტატისტიკა, 140-ზე მეტი ადამიანი კვდებოდა და სტატისტიკა საშუალოდ 20-ს ჩამოსცდა, როგორც კი ხელისუფლება შეიცვალა. ეს პირდაპირ ნიშნავს იმას, რომ 100-ზე მეტ ადამიანის მარტო ციხეებში კლავდნენ ყოველწლიურად, ამ დონის რეჟიმი იყო ჩამოყალიბებული. ბიზნესის რეკეტი პირდაპირ შეეხო ათი ათასობით ადამიანს, დაახლოებით ათი ათასმა კაცმა სახელმწიფოს აჩუქა თავის ქონება. მედიასთან დაკავშირებით ჩემზე კარგად გახსოვთ ყველაფერი რა ვითარება იყო, ომი დაიწყეს 400-ზე მეტი ადამიანი, ჯარისკაცი და სამოქალაქო პირი შეეწირა მათ მიერ დაწყებულ ომს. უამრავ ადამიანს მარტო სიცოცხლის დაკარგვის დონეზე შეეხო ეს რეჟიმი რომ არაფერი ვთქვათ ჯანმრთელობასა და კეთილდღეობაზე და ნერვებზე. დღეს რეალურად ვიხსენებთ იმას, რაც ყველას გვახსოვდა, უბრალოდ ემოციურ დონეზე გვქონდა მივიწყებული, ამიტომ ძალიან მნიშვნელოვანია ის პროცესი, რომელიც წარიმართება საგამოძიებო კომისიაში. კიდევ ერთხელ იკრიბება ფაქტები, რომლებიც საფუძვლად უნდა დაედოს საკონსტიტუციო სასამართლოში შეტანილ სარჩელს, ეს არის მთლიანად ჩვენი გუნდის განზრახვა, რომ ამ პროცესის საფუძველზე მოვამზადოთ სარჩელი, რომელიც შევა საკმაოდ მალე საკონსტიტუციო სასამართლოში. ვფიქრობთ, ყველანაირი საფუძველი იქნება მომზადებული, რათა კოლექტიური „ნაცმოძრაობა“, მასთან დაკავშირებული პარტიები, გამოცხადდეს არაკონსტიტუციურად საკონსტიტუციო სასამართლოს მიერ.

ვფიქრობ, რომ ოთხივე პარტიაზე უნდა გავრცელდეს, ამას გვიჩვენებს პროცესი, როდესაც მომზადდება შესაბამისი სარჩელი, მერე წარიმართება პროცესი სასამართლოში. ვფიქრობ, რომ წინასწარი ჩემი ანალიზი მაძლევს იმის თქმის საშუალებას, რომ თავისუფლად არის შესაძლებელი, ეს შედეგი გავრცელდეს კოლექტიურ „ნაცმოძრაობასთან“ მოაზრებულ ოთხივე პარტიაზე – ეს არის „ნაცმოძრაობა“, „ახალი“, რა განსხვავებაა „ახალსა“ და „ნაცმოძრაობას“ შორის? ერთი პარტიაა ორად გაყოფილი. ასევე რაც შეეხება „ლელოს“, ამ პოლიტიკური პარტიის წარმომადგენლები პირდაპირ იყვნენ ჩართული უმძიმეს ქმედებებში. რაც შეეხება გახარიას, დღესაც ოთხ მუნიციპალიტეტში აქვს შექმნილი კოალიცია იმ პარტიასთან, რომელიც მაშინ სისხლიან რეჟიმს ხელმძღვანელობდა“, – განაცხადა კობახიძემ.

მისივე თქმით, ეს პარტიები პირდაპირ თანამშრომლობენ უცხოურ ძალებთან იმისათვის, რომ ზიანი მიაყენონ საქართველოს და ქვეყნის მოსახლეობას.

