სლოვაკეთის პრემიერ-მინისტრმა, რობერტ ფიცომ განაცხადა, რომ უკრაინას ნატოში გასაწევრიანებლად არ მიიწვევენ.

ინფორმაციას ამის შესახებ Euronews-ი ავრცელებს.

სლოვაკეთის მთავრობის მეთაურის თქმით, რუსეთი არ გაიყვანს თავის ჯარებს ოკუპირებული ყირიმიდან ან უკრაინის სხვა ნაწილებიდან.

„უკრაინას ნატოში გასაწევრიანებლად არ მიიწვევენ. უკრაინა დაკარგავს თავისი ტერიტორიის მესამედს. იქ იქნება უცხოური სამხედრო ძალები“, – აღნიშნა რობერტ ფიცომ.

მიუხედავად იმისა, რომ ფიცომ აღიარა, რომ რუსეთმა დაარღვია საერთაშორისო სამართალი უკრაინაში შეჭრით, მან დიდწილად დაადანაშაულა დასავლეთი უკრაინის ცუდ სიტუაციამდე მიყვანაში.

პირდაპირ მინდა მოვუწოდო ბიზნესს, რომ გამაფრთხილებელი, თუნდაც 2-საათიანი გაფიცვა მოვაწყოთ. ერთდროულად ყველამ გააჩეროს თავისი საწარმო, გამოვიდეს გარეთ, ერთი წარწერით – გავიფიცეთ!, – ამის შესახებ „ძლიერი საქართველოს“ ლიდერი, მამუკა ხაზარაძე სოციალურ ქსელში წერს.

მამუკა ხაზარაძის განცხადებით, ეს იქნება გამაფრთხილებელი და ძალიან სერიოზულად დამაფიქრებელი ხელისუფლებისთვის.

„2 000 ორგანიზაცია და ბიზნესკომპანია ერთად რომ დადგება და იტყვის, რომ ვითხოვთ პოლიტიკური პატიმრების გათავისუფლებას და ახალ არჩევნებს, რომ კრიზისი განიმუხტოს,, ეს არ არის უბრალო გაერთიანება – ახალი ბიზნეს საზოგადოება დაიბადა – თავისუფალი, მებრძოლი, რომელიც ყოველთვის ადგება და იტყვის თავის სიტყვას!

აქვე, პირდაპირ მინდა, მოვუწოდო ბიზნესს, რომ გამაფრთხილებელი, თუნდაც 2-საათიანი გაფიცვა მოვაწყოთ.

ერთდროულად ყველამ გააჩეროს თავისი საწარმო, გამოვიდეს გარეთ, ერთი წარწერით – გავიფიცეთ!

ეს იქნება გამაფრთხილებელი, ძალიან სერიოზულად დამაფიქრებელი, ხელისუფლებისთვის, რადგან შემდეგი გაფიცვა უკვე სხვანაირი შეიძლება იყოს.

ხელში უნდა იქნეს აღებული ყველა ძალაუფლება, იმიტომ, რომ ეს ხალხი, იგივე ე.წ. პრემიერი ბიზნესის გადასახადებით იღებს ფულს და აქეთ მოდის და გემუქრება, იმის ნაცვლად, რომ ხელის გულზე გატაროს.

მოვუწოდებ იმ ბიზნესმენებს, რომლებიც ჯერ კიდევ არ არიან ამ პროცესში ჩართული. მეგობრებო, მე არავის არაფერს ვაძალებ, მაგრამ მერე ძალიან გვიან არ იყოს, იმიტომ, რომ აქ საუბარი არ არის თქვენი კომპანიის კეთილდღეობაზე, აქ საუბარია ჩვენი ქვეყნის ხვალინდელ დღეზე!“, – წერს მამუკა ხაზარაძე.

გაუგონარი რამ არის, რომ დიპლომატები დაისაჯონ რაღაცის გამო, – ამის შესახებ საქართველოს საგარეო საქმეთა მინისტრმა, მაკა ბოჭორიშვილმა „რუსთავი 2“-ის ეთერში განაცხადა.

მისი განმარტებით, ევროკავშირთან საქართველოს აქვს ხელშეკრულება გაფორმებული, რომლითაც დარეგულირებულია უვიზო მიმოსვლა დიპლომატიური პასპორტების მფლობელებისთვის, მის შეჩერებას კი კონკრეტული პირობები აქვს და ამიტომ უნდა დაველოდოთ ევროკომისიის განმარტებას.

