ამერიკის შეერთებული შტატების პრეზიდენტი დონალდ ტრამპი საქართველოს პრეზიდენტს, მიხეილ ყაველაშვილს დამოუკიდებლობის დღეს ულოცავს.

ინფორმაციას საქართველოს პრეზიდენტის პრესსამსახური ავრცელებს.

მათივე ცნობით, თეთრი სახლის ლიდერი მისალოც წერილში ყურადღებას ამახვილებს საქართველოს მთავრობასთან ურთიერთობების გაძლიერებაზე.

„ბატონო პრეზიდენტო, დღეს საქართველოს დამოუკიდებლობის 107-ე წლისთავია — ეპოქალური თარიღი ქართველი ხალხის ბრძოლაში სუვერენიტეტის, უსაფრთხოებისა და ეროვნული იდენტობისათვის, რომელიც მძიმე სირთულეებისა და გამოწვევების ფონზე მიმდინარეობდა თაობიდან თაობამდე. ჩემი ადმინისტრაცია ერთგულია, განამტკიცოს საქართველოს მთავრობასთან მშვიდობიანი და ნაყოფიერი ურთიერთობები. სამომავლოდ ველოდები ჩვენს ქვეყნებს შორის ეკონომიკური კავშირების გაღრმავებას სამართლიანი ვაჭრობის მხარდაჭერისა და ორმხრივი თანამშრომლობის არეალის გაფართოების გზით. გულითადად ვულოცავ ქართველ ხალხს ამ მნიშვნელოვან თარიღს, რომელიც ქვეყნის გამორჩეულ და მრავალფეროვან ისტორიას ასახავს“, – ნათქვამია მისალოც წერილში.

ვიცი, რამდენად რთული არჩევნებია მუნიციპალური არჩევნები. ორი არჩევნები ერთად, არის ურთულესი გამოწვევა თითოეული პოლიტიკური პარტიისთვის, ხელისუფლებისთვის, ოპოზიციისთვის, ყველასთვის, – ამის შესახებ პარტია „საქართველოსთვის“ თავმჯდომარემ, გიორგი გახარიამ ჟურნალისტებს განუცხადა.

გახარიამ კომენტარი გააკეთა საქართველოს ყოფილი პრეზიდენტის, სალომე ზურაბიშვილის განცხადებაზე, რომლის თანახმადაც: „არჩევნები უნდა იყოს ჯერ საპარლამენტო და მერე ადგილობრივი, ან, ბოლოსდაბოლოს, თუ სხვა არა, ერთობლივად, საპარლამენტო და ადგილობრივი“.

გახარიას შეფასებით, უკეთესია, თუ უფრო ადრე იქნება საპარლამენტო არჩევნები.

„ქართული პოლიტიკური რეალობისთვის, ახალი საპარლამენტო არჩევნები არის აუცილებლობა, რათა ქვეყანა დამშვიდდეს და რადიკალიზაცია არ ღრმავდებოდეს. მე თუ მკითხავთ, „ოცნება“ არის პირველ რიგში, დაინტერესებული იმაში, რომ ეს არჩევნები ჩაატაროს, რადგან „ოცნება“ იძახის, რომ ოპოზიცია განადგურებულია და მაინც ყველაფერს მოვიგებთ. ოპოზიცია ამბობს, ჩვენ მოვიგებთო. აი რა პრობლემაა ხომ? რაც შეეხება ერთდროულად საპარლამენტო და მუნიციპალური არჩევნების ჩატარებას, ჩემი პოზიცია არის შემდეგი – საპარლამენტო არჩევნები ამ ქვეყანაში არის აუცილებელი. ვისურვებდი, რომ ჩატარდეს უფრო ადრე. მე გამოვლილი მაქვს ეს არჩევნები და ვიცი, რამდენად რთული არჩევნებია მუნიციპალური არჩევნები. ორი არჩევნები ერთად, ეს არის ურთულესი გამოწვევა თითოეული პოლიტიკური პარტიისთვის, ხელისუფლებისთვის, ოპოზიციისთვის, ყველასთვის. ამიტომ, დამთხვევა რამდენად სწორია, თუ სხვა გამოსავალი არ იქნება, ალბათ ეს გამოსავალია“, – განაცხადა გიორგი გახარიამ.

რაც შეეხება საპარლამენტო მანდატებს, გახარიას თქმით, პარტიას „საქართველოსთვის“ აქვს ძალიან პრაგმატული, გააზრებული, თანმიმდევრული პოლიტიკა. გახარიას განმარტებით, დღეს არიან საპარლამენტო ბოიკოტის რეჟიმში.

