Home Blog Page 14

ძალიან ბევრი წლის შემდეგ საქართველოში პირველად შემოვა რკინიგზის ვაგონები ევროპიდან – შალვა წაქაძე

კომპანია E60 Shipping Line-ს ახალი საბორნე გადაზიდვის მარშრუტი ვარნას მიმართულებით დაემატა. კომპანია, ასევე ახალი ხომალდის მოლოდინშია, რომელიც საქართველოში მომავალ კვირას შემოვა.

როგორც E60 Shipping Line-ის დირექტორი, შალვა წაქაძე “ჯორჯიან თაიმსთან“ საუბარში აცხადებს, საბორნე გადაზიდვებთან დაკავშირებული მათი მოლოდინები გამართლდა, დატვირთვა მაღალია და ამ ფონზე მიიღეს გადაწყვეტილება, რომ ახალი ბორანი შეეძინათ. მალე, კომპანიის საკუთრებაში ორი ბორანი იქნება  „აია“ და „დიოსკურია“, რომელიც საქართველოში მომავალ კვირას იქნება.

– როგორია საბორნე გადაზიდვების პერსპექტივა და ახალი ტვირთების მოზიდვის პოტენციალი, რა სამომავლო გეგმები აქვს კომპანია E60 Shipping Line-ს? -“ჯორჯიან თაიმსი”  კომპანიის დირექტორს შალვა წაქაძეს ესაუბრა.

შალვა წაქაძე- „ჩვენ დღეს ვოპერირებთ ორი გემით. ერთი დაქირავებულია, მეორე არის ჩვენი საკუთარი გემი “აია”. მას  ჰყავს სრულად ქართული ეკიპაჟი და დაცურავს საქართველოს დროშის ქვეშ.

ვოპერირებთ ფოთი-კონსტანცას მიმართულებით. ამ კვირაში პირველი რეისი შევასრულეთ ვარნიდან.  სამკუთხედზე წავედით,  ფოთი-კონსტანცა-ვარნა და გემი ისევ ფოთში შემოვა.

ფოტოზე: ბორანი AIA. ხომალდი  1995 წელს აშენდა, რომელიც E60 Shipping Line-მა შეისყიდა და გარემონტა 2024 წელს. ბორნის ეკიპაჟი მთლიანად საქართველოს მოქალაქეებისგან შედგება და თავად ბორანი ცურავს საქართველოს დროშის ქვეშ.

შემდეგი კვირაც ასეთი იქნება,  ვარნაში ჩვენს გემს, აქვს სარკინიგზო ხაზი, ეს არის სარკინიგზო ტიპის ბორნის გემი. ვარნაშიც არის სარკინიგზო ხიდი,  საიდანაც შეიძლება ვაგონების დატვირთვა გემზე, ისეთივე ტიპის, როგორიც არის ფოთსა და ბათუმში. ძალიან ბევრი წლის შემდეგ საქართველოში პირველად შემოვა რკინიგზის ვაგონები ევროპიდან

რა ტიპის ტვირთებზეა მოთხოვნა სარკინიგზო ვაგონებით გადაზდვებისას? ექსპორტი უფრო აქტიურია, იმპორტი, თუ ტრანზიტი?

– სხვა და სხვა ტიპის მოთხოვნებია, მოთხოვნა არის ძირითადად ნახშირ წყალბადებზე და ასევე სხვა და სხვა სახის ტვირთებზე.  არა საკონტეინერო,  რადგან კონტეინერი ვერ იყიდება დიდი მოცულობის გამო. ასეთი ტვირთები იქნება ჩვენი მიმართულება.

– თქვენ მეორე გემი უნდა შემოიყვანოთ, ასევე დაიწყეთ  ახალი ვარნა–ფოთის მარშრუტზე ოპერირება, ეს რეგულარული რეისები იქნება?

– საბორნე გადაზიდვებთან დაკავშირებული მოლოდინები გამართლდა, დატვირთვა მაღალია და ჩვენც მივიღეთ გადაწყვეტილება, რომ ახალი ბორანი გვეყიდა. ახალ ხომალდს შესაძლებლობა აქვს სარკინიგზო ვაგონებიც გადაზიდოს. შესაბამისად, ჩვენი რკინიგზაც დაუკავშირდება ევროპას.

ვარნა, უკვე დავამატეთ, აქ იქნება რეგულარული რეისები. ვარნა ძირითადად იქნება სარკინიგზო მიმართულება..

რაც შეეხება ახალ გემს, უკვე შეძენილია და მომავალ კვირაში უკვე სახელიც მიენიჭება “დიოსკურია”- ეს არის სამგზავრო სატვირთო ტიპის ბორანი. ასეთი ტიპის გემი, სადაც სამგზავროც ურევია პირველი იქნება ჩვენს დროშაზე.

– რა მოცულობის ტვირთის გადატანა და მგზავრების  გადაყვანა შეეძლება  “დიოსკურიას“?

– ეს ბორანი განკუთვნილია დაახლოებით 250 მგზავრზე და 80 სატვირთო მანქანაზე. პლუს 30 მანქანა ეტევა კიდევ.  მინდა გითხრათ, რომ საკმაოდ კომფორტული  გემია.   გემს დანიშნულების ადგილზე ჩასასვლელად მხოლოდ 40 საათი სჭირდება და ამ დროის განმავლობაში, მგზავრებს და მძღოლებს შესაძლებლობა ექნებათ განთავსდნენ კომფორტულ კაიუტებში და ისარგებლონ ბორტზე არსებული რესტორნით, ბარით, გასართობი სივრცით და Duty Free მაღაზიით.

– სანამ ამ საქმეს დაიწყებდით, ცხადია ბაზარიც შეისწავლეთ, იმისათვის რომ კონკურენტულიც იყოს ეს მიმართულება, სამგზავრო ტარიფებია თუა უკვე ცნობილი?

– ტარიფები ჯერ არა, მაგალითად გემი ვერასოდეს გაუწევს კონკურენციას თვითმფრინავს, როცა ადამიანს, უნდა თავისი კერძო მანქანით გაისეირნოს ევროპაში, ასეთ კატეგორიაზეა საუბარი და პირიქითაც ევროპელებიც აქეთ მოდიან ჩვენთან.

– აქამდე,  მსგავსი ტიპის სერვისზე მოთხოვნა შემოგდიოდათ?

– დიახ, მოთხოვნა იყო, როგორც ევროპის, ასევე ჩვენი მხრიდანაც. ახლა ზუსტად საახალწლოდ იწყება, ეს პერიოდი და შემდეგი პიკის დრო  არის ზაფხული.

–ტვირთბრუნვაზე, რომ ისაუბროთ ექსპორტი უფრო აქტიურია თუ იმპორტი? როგორი ტიპის იმპორტზე საუბარი, რომელიც საქართველოში რჩება თუ საუბარია ტრანზიტზე?

– რა თქმა უნდა, იმპორტი ჭარბობს, რაც შეეხება თვითონ იმპორტის სტრუქტურას, შეგვიძლია ვთქვათ, რომ 50/50-ზეა ქართულ-უცხოური.

– რაც შეეხება შუა დერეფნის მიმართულებას, რამდენად არის ჩართული თქვენი ოპერირება  შუა დერეფნის საკითხში?

– ჩართულები ვართ, პირდაპირ გეტყვით, რომ  “აია”, ახლა მოემართება საქართველოსკენ და მოყავს – ევროპა საქართველოში – რკინიგზის ვაგონები  და აქედანაც, ჩვენ წავიყვანთ საქართველოს ევროპაში.  საქართველოს და იმ რეგიონს, სადაც ჩვენ ვცხოვრობთ. ეს არის პირდაპირ ევროპასთან კავშირი და გადებული ხიდი.  ვარნას პორტი და კონსტანცას  პორტი, შუა დერეფნის ნავსადგურებია, ისევე, როგორც ფოთის და ბათუმის ნავსადგურები.

– პარტნიორებს, დამკვეთებს რაც შეეხება  თუ გაქვთ, რომელიმე ქვეყანასთან სერიოზული და მრავალწლიანი ხელშეკრულებები, უკვე იცით, რომ წლების განმავლობაში ეს ტვირთები ჩვენკენ წამოვა?

– კი, როგორ არა სარკინიგზო მიმართულებას, უნდა ძალიან სერიოზული მომზადება, როგორც დოკუმენტურად და  იურიდიულად ასევე ტექნიკურ და მარკეტინგულ დონეზე. ამის გაკეთება არ არის მარტივი.  ამ პროცესის მომზადებას დიდი დრო მოვანდომეთ. და შევძელით, რომ 15 აგვისტოს, ბულგარეთში ხელი მოეწერა – ბულგარეთის რკინიგზას, საქართველოს რკინიგზასა და ჩვენს  შორის შედგა სამმხრივი ხელშეკრულება, რომლის ფარგლებში ხდება სწორედ ჩვენი საქმიანობის განხორციელება და ვაგონების პირველი პარტიაც უკვე შემოდის საქართველოში.

შემდეგ აქედანაც წავა ვაგონები  და ნელ-ნელა სარკინიგზო მიმოსვლა შავ ზღვაზე აღდგება.