ამასთან, როგორც ბოჭორიშვილმა აღნიშნა, პოლიტიკურად ეს ჟესტი ძალიან გაუგებარია.

„ჯერ არაფერი არ დაწესებულება, არსებობს საერთაშორისო ხელშეკრულებები, არსებობს საერთაშორისო ნორმები, რომლითაც წესრიგდება ჩვენსა და ევროკავშირს შორის ურთიერთობები, როდესაც საქმე გვაქვს დიპლომატიური პასპორტებით უვიზო მიმოსვლასთან დაკავშირებით. რაც შეეხება პრინციპულად ამ საკითხს, რომ დიპლომატები დაისაჯონ რაღაცის გამო, ეს რაღაც გაუგონარი რამ არის.

ჩვენ არ ვაცალკევებთ არავის, ვსაუბრობთ დიპლომატიური პასპორტების მფლობელ ადამიანებზე და ასეთი, პირველ რიგში არიან სწორედ დიპლომატები. ის ადამიანები, რომლებიც საგარეო უწყებაში მუშაობენ, ის ადამიანები, რომლებიც ქვეყანას ემსახურებიან ქვეყნის ფარგლებს გარეთ და ასეთი არის დიპლომატიური პასპორტის მფლობელების 80-90%. დანარჩენი, ვისაც უწევს სამსახურებრივად დიპლომატიური პასპორტის ქონა, შეიძლება, წარმოადგენდეს ასეთი ადამიანების 10-15%-ს.

ეს ჟესტი პოლიტიკურად არის ძალიან გაუგებარი, ომში მყოფი ქვეყნები სცემენ ერთმანეთის დიპლომატებს პატივს და ეს არ არის საერთაშორისო ურთიერთობებში მიღებული ფორმა, როდესაც პირველი იწყებ დიპლომატებზე ხელის მოკიდებას. დიპლომატები არიან განსაკუთრებული წრე ადამიანებისა, სარგებლობენ პრივილეგიებით და იმუნიტეტებითაც, სწორედ იმიტომ, რომ ამით არის გამოკვეთილი მათი განსაკუთრებული სტატუსი ქვეყნებს შორის ურთიერთობებში.

ევროკავშირთან ჩვენ გვაქვს ხელშეკრულება გაფორმებული, რომლითაც დარეგულირებულია უვიზო მიმოსვლა დიპლომატიური პასპორტების მფლობელებისთვის. ეს ხელშეკრულება ჯერ კიდევ 2010 წელს გაფორმდა საქართველოსა და ევროკავშირს შორის და მას შემდეგ ქართული დიპლომატიური პასპორტის მფლობელი ადამიანები უვიზოდ დადიან ევროკავშირის სივრცეში. ამ შეთანხმებას აქვს შეჩერების, გაუქმების, ძალიან კონკრეტული პირობები. ამიტომ, ჩვენ უნდა დაველოდოთ, რა სამართლებრივ საფუძველს და განმარტებას მისცემს ამ ყველაფერს ევროკომისია, თუ როგორ უნდა მოხდეს ამ ზომის ამოქმედება. ამას სჭირდება სამართლებრივი საფუძვლის მომზადება, სწორედ ეს დაევალება ევროკომისიას და ვნახოთ, როგორი იქნება სამართლებრივი საფუძველი. ერთი შეხედვით, ძალიან მარტივია ჩაიხედო შეთანხმებაში და ნახო, რა პირობები არსებობს, რათა ეს შეთანხმება შეჩერდეს. იქ არსად არ წერია, რომ ეს შეთანხმება შეიძლება, გამოყენებული იყოს რაღაც პოლიტიკური მიზნებისთვის ქვეყნის ან ხელისუფლების დასასჯელად. ამისთვის არ ყოფილა ეს შეთანხმება გაფორმებული. ამიტომ, ჩვენ უნდა დაველოდოთ იმ განმარტებას, რასაც მივიღებთ ევროკომისიისგან“, – განაცხადა მაკა ბოჭორიშვილმა.