„უადგილო ადგილას ღელავენ ხოლმე. ხელისუფლებაც – მაისამდე შევლენ, ან მაისამდე გამოაცხადებენ, არ ვმოქმედებთ ჩვენ ასე. ოპოზიციაც – ხომ გახსოვთ, „ნაცები“ ამბობდნენ, პარტია „საქართველოსთვის“ და გახარია აუცილებლად მისცემენ ლეგიტიმაციას „ოცნებას“ და პარლამენტში შევლენ. შევედით? არ შევედით. ჩვენ გვაქვს ძალიან პრაგმატული, გააზრებული, თანმიმდევრული პოლიტიკა. ჩვენ არ ვცვლით ასე 180 გრადუსით მიდგომებს. ამიტომ ვამბობ, რომ მანდატებთან დაკავშირებით და საქართველოს პარლამენტში, მე-11 მოწვევის პარლამენტში შესვლასთან დაკავშირებით დღეს ჩვენ ვართ ბოიკოტში, არ შევდივართ. რაღაც თუ შეიცვალა, ჩვენ ხომ არ ვართ ის ძალა, ხომ გვეტყობა, რომ არ ვმალავთ, არავის არ ვეპარებით, უჩუმრად არაფერს არ ვაკეთებთ, სიურპრიზებს არ ვაწყობთ. ჩვენ ყველაფერს ვაკეთებთ ღიად. დღეს მსოფლიოში ისეთი პროცესები მიმდინარეობს, ყველა პასუხისმგებლიანი პოლიტიკოსის მთავარი მიზანი უნდა იყოს  საქართველოში მთავარი პრობლემის, რადიკალიზაციის დაძლევა. ჩვენ უნდა გვესმოდეს, გლობალური თამაშის წესები იცვლება. მაგალითად, დღეს წავიკითხე განცხადებები ვეიმარის ტრიოს განცხადებასთან დაკავშირებით. როგორ შეიძლება, ასე უპასუხო მთავარი წამყვანი სახელმწიფოების მეთაურების წერილს, რომელ სახელმწიფოთა გაერთიანებაშიც ამბობ, რომ შესვლა გინდა. ხომ არსებობს ტელეფონი, უნდა არსებობდეს საელჩოები, არსებობს დახურული ხაზები, როცა თვითონ უნდათ, გამოვლენ და იტყვიან, რომ ვიღაც მოვიდა და ომში გვითრევდაო, ახლა ამ ინფორმაციის მარტო 20 პროცენტს გეტყვითო, მეტი რომ გითხრათ, გაგიჟდებითო. როცა საჭიროა, დახურულ ხაზებს თურმე იყენებენ. მე ვფიქრობ, რომ დღეს თითოეულმა ჩვენგანმა ყველაფერი უნდა გავაკეთოთ, რათა ეს რადიკალიზაცია როგორმე შევამციროთ. ამას ვცდილობთ მანდატების არგაუქმებითაც, იმითაც, რასაც ვამბობთ მუნიციპალურ არჩევნებთან დაკავშირებით, იმითაც, რასაც ვამბობთ მაგალითად, არჩევნებთან დაკავშირებით. უნდა გვესმოდეს, რომ ადამიანებზე ზრუნვა არის მთავარი ამოცანა“, – განაცხადა გიორგი გახარიამ.

დღეს „ოცნებას“, სამწუხაროდ, ჰყავს იმდენი მხარდამჭერი, რამდენსაც არ იმსახურებს და ამაში თითოეული ჩვენგანის ბრალიც არის, – ამის შესახებ პარტია „საქართველოსთვის“ თავმჯდომარემ გიორგი გახარიამ პარტიის ყრილობაზე განაცხადა.

როგორც გახარიამ აღნიშნა, ეს ნიშნავს, რომ ხალხს ვერ აუხსნეს, „ქართული ოცნება“ აღარ არის ძალა, რომელიც იბრძვის ღირსებისთვის, სამართლიანობისთვის.

„ეს არის ის ძალა, რომელიც არსებობს დღეს მხოლოდ და მხოლოდ უსამართლობის, ძალადობის და კორუფციის ხარჯზე. ეს არის ის ძალა და გახდა ის ძალა, რომელსაც მორალური და ფასეულებრივი საფუძველი აღარ აქვს და მხოლოდ იმიტომ აკონტროლებს ხელისუფლებას, რომ ფიზიკურად უფრო ძლიერია. დემოკრატია ქვეყანაში, სადაც არ არის სოციალური სამართლიანობა, შეუძლებელია“, – განაცხადა გიორგი გახარიამ.

ამასთან, გახარიამ განაცხადა, რომ აუცილებელია რადიკალიზაციის და პოლარიზაციის დაძლევა.

„ჩვენ გვყავს ორი პოლუსი, რომლიდანაც ერთი გვეუბნება, რომ ის არის მხოლოდ ეროვნული, თითქოს პრივატიზება მოახდინა, ეროვნულობის უფლება წაგვართვა თითოეულ ჩვენგანს და ვიღაც გვიხსნის ოჯახის ფასეულობას, ის ხალხი, რომელიც, მერწმუნეთ, ოჯახის ფასეულობებთან, შეიძლება, ძალიან შორს იყვნენ; მეორე მხარეს მეორე პოლუსია, რომელიც ამბობს, რომ ევროპულები ისინი არიან მხოლოდ. ეს არის კატეგორიულად მიუღებელი. ყველასთვის, ვინც დღეს საქართველოში მიიჩნევს, რომ არც ერთი პოლუსის და არც მეორე პოლუსის ხელში საქართველოს მომავალი არ უნდა იყოს, ჩვენი პოლიტიკური ძალის კარი ღიაა“, – განაცხადა გიორგი გახარიამ.

გახარიას განმარტებით, პარტია „საქართველოსთვის“ ემზადება ნებისმიერი არჩევნებისთვის.

„ჩვენ ვემზადებით ნებისმიერი შემდეგი არჩევნებისთვის. ვიღებთ იმ პასუხისმგებლობას, რომ არ ვმალავთ არაფერს და საქართველოს თითოეულ მოქალაქეს ვეუბნებით, რომ დიახ, ჩვენთვის ქვეყანაში ხელისუფლების ცვლილება შესაძლებელია მხოლოდ და მხოლოდ მშვიდობიანად და არჩევნების გზით. ჩვენ ვამბობთ, რომ ნებისმიერი რადიკალური, რევოლუციური სცენარი ამ ქვეყანაში გაახარებს მხოლოდ და მხოლოდ საქართველოს მტრებს. ვინც მიიჩნევთ, რომ დღევანდელი რეალობა, რომელიც არ მოგწონთ, უნდა შეიცვალოს მშვიდობიანი გზით, მათთვისაც ჩვენი პოლიტიკური კარი არის ღია“, – განაცხადა გიორგი გახარიამ.