რაც მთავარია, ეს პარტიები, ყველა ერთად დღეს არიან ჩართული ანტიკონსტიტუციურ საქმიანობაში ჩვენი ქვეყნის წინააღმდეგ, არც მალავენ ამას, პირდაპირ დადიან დერეფნებში და ითხოვენ ქვეყნის დასჯას, დასანქცირებას, ათასი ტიპის შეზღუდვის შემოღებას და ეს ხომ ხელის გულზე დევს. პირდაპირ ხომ უპირისპირდებოდნენ კანდიდატის სტატუსის მიღებას. დღესაც ხომ აღშფოთდნენ ტრამპის წერილთან დაკავშირებით არც აშშ-თან დაახლოება უხარიათ, არც კანდიდატის სტატუსი უხარიათ, პირიქით უპირისპირდებიან ამ ყველაფერს. ეკონომიკასთან დაკავშირებით ერთმანეთის მიყოლებით საუბრობდნენ, რომ წელს ჩამოიქცეოდა ეკონომიკა და საშუალო ზრდა გვაქვს პირველი კვარტლის ცხრა პროცენტზე მეტი, ეს პირდაპირ ხელის გულზე დევს. პირდაპირ თანამშრომლობენ უცხოურ ძალებთან იმისათვის, რომ ზიანი მიაყენონ ჩვენს ქვეყანას, ქვეყნის მოსახლეობას, ეს ყველაფერი იძლევა საფუძველს იმისათვის, რომ ამ პარტიების არაკონსტიტუციურად გამოცხადებასთან დაკავშირებით შევიტანოთ სარჩელი საკონსტიტუციო სასამართლოში“, – განაცხადა პრემიერ-მინისტრმა.

მე მგონია, რომ საქართველოში ამერიკის შეერთებული შტატების ელჩს, რობინ დანიგანს სურდა საქართველოს დამოუკიდებლობის დღისადმი მიძღვნილ ღონისძიებაში მონაწილეობა, თუმცა აქაც ჩაერია „დიფ სთეითის” ხელი და აშშ-ის ელჩის გარეშე ჩაიარა ამ ღონისძიებამ, – ამის შესახებ საქართველოს პრემიერ-მინისტრმა ირაკლი კობახიძემ პირველი არხის გადაცემაში – „აქტუალური თემა” განაცხადა.

როგორც მთავრობის მეთაურმა აღნიშნა, ნებისმიერ ელჩს უნდა, რომ სრულფასოვნად შეასრულოს საკუთარი დიპლომატიური ფუნქციები შესაბამის ქვეყანაში და ეროვნული დამოუკიდებლობის დღისადმი მიძღვნილ ღონისძიებაზე დასწრება, ამ კუთხით ერთ-ერთი მნიშვნელოვანი აქტია.

„მე მგონია, რომ მას ძალიან ენდომებოდა ამ ღონისძიებაში მონაწილეობა. რა შეიძლება იყოს ელჩისთვის უფრო მნიშვნელოვანი, ვიდრე შესაბამისი სახელმწიფოს დამოუკიდებლობის დღის აღნიშვნა ქვეყნის ცენტრალურ მოედანზე, თუმცა ხედავთ, რომ რაღაც გამოგონილი საბაბით – ჯერ გვითხრეს, რომ თბილისში არ იყო, შემდეგ საჯაროდ თქვეს, რომ ქვეყანაში არ იყო, აქაც პირდაპირ ჩანს „დიფ სთეითის” ხელი, რაც აიძულებს კონკრეტულ ადამიანებს, რომ მიიღონ ისეთი გადაწყვეტილებები, რომლებიც ახსნადი არ არის, რაციონალური ახსნა ამ ყველაფერს არ აქვს. მე ვარაუდი გამოვთქვი, მე მგონია, რომ მას სურდა პიროვნულად, ვიცნობ მას და დადებითი წარმოდგენა მაქვს, მე მგონია, რომ მას სურდა ამ ღონისძიებაში მონაწილეობა, თუმცა აქაც ჩაერია „დიფ სთეითის” ხელი და ხედავთ, რომ ამერიკის ელჩის გარეშე ჩაიარა ამ ღონისძიებამ”, – განაცხადა პრემიერ-მინისტრმა.

თუ ვინმე უპირისპირდება საქართველოს დასავლურ გზას, ეს არის სწორედ რადიკალური ოპოზიცია, – ამის შესახებ საქართველოს პრემიერ-მინისტრმა ირაკლი კობახიძემ პირველი არხის გადაცემაში – „აქტუალური თემა” განაცხადა.

მთავრობის მეთაურის შეფასებით, ტრამპის წერილთან დაკავშირებით ოპოზიციის რეაქცია იყო სრული ისტერიკა.

„თქვენ ნახეთ ოპოზიციის რეაქციები  ამ წერილთან დაკავშირებით – სრული ისტერიკა. სახე დაკარგეს საერთოდ, როდესაც კომენტარებს აკეთებდნენ ამ წერილთან დაკავშირებით. უბრალოდ სასაცილოები გახდნენ თავიანთ კომენტარებში, იმდენად არაადეკვატურები იყვნენ. ეს ყველაფერი აჩვენებს იმას, რომ საბოლო ჯამში, ორთაბრძოლა გრძელდება და იმედი უნდა დავიტოვოთ, სწორედ ტრამპის ადმინისტრაცია გაიმარჯვებს Deep State-ზე. ეს თუ ასე არ მოხდება, ამ შემთხვევაში პრობლემები დარჩება, სამწუხაროდ, მაგრამ დავიტოვოთ იმედი, რომ გაიმარჯვებს ტრამპის ადმინისტრაცია და ასეთ შემთხვევაში გვაქვს ყველანაირი რესურსი იმისა, რომ თვისებრივად გაჯანსაღდეს ჩვენი ურთიერთობები.

