ულტიმატუმებს და მუქარებს არავის გავუტარებთ, საქართველო რჩება ევროსაბჭოს წევრად, უბრალოდ უარი ვთქვით მუშაობაზე, ვიდრე ჩვენი ქვეყნის ინტერესების დაშანტაჟება ხდება, – ამის შესახებ პარლამენტის დიასპორის საკითხთა კომიტეტის თავმჯდომარე ირაკლი ზარქუამ განაცხადა.

მისივე თქმით, „ქართულ ოცნებას“ ლეგიტიმაცია მილიონ ასი ათასზე მეტმა ამომრჩეველმა არჩევნების საშუალებით მიანიჭა.

„ევროსაბჭომ აღიარა ლეგიტიმაცია და ბუნებრივია, ჩვენ არც გვჭირდებოდა ვინმეს აღიარება. მილიონ ასი ათასზე მეტმა ამომრჩეველმა ჩვენ ლეგიტიმაცია მოგვცა და ეს იყო ჩვენთვის უზენაესი. თუმცა, მიუხედავად ამისა, საერთაშორისო ორგანიზაციების თუ ცალკეული ქვეყნების აღიარებები მისასალმებელია. ნახეთ ადგილობრივი უსამშობლოები ვინც გვყავს, ე.წ. ოპოზიცია, ქართული სახელმწიფოს წინააღმდეგ. უკრაინელ გონჩარენკოებთან ერთად, როთებსა და გონჩარენკოებს ვეძახი ამათ. გონჩარენკო ხომ იცით ვინც არის, პარტია არ არის დარჩენილი, რომ გამოვლილი არ ჰქონდეს უკრაინის რადაში. დაწყებული ჯერ იანუკოვიჩთან იყო, შემდეგ პრეზიდენტთან, ახლა ამ პრეზიდენტთან, მერე გალახეს, მერე სცემეს, მერე გააპანღურეს, მერე ისევ უკან დაუბრუნდა. ასეთი ადამიანი ჰყავდათ ამათ სპიკერად და პარტნიორად.

გონჩარენკოები ხართ თქვენ, თავიდან ბოლომდე, რომელიც საკუთარი სამშობლოს წინააღმდეგ დღენიადაგ იბრძვით. თქვენ არ გაინტერესებთ ქართული ინტერესები, ქართველი ხალხის დაკვეთა. ხარობდით იქ, რომ თურმე როგორ აშანტაჟებენ ქართულ სახელმწიფოს, როგორ ემუქრებიან, მაგრამ კოვზი ნაცარში ჩაგეყარათ. გამორიცხულია, ამას არ გაგიტარებთ. ჩვენ ვართ ღირსეული ქვეყნის შვილები, ჩვენ ულტიმატუმებს და მუქარებს არავის გავუტარებთ, რადგან უფლებამოსილება ქართველმა ხალხმა მოგვცა არჩევნებზე მხარდაჭერით. მხოლოდ ღირსებით და სახელმწიფო ინტერესების დაცვით. როგორც კი გაიაზრებს ამას ევროსტრუქტურები, შემდეგ უკვე ჩვენ დავუბრუნდებით და გავაგრძელებთ მუშაობას. იცით თქვენ, რომ საქართველო რჩება ევროსაბჭოს წევრად, უბრალოდ უარი ვთქვით, ვიდრე ჩვენი ქვეყნის ინტერესების დაშანტაჟება ხდება“, – განაცხადა ზარქუამ.

ზუსტად სამი წლის წინ, 2022 წლის 1-ელ თებერვალს, ომამდე თითქმის ერთი თვით ადრე საქართველოს პარლამენტმა  „უკრაინაში შესაძლო სამხედრო ესკალაციის შესახებ“ რეზოლუცია მიიღო, რომელსაც რადიკალურმა ოპოზიციამ მხარი არ დაუჭირა იმ მიზეზით, რომ ის რუსეთის მიმართ საკმარისად აგრესიული არ იყო, – ამის შესახებ საქართველოს პარლამენტის თავმჯდომარე შალვა პაპუაშვილი სოცუიალურ ქსელში წერს.

მისი თქმით, სამი წლის გადმოსახედიდან, ყველა, ვინც ამ რეზოლუციას აკრიტიკებდა და მომდევნო კვირებში მთავრობის საწინააღმდეგო აქციებს მართავდა, უკრაინაში მოხალისეების გაგზავნასა და რუსეთის მიმართ ორმხრივი სანქციების დაწესებას მოითხოვდა, დღეს პოტენციურად ან დატირებული იქნებოდა, ან დამტირებელი.