რაც შეეხება ტვირთბრუნვის გაზრდას, პარალელურად ვმუშაობთ ყველა პოტენციურ დამკვეთთან, მათ შორის ქვეყნის გარეთაც. ფაქტობრივად, ძალიან კარგი კავშირები დავამყარეთ შუა აზიურ მხარესთან, ყაზახეთთან, თურქმენეთთან და უზბეკეთთან, ევროპულ დიდ გადამზიდ კომპანიებთან.

– რა სიხშირეებით შესრულდება რეისები და  ასევე, როგორი იქნება მოძრაობა ამ სამკუთხედ სქემაში? 

– რეისი იქნება კვირაში ერთხელ.  რაც შეეხება  სამკუთხედს, ეს  არის დროებითი, როცა ჩვენი ახალი გემი შემოვა, “აიას”   პირდაპირ გადავრთავთ მთლიანად ვარნაზე და სარკინიგზო ტვირთებზე.  ახალი გემი კი იმოძრავებს  კონსტანცას მიმართულებით.

ვარნა,  ახლა პირველი რეისი სრულდება და  8 ვაგონით მოვდივართ, რაც არ არის ცოტა.  სპეც დანიშნულების ვაგონებია.

მაინც ძირითადი დატვირთვა კონსტანციდან მოგვაქვს, დროთა განმავლობაში. ეს დატვირთვა გადავა ვარნაზე და იქნება ძირითადად სარკინიგზო და არა საავტომობილო.  დღეს მაგალითად შერეული ტიპის ტვირთები  მოდის. ეს არის საავტომობილო ტვირთები, ასევე არაგაბარიტულიც მოაქვს, სარკინიგზოც და სხვა და სხვა წვრილი ტექნიკა.

 – ევროპულ ან თუნდაც აზიურ ბაზარზე ქართული დროშის ქვეშ მცურავი გემის მიმართ ნდობა როგორია, იყო შემთხვევა, როცა უცხოური კომპანიები სპეციალურად იღებდნენ ქართულ დროშას.

– როგორც ვიცი თურქები, განგებ კი არ იღებდნენ ქართულ დროშებს, ისინი იძულებული იყვნენ აეღოთ, ჩვენი კანონმდებლობით, ასეა და სწორიცაა, როცა  გემი ეკონომიკურ საქმიანობას ეწევა საქართველოს შიდა წყლებში, მას უნდა ჰქონდეს ქართული დროშა. თურქები, ამას იმიტომ აკეთებდნენ, რომ თევზჭერა მიდიოდა საქართველოს წყლებში და იღებდნენ ქართულ დროშას. იძულებული იყვნენ აეღოთ  სხვანაირად კანონმდებლობის ჩარჩოდან გავიდოდნენ.

რაც შეეხება ქართული დროშის ნდობას, აბსოლუტურად სანდოა.  ეს პრაქტიკამაც ანახა უკვე.   „აიას“ სრული ნდობა აქვს.   არის ასეთი გაერთიანება „1520 მმ-იანი რკინიგზა“, რომელსაც ვარშავაში აქვს ოფისი, მისი კოდი გვაქვს მონიჭებული, ასევე პარიზის კოდიც გვაქვს მონიჭებული. რაც იმას ნიშნავს, რომ ქართული დროშით „აია“ უკვე ცნო ევროპამ, როგორც სარკინიგზო ბორანი და კიდეც ახორციელებს გადაზიდვებს.

– იმ მცირე დროის განმავლობაში, რაც თქვენი კომპანია ბაზარზეა, რა იყო ჩანაფიქრი და რა არის დღეს თქვენი რეალობა, რამდენად გაამართლა ის  მოლოდინები, რაც  გქონდათ? 

– პირდაპირ გეტყვით, რომ გაამართლა.  ჩვენი საქმიანობის დაწყება იყო მრავალწლიანი დაკვირვების შედეგი, რამაც ამის გაკეთება გადაგვაწყვეტინა. როცა ჩვენ საქმიანობა დავიწყეთ, მთავარი იყო კონსტანცას მიმართულება და ყოველთვის მთავარ მიმართულებად დარჩება. თვითონ კომპანიის სახელი E60  – ეს არის ხაზი, რომელიც აკავშირებს ფოთს და კონსტანცას ერთმანეთთან.  ეს არის მთავარი. თავიდანვე ვფიქრობდით, კომპანიის განვითარებაზე. შევედით ბულგარეთის ერთ-ერთ პორტში, მომავალში ვაპირებთ სხვა პორტებშიც შესვლას, რა თქმა უნდა ვაპირებთ გეოგრაფიის  გაფართოებას. რაც შეიძლება  მეტი ნავსადგური დავაკავშიროთ ქართულ ნავსადგურებთან და შემოვზიდოთ ტვირთები.  სხვა ყველაფერს თავი, რომ დავანებოთ ეკოლოგიური თვალსაზრისითაც ძალიან ბევრი სიკეთე აქვს. ჩვენი მძღოლებიც ნელ-ნელა ეჩვევიან, რომ გემით მგზავრობა ჯობია საავტომობილო გზით მგზავრობას. რომელიც გაცილებით უსაფრთხოა. კომფორტია მძღოლისთვის.

 – რაც რუსეთ–უკრაინის ომის დროს შავ ზღვაში მინები მოხვდა, უცხოურ მედიაში ხშირად იწერებოდა, რომ შავი ზღვა არ არის უსაფრთხო. თქვენი ოპერირების მაგალითზე რა შეგიძლია თქვათ?

– შავი ზღვა აბსოლუტურად უსაფრთხოა. კი რაღაც მინების რაოდენობა დინებამ სამხრეთით წაიღო, მაგრამ დღეს შავი ზღვა ითვლება უსაფრთხოდ. არანაირი შემთხვევა არ ყოფილა, რომ რომელიმე გემი  მინას შეხებოდა და რამე უბედური შემთხვევა მომხდარიყო. ამიტომ ვიტყოდი, რომ აბსოლუტურად უსაფრთხოა.

– რა არის თქვენი კომპანიის კონკურენტული უპირატესობა, რატომ უნდა დაგიკვეთონ თქვენს კომპანიას, თქვენს გემებს  სერვისი და არა სხვას? 

– რას შევადარებდი ამას, კონკურენტი ვინ არის? კონკურენტი არის სახმელეთო გზა.  ორი გემით დავდივართ და სახმელეთო გზასთან შედარებით უამრავი უპირატესობა გვაქვს.  ჯერ მარტო უსაფრთხოებაზე, რომ ვისაუბროთ, წარმოიდგინეთ რამდენად უსაფრთხოა ჩვენი მომსახურება. ამხელა გზა, თურქეთის შემდეგ ბულგარეთი, რუმინეთის ნაწილი უნდა გაიაროს მანქანამ თუ ევროპაში მიდის. ამხელა ტერიტორიის გავლა რამდენად უსაფრთხოა,  გემზე ხარ ჩამქრალი ძრავით, ისვენებ შენს კაიუტაში, გამოდიხარ სამჯერადი კვება გაქვს უფასო. ისვენებ და ჩადიხარ დასვენებული. საწვავს არ წვავ, მანქანას ცვეთა არ აქვს. ეს არის ჩვენი უპირატესობები.

 – 1 წელში უკვე გყავთ ორი საკუთარი ბორანი, როგორია კომპანიის გეგმები  უახლესი  ორი წლის განმავლობაში, ინვესტიციების მოცულობა, რამდენი შეიძლება იყოს რა გათვლები გაქვთ.

– გათვლები რა თქმა უნდა გვაქვს, მაგრამ ინვესტიციების მოცულობაზე ცოტა ძნელია საუბარი, ფოთის გაზრდას ნამდვილად ვაპირებთ გააჩნია როგორი გემი შეგვხვდება, რამდენიმე მილიონზეა საუბარი. გადაზიდვის გეოგრაფიული არეალის ზრდასთან ერთად აუცილებლად გავიზრდებით.

ახალი გემი შევიძინეთ და „აიას“ გადმოვიყვანთ ახალ მიმართულებაზე, სარკინიგზო ტვირთებზე. კიდევ არის შანსი ბაზრის გაზრდის და თუ მისაღები იქნება ჩვენთვის შეიძლება კიდევ ავიყვანოთ ერთი გემი. გავძლიერდებით და კიდევ უფრო გავიზრდებით.

– მთავრობამ დააანონსა, რომ 2029 წელს  ანაკლიის ღრმაწყლოვანი პორტი, პირველ გემს მიიღებსო, თქვენი გეგმა, როგორია აპირებთ გადანაცვლებას ანაკლიაში?

– 2029 წლამდე დიდი დროა და ძნელია წინასწარ  რამის თქმა, მაგრამ დიდი სიამოვნებით ვიმუშავებდით ანაკლიიდან. გადაზიდვა, ხომ არ არის მარტო ნავსადგური. ნავსადგური არის ადგილი სადაც ტვირთი იცლება და იტვირთება გემზე. ნავსადგურის უკან უნდა იყოს ინფრასტრუქტურა. ისეთი როგორიცაა რკინიგზა, საავტომობილო გზა. როცა ანაკლიის ნავსადგური იქნება და იქ მივა თანამედროვე ტიპის გზა, რასაც ჩვენ ავტობანს ვეძახით. ასეთი ფუფუნება  თუ იქნება ძალიან კარგია ჩვენი ბიზნეს მიმართულებისთვის.

