ამ წუთის მონაცემებით, საკონსულოების რაოდენობა დარეგისტრირებული საქართველოს მოქალაქეების შესატყვისია. დარბაზში იმ დღეს რა მოხდა – ვაშაძემ მოიტანა 52 ადამიანის სია, 800 ათასით დაიწყეს და საბოლოო ჯამში 52 ადამიანის პრობლემაზე ალაპარაკდნენ, მერე ერთი აღარ აღმოჩნდა პრობლემური იქიდან, – ამის შესახებ „ქართული ოცნების“ აღმასრულებელმა მდივანმა მამუკა მდინარაძემ ჟურნალისტებთან განაცხადა.

უმრავლესობის ლიდერი გამოეხმაურა გიორგი ვაშაძის განცხადებას, რომელმაც პარლამენტში სიტყვით გამოსვლისას მმართველ გუნდს იმ ემიგრანტების სია წარუდგინა, რომლებსაც, ოპოზიციონერის თქმით, საზღვარგარეთ საკონსულოებში საარჩევნოდ არ არეგისტრირებენ.

„ემიგრაციაში რომ უამრავი ადამიანია, ამას ლაპარაკი რად უნდა. ზოგი გაჭირვების გამო მიდის და ზოგი სხვადასხვა მიზეზების გამო. აქ პროგრესი გვაქვს თუ რეგრესი გვაქვს, ამაზე უნდა ვილაპარაკოთ. ჩემი ძალიან ახლობლებიც არიან ემიგრაციაში და ბუნებრივი ამბავია ეს. გასაგებია, ცუდია ძალიან, მაგრამ შედარებითია ყველაფერი. მიგრაციული სალდო გვაქვს, როგორც იქნა, დადებითი. ადამიანი, რომელიც მივიდა, საბუთები წესრიგში ჰქონდა და შეიტანა ეს საბუთები, ყველამ შესაბამისი რეგისტრაცია მიიღო. ვისაც არ ჰქონდა წესრიგში, ამ ადამიანებმა ვერ მიიღეს. ათასში ერთი შემთხვევა შეიძლება იყო, გამონაკლისზე გამონაკლისი, სხვა არცერთი შემთხვევა არ ფიქსირდება, როცა ყველაფერი წესრიგში ჰქონდა, საქართველოს მოქალაქე იყო და საელჩოში არ დაარეგისტრირეს. რამდენი დღეა გასული მას შემდეგ, რაც მე ვაშაძეს ფურცლები გამოვართვი და ვუთხარი, რომ ერთი დაესახელებინა. 52-კაციანი სია ჰქონდა და ერთი ვერ დამისახელა, ანუ იტყუებოდა“, – აღნიშნა მამუკა მდინარაძემ.

არის კოორდინირებული ქცევა, რომ უფლებები და ლგბტ პროპაგანდა გააიგივონ ანუ დააახლოონ. ჩვენი მიზანია, რომ ისინი ერთმანეთს დავაშოროთ და უფლებებს არავინ შეეხოს და მაინც იბრაზებენ თავს. ვეუბნებით, უფლებების დაცვის ხარისხი გავზარდოთ და ამაზე ბრაზდებიან?! პროპაგანდა ავკრძალოთ – ამაზე ბრაზდებიან?! გვითხრან, ან ერთზე ბრაზდებიან ან მეორეზე. ორივეს ერთად თუ ილაპარაკებენ, მაშინ ძალით იბრაზებენ თავს, – ამის შესახებ მამუკა მდინარაძემ განაცხადა.

ჟურნალისტებთან საუბრისას „ქართული ოცნების“ აღმასრულებელმა მდივანმა და საპარლამენტო უმრავლესობის ლიდერმა აღნიშნა, რომ ოპონენტები ამ საკითხის ირგვლივ ცისარტყელამ გააერთიანა.

„სხვათა შორის, გუშინ ცისარტყელამ გააერთიანა, რაც ჩვენ ვერ ვქენით, გუშინ ცისარტყელამ ქნა. გუშინ მთელი კამპანია აწიეს ოპოზიციაში. სხვა თემაზე ხომ ვერ გაბედეს გაერთიანება, ცისარტყელამ და მისმა ფერებმა გააერთიანა. იყვნენ გახარებულები, აჟიტირებულები და მთაგავდნენ თურმე ამ რაღაცებზე. იყო ერთი ამბავი. ცისარტყელამ გააერთიანა ბოლოს და მართლა პროპაგანდისტები არიან, ბავშვებს ცისარტყელა წაართვეს. ეს ხუმრობით, რა თქმა უნდა“, – განაცხადა მდინარაძემ.

მისივე თქმით, ლგბტ პროპაგანდის მხარეს ძალიან დიდი ფინანსები დგას და „თბილისი პრაიდს“ და სხვა „ენჯეოებს“ დაფინანსების შესახებ ინფორმაციის გამოქვეყნებისკენ მოუწოდა.