როგორც შალვა პაპუაშვილი წერს, დრომ დაადასტურა, რომ საქართველოს ხელისუფლების პოლიტიკას ალტერნატივა არ ჰქონდა და იგი ეროვნული ინტერესებით და გეოპოლიტიკის სწორი შეფასებით იყო ნაკარნახევი.

„ზუსტად 3 წლის წინ, 2022 წლის 1-ელ თებერვალს, ომამდე თითქმის ერთი თვით ადრე საქართველოს პარლამენტმა მიიღო „რეზოლუცია უკრაინაში შესაძლო სამხედრო ესკალაციის შესახებ“. რეზოლუციის მთავარი არსი უკრაინის მიმართ სოლიდარობის გამოხატვა, მისი სუვერენიტეტის პატივისცემის ხაზგასმა და, ყველაზე მთავარი, ომის არდაშვებისკენ მოწოდება იყო. რეზოლუციას რადიკალურმა ოპოზიციამ მხარი არ დაუჭირა იმ მიზეზით, რომ ის რუსეთის მიმართ საკმარისად აგრესიული არ იყო. ამ დღეებში ამერიკის სახელმწიფო მდივანმა, მარკო რუბიომ ასეთი ხალხის პოზიცია, რომლებიც ომის მოსალოდნელ კატასტროფულ შედეგებს პროპაგანდისტულად არბილებდნენ და მალავდნენ, შეაფასა, როგორც არაკეთილსინდისიერი. ქართული რეალობისთვის კი ამგვარი პოზიცია ღალატს უდრიდა. სამი წლის გადმოსახედიდან, ყველა, ვინც ამ რეზოლუციას აკრიტიკებდა და მომდევნო კვირებში საკუთარი მთავრობის საწინააღმდეგო აქციებს მართავდა, უკრაინაში მოხალისეების გაგზავნასა და რუსეთის მიმართ ორმხრივი სანქციების დაწესებას მოითხოვდა, დღეს პოტენციურად ან დატირებული იქნებოდა, ან დამტირებელი. დრომ დაადასტურა, რომ საქართველოს ხელისუფლების პოლიტიკას ალტერნატივა არ ჰქონდა და იგი ეროვნული ინტერესებით და გეოპოლიტიკის სწორი შეფასებით იყო ნაკარნახევი“, – წერს პარლამენტის თავმჯდომარე.

კოლექტიური „ნაციონალური მოძრაობის“ ანტისახელმწიფოებრივი საქმიანობა არამარტო ხელისუფლებაში, ოპოზიციაში ყოფნის დროსაც გაგრძელდა, რასაც პოლიტიკური შეფასება სჭირდება, როგორც ქვეყნის შიგნით, ისე გარეთაც, არსებობდეს იურიდიული, სამართლებრივი, პოლიტიკური შეფასების მქონე დოკუმენტი, – ამის შესახებ „ქართული ოცნების“ წევრმა, ირაკლი ქადაგიშვილმა განაცხადა.

მისი თქმით, საგამოძიებო კომისიის შექმნას 50 ხმა სჭირდება, „ქართულ ოცნებას“ კი, ხმების საკმარისი რაოდენობა აქვს.

„საგამოძიებო კომისია თანაბარი რაოდენობით კომპლექტდება, როგორც უმრავლესობის, ისე ოპოზიციის წარმომადგენლების მხრიდან. მიიღებს თუ არა ოპოზიცია მონაწილეობას, წინასწარ ამბობენ, რომ არ მიიღებენ მონაწილეობას. კიდევ ერთხელ კარგად ჩანს, დღეს ოპოზიცია არის კოლექტიური „ნაციონალური მოძრაობა“. ამბობენ, ჩვენ არ ვართ „ნაციონალური მოძრაობა“, ვემიჯნებით და ვგმობთო რა უკანონობა და უსამართლობა ხდებოდა საქართველოში 2003-2012 წლებში „ნაციონალური მოძრაობის“ მმართველობის დროსო. რეალურად კი, არანაირი სურვილი არ აქვთ, გამოძიებული იყოს ის, რასაც სიტყვიერად ამბობენ, და მოხდეს რეალური პოლიტიკური შეფასება“, – განაცხადა ირაკლი ქადაგიშვილმა.