კიდევ ერთხელ ხაზს გავუსვამ ოპოზიციის ისტერიკას. მუდმივად საუბარი აქვთ იმაზე, რომ ჩვენ რაღაც კურსი შევიცვალეთ, არ გვინდა ამერიკისკენ, არ გვინდა ევროპისკენ და ა.შ. ამ დროს, დღეს შემოვიდა წერილი, რომელიც იძლევა იმის იმედს, რომ შეიძლება გაჯანსაღდეს ქართულ-ამერიკული ურთიერთობები. ისტერიკა რატომ უნდა მოჰყვეს შენი მხრიდან ასეთ წერილს, ხომ გაუგებარია, მაგრამ ამაზე მეტიც გვახსოვს გასული წლებიდან, პირდაპირ კამპანიას აწარმოებდნენ კანდიდატის სტატუსის წინააღმდეგ. პირდაპირ აცხადებდნენ, რომ ქვეყანა არ იმსახურებდა კანდიდატის სტატუსს და ა.შ. სინამდვილეში, თუ ვინმე უპირისპირდება საქართველოს დასავლურ გზას, ეს არის სწორედ რადიკალური ოპოზიცია. დღესაც ხომ ვერ დამალეს საკუთარი ემოციები. არის რაღაც წერილი, რომელიც საფუძველს ქმნის ურთიერთობების გაჯანსაღებისთვის და ამის გამო ვერ დამალეს საკუთარი უარყოფითი ემოციები. გასაგებია რაშიც არის საქმე. მათ აინტერესებთ ერთადერთი რამ და ეს არის Deep State-ის დავალებების შესრულება. ამიტომ, რაღაცნაირად ცოტათი გაუხარდათ გუშინდელი წერილი და დღევანდელ წერილს მოჰყვა მათი ძალიან მძიმე რეაქცია და გაგულისება”, –  განაცხადა პრემიერ-მინისტრმა.

ჩვენ ვიცით, ჩვენ რა გვინდა და რას ვთავაზობთ ამერიკულ მხარეს – ჩვენი მოწოდებაა, განვაახლოთ სუფთა ფურცლიდან სტრატეგიული პარტნიორობა და გვინდა, კონკრეტული გზამკვლევით განახლდეს სტრატეგიული პარტნიორობა, – ამის შესახებ საქართველოს პრემიერ-მინისტრმა ირაკლი კობახიძემ პირველი არხის გადაცემაში – „აქტუალური თემა” განაცხადა.

მთავრობის მეთაურის თქმით, საუბარია გზამკვლევზე, სადაც ასახული იქნება სარგებელი ორივე მხარისთვის.

„მანამდე იყო თაროზე შემოდებული, ქაღალდზე არსებული სტრატეგიული პარტნიორობა ყოველგვარი შედეგების გარეშე, ახლა ვთავაზობთ რადიკალურად განსხვავებულ, უკეთეს რამეს პრეზიდენტ ტრამპის ადმინისტრაციას – ეს არის სუფთა ფურცლიდან და კონკრეტული გზამკვლევით სტრატეგიული პარტნიორობის განახლება”, – განაცხადა პრემიერ-მინისტრმა.

ირაკლი კობახიძემ აშშ-ის მხრიდან გავრცელებული პირველი წერილი შეაფასა და აღნიშნა, რომ ეს იყო „დიფ სთეითის” წერილი, საიდანაც, ყველაფერთან ერთად, ქედმაღლობაც გამოსჭვიოდა.

