ხალხი რუსთაველის გამზირზე ახალ სახელმწიფოს აშენებს. ყველა დანარჩენი თანმდევი პროცესია. ვგულისხმობ სანქციებს ვაშინგტონიდან, ბრიუსელიდან სტრასბურგიდან. ეს ყველაფერი არ გაჩერდება მანამ, სანამ არ ჩაინიშნება არჩევნები და ახალი დემოკრატიული ძალები არ მოვლენ ხელისუფლებაში, – ამის შესახებ კოალიცია „ცვლილებისთვის“ ერთ-ერთმა ლიდერმა, ნიკა მელიამ „ინტერპრესნიუსთან“ საუბრისას რუსთაველის გამზირზე განაცხადა, სადაც ამ წუთებში საპროტესტო აქცია მიმდინარეობს.

როგორც მელიამ აღნიშნა, ახალი ხელისუფლება, რომელიც ქვეყნის სათავეში მოვა, ძალიან მძიმე დაკვირვების ქვეშ იქნება სამოქალაქო საზოგადოების მხრიდან, რომელსაც მისივე შეფასებით, „ხალხი არც შეცდომების დაშვების შესაძლებლობას მიცემს და არც დაშვებულ შეცდომას აპატიებს“.

„არ ვიცი ამ პროცესის მიმდინარეობას, რომელიც ყოველდღეა, აქცია უნდა ვუწოდოთ თუ არა. ჩემი აზრით, ეს არის ახალი წესრიგი, რომელმაც დაარღვია ყველა ნეგატიური მითი ქართველების გარშემო რაც არსებობდა ისტორიულად, რომ ქართველები არიან ნიჭიერები, მაგრამ ზარმაცები, არადისციპლინირებულები, არამიზანდასახულები და ა.შ. გამოჩნდა, რომ ეს ასე არ არის. გამოჩნდა, რომ ახალი ქართული სამოქალაქო საზოგადოება შენდება და შესაბამისად, ის აშენებს ახალ ქართულ სახელმწიფოს. სხვადასხვა ხელისუფლებებმა, სხვადასხვა პერიოდში მეტნაკლებად სხვადასხვა ხარისხის მნიშვნელოვანი აგურები დადეს სახელმწიფოს შენების პროცესში, მაგრამ ეს აგურები ერთმანეთთან ვერ შეკავშირდა, არ იყო საკმარისად ძლიერი დუღაბი. ახლა სხვა ხარისხის პროცესია – ისტორიას და დროს რომ გაუძლებს ის მშენებლობა მიმდინარეობს. ხალხი აშენებს რუსთაველის გამზირზე ახალ სახელმწიფოს. ყველა დანარჩენი ამის თანმდევი პროცესია. ვგულისხმობ, ივანიშვილის რეჟიმის ფარგლებში სხვადასხვა დასანქცირებულ ადამიანს ვაშინგტონიდან, ბრიუსელიდან სტრასბურგიდან. ეს ყველაფერი არ გაჩერდება მანამ, სანამ არ ჩაინიშნება არჩევნები და ახალი დემოკრატიული ძალები არ მოვლენ ხელისუფლებაში, რომელიც იქნებიან ძალიან მძიმე დაკვირვების ქვეშ სამოქალაქო საზოგადოების მხრიდან მომავალში. ამათ არც შეცდომების დაშვების შესაძლებლობას მიცემენ და არც დაშვებულ შეცდომას აპატიებს მომავალ ხელისუფლებაში ვაითუ არამზადები მოვიდნენ“, – განაცხადა „ინტერპრესნიუსთან“ ნიკა მელიამ.

დარწმუნებული ვართ, რომ მას შემდეგ, რაც ტრამპის ადმინისტრაცია საკუთარ პოლიტიკას გაატარებს, აუცილებლად მოხდება ურთიერთობების გადატვირთვა, – ამის შესახებ პარტია „ხალის ძალის“ აღმასრულებელმა მდივანმა, გურამ მაჭარაშვილმა განაცხადა.

მისივე თქმით, ყველამ პატივი სცეს ამერიკელი ხალხის გადაწყვეტილებას, რომელმაც ტრამპი და მისი პოლიტიკა აირჩია.

„ჩვენ არაერთხელ გვითქვამს, რომ მზად ვიყავით და ვართ პარტნიორული ურთიერთობის გადატვირთვისთვის ამერიკასთანაც და ევროკავშირთანაც. ეს პერიოდი აუცილებლად დადგება 2025 წელს, რადგან ეს გადაწყვეტილება მიიღო ქართულმა საზოგადოებამ 26 ოქტომბერს და ამერიკულმა საზოგადოებამ 5 ნოემბერს. შესაბამისად, ჩვენ მოლოდინი გვაქვს, რომ უახლოეს დღეებსა და კვირებში აუცილებლად მოხდება ურთიერთობების გადატვირთვა.