რუმინეთშიც იგივეა, მანქანა ნავსადგურიდან, რომ გამოდის დგება ავტობანზე და უკვე ევროპის ნებისმიერ წერტილში მიდის იმ ავტობანით. ანაკლია, ფაქტობრივად იმავეს გაიმეორებს, ოღონდ აქეთ მხარეს. წარმოიდგინეთ რამხელა უპირატესობა აქვს. ასევე ფოთის და ბათუმის ნავსადგურის უგულებელყოფაც არ შეიძლება. იქ ცალკეული ბიზნეს მიმართულებების განვითარება შეიძლება და არც იმას დავტოვებთ უყურადღებოდ.

ანაკლია რაც იქნება ეს არის ძალიან დიდი და საჭირო პროექტი. უმთავრესია ინფრასტრუქტურა, როგორიცაა ნავსადგურები, რკინიგზა, მისი გამტარუნარიანობა, საავტომობილო გზა. თუკი ეს ყველაფერი მწყობრში იქნება, ტვირთიც წამოვა ამ მიმართულებით

თიბისი ბიზნესის მხარდაჭერით “ალექსი ჩიქოვანის დიდი პოდკასტი” იწყება

12 ნოემბრიდან, თიბისი ბიზნესის მხარდაჭერით და აზროვნების აკადემიის ჩართულობით, სტრატეგიული ბრენდინგით დაინტერესებული პირებისთვის პოდკასტების სერია – “ალექსი ჩიქოვანის დიდი პოდკასტი” იწყება.  

კვირაში ერთხელ, კომპანია LIVE Branding-ის დამფუძნებელი, სტრატეგიული ბრენდინგის სპეციალისტი ალექსი ჩიქოვანი, რომელსაც ბრენდინგის, მარკეტინგისა და გაყიდვების სფეროში 20-წლიანი გამოცდილება აქვს, მოწვეულ სტუმრებთან ერთად, პრაქტიკულ მაგალითებზე განიხილავს, რა მნიშვნელობა აქვს სტრატეგიულ ბრენდინგს ბიზნესის წამოწყებასა და მის განვითარებაში.

პოდკასტების სტუმრები იქნებიან სხვადასხვა ქართული ბრენდის შემქმნელი, ცნობილი თუ საზოგადოებისთვის ნაკლებად ცნობილი ადამიანები, რომლებიც მსმენელებს საკუთარ გამოცდილებას გაუზიარებენ იმის შესახებ, თუ როგორ შეიქმნა მათი ბრენდი, რა გამოწვევებს  და სირთულეებს შეხვდნენ ამ გზაზე და როგორია მათი საქმიანობა დღეს.

პოდკასტების მოსმენა შესაძლებელი იქნება  ყოველ სამშაბათს, აზროვნების აკადემიის Youtube და Spotify გვერდებზე.

თიბისი ბიზნესისთვის ბიზნესგანათლების ხელმისაწვდომობა პრიორიტეტული მიმართულებაა, სწორედ ამ მიზანს ემსახურება პოდკასტების სერიების მხარდაჭერაც. ბიზნესების წარმომადგენლებს და ზოგადად, ბრენდინგით დაინტერესებულ ადამიანებს, საინტერესო და სასარგებლო ინფორმაციის მიღებასთან ერთად, შესაძლებლობა ექნებათ, წარმატებული ქართული ბრენდების მაგალითზე უფრო მეტი ისწავლონ და განვითარდნენ საკუთარ სფეროში.

“ალექსი ჩიქოვანის დიდი პოდკასტის” ანონსის ნახვა შესაძლებელია ბმულზე:

https://link.tbc.ge/Podcast

კრიზისი სახეზეა და ჩვენი მეგობრები აქ არიან, რომ ვნახოთ ის გზები, რითაც შეიძლება საქართველო გამოვიდეს ამ კრიზისიდან – პრეზიდენტი

კრიზისი სახეზეა და ჩვენი მეგობრები აქ არიან, რომ ვნახოთ, მოვიპოვოთ ის გზები, რითაც შეიძლება საქართველო გამოვიდეს ამ კრიზისიდან – ქვეყანა გამოვა ამ კრიზისიდან სამართლიანი ფორმით, დავუბრუნდებით ახალ არჩევნებს იმისთვის, რომ საქართველომ მიიღოს ლეგიტიმური პარლამენტი, – ამის შესახებ საქართველოს პრეზიდენტმა, სალომე ზურაბიშვილმა ევროკავშირის 8 ქვეყნის საგარეო ურთიერთობათა კომიტეტის თავმჯდომარეებთან შეხვედრის შემდეგ განაცხადა.

მისივე თქმით, ქართული საზოგადოება არის მართლაც ევროპული, თუმცა ხელისუფლება არ არის დემოკრატიული.

„ეს არის ქვეყანა, სადაც საზოგადოება არის მართლაც ევროპული, დემოკრატიული და სამწუხაროდ, რომელსაც არ ჰყავს დემოკრატიული ხელისუფლება, რომელსაც ჰყავს ერთპარტიული ხელისუფლება, რომელიც დაეუფლა, პრაქტიკულად, ამ ქვეყნის ინსტიტუტებს და შედეგი მივიღეთ ამ არჩევნებში. ეს არის ერთპარტიულად მართული არჩევნები, სხვა დახმარებებით, მაგრამ ერთპარტიულად მართული და ერთპარტიულად გაყალბებული არჩევნები. ამიტომაც არის, რომ ჩვენ შევდივართ კრიზისში.

ცენტრალური საარჩევნო კომისიის ხელმძღვანელის განცხადებებიდან გამომდინარე, ნათელი არის რა გადაწყვეტილებას მიღებს. აქ არანაირი მოულოდნელობა არ შეიძლება რომ იყოს. კრიზისი სახეზეა და ჩვენი მეგობრები აქ არიან, რომ ჩვენთან ერთად ვნახოთ, მოვიპოვოთ ის გზები, რითაც შეიძლება საქართველო გამოვიდეს ამ კრიზისიდან და გამოვა ამ კრიზისიდან მხოლოდ რაღაც მომენტში და რაღაც ფორმით, სამართლიანი ფორმით, დავუბრუნდებით ახალ არჩევნებს იმისთვის, რომ საქართველომ მიიღოს ლეგიტიმური პარლამენტი, ლეგიტიმური მთავრობა და ლეგიტიმური ახალი პრეზიდენტი, როცა ამის დრო მოვა. ეს არის ჩვენი გზა. ჩვენი გზა არის სტაბილურობის, დემოკრატიის და ევროპის გზა. სხვა გზა საქართველოსთვის არ არსებობს და ჩვენი მეგობრები, ვინც აქ არიან, ამაში არიან ჩვენთან ერთად ღრმად დარწმუნებული,“ – განაცხადა ზურაბიშვილმა.

210-კილომეტრიანი მოგზაურობა „დედამიწის ყველაზე ლამაზ ადგილზე” – რას წერს „ბი-ბი-სი” საქართველოს შესახებ

ბრიტანული სამაუწყებლო კომპანიის „ბი-ბი-სი“-ს (BBC) ვებ-გვერდზე გამოქვეყნებულია ვრცელი სტატია (ნარკვევი) სათაურით „210-კილომეტრიანი მოგზაურობა „დედამიწის ყველაზე ლამაზ ადგილზე“ (ავტორი – სუმია გაიატრი, წარმოშობით ინდოელი ჟურნალისტი).

გთავაზობთ პუბლიკაციას შემოკლებით:

საქართველოს სამხედრო გზა, რომლითაც ვაჭრები და დამპყრობლები უძველესი დროიდან სარგებლობდნენ, ტრადიციულად ადამიანებისათვის იდეების გამტარებელიც იყო.

ჩვენი ავტომანქანა ახლა სამხედრო გზაზე მიჰქრის, 210-კილომეტრიან მარშრუტზე, კავკასიის მთების მიხვეულ-მოხვეულ მაგისტრალზე. ჩვენ გვხვდება დიდებული ხეობები ხმაურიანი მდინარეებით, ლამაზი სოფლები, რომლებიც კლდეების პირას არიან გაშენებულნი. აქა-იქ ჰორიზონტზე ქართული მართლმადიდებელი ეკლესიების მიმზიდველი ცილინდრული გუმბათები მოჩანს, ხოლო ავტობუსის გაჩერებებზე ჯერ კიდევ შემორჩენილია საბჭოური დროის ფერადი მოზაიკა. ერთ-ერთ გაჩერებაზე არსებულ კაფეში მომღიმარე მზარეული ქართული ხინკლით სავსე თეფშს მაწვდის, ქვემოთ კი ცისფრად მოელვარე არაგვი მოჩანს.

„საკვირველია, მაგრამ ფაქტია – საქართველოს ამ ნაწილს ტურისტების მცირე ნაწილი თუ სტუმრობს… არადა, ეს არის დედამიწის ყველაზე ლამაზი და ჩემთვის საყვარელი ადგილი“, –  ამბობს ტაქსის მძღოლი მირიან თაკვარელია, რომელიც ადგილობრივ სამოგზაურო კომპანიას GoTrip Georgia-ს ჰყავს დაქირავებული საქართველოში უცხოელი ტურისტების მრავალდღიანი მოგზაურობისთვის, – „კავკასია რომ შეგიყვარდეს, საკმარისია აქ მხოლოდ ერთხელ ჩამოხვიდე და დაათვალიერო“.