„ამ ქედმაღლობას არავითარი საფუძველი არ აქვს. მესმის, რომ საქართველო არის პატარა ქვეყანა და აშშ-ი არის ძალიან დიდი ქვეყანა, მაგრამ გვამადლიან ისეთ რამეს, რაც ბუნებაში არ მომხდარა. გვამადლიან, რომ ქვეყანა საერთოდ არ იარსებებდა, რომ არა ე.წ დახმარება, რასაც ჩვენ ვიღებდით ამერიკის მხრიდან. სინამდვილეში, მათემატიკურად გადავთვალეთ, რა სარგებელი მიიღო შეღავათების სახით ამერიკულმა მხარემ ჩვენგან და აქ საუბარია ძირითადად ავღანეთის და ერაყის მისიებში მონაწილეობაზე. თუ დავთვლით მათემატიკურად, ფინანსურად იმ შეღავათებს, რომლებიც ჩვენ გავუწიეთ ამერიკულ მხარეს და თუ შევადარებთ იმ დახმარებას, რომელსაც რეალურად ვიღებდით აშშ-დან, ჩვენი შეღავათი არის ფინანსურად დაახლოებით 5-ჯერ და შეიძლება 10-ჯერ მეტიც. დახმარებაში ჩვენ ვერ ჩავთვლით იმ თანხებს, რომლებიც იქნა გაღებული სააკაშვილის გადასარჩენად, ეს იყო 2008-2011 წლებში ეკონომიკაში ჩასხმული ფული. სხვა წლებში კაპიკი არ ჩაუსხამთ ეკონომიკაში და დახმარებაში ვერ ჩავთვლით ენჯეოებზე გამოყოფილ ფულს. პრეზიდენტ ტრამპის ადმინისტრაციამაც დაადასტურა ის, რომ ეს იყო არა დახმარება, არამედ პირიქით, უკუშედეგის მომტანი. თქვენ რომ წარმოიდგინოთ ამ ყველაფრის გარეშე ჩვენი ქვეყნის განვითარება, რომ არ იყო თუნდაც ამ ოთხი წლის განმავლობაში რევოლუციის ითხი მცდელობა, რომ არ ყოფილიყო ვარდების რევოლუცია, რომელმაც სისხლიანი რეჟიმი მოიყვანა ხელისუფლებაში და რად დაუჯდა ჩვენს ქვეყანას, ძალიან კარგად გვახსოვს, ეს რეჟიმი. ყველაფერს რომ თავი დავანებოთ, იყო ბიზნესის რეკეტი, რაც, ბუნებრივია, ეკონომიკის განვითარებას აფერხებდა. უამრავი ადამიანის სიცოცხლედ დაუჯდა ეს რეჟიმი და ა.შ. ამიტომ, ეს არ იყო დახმარება, პირიქით, ეს იყო ისეთი თანხები, რომელიც პირდაპირ იყო მიმართული საქართველოს უკუსვლისკენ. შესაბამისად, კიდევ ერთხელ რომ შევადაროთ ერთმანეთს დახმარება და ჩვენი მხრიდან გაწეული შეღავათები, ჩვენს მხარეს არის უპირატესობა და დისბალანსი დადებითი კუთხით. ამიტომ, ქედმაღლობას არ აქვს არავითარი საფუძველი”, – განაცხადა პრემიერ-მინისტრმა.

რაც შეეხება წერილებს, ირაკლი კობახიძის შეფასებით, დიფ სთეითის მიერ დაწერილ წერილს არავითარი ფასი არ აქვს.

„ასეთ ამერიკულ წერილებს ვერ ექნება ვერავითარი ფასი, რაც გუშინ შემოვიდა სახელმწიფო დეპარტამენტის ხელმოწერით. რაც შეეხება პრეზიდენტ ტრამპის წერილს, ამას აქვს ჩვენთვის ძალიან დიდი ფასი და კიდევ ერთხელ მადლობა მინდა გადავუხადო პრეზიდენტ ტრამპს ამ მილოცვისთვის”, – აღნიშნა პრემიერმა.

ეკონომიკა, სიღარიბის დაძლევა, სოციალური მდგომარეობის გაუმჯობესება, ეს არის ჩვენი უმთავრესი ამოცანა, – ამის შესახებ საქართველოს პრემიერ-მინისტრმა ირაკლი კობახიძემ პირველი არხის გადაცემაში – „აქტუალური თემა” განაცხადა.

პრემიერის თქმით, თუ  ამ ტემპით გაგრძელდება ეკონომიკის ზრდა,  უკვე საშუალოვადიან პერსპექტივაში ქვეყანა შესაძლოა მიუახლოვდეს ევროკავშირის საშუალო დონეს, ეკონომიკური განვითარების კუთხით.