საქართველოს პრემიერ-მინისტრი ირაკლი კობახიძე ADP ჯგუფის წევრი TAV Airports-ის მენეჯმენტს შეხვდა, რომელიც თბილისისა და ბათუმის საერთაშორისო აეროპორტებს მართავს. ინფორმაციას მთავრობის ადმინისტრაცია ავრცელებს. მათივე ინფორმაციით, მსხვილი ფრანგული ჰოლდინგის ხელმძღვანელმა პირებმა ირაკლი კობახიძეს არჩევნებში მმართველი გუნდის გამარჯვება და პრემიერ-მინისტრის თანამდებობაზე დამტკიცება მიულოცეს და წარმატებები უსურვეს.

“შეხვედრისას საუბარი შეეხო სამომავლო თანამშრომლობის პერსპექტივებს. კომპანიამ გამოთქვა სურვილი, დარჩეს საქართველოს ბაზარზე და განაგრძოს ოპერირება, მათ შორის, თბილისის ახალ საერთაშორისო აეროპორტში.

კომპანიის წარმომადგენლებმა ისაუბრეს სამომავლო გეგმებსა და სახელმწიფოსთან მჭიდრო თანამშრომლობაზე, რათა თბილისის საერთაშორისო აეროპორტის ინფრასტრუქტურამ უპასუხოს გაზრდილ მგზავრთნაკადს და ახალი ავიაკომპანიების საჭიროებებს. აღინიშნა, რომ წლის ბოლომდე მგზავრთნაკადი თბილისის საერთაშორისო აეროპორტში 1 მილიონით გაიზრდება და თითქმის 5 მილიონს მიაღწევს.

შეხვედრისას ხაზი გაესვა საქართველოს ხელისუფლების სწორ პოლიტიკას, რაც ხელს უწყობს საქართველოში მეტი ახალი ავიაკომპანიის შემოსვლასა და მგზავრთნაკადის ზრდას თბილისისა და ბათუმის საერთაშორისო აეროპორტებში, შესაბამისად – ეკონომიკისა და ტურიზმის განვითარებას. დადებითად შეფასდა სახელმწიფოს ძალისხმევა ჩინეთის სახალხო რესპუბლიკასთან ვიზალიბერალიზაციის კუთხით, რაც უზრუნველყოფს ჩინეთიდან მგზავრთნაკადის ზრდას და საქართველოს ბაზრით ახალი ავიაკომპანიების დაინტერესებას”, – ნათქვამია ინფორმაციაში.

გაუარესებული ურთიერთობები იქნება შეცვლილი, დარწმუნებული ვარ, ეს ყველაფერი მოხდება იმის გამო, რომ საქართველო არის მნიშვნელოვანი პარტნიორი, მათ შორის ამერიკის შეერთებული შტატებისთვისაც, – ამის შესახებ საგარეო საქმეთა მინისტრმა, მაკა ბოჭორიშვილმა „რუსთავი 2“-ის ეთერში განაცხადა.

მისივე თქმით, აშშ-ის გადაწყვეტილება, საქართველოსთან შეაჩეროს პარტნიორობა, რეგიონში არსებულ რუსეთ-უკრაინის კონფლიქტს უკავშირდება.

ამასთან, როგორც ბოჭორიშვილმა აღნიშნა, მნიშვნელოვანია, ყველა სტრატეგიულ პარტნიორთან პარტნიორობა შინაარსით იყოს დატვირთული.

„ჩვენ ამ დამოკიდებულებას საქართველოს მიმართ ვუკავშირებთ იმ ომს, რომელიც ამჟამად მიმდინარეობს უკრაინაში და ზოგადად, იმ ვითარებას, რომელიც შექმნილია რეგიონში. ამასთან დაკავშირებით უკვე არაერთხელ მოგვისმენია ამერიკის ახლად არჩეული პრეზიდენტის პოზიცია, როგორ ხედავს ჩვენს რეგიონში ამ კონფლიქტის სასწრაფოდ დარეგულირების საჭიროებას. თეთრ სახლში ვიდრე დაიკავებს ადგილს, მანამდეც კი გადადგა გარკვეული ნაბიჯები ამ მიმართულებით და ვხედავთ, რომ მუშაობა მიდის ამ საკითხზე უკრაინის ხელისუფლებასთანაც, რუსეთთანაც. ეს იძლევა იმის ფიქრის საფუძველს, რომ ძალიან მალე ეს საკითხი კიდევ უფრო აქტიურად დადგება საერთაშორისო დღის წესრიგში. რუსეთსაც და უკრაინასაც მოუწევთ, გარკვეულ შეთანხმებაზე და დიპლომატიური გზების ძიებაზე დაიწყონ ფიქრი. მეორე საკითხია, როგორი იქნება ეს გადაწყვეტა, იქნება თუა არა ისეთი, როგორიც ჩვენ ყველას გვინდა, რომ ვნახოთ, მაგრამ როდესაც ვსაუბრობთ იანვარზე, ეს არის თარიღი, როდესაც ამერიკის ახლად არჩეული პრეზიდენტი დაიკავებს ადგილს.