როცა მირიანს ვეკითხები – დიდი ხანია ტურისტები საქართველოს სამხედრო გზის დასათვალიერებლად დაგყავს-მეთთქი, იგი იღიმება: „ძალიან დიდი ხანია, თითქმის 15 თუ 16 წელი“.

შესაძლოა სხვა ქვეყნებში „15 თუ 16 წელი“ არაფერს ნიშნავს, მაგრამ საქართველოში, სამხრეთ კავკასიაში მდებარე ქვეყანაში, ეს პერიოდი რუსეთთან 2008 წლის ხუთდღიანი ომის დასრულებიდან იწყება, რომლმაც თავისი კვალი დაამჩნია სამხედრო გზასაც – საქართველო 1921-1991 წლებში საბჭოთა კავშირის შემადგენელი ნაწილი იყო და გზა, რომელიც ქართულ თბილისს რუსულ ვლადიკავკაზთან აკავშირებდა, ერთადერთ სახმელეთო მარშრუტად ითვლებოდა საქართველოსა და რუსეთს შორის.

კავკასიურ საქართველოს კონფლიქტებისა და ომების დიდი ისტორია აქვს. ეს უძველესი ქვეყანა არაერთხელ ყოფილა რომაელების, ოსმანების, სპარსელებისა და რუსების თავდასხმების მსხვერპლი – თავისი სტრატეგიული მდებარეობის გამო, ევროპასა და აზიას შორის. საქართველოს ტერიტორიაზე, კავკასიონის სამხრეთ ვაკეზე გადიოდა აგრეთვე უძველესი საქარავნო გზა, რომელიც ორ კონტინენტს აერთიანებდა – მას ჯერ კიდევ ბერძენი სტრაბონი უწოდებდა „კავკასიის კარიბჭეს“ (Porta Caucasica) და მნიშვნელოვან როლს ასრულებდა იმპერიებს შორის ჯარების გადასროლაში შემტევითი ოპერაციებისათვის.

მე-18 საუკუნიდან მოყოლებული, როცა რუსეთის იმპერიასა და ქართლ-კახეთის სამეფოს შორის გეორგიევსკში ხელშეკრულება დაიდო, რუსებმა „კავკასიის კარიბჭე“ იმ დროისათვის საკმაოდ კეთილმოწყობილ სამხედრო მაგისტრალად გადააქციეს, რომელსაც შესაბამისად მოგვიანებით „საქართველოს სამხედრო გზა“ ეწოდა. ამ გზის მეშვეობით რუსეთის არმიები მე-19 საუკუნეში (კავკასიის ომების პერიოდის ჩათვლით) ებრძოდნენ დაუმორჩილებელ კავკასიის ხალხებს და ადგილობრივ მიურიდებს.

სამხედრო ისტორიის გარდა, კავკასიის კარიბჭეს კიდევ ერთი მნიშვნელოვანი ფუქნცია ჰქონდა – ის იყო „აბრეშუმის დიდი გზის“ – ჩინეთისა და ევროპული ხმელთაშუაზღვისპირეთის დამაკავშირებელი ერთ-ერთი განშტოება. აქ გადიოდნენ ქარავნები, რომლებიც დატვირთულნი იყვნენ ჩინური აბრეშუმით, აღმოსავლური სანელებლებით და ძვირფასეულობით, ხოლო ძველი გეოგრაფები სტრაბონი და პლინიუს-უფროსი აღფრთოვანებულნი იყვნენ ამ გზის ბუნებრივი სილამაზით. დრესაც გზა ძალზე აქტიურად მუშაობს, რომლითაც გადაიტანება ყველაფერი – იაფფასიანი [თურქული] პროდუქციიდან დაწყებული, [ქართული ღვინით] და სომხური ყვავილებით დამთავრებული, კავკასიის რეგიონის ფარგლებში.

(პუბლიკაციაში ფართოდა არის გადმოცემული მცხეთის ღირსშესანიშნაობების შესახებ, ხაზგასმულია ქალაქის, როგორც რელიგიური ცენტრის მნიშვნელობა, რომლის ტაძრები იუნესკოს მსოფლიო მემკვიდრეობის სიაშია შეტანილი. ავტორი ვრცლად საუბრობს სვეტიცხოველის ტაძარზე, ჯვრისა და სამთავროს მონასტრებზე, მირიან მეფეზე და დედოფალ ნანაზე…).

მცხეთის დათვალიერების შემდეგ კავკასიის ქედის სიღრმეში შევდივართ. გზის პირზე რამდენიმე მოზაიკურ პანოს ვხედავ და მძღოლს მანქანას ვაჩერებინებ, რათა ოდესღაც ლამაზი, ახლა კი ფილებაცვენილი კერამიკული ფერადი პანო ვნახო – ლომებით, მითიური ფრინველებით და ზღაპრული არსებებით – წითელი, ლურჯი და ყვითელი ფერებით.

„იცი, საქართველოს სამხედრო გზაზე უამრავი მოზაიკური პანოა, განსაკუთრებით ავტობუსების გაჩერებაზე, თუმცა ქართველები მათ არ სწყალობენ და არ ათვალიერებენ“, – მეუბნბა მირიანი.

სამხედრო გზაზე მდებარე მოზაიკური ძეგლები მეოცე საუკუნის მეორე ნახევარშია შექმნილი. იმ დროს ეს ხელოვნება პოლიტიკური და კულტურული იდეების პროპაგანდისათვის გამოიყენებოდა არა მხოლოდ საქართველოში, არამედ მთელ საბჭოთა კავშირში, მაგრამ დიდი საბჭოეთის დაშლის შემდეგ, ეს ხელოვნებაც ჩაკვდა. დღეს ქართული მოზაიკური ძეგლების უმეტესობა ან საერთოდ გამქრალია, ან ნანგრევებიღაა დარჩენილი.

იგრძნო რა ჩემი ინტერესი საქართველოს საბჭოური პერიოდის მოზაიკური ხელოვნების მიმართ, მირიან თაკვარელიამ შემომთავაზა მოგვენახულებინა მცხეთასთან ახლოს, კურორტ ცხვარიჭამიაში მდებარე ყოფილი პიონერთა ბანაკი „ცისკარი“, სადაც ჯერ კიდევ ბევრი მსგავსი მოზაიკური ხელოვნების ძეგლია შემორჩენილი. რაც უფრო ვიახლოვდებოდით ყოფილ ბანაკს, გზის პირზე სულ უფრო ბევრი ლამაზი მოზაიკური პანო გვხვდებოდა, რომლებიც ქართულ დღესასწაულებს და ხალხის ცხოვრებას ასახავდა, პიონერის ფორმაში გამოწყობილ ბავშვებს, რომლებიც ყვავილებს აგროვებენ… სამწუხაროდ, თვითონ ბანაკი ცარიელი და მიტოვებულია.

„ემოციები შემოინახეთ – თქვენ ჯერ კიდევ არ გინახავთ საქართველოს მთავარი მოზაიკა“, – მეუბნება მირიანი, რომელსაც მხედველობაში აქვს საქართველო-რუსეთის მეგობრობის ამსახველი მოზაიკური ძეგლი. ჩვენ მივემართებით გუდაურისაკენ, მაგრამ ჯერ ფასანაურში ვჩერდებით, სადაც უგემრიელეს ხინკალს მივირთმევთ. ამბობენ, რომ ფასანაური ხინკლის სამშობლოა – თურმე სწორედ ამ ლამაზ სოფელში მოამზადეს პირველად ხორცისა და ფქვილის ცომის შესანიშნავი საჭმელი.

 „ფასანაურის ხინკალი – ეს არის ცომის, ხორცისა და წვნიანის იდეალური ბალანსი, რომელიც პირში პირდაპირ ფეთქდება და საოცარ გემოს გრძნობ“, – ამბობს მირიანი და ხინკლის ჭამას მასწავლის, – თუ თავს არ დაღუნავ და ხინკალს ისე შეჭამ, წვენი დაიღვრება, რაც დაუშვებელია“.

დღის მეორე ნახევარში სწორედ იმ ცნობილ მოზაიკას ვათვალიერებ – „საქართველო-რუსეთის მეგობრობის ძეგლს“ – ბეტონის კოლოსალურ ნაგებობას, რომელიც თავდაპირველად, ერთი შეხედვით, თვალში ნეგატიურად  ეჩხირება მნახველს, კავკასიის მტების მომხიბლავი პეიზაჟის ფონზე, მაგრამ როგორც კი მიუახლოვდები, ბევრ საინტერესოს აღმოაჩენ რუსეთ-საქართველოს „მეგობრობის“ ისტორიიდან, საბჭოური ეპოქის შესაბამისად. (…)

მოგზაურობის ბოლო დღეს მირიან თაკვარელიამ ყველგანმავალი იქირავა და შორეულ თრუსოს ხეობაში წამიყვანა, რომელიც საქართველოს სამხედრო გზიდან ჩრდილო-აღმოსავლეთით არის და რომელსაც ჩრდილოეთიდან რუსეთი ესაზღვრება, დასავლეთიდან კი – საქართველოს სეპარატისტული რეგიონი „სამხრეთ ოსეთი“. თრუსოს ხეობა სტეფანწმინდიდან 22 კილომეტრზე მდებარეობს, მაგრამ მთის რთული გზით იქამდე მისაღწევად ორი საათი დაგვჭირდა.