„რაც შეეხება ეკონომიკას, ბოლო ოთხი წლის განმავლობაში სწრაფად იზრდება ჩვენი ეკონომიკა. დოლარში საქართველოს ეკონომიკა, სულ მოსახლეზე გაორმაგდა და კიდევ უფრო მეტად გაიზარდა. მხოლოდ ამ ოთხი წლის განმავლობაში გვქონდა უპრეცედენტო ეკონომიკური ზრდა და ჩვენი მთავარი ამოცანა ამ ზრდის შენარჩუნებაა. ჯერ კიდევ ჩამოვრჩებით ევროპულ ქვეყნებს, კეთილდღეობის დონით, მაგრამ თუ გავაგრძელებთ ამ ტემპით ეკონომიკის ზრდას, ჩვენ უკვე საშუალოვადიან პერსპექტივაში შეიძლება მივუახლოვდეთ ევროკავშირის საშუალო დონეს, ეკონომიკური განვითარების კუთხით და შესაბამისად, სოციალური პირობებიც შეიძლება რადიკალურად გაუმჯობესდეს ჩვენს ქვეყანაში. ჩვენი პროგრამული მიზნების მიხედვით, ჩვენი ამოცანაა, სიღარიბის უმუშევრობის შემცირება მაქსიმუმ 4%-მდე. არც ერთმა მაჩვენებელმა არ უნდა გადააჭარბოს 4%-ს. როგორც ახლა მივდივართ, ეს არის აბსოლუტურად მიღწევადი 2028 წლისთვის. ეკონომიკა, სიღარიბის დაძლევა, სოციალური მდგომარეობის გაუმჯობესება, ეს არის ჩვენი უმთავრესი ამოცანა“, – განაცხადა პრემიერმა.

ჩვენ ძალიან მოხარული ვართ, რომ აშშ-ის პრეზიდენტის ადმინისტრაციიდან შემოვიდა ასეთი წერილი, სადაც პირდაპირ არის გამოხატული ღიაობა თანამშრომლობის მიმართ, – ამის შესახებ საქართველოს პრემიერ-მინისტრმა ირაკლი კობახიძემ პირველი არხის გადაცემაში – „აქტუალური თემა” პრეზიდენტ ტრამპის მიერ საქართველოს პრეზიდენტისთვის გაგზავნილი მილოცვის კომენტირებისას განაცხადა.

მთავრობის მეთაურის შეფასებით, საქართველოს მთავრობა სწორედ ამას ითხოვდა, როგორც დახურული, ისე – ღია წერილით.

„საინტერესოა, რომ ამ ორი დღის განმავლობაში ვიხილეთ ორი ერთმანეთისგან განსხვავებული წერილი, ერთი გამოიგზავნა სახელმწიფო დეპარტამენტიდან და მეორე გამოიგზავნა პრეზიდენტის ადმინისტრაციიდან. პირველი წერილი იყო დაწერილი დიფ სთეითის მიერ და მეორე წერილი შედგენილი იყო პრეზიდენტ ტრამპის ადმინისტრაციაში. რადიკალური განსხვავებაა და ეს უკვე აჩვენებს იმ ორთაბრძოლას, დაპირისპირებას, რაც წარიმართება ახალ ადმინისტრაციასა და დიფ სთეითს შორის. სხვანაირად შეუძლებელია იმის ახსნა, თუ როგორ შეიძლება ასეთი რადიკალურად განსხვავებული წერილები შემოვიდეს საქართველოში. ერთი წერილი პრაქტიკულად არ აღიარებდა ხელისუფლებას, გამომდინარე იქიდან, რომ ადრესატი იყო პირდაპირ ხალხი, მაშინ, როდესაც გვერდი აუარეს ხალხის მიერ არჩეულ ხელისუფლებას და ამ დროს პრეზიდენტ ტრამპის მხრიდან შემოვიდა წერილი პრეზიდენტ ყაველაშვილის სახელზე, რომლის ადრესატი პირდაპირ არის საქართველოს ხელისუფლება, პრეზიდენტი მიხეილ ყაველაშვილი და იქ პირდაპირ იყო საუბარი საქართველოს მთავრობასთან თანამშრომლობის განვითარებაზე. ეს დუბლირება ერთი და იგივე ხელისუფლების მხრიდან პირდაპირ წარმოაჩენს იმ დაპირისპირებას, რომელიც ახლა წარიმართება ტრამპის ადმინისტრაციასა და დიფ სთეითს შორის. ჩვენ, რა თქმა უნდა, ძალიან მოხარული ვართ, რომ აშშ-ის პრეზიდენტის ადმინისტრაციიდან შემოვიდა ასეთი წერილი, სადაც პირდაპირ არის გამოხატული ღიაობა თანამშრომლობის მიმართ და ჩვენ ამას ვითხოვდით. ჩვენ ვისაუბრეთ დახურულ წერილზე და შემდეგ გავაგზავნეთ ღია წერილი პრეზიდენტ ტრამპის მიმართ. სულისკვეთება იყო ერთი და იგივე”, – განაცხადა პრემიერ-მინისტრმა.