არ მაქვს მოლოდინი, რომ ამერიკის შეერთებული შტატების პრეზიდენტი შევა კაბინეტში და პირველი საქართველოზე ფიქრსა და ზრუნვას დაიწყებს. ურთიერთობები იქნება სხვაგვარი, ეს ეფუძნება იმ წინაპირობას, რაც დღეს არის. ეს გაუარესებული ურთიერთობები იქნება შეცვლილი და ეს ვითარება რამდენიმე თვეში სხვაგვარი იქნება. დარწმუნებული ვარ, ეს ყველაფერი მოხდება იმის გამო, რომ საქართველო არის მნიშვნელოვანი ქვეყანა და მნიშვნელოვანი პარტნიორი, მათ შორის, ამერიკის შეერთებული შტატებისთვისაც. ის სტრატეგიული პარტნიორობა, რაც გვქონდა, არ იყო აბსტრაქტული რამ, ამას ჰქონდა კონკრეტული მიზეზები, რატომ უნდოდა ამერიკას საქართველოსთან სტრატეგიული პარტნიორობა, სწორედ მნიშვნელობიდან გამომდინარე და ეს მნიშვნელობა არსად წასულა, აქ არის საქართველოს მნიშვნელობა და, რა თქმა უნდა, იმედი მაქვს.

ჩვენთვის მნიშვნელოვანია, ყველა სტრატეგიულ პარტნიორთან პარტნიორობა შინაარსით იყოს დატვირთული. ჩვენ ეს არაერთხელ გვითქვამს. სამწუხაროდ, ეს არ გამოვიდა ამ ადმინისტრაციის პირობებში. არაერთხელ გაგვიგზავნია გზავნილი, რომ გვსურს შინაარსით დავტვირთოთ ეს ურთიერთობები და ჩვენი ურთიერთობა იყოს ნამდვილად სტრატეგიული“, – განაცხადა მაკა ბოჭორიშვილმა.

„ქართული ოცნება“ ქართველებს მათ მიერ არჩეულ ევროატლანტიკური ინტეგრაციის გზას აშორებს, – ამის შესახებ აღნიშნულია ჰელსინკის კომისიის განცხადებაში.

განცხადებაში ნათქვამია, რომ ქართველი ხალხის მასობრივი წინააღმდეგობის მიუხედავად, „ქართული ოცნება“ განაგრძობს მსოფლიოს ავტოკრატებთან ინტეგრაციას.

„„ქართული ოცნება“ ქართველებს მათ მიერ არჩეულ ევროატლანტიკური ინტეგრაციის გზას აშორებს და მიათრევს აგრესორების ღერძისკენ, რომელთა მიზანია დემოკრატიული მსოფლიო წესრიგის განადგურება.

ქართველი ხალხის მასობრივი წინააღმდეგობის მიუხედავად, „ქართული ოცნება“ განაგრძობს მსოფლიოს ავტოკრატებთან ინტეგრაციას. ივნისში საქართველოს პრემიერ-მინისტრი კობახიძე დაესწრო ირანის პრეზიდენტ ფეზეშქიანის ინაუგურაციას. ეს მას შემდეგ მოხდა, რაც „ქართული ოცნება“ ეცადა, გაეძლიერებინა ეკონომიკური კავშირები ირანსა და საქართველოს შორის. თავის მხრივ, გავრცელებული ცნობების თანახმად, ირანთან დაკავშირებული ჯგუფები მხარს უჭერდნენ „ქართული ოცნების“ კამპანიას და ავრცელებდნენ ანტიდასავლურ ნარატივებს. აგვისტოში „ქართულმა ოცნებამ“ სტრატეგიული პარტნიორობის შეთანხმება გააფორმა ჩინეთთან. ჩინური კონსორციუმი ამჟამად აშენებს მასშტაბურ ღრმაწყლოვან პორტს ანაკლიაში, ჩინეთის „სარტყელი და გზის“ ინიციატივის ფარგლებში.