თრუსო შთამბეჭდავი სანახავია, საოცრად ლამაზი. ხეობაში ბევრია მიტოვებული სოფლები და შუა საუკუნეების სადარაჯო კოშკები. მოწითალო მთები და მწვანე მდელოები მდინარე თერგის ნაპირებზე, აბანოს მინერალური წყალი და ლამაზი ტბა, სოფელ ზაკაგორის ციხე-სიმაგრის იდუმალება ადამიანში საკუთარ შინაგან ინდიანა ჯონსს ბადებს.

„ეს ყველაზე საუკეთესო ადგილი ბოლოსთვის მოვიტოვე. აი, ახლა თქვენ საქართველოს სამხედრო გზა არასოდეს არ დაგავიწყდებათ“, – იცინის მირიან თაკვარელია. მართლაცდა, არ შემიძლია, რომ არ დავეთანხმო.

წყარო

მსგავსი მასშტაბის პროექტი სახიფათო ნარჩენების მიმართულებით, ქვეყანაში პირველად ხორციელდება – ოთარ შამუგია 

გარემოს დაცვისა და სოფლის მეურნეობის მინისტრი ოთარ შამუგია და რაჭა-ლეჩხუმისა და ქვემო სვანეთის სახელმწიფო რწმუნებული პაპუნა მარგველიძე ლენტეხის მუნიციპალიტეტის სოფელ ცანაში, დარიშხანშემცველი ნარჩენების უსაფრთხო მართვის მიზნით საცავის მოწყობის მიმდინარე სამუშაოებს ადგილზე გაეცნენ. ინფორმაციას გარემოს დაცვისა და სოფლის მეურნეობის სამინისტრო ავრცელებს.

მინისტრის თქმით, სახიფათო ნარჩენების მიმართულებით, მსგავსი მასშტაბის პროექტი ქვეყანაში პირველად ხორციელდება და სამუშაოების დასრულების შემდეგ აღნიშნული ტერიტორია მთლიანად უსაფრთხო იქნება.

„ძალიან მნიშვნელოვან პროექტს ვახორციელებთ, რომლის მიზანია დარიშხანის შემცველი ნარჩენებით დაბინძურებული ტერიტორიების სრულად მოწესრიგება. პროექტი მოიცავს სამ ფაზას, რომელთაგან ორი უკვე დასრულებულია – ტერიტორია მთლიანად იზოლირებულია, მასშტაბური სამუშაოებია ჩატარებული ნაპირდაცვითი, სალექარი და წყალგამყვანი არხები მოწყობის კუთხით. მომავალი წლის გაზაფხულზე, უკვე დავიწყებთ პროექტის მესამე ფაზას, რომელიც დარიშხანშემცველი ნარჩენების განთავსებისთვის სპეციალური ნაგებობის მშენებლობას ითვალისწინებს. მინდა ხაზგასმით აღვნიშნო, რომ მსგავსი მასშტაბის პროექტი, სახიფათო ნარჩენების მართვის კუთხით, ქვეყანაში პირველად ხორციელდება და სამუშაოების დასრულების შემდეგ ეს ტერიტორია იქნება სრულად მოწესრიგებული და უსაფრთხო“, – განაცხადა ოთარ შამუგიამ.

სამინისტროს ცნობით, ლენტეხის მუნიციპალიტეტში არსებული დარიშხანის შემცველი მადნის გადამუშავებით წარმოქმნილი ნარჩენების განთავსების ადგილებზე, რთული ეკოლოგიური ვითარება გასული საუკუნის 90-იანი წლებიდან არსებობს. მას შემდეგ, რაც ამ ტერიტორიაზე არსებული სამთო-ქიმიური ქარხნები დაიხურა და დარიშხანშემცველი ნარჩენები ღია ცის ქვეშ, ყოველგვარი კონტროლის გარეშე დარჩა.

„როგორც რაჭა-ლეჩხუმისა და ქვემო სვანეთის სახელმწიფო რწმუნებულმა, პაპუნა მარგველიძემ აღნიშნა, საქართველოს ხელისუფლება ახორციელებს რეგიონისთვის მნიშვნელოვან პროექტს, რომელიც ადგილობრივი მოსახლეობის რამდენიმე ათეული წლის განმავლობაში არსებულ პრობლემას სრულად მოაგვარებს.

გარემოს დაცვისა და სოფლის მეურნეობის სამინისტროს ინიციატივით, საქართველოს მთავრობასთან კოორდინაციით და საერთაშორისო და ადგილობრივი ექსპერტების ჩართულობით, დარიშხანშემცველი ნარჩენების საცავის მოწყობის მიზნით ჩატარდა კვლევები და მომზადდა ანგარიშები. ეფექტიანი ღონისძიებების შემუშავებისა და შემდგომში, მისი განხორციელების მიზნით, ექსპერტებისა და მოსახლეობის მონაწილეობით, გაიმართა არაერთი საჯარო განხილვა, განისაზღვრა პრიორიტეტები უსაფრთხოების ზომების უზრუნველსაყოფად და დაიგეგმა პირველადი დაცვითი ღონისძიებების ჩატარება.

აღსანიშნავია, რომ სოფელ ძუღარეშში (საიტი – ცანა 1) და სოფელ ყორულდაშში (საიტი – ცანა 3) განხორციელდა დაბინძურებული ტერიტორიების შეღობვის სამუშაოები, რამაც განაპირობა სახიფათო ტერიტორიაზე ადამიანების და ცხოველების მოხვედრის შესაძლებლობა; დასრულდა მდინარე ყორულდაშის მონოლითური რკინაბეტონის ნაპირსამაგრი ჯებირის, წყალგამტარი არხისა და სალექარის მშენებლობის სამუშაოები. კერძოდ, აშენდა 224 მეტრი სიგრძის დამცავი ჯებირი, რომელიც წყალდიდობის შემთხვევაში დაიცავს დარიშხანშემცველი ნარჩენების სარკოფაგს წარეცხვისაგან; გაკეთდა 350 მეტრის სიგრძის რკინაბეტონის არხი, სარკოფაგის ტერიტორიის დატბორვისა და დაჭაობებისგან დაცვის უზრუნველყოფისთვის.

2025 წელს განხორციელდება პროექტის მესამე ეტაპით გათვალისწინებული ღონისძიებები – 50500 მ3 მოცულობის სარკოფაგის მშენებლობა, დარიშხანის შემცველი ნარჩენების შეგროვება და სარკოფაგში განთავსება,“ – აღნიშნულია გავრცელებულ ინფორმაციაში.

შეუძლებელია, ევროპას მშვიდობის პროექტად წარმოაჩენდე და ამავდროულად, ევროპის სახელით, ქვეყანაში არეულობას თესავდე – შალვა პაპუაშვილი ვროკავშირის 8 ქვეყნის პარლამენტების დელეგაციას

შეუძლებელია, ევროპას მშვიდობის პროექტად წარმოაჩენდე და ამავდროულად, ევროპის სახელით, ქვეყანაში არეულობას თესავდე, – ამის შესახებ საქართველოს პარლამენტის თავმჯდომარე შალვა პაპუაშვილი აცხადებს, რომელმაც თბილისში ჩამოსულ, რამდენიმე ქვეყნის პარლამენტის წევრისგან შემდგარ ჯგუფს შეხვედრაზე უარი უთხრა.

როგორც პაპუაშვილი აღნიშნავს, მიუხედავად იმისა, რომ საქართველოს ხელისუფლება რჩება ევროკავშირის ყველა რელევანტურ და დაინტერესებულ მხარესთან დიალოგის ხელშეწყობის ერთგული, შეხვედრების გამართვის ამ განზრახვას დადებითად ვერ უპასუხებენ.

„როგორც საჯაროდ დაანონსდა, ამ დღეებში, საქართველოში რამდენიმე ქვეყნის პარლამენტის წევრისგან შემდგარი ჯგუფი ჩამოდის, რომელსაც ლიეტუვის პარლამენტის წევრმა, ჟიგიმანტას პავილიონისმა მოუყარა თავი. ამ ჯგუფმა ჩემთან და პარლამენტის ზოგიერთი კომიტეტის თავმჯდომარესთან შეხვედრაც ითხოვა, რაზეც უარი ვუთხარი და წერილობითაც განვუმარტე უარის მიზეზი.

გთავაზობთ საპასუხო წერილს ქართულად:

არ გამკვირვებია ევროკავშირის რამდენიმე ქვეყნის პარლამენტის წევრისგან შემდგარი დელეგაციის საქართველოში ჩამოსვლა. თუმცა, ნამდვილად გამაკვირვა დელეგაციის ზოგიერთი წევრის განზრახვამ, შეხვდნენ საქართველოს პოლიტიკურ და საპარლამენტო ხელმძღვანელობას, მიუხედავად მათ მიერ საქართველოს ხელისუფლების და ქართული საზოგადოების მიმართ მრავალჯერ გამოვლენილი პირადი არამეგობრული დამოკიდებულებისა.

