ჩვენი ბიჭების გამარჯვებით საქართველო, ფაქტობრივად, ევროკავშირის დე ფაქტო წევრი გახდა, ამას პოლიტიკური გამარჯვებები უნდა მოჰყვეს, – ამის შესახებ „სტრატეგია აღმაშენებლის“ წევრმა, პაატა მანჯგალაძემ განაცხადა.

მანჯგალაძის თქმით, საქართველო ერთიანობით შეძლებს, ევროკავშირის წევრი გახდეს.

„ჩვენმა ბიჭებმა მართლა შეუძლებელი შეძლეს, ბევრი თაობის ოცნება და ნატვრა შეასრულეს. ეს დიდი წარმატებაა დიდ გზაზე. ფაქტობრივად, ბიჭებმა შეძლეს, რომ ამ გამარჯვებით საქართველო ევროკავშირის დე ფაქტო წევრი გახდა. ამას პოლიტიკური გამარჯვებები უნდა მოჰყვეს. დარწმუნებული ვარ, ერმა როგორც ეს გამარჯვება მოახერხა, ერთიანობით იმასაც შევძლებთ, რომ ევროკავშირის წევრი გავხდეთ. საქართველომ ევროპა დემოკრატიით გააოცა“, – განაცხადა პაატა მანჯგალაძემ.

საქართველოს საფეხბურთო ნაკრებმა გუშინ საბერძნეთი პენალტების სერიაში დაამარცხა და ევროპის ჩემპიონატის საგზური ისტორიაში პირველად მოიპოვა.

როცა შენ გიპირისპირდებიან სახელმწიფო და პოლიტიკურ დონეზე, აუცილებელია შექმნა სამართლებრივი ბერკეტები, რომ დაიცვა თავი, მომავალი და შენი შვილები, – ამით ხსნის „ხალხის ძალის“ წევრი თამთა მეგრელიშვილი ლგბტ პროპაგანდის წინააღმდეგ მიმართულ საკანონმდებლო ინიციატივას, რომლის ავტორია მმართველი გუნდი.

როგორც თამთა მეგრელიშვილმა ჟურნალისტებთან საუბრისას განაცხადა, აუცილებელია ამ ინიციატივის კანონად ქცევა, რადგან როცა ქვეყანას უპირისპირდებიან, აუცილებელია შექმნა სამართლებრივი ბერკეტები.

„ზღვარგადასული ლიბერალიზმი არის ფერადი ფაშიზმი და ეს არის ჩვენკენ მომართული იარაღი, ჩვენს რელიგიაზე, კულტურულ ღირებულებებზე, ტრადიციებზე, ზოგადად მორალურ ასპექტებზე მომართული იარაღია, რომლის მთავარი სამიზნეა არასრულწლოვანი ბავშვები. ეს არის იარაღი, რომელსაც იყენებენ ჩვენს წინააღმდეგ. მეტსაც ვიტყვი, ამ თითქოსდა უფლებების სახელით ჩვენი უუფლებობამდე მიყვანა სურთ. რეალურად ესაა პრობლემა. ამიტომ, მე ვუერთდები ჩემი გუნდის – „ხალხის ძალის“ პოზიციას და როგორც „ხალხის ძალის“ წევრი და როგორც რიგითი მოქალაქე, თამთა მეგრელიშვილი აუცილებლად მივიჩნევ იმ ინიციატივის კანონად, სამართლებრივ მექანიზმად ქცევას, რა ინიციატივაც აქვს დღეს „ქართულ ოცნებას“. ეს საჭიროა იმიტომ, რომ როცა შენ გიპირისპირდებიან სახელმწიფო და პოლიტიკურ დონეზე, აუცილებელია შექმნა სამართლებრივი ბერკეტები, რათა დაიცვა თავი, მომავალი და შენი შვილები. ამიტომ, ეს არის ეროვნული ღირსების, თვითმყოფადობის, კულტურის გადარჩენის მთავარი გზა. ეს არის კანონპროექტი, რომელმაც ხორცი უნდა შეისხას და ეს არის ქართველი ხალხის, მოქალაქეების უმრავლესობის პირდაპირი დავალება და ჩვენ ეს დავალება უნდა შევასრულოთ. კიდევ ერთხელ ხაზგასმით აღვნიშნავ, რომ „ქართულ ოცნებასთან“ ერთად „ხალხის ძალა“ ამ ბრძოლის ავანგარდში დგება და ჩვენ არ გავურბივართ პასუხისმგებლობას. ჩვენ, ჩვენი მხრივ, ყველაფერს გავაკეთებთ იმისთვის, რომ ეს ინიციატივა ინიციატივად არ დარჩეს და ერთხელ და სამუდამოდ მოხდეს ამ აღვირახსნილობის, უკანონობის სამართლებრივი შეზღუდვა,” – განაცხადა თამთა მეგრელიშვილმა.

საქართველოს საგარეო საქმეთა მინისტრი ილია დარჩიაშვილი საქართველოს საბერძნეთთან გამარჯვებას და ევროპის ჩემპიონატზე გასვლას ულოცავს.

როგორც დარჩიაშვილი სოციალურ ქსელში წერს, „ევრო 2024“-ზე გასვლა ევროკავშირის კანდიდატის სტატუსის სამართლიანი და ლოგიკური გაგრძელებაა.

„ისტორიული გამარჯვება! გილოცავ, საქართველო. ვულოცავთ ჩვენს ეროვნულ საფეხბურთო გუნდს ამ ტრიუმფსა და აბსოლუტურად ამაღელვებელ გამარჯვებას. დიდი მადლობა თქვენი თავდადების, შრომისმოყვარეობისა და მთელი ერის სიამაყისთვის! „ევრო 2024“-ზე გასვლა ევროკავშირის კანდიდატის სტატუსის სამართლიანი და ლოგიკური გაგრძელებაა“, – წერს ილია დარჩიაშვილი.