„მე ვაბრალებ მათ, რომ ლგბტ პროპაგანდაში იხარჯება მათი ფინანსების ძალიან დიდი ნაწილი. თავის დამფინანსებლებსაც და საქართველოს მოქალაქეებსაც უთხრან, რომ ეს არის ან მართალი ან ტყუილი. ვიღებ ამ პასუხისმგებლობას ჩემს თავზე“, – აღნიშნა მდინარაძემ.

როგორც ჩანს, საპარლამენტო არჩევნები მოახლოვდა ისე, რომ ოპოზიციის მთავარი დაპირება, ალბათ, იქნება მიხეილ სააკაშვილის გათავისუფლება, ჩანს, როგორი უთავმოყვარეოა ოპოზიცია, ვინც უშვერი სიტყვით ლანძღავდნენ ქალბატონ სალომე ზურაბიშვილს არჩევნების პერიოდში, ზუსტად იგივე ადამიანები ახლა ეხვეწებიან, შეწყალებას და მოწყალებას სთხოვენ იგივე ადამიანს, სალომე ზურაბიშვილს, – ამის შესახებ „ქართული ოცნების“ წევრმა, არჩილ თალაკვაძემ განაცხადა.

თალაკვაძის თქმით, ოპოზიციის ქმედებები მიუთითებს, როგორი არათანმიმდევრული და უთავმოყვარეო ლიდერები ჰყავს ოპოზიციას.

„შეწყალების გადაწყვეტილებას რაც შეეხება, ვხედავთ, რომ პრეზიდენტის რიტორიკა შეიცვალა ბოლო ორი წლის განმავლობაში. ის აკრიტიკებს უკვე ხელისუფლებას, რეალურად იგივე დღის წესრიგის მხარდამჭერია, რომელსაც რადიკალური ოპოზიცია ატარებს. შესაბამისად, შეწყალების გადაწყვეტილება დიდწილად დამოკიდებული იქნება შიდა კვლევებზე, რასაც ისინი ატარებენ და რის შესახებაც არ იცის საზოგადოებამ. როგორც კი საბოლოო დასკვნას გამოიტანენ, რა სჯობს მათთვის, შეწყალება თუ ამისგან თავის შეკავება, შემდეგ მიიღებენ ამ გადაწყვეტილებას“, – აღნიშნა დეპუტატმა.

არჩილ თალაკვაძის განცხადებით, სალომე ზურაბიშვილმაც და „ნაციონალურმა მოძრაობამაც“ ძალიან კარგად იცის, რომ მიხეილ სააკაშვილის შეწყალება იმ ადამიანისთვის იქნება უმძიმესი პოლიტიკური გადაწყვეტილება, ვინც ამ გადაწყვეტილებას მიიღებს

„მიდის კამპანია, რომ როგორმე საზოგადოების ყური შეაჩვიონ ამ სცენარს და ამაზე საუბრობენ როგორც შიგნით, ასევე გარე სპიკერები. როგორც ჩანს, ახლა ამისთვის შეაწუხეს ათიათასობით ადამიანი ხელმოწერებისთვის. როგორც ამბობენ, ალბათ ეს ხელმოწერებიც. მიუთითებს, რომ „ნაციონალური მოძრაობის“ მხარდაჭერა და რეიტინგი მკვეთრად არის შემცირებული. ხელმოწერებით ვერავინ აუვლის მართლმსაჯულებას გვერდს და ვერავინ აიძულებს ვერც სასამართლოს და სახელმწიფოს, შეცვალოს სამართლიანი გადაწყვეტილება“, – განაცხადა თალაკვაძემ.

„ნაციონალურმა მოძრაობამ“ პრეზიდენტის სასახლესთან აქციას გუშინ გამართა. ორბელიანების სასახლესთან შეკრებილებმა მიხეილ სააკაშვილის გათავისუფლება მოითხოვეს.

ბევრი ჩვენგანი, მათ შორის რამდენიმე მინისტრი, ვიქნებით რესპუბლიკის მოედანზე მათთან ერთად, ვინც ვერ შეძლო ბილეთების ყიდვა, მათთან ერთად ვუგულშემატკივრებთ ჩვენს ძალიან მაგარ ბიჭებს, – ამის შესახებ საპარლამენტო უმრავლესობის ლიდერმა, მამუკა მდინარაძემ განაცხადა.

მდინარაძის თქმით, დღეს არის შესაძლებლობა, რომ ახალი ისტორია დაიწეროს.