მიუხედავად იმისა, რომ საქართველოს ხელისუფლება რჩება ევროკავშირის ყველა რელევანტურ და დაინტერესებულ მხარესთან დიალოგის ხელშეწყობის ერთგული, შეხვედრების გამართვის ამ განზრახვას დადებითად ვერ ვუპასუხებ.

საქართველოსადმი მრავალჯერ გამოვლენილი არამეგობრული დამოკიდებულებიდან გამომდინარე, დელეგაციის ზოგიერთ წევრს სხვა მოლოდინი არც უნდა ჰქონოდა. აშკარაა, რომ ვიზიტის მთავარი საფუძველი პოლიტიკური მიკერძოებულობაა და ამას ყველა ხედავს.

წინასაარჩევნო კამპანიის დროს, დელეგაციის ზოგიერთი წევრი და სხვა უცხოელი პოლიტიკოსები მუდმივად და მიზანმიმართულად არღვევდნენ საქართველოს კანონმდებლობას საქართველოს მმართველი პარტიის წინააღმდეგ მიმართული საჯარო კამპანიის წარმართვისა და ოპოზიციის მხარდაჭერის გზით, რითიც მოქალაქეების ნებაზე უკანონო ზემოქმედებას ცდილობდნენ.

საქართველოს კონსტიტუცია და საარჩევნო კანონმდებლობა კრძალავს არჩევნებში უცხოურ ჩარევას, რაც უხეშად იყო უგულებელყოფილი. არჩევნებთან დაკავშირებულ პროცესებში, განსაკუთრებით კი ხელისუფლების საწინააღმდეგო აქციებში უშუალო მონაწილეობით, ამ პოლიტიკოსებმა უხეშად დაარღვიეს ჩაურევლობის პრინციპი, რაც გაეროს წესდებით განმტკიცებული საერთაშორისო სამართლის ფუნდამენტური ნორმაა, და ეჭვქვეშ დააყენეს წესებზე დაფუძნებული საერთაშორისო წესრიგის არსი, რომლისადმი პატივისცემას, როგორც სჩანს, მხოლოდ სიტყვიერად გამოხატავენ.

აღნიშნულმა ხელი შეუწყო ოპოზიციის რადიკალურ ნაწილს პოლიტიკური პოლარიზაციის გაღრმავებაში, რამაც გააუარესა წინასაარჩევნო გარემო და არჩევნების გარშემო დაძაბულობის აღქმა შექმნა.

თუმცა, ეს არ არის პირველი შემთხვევა, როდესაც ამ დელეგაციის ზოგიერთი წევრი ქართველი ხალხის წინააღმდეგ მიმართული დეზინფორმაციის გავრცელებით არის დაკავებული. ასეთი იყო, მაგალითად, მიხეილ სააკაშვილის პატიმრობის პირობების შესახებ წარმოებული კამპანიაც, რომლის სიცრუეც ადამიანის უფლებათა ევროპულმა სასამართლომ დაადასტურა.

რადიკალური პოლიტიკური პარტიების მიერ გავრცელებული ასეთი ცრუ ნარატივებისა და დეზინფორმაციის მხარდაჭერამ, საზღვარგარეთ საქართველოს იმიჯი შელახა, და ამასთან შეარყია ჩვენი მოსახლეობის ნდობა ჩვენი დასავლელი პარტნიორების კეთილმოსურნეობის მიმართ.

ეს ქმედებები და არამეგობრული რიტორიკა ხელს უწყობს ევროკავშირის გაფართოების პროცესის იარაღად გამოყენების მცდელობას, რათა კიდევ უფრო წაახალისოს ოპოზიცია, შეარყიოს არჩევნების შედეგების მიმართ ნდობა და არჩევნების ლეგიტიმურობას ძირი გამოუთხაროს.

საქართველოსა და მისი ხელისუფლების მიმართ დელეგაციის ზოგიერთი წევრის არამეგობრული რიტორიკა და ქმედებები, რომელთა მომსწრენი ვართ უკანასკნელი ორწელიწად-ნახევრის განმავლობაში, აგრეთვე, ხელს უშლის საქართველოში მშვიდობისა და დემოკრატიული სტაბილურობის შენარჩუნებაზე მიმართულ ჩვენს ძალისხმევას.

შეუძლებელია, ევროპას მშვიდობის პროექტად წარმოაჩენდე და ამავდროულად, ევროპის სახელით, ქვეყანაში არეულობას თესავდე.

26 ოქტომბრის არჩევნებში უცხოურ ჩარევას ქართულმა საზოგადოებამ მკაფიოდ უპასუხა, როდესაც ქართულმა ოცნებამ მორიგი დამაჯერებელი გამარჯვება მოიპოვა.

არჩევნების უარყოფა და ამომრჩეველთა ასეთი ძლიერი ხმის იგნორირება ის გზაა, რომელსაც ოპოზიცია წლების განმავლობაში მიჰყვება და რასაც ქართული საზოგადოება უკვე შეეჩვია. თუმცა, როდესაც ქართული საზოგადოება ხედავს ევროპელი პოლიტიკოსების მიერ დემოკრატიის უარყოფას, ეს ევროკავშირისადმი ნდობას აზიანებს.

აღნიშნულის გათვალისწინებით, შეუძლებლად მიმაჩნია მიღებულ თხოვნაზე დათანხმება.

ამავდროულად, მსურს გამოვხატო პატივისცემა დელეგაციის სხვა წევრების მიმართ და დავუდასტურო დიალოგის გაგრძელების მზაობა საპარლამენტო დიპლომატიის ფუნდამენტური პრინციპებისა და ნორმების ფარგლებში, თანასწორობისა და სუვერენიტეტის პატივისცემის საფუძველზე“, – აღნიშნულია შალვა პაპუაშვილის ფეისბუქპოსტში.

 როგორი ამინდი იქნება უახლოეს დღეებში საქართველოში

12 ნოემბრამდე საქართველოში უნალექო ამინდი იქნება. მოსალოდნელი ამინდის პროგნოზს გარემოს ეროვნული სააგენტო ავრცელებს.

თბილისში უნალექო ამინდი იქნება. ჰაერის ტემპერატურა დღისით +14, +16 გრადუსი დაფიქსირდება.

სანაპირო რაიონებში (ბათუმი, ქობულეთი, ანაკლია, ფოთი): უნალექო ამინდი იქნება. ჰაერის ტემპერატურა დღისით +17 +19 გრადუსი დაფიქსირდება.

დასავლეთ საქართველოს დაბლობ რაიონებში (ზესტაფონი, ქუთაისი, სამტრედია, ზუგდიდი, მარტვილი, ოზურგეთი): უნალექო ამინდი იქნება. ჰაერის ტემპერატურა დღისით +18, +20 გრადუსი დაფიქსირდება.

დასავლეთ საქართველოს მთიან რაიონებში (ამბროლაური, ონი, ცაგერი, შოვი, ჭიათურა, საჩხერე, ხულო, რიკოთის უღელტეხილი): უნალექო ამინდი იქნება. ჰაერის ტემპერატურა დღისით +14, +18 გრადუსი დაფიქსირდება.

დასავლეთ საქართველოს მაღალმთიან რაიონებში (მესტია, ბახმარო): უნალექო ამინდი იქნება. ჰაერის ტემპერატურა დღისით +7, +12 გრადუსი დაფიქსირდება.

ქართლში (რუსთავი, ბოლნისი, მარნეული, გარდაბანი, გორი, ცხინვალი): უნალექო ამინდი იქნება. ჰაერის ტემპერატურა დღისით +15, +18 გრადუსი დაფიქსირდება.

კახეთში (საგარეჯო, თელავი, გურჯაანი, სიღნაღი, ლაგოდეხი, ყვარელი, ახმეტა, დედოფლისწყარო): უნალექო ამინდი იქნება. ჰაერის ტემპერატურა დღისით +16, +19 გრადუსი დაფიქსირდება.

აღმოსავლეთ საქართველოს მთიან რაიონებში (ახალციხე, ბორჯომი, დუშეთი, თიანეთი, ფასანაური): უნალექო ამინდი იქნება. ჰაერის ტემპერატურა დღისით +13, +16 გრადუსი დაფიქსირდება.

აღმოსავლეთ საქართველოს მაღალმთიან რაიონებში (ახალქალაქი, წალკა, ბაკურიანი, გუდაური, ომალო): უნალექო ამინდი იქნება.

,,რა აქვს დასამალი ევროკავშირს საქართველოში, დეზინფორმაცია ხომ არის ევროკავშირისთვის ერთ-ერთი გამოწვევა”-  შალვა პაპუაშვილი

რა აქვს დასამალი ევროკავშირს საქართველოში, რატომ მალავენ?! დეზინფორმაცია ხომ არის ევროკავშირისთვის ერთ-ერთი გამოწვევა – აი, გავარკვიოთ, გვითხრას ევროკავშირმა, ევროპის დემოკრატიის ფონდი რომელ მედიაში ხარჯავს ფულს? – განაცხადა „იმედის კვირასთან“ პარლამენტის თავმჯდომარემ, შალვა პაპუაშვილმა ოჯახური ღირებულებებისა და გამჭვირვალობის კანონების გაუქმებაზე, დასავლეთის ლიდერებისგან მიღებული მოთხოვნების კომენტირებისას.