„ქართული ოცნება“ თუ მოახერხებს ძალაუფლების შენარჩუნებას, პარტია საქართველოს აქცევს ძალაუფლების პროექციისა და ეკონომიკური შესაძლებლობების ადგილად არა მხოლოდ მისი რუსი პატრონებისთვის, არამედ ჩინეთისა და ირანისთვისაც, რომლებთანაც „ქართული ოცნება“ სულ უფრო მეტად დაახლოვდა“, – აღნიშნულია განცხადებაში.

ბრიუსელში დღეს ევროკავშირის ლიდერები შეიკრიბებიან და სხვა საკითხებთან ერთად, საქართველოზეც ისაუბრებენ, – ამის შესახებ ინფორმაციას ევროკავშირი ავრცელებს.

„კონკრეტული მოვლენების გათვალისწინებით, ევროკავშირის ლიდერებმა, შესაძლოა, განიხილონ საგარეო პოლიტიკის კონკრეტული საკითხები, მათ შორის საქართველოსა და მოლდოვაში განვითარებული მოვლენები“, – აღნიშნულია ინფორმაციაში.

ამასთან, ევროკავშირის ლიდერები დღევანდელ შეხვედრაზე უკრაინასთან, ახლო აღმოსავლეთთან, მიგრაციასა და საგარეო პოლიტიკასთან დაკავშირებულ სხვა საკითხებზეც იმსჯელებენ.

შეხვედრაზე მიწვეულია უკრაინის პრეზიდენტი, ვოლოდიმირ ზელენსკი, რომელიც უკვე ბრიუსელში იმყოფება.

როდესაც პორტუგალიაში, ირლანდიაში, საფრანგეთში ცხოვრობ, ძალიან მარტივია ილაპარაკო – საზღვრები დავბლოკოთ, ვაჭრობა შევწყვიტოთ, სანქციები დავუწესოთ რუსეთს. როდესაც რუსეთის საზღვართან იმყოფები, ეს იგივე არ არის, – განაცხადა ევროპარლამენტარმა ტიერი მარიანიმ გადაცემაში „იმედი LIVE“. მისი თქმით, ხელისუფლებამ უნდა იმოქმედოს საქართველოს ინტერესებიდან გამომდინარე.

„ვფიქრობ, მთავრობის ფუნქციაა იფიქრო ქვეყნის ინტერესებიდან გამომიდინარე და მე სრულად მესმის რატომ არ შემოიღეთ სანქციები. სერბეთმაც უარი განაცხადა სანქციებზე და ეკონომიკა საკმაოდ ჯანსაღი აქვთ, უნგრეთმაც უარი განაცხადა, რადგან იაფი ენერგომატარებლები გვაქვს და რას მივიღებთ ინდუსტრიისთვის, რომ სანქციები დავაწესოთ? შეხედეთ ქვეყნებში სიტუაციას, რომლებმაც სანქციები შემოიღო, დავაკვირდეთ გერმანიას და საფრანგეთს – ძალიან ცუდია მდგომარეობა რადგან ენერგომატარებლების ფასი ურტყამს კომპანიებს. მე დიდი ხანია ვმოღვაწეობ პოლიტიკაში. 2008 წელს, როდესაც რუსეთი საქართველოს თავს დაესხა, ამ მომენტში არცერთმა ქვეყანამ არ შემოიღო სანქციები რუსეთის წინააღმდეგ. თქვენ მარტო დარჩით და ამიტომ აბსოლუტურად მესმის, რატომაც არ შემოიღებს თქვენი ქვეყანა სანქციებს რუსეთის წინააღმდეგ. იმავეს გავაკეთებდი, პირველ რიგში საქართველოს ინტერესებიდან გამომდინარე უნდა ვიმოქმედოთ და არა ქალბატონი ფონ დერ ლაიენის ინტერესებით“, – განაცხადა ტიერი მარიანიმ.