მისი თქმით, კოლექტიური „ნაციონალური მოძრაობის“ ანტისახელმწიფოებრივი საქმიანობა არამარტო ხელისუფლებაში ყოფნის დროს, ოპოზიციაში ყოფნის დროსაც გაგრძელდა.

„კოლექტიური „ნაციონალური მოძრაობის“ ანტისახელმწიფოებრივი საქმიანობა არამარტო ხელისუფლებაში ყოფნის დროს, ოპოზიციაში ყოფნის დროსაც გაგრძელდა. ამ საკითხს, სულ მცირე, პოლიტიკური შეფასება სჭირდება, რომ საზოგადოებას, როგორც ქვეყნის შიგნით, ისე გარეთაც, ჰქონდეს იურიდიული, სამართლებრივი, პოლიტიკური შეფასების მქონე დოკუმენტი. საშინელება, რომელიც მართლა ხდებოდა საქართველოში 2003-2012 წლებში – ავტორიტარული რეჟიმის ჩამოყალიბება, რომელიც თავის თავში მოიცავდა არჩევნების მონოპოლიზაციას და გაყალბებას; მედიის სრული მონოპოლიზაცია და დაქვემდებარება ერთი მმართველობის, სარედაქციო პოლიტიკის ქვეშ; ბიზნესის სრული რეკეტი, ბიზნესის სრულად დამორჩილება; და რაც მთავარია, დიდი გეოპოლიტიკური ტრაგედია, რომელიც საქართველოს 2008 წლის ომის ოკუპაციის და ე.წ. აღიარების შედეგად უმძიმესი პოლიტიკური შედეგი დაუდგა. ამავდროულად იმ ათასობით და ათიათასობით ადამიანის უფლება, რომელიც ეკონომიკური, ადამიანის უფლებების, პოლიტიკური კუთხით იქნა შეზღუდული“, – განაცხადა ირაკლი ქადაგიშვილმა.

მისი თქმით, საგამოძიებო კომისიაში გამოუცხადებლობა კანონით გათვალისწინებულ სამართლებრივ ზომებს ითვალისწინებს.

„კომისიის მიერ გამოძახებული იქნება ყველა ის პირი, ვისაც კომისია ჩათვლის საჭიროდ ინფორმაციის მისაღებად. საპარლამენტო საგამოძიებო კომისიაში გამოუცხადებლობის შემთხვევაში კანონი ითვალისწინებს შესაბამის სამართლებრივ ზომებს. მაგალითად გუშინ, პოლონეთში სეიმის მიერ შექმნილ საგამოძიებო კომისიაში არ გამოცხადდა ერთ-ერთი ყოფილი ხელისუფლების მაღალჩინოსანი და ის დააკავეს, რადგან ყველა ქვეყანაში კანონი ამას ითვალისწინებს“, – განაცხადა ირაკლი ქადაგიშვილმა.

საგამოძიებო კომისიის მთავარი პრინციპი უნდა იყოს ის, რომ კოლექტიური „ნაცმოძრაობა“ ქართულ პოლიტიკას უნდა ჩამოსცილდეს, – განაცხადა „ხალხის ძალის“ აღმასრულებელმა მდივანმა, საპარლამენტო ოპოზიციის წევრმა, გურამ მაჭარაშვილმა.

მისივე თქმით, შესაბამისი მტკიცებულებების მოპოვება რთული არ იქნება, რადგან „ხელისგულზე დევს“.

„ხშირ შემთხვევაში ამის უბრალოდ თარგმნა დაგვჭირდება ინგლისურიდან ქართულზე, როდესაც საერთაშორისო სასამართლოები პირდაპირ აღიარებენ, რომ კოლექტიური „ნაცმოძრაობა“ იყო სისტემური დანაშაულის მქონე ხელისუფლება. ამის სტრასბურგის არაერთი გადაწყვეტილება არსებობს, რასაკვირველია, ქართულ მართლმსაჯულებასთან ერთად“, – განაცხადა მაჭარაშვილმა.

პარლამენტში საგაზაფხულო სესიის პირველივე კვირაში დარეგისტრირდება ინიციატივა დროებითი საგამოძიებო კომისიის შექმნის შესახებ, რომელიც „ნაციონალური მოძრაობის“ რეჟიმის დანაშაულებს შეისწავლის და 6 თვეში სამართლებრივ შეფასებას მოამზადებს.