„რა აქვს დასამალი ევროკავშირს საქართველოში, რატომ მალავენ?! დეზინფორმაცია ხომ არის ევროკავშირისთვის ერთ-ერთი გამოწვევა – აი, გავარკვიოთ, გვითხრას ევროკავშირმა, ევროპის დემოკრატიის ფონდი რომელ მედიაში ხარჯავს ფულს? შემთხვევით, ხომ არ არის ეს ის მედიები, რომლებიც შემდეგ დეზინფორმაციას ავრცელებენ. ჩვენც ევროპელები ვართ და ჩვენი ევროპული ღირებულებები გვეუბნება, რომ არ ჯდება ამ ღირებულებაში სკოლებში, ბაღებში იმის სწავლება, რომ სინამდვილეში ორი სქესი კი არ არსებობს, როგორც ათასწლეულებია, ვიცით და საღი აზრი ამას გვეუბნება, არამედ თურმე, შეიძლება ეს არჩევითი იყოს და შეიძლება იყოს უთვალავი სქესი“, – განაცხადა პაპუაშვილმა.

მისივე თქმით, ძალიან ეჭვის აღმძვრელია ის ფაქტი, რომ საქართველოში ჩატარებული საპარლამენტო არჩევნების შეფასების კონტექსტში ზემოთ აღნიშნული ორი კანონი სახელდება. პაპუაშვილი მიიჩნევს, რომ ამ კანონებს არჩევნებთან არანაირი კავშირი არ აქვს.

პაპუაშვილის განცხადებით, რაც შეეხება მითითებებს ევროპულ ღირებულებებზე, ქართველმა ხალხმა ამ ორივე კანონს მხარი დაუჭირა არჩევნებით და „ეს არჩევნები იყო რეფერენდუმი, რომლის შედეგები ყველამ უნდა მიიღოს“.

„ქართველმა ხალხმა თქვა, რომ ამ ორივე კანონის უკან დგას ქართველი ხალხის ნება“, – დასძინა პაპუაშვილმა.

საუბრისას მან გაიხსენა ლგბტ პროპაგანდის წინააღმდეგ მიმართული კანონმდებლობის პროექტზე სახალხო განხილვების ფაქტი და აღნიშნა, რომ შესაბამის კომისიაში შედიოდა გახარიას პარტიის წარმომადგენელიც, შალვა კერესელიძე.

„იგი ესწრებოდა პირველ, გასვლით სხდომებს, როდესაც რეგიონში გვქონდა ხალხთან შეხვედრა, გამოვიდა სცენაზე და მხარი დაუჭირა ამ კანონებს. ამ გამოსვლის შემდეგ, როგორც ჩანს, ის დატუქსეს, როგორც ჩანს, პარტიაში მიიღეს ზარი უცხოეთიდან – მიუღებელია მათი მფარველებისთვის ასეთი კანონების მიღება და შემდეგ კომისიის სხდომებზე ბატონი შალვა კერესელიძეც აღარ გამოჩენილა“, – აღნიშნა პაპუაშვილმა

11 ნოემბრის ასტროლოგიური პროგნოზი

ვერძი

მცირე გაუგებრობებზე არ უნდა ინერვიულოთ – ყველაფერი კარგად იქნება, თუ მოთმინებას გამოიჩენთ და დაუფიქრებლად არ მოიქცევით. ხელსაყრელი დღეა ნებისმიერი ურთიერთობის აღსადგენად – ეცადეთ, ძველი შეცდომები აღარ გაიმეოროთ და ყველა უთანხმოების მოგვარებას შეძლებთ. შემოქმედებითი პოტენციალი იზრდება, რაც ახალი საქმის წარმატებით დასრულებაში დაგეხმარებათ.

კურო

მიზნისკენ ნელ-ნელა, მაგრამ მტკიცე ნაბიჯებით მიიწევთ. ეს რამდენიმე მნიშვნელოვანი საკითხის მოგვარების საშუალებას მოგცემთ. შესაძლოა, ვიღაცამ სხვა ადამიანების დაპირისპირებასა და კონფლიქტებში ჩაგითრიოთ, მაგრამ ვარსკვლავების დახმარებით გამოსავალს ნებისმიერი სიტუაციიდან იპოვით. მიუხედავად იმისა, რომ მნიშვნელოვანი ხარჯები გელით, ფინანსურ საკითხებზე ნერვიულობის საფუძველი არ გაქვთ.

ტყუპები

თქვენი თავდაჯერება უსაფუძვლო არ არის, მაგრამ მაინც გადაჭარბებულია. ნუ ეცდებით სირთულეების მარტო დაძლევას. უმჯობესია, შემოთავაზებული დახმარებით ისარგებლოთ. მოსალოდნელია ფინანსური სირთულეები, ამიტომ გირჩევთ ხარჯები აკონტროლოთ და უსარგებლო ნივთების შეძენას მოერიდოთ. პირადი ურთიერთობების თვალსაზრისით, ნეიტრალური დღეა.

კირჩხიბი

გახსოვდეთ, რომ თქვენს პრობლემებს არავინ მოგიგვარებთ, ამიტომ დამოუკიდებლად მოქმედება მოგიწევთ. დღის ემოციური ფონი საკმაოდ დაძაბულია, მაგრამ თქვენი თანდაყოლილი ოპტიმიზმი ნეგატიურ ტენდენციებზე ძლიერია. მეგობრები მნიშვნელოვან საკითხში არ გეთანხმებიან, მაგრამ ნუ ინერვიულებთ – უბრალოდ, ისინი საჭირო ინფორმაციას არ ფლობენ.

ლომი

რთული დღე გელით – შეიძლება, გაუგებარი მოვლენების ცენტრში აღმოჩნდეთ. მნიშვნელოვანი გადაწყვეტილების მიღებამდე ეცადეთ მომხდარის მიზეზი დაადგინოთ და სხვების რჩევაზე მეტად საკუთარ გამოცდილებას დაეყრდნოთ. ახლობელ ადამიანებთან, განსაკუთრებით უფროსი თაობის წარმომადგენლებთან ურთიერთობაში მოსალოდნელია პრობლემები.

ქალწული

ამ დღეს წინასწარ შედგენილი გეგმების განხორციელებას გრაფიკიდან გადახვევის გარეშე შეძლებთ. ხელსაყრელი დღეა საქმიანი და პირადი კონტაქტებისთვის, არაფორმალურ გარემოში შეხვედრებისა და მნიშვნელოვანი საკითხების განხილვისთვის. ყველა საქმის ერთდროულად კეთებას ჯობს, რომ ყველაზე მნიშვნელოვანი აირჩიოთ, წინააღმდეგ შემთხვევაში დაწყებული საქმის დასრულებას ვერ შეძლებთ. დღის მეორე ნახევარში შემოქმედებითი პოტენციალი მცირდება და ბრწყინვალე იდეების გაჩენის იმედი არ უნდა გქონდეთ.

სასწორი

ამ დღეს საშუალება გექნებათ, რომ წინა დღეს დაშვებული შეცდომები გამოასწოროთ და ახლობელ ადამიანებთან ურთიერთობაში წარმოქმნილი უთანხმოება მოაგვაროთ. მიზანდასახული ქმედების წყალობით სასურველ შედეგს მიაღწევთ, მაგრამ ცუდი ისაა, რომ წვრილმანებს ნაკლებ ყურადღებას აქცევთ და უსიამოვნო ფაქტებს არ ითვალისწინებთ. კოლეგის რჩევები დამატებითი შემოსავლის მიღებაში დაგეხმარებათ.

მორიელი

ამ დღეს ბევრი პატარ-პატარა უსიამოვნება და სამწუხარო გაუგებრობა გელით. ეს შეიძლება გულთან ახლოს არ მიიტანოთ, მაგრამ არახელსაყრელი ტენდენციების გავლენა მაინც უნდა გაითვალისწინოთ. დღეისთვის რაიმე მნიშვნელოვანი საქმე არ უნდა დაგეგმოთ. დღის მეორე ნახევარში შეიძლება რაღაც ახალო და უჩვეულო აღმოაჩინოთ. გირჩევთ ოჯახის უფროს წევრებს გეგმური გამოკვლევა ჩაუტაროთ.

მშვილდოსანი

რაღაც მოვლენა გეგმების შეცვლას გაიძულებთ. იმის ნაცვლად, რომ შექმნილი ვითარებიდან გამოსავალი იპოვოთ, დამნაშავეს ეძებთ და ეს თქვენი პირველი შეცდომაა. მეორე ის არის, რომ სხვებს უფრო ენდობით, ვიდრე საკუთარ თავს. თქვენი გულუბრყვილობა არაკეთილგანწყობილ ადამიანს შანსს აძლევს, რომ საკუთარი მიზნებისთვის გამოგიყენონ.

თხის რქა

იღბლის და ხელსაყრელი გარემოებების იმედად ნუ იქნებით. სამწუხაროდ, ამ დღეს ვარსკვლავები თქვენს მხარეს არ არიან – ახლობელ ადამიანებს დროდადრო პრობლემები შეექმნებათ, რომელთა მოგვარება თქვენი ჩარევის გარეშე ვერ მოხერხდება და საკუთარი საქმისთვის დრო პრაქტიკულად აღარ დაგრჩებათ. არ არის გამორიცხული, რომ იმ ადამიანთან ურთიერთობა მოგიწიოთ, რომელმაც წარსულში გული გატკინათ.