რაც შეეხება ინდივიდუალურ ქმედებებს, ნაბიჯებს, ეს იქნება საკანონმდებლო ორგანოში თუ ცალკეული თანამდებობის პირების განცხადებები, რა თქმა უნდა, ეს აზიანებდა და აზიანებს პარტნიორულ ურთიერთობებს. ამერიკელი ხალხის გადაწყვეტილება შევა ძალაში და ტრამპის პოლიტიკა შეუდგება უკვე მოქმედი ადმინისტრაციის ჩამოყალიბებას. ამასთან, გაატარებს იმ პოლიტიკისა, რომელიც ჩვენი და მსოფლიოს ინტერესებშიცაა, უკრაინაში ომი დასრულდეს, აშშ რომ არ ერეოდეს სხვა ქვეყნის პოლიტიკაში და ა.შ. დარწმუნებული ვართ, რომ ამის შემდგომ აუცილებლად მოხდება გადატვირთვა ამ ურთიერთობების.

მანამდე კი, კიდევ ერთხელ ვიმეორებ, რომ ყველამ პატივი სცეს ამერიკელი ხალხის გადაწყვეტილებას, რომელმაც ტრამპი აირჩია პრეზიდენტად და არცერთი სხვა პირი ამერიკაში. ყველას ვთხოვთ, რომ პატივი სცენ უპირველესად ამერიკის საზოგადოების გადაწყვეტილებას და მიჰყვნენ იმ პოლიტიკას, რომელიც მიიღო ტრამპმა და რა პოლიტიკითაც ამერიკის საზოგადოებამ აირჩია თავისი პრეზიდენტი“, – აღნიშნა მაჭარაშვილმა.

ომს ანაცვალეს ყველა დემოკრატიული სტანდარტი და პატარა საქართველოს „მეგობრობის სახელით“ ბრძოლა გამოუცხადეს. მშვიდობის დამცველებს ადამიანის უფლებების დარღვევაში ადანაშაულებენ ყველგან, სადაც კი მათი უშუალო ინტერესები იზღუდება, – ამის შესახებ „ხალხის ძალის“ ერთ-ერთი ლიდერი დიმიტრი ხუნდაძე სოციალურ ქსელში წერს და კონგრესმენ ჯო უოლსონის მიერ სამ კონგრესმენთან ერთად კონგრესში ხელახლა დაინიცირებულ „მეგობრობის აქტს“ ეხმაურება.

ხუნდაძის თქმით, ქართველების ის მცირე ნაწილი, რომელსაც „გაღმიდან“ უმრავლესობას უწოდებენ, უნდა დაფიქრდეს და რეალობას თვალი გაუსწოროს.

„დაძაბულობის პიკში ასულ მსოფლიოს თუ ვერაფერი განმუხტავს, ის გადაიჩეხება. დღეს მსოფლიოს სწორედ იმ ნაწილში დგას უსამართლობის ზეიმი, რომელშიც კანონის უზენაესობა და სამართლიანობა მიმზიდველი იყო ბევრისთვის და, მათ შორის, ჩვენთვისაც.

ომს ანაცვალეს ყველა დემოკრატიული სტანდარტი და პატარა საქართველოს „მეგობრობის სახელით“ ბრძოლა გამოუცხადეს. მშვიდობის დამცველებს ადამიანის უფლებების დარღვევაში ადანაშაულებენ ყველგან, სადაც კი მათი უშუალო ინტერესები იზღუდება.

ტრამპს აშშ-ში ესროლეს, ფიცო სლოვაკეთში ჩაცხრილეს, საქართველოს პრემიერი „გააფრთხილეს“. ზელენსკი, რომელმაც, მათივე თქმით, ომში ფული იშოვა, გმირად გამოაცხადეს და ბიძინა ივანიშვილი, რომელმაც მშვიდობისთვის საკუთარი დახარჯა, დაასანქცირეს.

გერმანიაში პიროტექნიკით შეიარაღებული მომიტინგეები დამნაშავეები ყოფილან, საქართველოში კი – თავისუფლებისთვის მებრძოლი ხალხი. ვადაგასულ პრეზიდენტს, სალომე ზურაბიშვილს, ლეგიტიმაცია საჩუქრად უბოძეს და არჩეულ პრეზიდენტს – მიხეილ ყაველაშვილს არჩევის წესი დაუწუნეს.

ქართველების ის მცირე ნაწილი, რომელსაც „გაღმიდან“ უმრავლესობას უწოდებენ, უნდა დაფიქრდნენ და რეალობას თვალი გაუსწორონ. საკუთარი ქვეყნის რყევით, პიროტექნიკით, „მოლოტოვის კოექტეილების“ სროლით, ლანძღვით და ვერც შარდის ბუშტის საჯაროდ დაცლით სამშობლოზე ვერ იზრუნებენ.

არც ვინმეს თქვენი დარდი არ აქვთ და არც ჩვენი ევროკავშირში სწრაფი გაწევრიანება არ „ეპრიორიტეტებათ“. გვებრძვიან და გვიყენებენ საკუთარი ბრძოლის მოსაგებად, რომელიც თავად ჩიხში შეიყვანეს. ასე წააქეზეს უკრაინაც და დღეს მის პატრონობაზე უკვე ფეხს ითრევენ.

დაფიქრდით, თორემ თქვენთვისაც გვიან იქნება და უმრავლესობასაც გამოუსწორებელ შარში გახვევთ!“ – წერს ხუნდაძე.