„დღეს მე ვიქნები რესპუბლიკის მოედანზე. გავიყავით, უმრავლესობის წევრების ნახევარი რესპუბლიკის მოედანზე ვიქნებით, ხოლო დანარჩენები, რომლებსაც ბილეთი შეხვდათ, იქნებიან მოედანზე. ლევან კობიაშვილს ველაპარაკე და მითხრა, რომ ბილეთები როცა გაიყიდა, იმ წუთის მდგომარეობით, ნახევარი მილიონი ადამიანი იდგა რიგში. წარმოიდგინეთ, რამდენმაც ყიდვა შეძლო, ალბათ ოცი იმდენი დარჩა ბილეთების გარეშე. ამ ხალხს გავუწევთ ანგარიშს და ბევრი ჩვენგანი, მათ შორის რამდენიმე მინისტრი, ვიქნებით რესპუბლიკის მოედანზე მათთან ერთად, ვინც ვერ შეძლო ბილეთების ყიდვა. მათთან ერთად ვუგულშემატკივრებთ ჩვენს ძალიან მაგარ ბიჭებს და მაგარ ნაკრებს. არ ვიცი, რა შეიძლება იყოს ამაზე მაგარი დღე. დღეს უნდა მოვახერხოთ და გავიმარჯვოთ. ეს იქნება ახალი ისტორია, არა მხოლოდ ფეხბურთის, არამედ ქვეყნის ახალი ისტორია. მათ შეუძლიათ, ეს ისტორიული ფურცელი გადაფურცლონ. ამაზე უფრო პოზიტიური არაფერი შეიძლება მოხდეს დღეს ამ ქვეყანაში. ეროვნულ ნაკრებს ვუსურვებ უდიდეს წარმატებებს ეროვნული საქმის გაკეთებაში. ჩვენ დღეს უნდა გავიმარჯვოთ“, – განაცხადა მამუკა მდინარაძემ.

„დინამო არენაზე“ საქართველოს ეროვნული ნაკრები საბერძნეთის ეროვნული ნაკრების წინააღმდეგ ევროპის ჩემპიონატის პლეიოფის ფინალურ მატჩს გამართავს. მატჩის პარალელურად, პირველი რესპუბლიკის მოედანზე თბილისის მერიისა და საქართველოს ფეხბურთის ფედერაციის მიერ ორგანიზებული ღონისძიება გაიმართება და ტერიტორიაზე ფეხბურთის გულშემატკივრებისთვის დიდი ეკრანი განთავსდება. შეხვედრა 21:00 საათზე დაიწყება, ხოლო პირველი რესპუბლიკის მოედანზე მოწყობილ ზონაში მისვლა გულშემატკივარს 19:00 საათიდან შეეძლება.

ხელმოცარულები ცდილობენ, უცხოელების დაკვეთა შეასრულონ, საიდანაც გრანტს იღებენ, რათა ჩვენს იდენტობას შეუტიონ, – ამის შესახებ საპარლამენტო უმრავლესობის წევრმა, ირაკლი ზარქუამ განაცხადა.

ზარქუას თქმით, „ქართული ოცნება“ ხალხთან ერთად დაიცავს ქართულ იდენტობას.

„ჩვენ დავაინიცირეთ საკონსტიტუციო ცვლილება, რომელიც გულისხმობს ოჯახური ღირებულებებისა და მომავალი თაობის დაცვას. ამასთან დაკავშირებით არსებობს კონკრეტული გამოწვევები, რომლებიც ითქვა და მათ შორის, გაიწერა პუნქტებად: ეს არის ქორწინება და ოჯახის შექმნა, მათ შორის არის შვილად აყვანის თემების დარეგულირება, სქესის შეცვლა და ასე შემდეგ. მთელი რიგი ნიუანსებია, რომლებიც მსოფლიო გამოწვევაა. ეს არ არის ჩვენი მოგონილი. ხელმოცარულები ცდილობენ, უცხოელების დაკვეთა შეასრულონ, საიდანაც გრანტს იღებენ, რათა ჩვენს იდენტობას, მართლმადიდებლობას, ეკლესიას, კულტურას, მენტალობას შეუტიონ. თუ გადაგვარდი, სარწმუნოება, ტრადიცია წაგართვეს, არ მოგეცა საშუალება, შვილს დაუძახო ქალიშვილი, ვაჟიშვილი, დედას – დედა, მამას – მამა, რა გვინდა მაშინ ევროკავშირში და სხვა გაერთიანებებში? ამათ ეს არ აინტერესებთ, მთავარია, უცხო ქვეყნის ინტერესები გაატარონ და ფული აიღონ. ჩვენ ამას წინ აღვუდგებით. ქართველ ხალხთან ერთად როგორც აქამდე მოვიგერიეთ არაერთი შემოტევა, ამ ხელმოცარულების და უცხოური დაფინანსების მქონე პირების, მათ შორის მდიდარი „ენჯეოების“, ახლაც გავუძლებთ და გავიტანთ ჩვენს გასატანს, დავიცავთ ჩვენს იდენტობას“, – განაცხადა ირაკლი ზარქუამ.

პარტია „ქართულმა ოცნებამ“ ოჯახურ ღირებულებათა და არასრულწლოვანთა დაცვის შესახებ საკონსტიტუციო ცვლილებები მოამზადა.