მერწყული

იძულებული ხართ, რთული საკითხები გადაჭრათ და გარშემო მყოფთა პრობლემები მოაგვაროთ, რისი სურვილიც არ გაქვთ. გინდათ, რომ გარშემომყოფებმა მარტო დაგტოვონ და მშვიდად დასვენების საშუალება მოგცენ. სამწუხაროდ, ეს მხოლოდ ოცნებებია, რომლებსაც ასრულება არ უწერია. გირჩევთ უცნობ ადამიანებთან ურთიერთობა მინიმუმამდე შეამციროთ.

თევზები

ყოველმხრივ არახელსაყრელი დღეა. შესაძლოა, გარემოებების მსხვერპლი აღმოჩნდეთ და უთანასწორო ბრძოლაში ჩაებათ. ასეთ ვითარებაში ყველაზე მეტად ერთგული და გამოცდილი ადამიანის დახმარება გჭირდებათ. მოემზადეთ იმისთვის, რომ ყველაზე აქტუალური პრობლემების გადასაჭრელად მნიშვნელოვანი ხარჯები გელით.

მტკვრის მარჯვენა და მარცხენა სანაპიროზე მყოფ დემონსტრანტებს სამართალდამცველებმა საავტომობილო გზის გათავისუფლებისკენ მოუწოდეს

აქციის მონაწილეებთან, რომელთაც მტკვრის მარჯვენა და მარცხენა სანაპირო გადაკეტეს, სამართალდამცველები გამოჩნდნენ.

პოლიციამ დემონსტრანტებს საავტომობილო გზის გათავისუფლებისკენ მოუწოდა.

სამართალდამცველების განმარტებით, აქციაზე ადამიანების ის რაოდენობა არ არის შეკრებილი, რომ მათ გზა გადაკეტონ და საგზაო მოძრაობა შეაფერხონ.

სამართალდამცველები აღნიშნავენ, რომ ეს არის გაფრთხილება, შემდეგ კი მოხდება მათი იდეტიფიცირება და გატარდება კანონით დადგენილი ზომები.

“გზა ბუნებრივად არ არის დაკეტილი, არ არის ხალხის ის რაოდენობა, რომ ცენტრალური მაგისტრალი დაკეტილი იყოს. აქციის მონაწილეების იდენტიფიცირება მოხდება და საქართველოს კანონმდებლობით დაჯარიმდებიან”, – განუცხადა ერთ-ერთმა სამართალდამცველმა ჟურნალისტებს.

აქციის მონაწილეები აღნიშნავენ , რომ არ აპირებენ დაშლას, მათი განმარტებით, ეს არის “შეშინებული ხელისუფლების ქმედება” და ახლა უფრო მეტი სტიმული აქვთ, რომ საპროტესტო აქციები უახლოეს დღეებშიც გაგრძელდეს.

როგორც ადგილიდან „ინტერპრესნიუსის“ კორესპონდენტი იუწყება, ადგილზე სამართალდამცველთა საკმაოდ დიდი რაოდენობა იმყოფება.

აქციის მონაწილეები მსვლელობის ევროპის მოედნისკენ გაგრძელებას გეგმავენ.

პრეზიდენტისა და 8 ქვეყნის საგარეო ურთიერთობათა კომიტეტის თავმჯდომარეების დელეგაციის შეხვედრის პარალელურად 11 ნოემბერს ორბელიანების სასახლესთან აქცია იგეგმება

11 ნოემბერს, პრეზიდენტისა და 8 ქვეყნის საგარეო ურთიერთობათა კომიტეტის თავმჯდომარეების დელეგაციის შეხვედრის პარალელურად, ორბელიანების სასახლესთან აქცია გაიმართება. ამის შესახებ „დაიტოვეს“ მიერ ორგანიზებულ საპროტესტო მსვლელობაზე განაცხადეს, სადაც საპარლამენტო არჩევნების შედეგებს აპროტესტებენ.

ამასთან, აქციის მონაწილეებმა მოქალაქეებს მოუწოდეს, შეიკრიბონ სასამართლოსთანაც.

„ამ შეხვედრაში ჩვენც უნდა მივიღოთ გარკვეული მონაწილეობა. ეს მონაწილეობა იქნება, რომ ჩვენ დავანახებთ რამდენი ვართ პრეზიდენტის სასახლესთან. ჩვენ უნდა ვაჩვენოთ ევროპელ მეგობრებს, რომ არა მხოლოდ პოლიტიკოსები, არამედ ქართველი ხალხი იბრძვის თავისუფლებისთვის, იბრძვის მოპარული არჩევნების დასაბრუნებლად. ამიტომ ყველას, ხვალ, გელოდებით ორ ლოკაციაზე, ვისაც, სადაც გირჩევნიათ და გული მიგიწევთ, ოღონდ, სახლში არ დარჩეთ. მოვა დრო თავისუფალ, დამოუკიდებელ და ევროპულ საქართველოში სახლში ვიქნებით, ძალიან კარგად და თბილად, მაგრამ ეს დღეები და თვეები სჭირდება ქვეყანას, თქვენი გვერდში დგომა!“, – განაცხადეს მსვლელობის მიმდინარეობისას ორგანიზატორებმა.

,,საჩივრები წარმოდგენილი იყო დაუსაბუთებლად”- ცესკოს იურიდიული დეპარტამენტის უფროსი

არც წარმოდგენილი მასალებით და არც სხდომის მიმდინარებისას, რაიმე ახალი გარემოება არ გამოკვეთილა, რომელიც დამატებით რაიმე არგუმენტაციას შესძენდა საჩივრის ავტორების მიერ დაყენებულ პოზიციას – საჩივრები წარმოდგენილი იყო დაუსაბუთებლად , – ამის შესახებ ცენტრალური საარჩევნო კომისიის იურიდიული დეპარტამენტის უფროსმა, გიორგი სანტურიანმა სხდომის დასრულების შემდეგ, სადაც საჩივრებს განიხილავდნენ, ჟურნალისტებს განუცხადა.

მისივე თქმით, წარმოების შედეგად ყველა წარმოდგენილი მასალა შესწავლილი იქნა.

“დღეს საქართველოს ცენტრალურ საარჩევნო კომისიაში სხდომაზე წარიმართა საჩივრების განხილვა, რომელიც შეეხებოდა ფაქტობრივად, ყველა საარჩევნო კომისიის შედეგების შემაჯამებელ ოქმებს და წარმოდგენი იქნა შესაბამისი არგუმენტები მხარეების მიერ. სხდომის მიმდინარებისას ძალიან ბევრი კითხვა დაისვა, როგორც საჩივრის ავტორების მხრიდან, ასევე, კომისიის წევრებმა დააზუსტეს შესაბამისი ინფორმაცია საჩივრის ავტორებთან, რითაც საბოლოო ჯამში, დადგინდა ის, რომ არც წარმოდგენილი მასალებით და არც სხდომის მიმდინარებისას, რაიმე ახალი გარემოება არ გამოკვეთილა, რომელიც დამეტებით რაიმე არგუმენტაციას შესძენდა საჩივრის ავტორების მიერ დაყენებულ პოზიციას.

საჩივრები წარმოდგენილი იყო დაუსაბუთებლად და საოლქო საარჩევნო კომისიები ემყარებოდნენ თავის მხრივ იმ კანონმდებლობით არსებულ რეგულაციებს, კანონიერ ძალაში შესული შემაჯამებელი ოქმებისა და სასამართლო გადაწყვეტილების საფუძველზე შეადგინეს და შეაჯამეს მათ შესაბამისი შედეგები ოლქების ტერიტორიაზე.

რაც შეეხება საქმის მასალებს, რა თქმა უნდა, წარმოების შედეგად ყველა წარმოდგენილი მასალა იქნა შესწავლილი. რაც შეეხება იმ საარჩევნო უბნებს და ბიულეტენებს, რომელიც ე.წ. ტრადიციული წესით კენჭისყრის წესით პროცედურას ითვალისწინებდა, აქ აღსანიშნავია, რომ საჩივრის ავტორს საოლქო საარჩევნო კომისიისთვის და შემდგომ სასამართლოსთვის არ მიუმართავს”, – განაცხადა ცესკო-ს იურიდიული დეპარტამენტის უფროსმა გიორგი სანტურიანმა.

ცნობისთვის, ცესკო-ს კომისიამ „საქართველოს ახალგაზრდა იურისტთა ასოციაციის”, „ერთიანობა – ნაციონალური მოძრაობის” და „ძლიერი საქართველო – ლელო, ხალხისთვის, თავისუფლებისთვის!” საჩივრები საოლქო საარჩევნო კომისიის შემაჯამებელ ოქმების გაბათილებასთან დაკავშირებით არ დააკმაყოფილა.

1...131415...2,303Page 14 of 2,303
ჩვენი არქივი

კონტაქტი

მის: ქ.თბილისი, მ.კოსტავას 59

ტელ: +995 32 93 44 05

ელ.ფოსტა: editor@geotimes.ge

ნავიგაცია

ონლაინ გაზეთი Geotimes.ge

დამატებითი რესურსი