როგორც ჩანს, საქართველოს მმართველი პარტია ევრაზიული ტირანიისკენ ტრიალდება , – ასე ეხმაურება ევროპარლამენტარი პეტრას აუსტრევიჩუსი “ქართული ოცნების” მიერ “უცხოური გავლენის გამჭვირვალობის შესახებ“ კანონპროექტის ხელახლა დაინიცირებას.

“როგორც ჩანს, საქართველოს მმართველი პარტია ევრაზიული ტირანიისკენ ტრიალდება. ევროკავშირსა და ამ უკანასკნელს შორის კომპრომისი არ არსებობს, ვინაიდან, დემოკრატიული კრიტერიუმები მოლაპარაკებების საგანი არ შეიძლება იყოს”, – წერს აუსტრევიჩუსი.

ცნობისთვის, საპარლამენტო უმრავლესობამ „უცხოური გავლენის გამჭვირვალობის შესახებ“ კანონპროექტს პარლამენტში კვლავ დააინიცირა. საპარლამენტო უმრავლესობის ლიდერმა მამუკა მდინარაძემ პარტიის ოფისში გამართულ ბრიფინგზე განაცხადა, რომ “საპარლამენტო უმრავლესობამ, პარტიის პოლიტიკურ საბჭოსთან კონსულტაციის შემდეგ, მიიღო გადაწყვეტილება, პარლამენტში ხელახლა წარადგინოს კანონპროექტი „უცხოური გავლენის გამჭვირვალობის შესახებ“

პარლამენტში მმართველი უმრავლესობის დეპუტატების ხელმოწერით “ლგბტ პროპაგანდის საწინააღმდეგოდ“ მომზადებული საკანონსტიტუციო ცვლილებები ინიცირებულია. დარეგისტრირებულია ორი საკონსტიტუციო ინიციატივა.

“ლგბტ პროპაგანდის საწინააღმდეგოდ“ წარდგენილია როგორც მოქმედ კონსტიტუციაში ცვლილებების პროექტი, ასევე კონსტიტუციური კანონის პროექტი სახელწოდებით – “ოჯახურ ღირებულებათა და არასრულწლოვანთა დაცვის შესახებ“.

თავად კონსტიტუციაში დაგეგმილი ცვლილებით, კორექტირდება კონსტიტუციის 30-ე მუხლი, რომელიც ქორწინების, დედათა და ბავშვთა უფლებებს შეეხება. პროექტის გათვალისწინებით, აღნიშნულ მუხლს ემატება ახალი პუნქტი შემდეგი შინაარსით: – “ოჯახურ ღირებულებათა და არასრულწლოვანთა დაცვა უზრუნველყოფილია საქართველოს კონსტიტუციური კანონით, რომელიც საქართველოს კონსტიტუციის განუყოფელი ნაწილია“.

რაც შეეხება “ოჯახურ ღირებულებათა და არასრულწლოვანთა დაცვის შესახებ“ კონსტიტუციური კანონის პროექტს, ის რვა პუნქტისგან შედგება და მთელი რიგი აკრძალვების დაწესებას ითვალისწინებს.

კონსტიტუციური კანონის პროექტით, მმართველი გუნდი შემდეგი შეზღუდვებისა და აკრძალვების შემოღებას გეგმავს: –

კანონმდებლობით შეიძლება მოწესრიგდეს ქორწინებასთან მიმსგავსებული მხოლოდ იმგვარი ურთიერთობა, რომელიც არანაკლებ 18 წლის ერთი გენეტიკური მამაკაცისა და ერთი გენეტიკური ქალის კავშირს ითვალისწინებს.

არასრულწლოვანის შვილად აყვანა ან მინდობით აღზრდა დასაშვებია მხოლოდ საქართველოს კონსტიტუციისა და კანონმდებლობის შესაბამისად ქორწინებაში მყოფი მეუღლეების ან ჰეტეროსექსუალი პირის მიერ.

აკრძალულია ადამიანის სქესის შეცვლასთან დაკავშირებული ნებისმიერი სამედიცინო ჩარევა.

სახელმწიფოს ან ადგილობრივი თვითმმართველობის მიერ გაცემულ დოკუმენტში მიეთითება მხოლოდ მდედრობითი ან მამრობითი სქესი, რომელიც მის გენეტიკურ მონაცემებს შეესაბამება.

ბათილია საჯარო ხელისუფლების ან კერძო პირის ნებისმიერი გადაწყვეტილება, რომელიც სქესობრივი ნიშნით განსაზღვრული ცნებების გამოყენებას პირდაპირი ან ირიბი ფორმით ზღუდავს.

აკრძალულია იმგვარი შეკრება, რომელიც ერთნაირსქესიანი ოჯახური ან ინტიმური ურთიერთობის, ინცესტის, ერთნაირსქესიანი წყვილის ან არაჰეტეროსექსუალი პირის მიერ არასრულწლოვანის შვილად აყვანის ან მინდობით აღზრდის, სქესის შეცვლასთან დაკავშირებული სამედიცინო ჩარევის ან სქესობრივი ნიშნით განსაზღვრული ცნებების არგამოყენების პოპულარიზაციისკენ არის მიმართული.

აკრძალულია იმგვარი შინაარსის ნაწარმოების, პროგრამის ან სხვა მასალის გავრცელება, რომელიც ერთნაირსქესიანი ოჯახური ან ინტიმური ურთიერთობის, ინცესტის, ერთნაირსქესიანი წყვილის ან არაჰეტეროსექსუალი პირის მიერ არასრულწლოვანის შვილად აყვანის ან მინდობით აღზრდის, სქესის შეცვლასთან დაკავშირებული სამედიცინო ჩარევის ან სქესობრივი ნიშნით განსაზღვრული ცნებების არგამოყენების პოპულარიზაციისკენ არის მიმართული.

აკრძალულია საჯარო ან კერძო საგანმანათლებლო დაწესებულების სასწავლო პროცესში იმგვარი ინფორმაციის მიწოდება, რომელიც ერთნაირსქესიანი ოჯახური ან ინტიმური ურთიერთობის, ინცესტის, ერთნაირსქესიანი წყვილის ან არაჰეტეროსექსუალი პირის მიერ არასრულწლოვანის შვილად აყვანის ან მინდობით აღზრდის, სქესის შეცვლასთან დაკავშირებული სამედიცინო ჩარევის ან სქესობრივი ნიშნით განსაზღვრული ცნებების არგამოყენების პოპულარიზაციისკენ არის მიმართული.

ამასთან, როგორც საპარლამენტო უმრავლესობის ლიდერმა მამუკა მდინარაძემ დღეს გამართულ პრესკონფერენციაზე განაცხადა, კონსტიტუციაში დაგეგმილი ცვლილებებიდან და კონსტიტუციურ კანონპროექტიდან გამომდინარე, ახლო მომავალში პარლამენტში რამდენიმე კანონში ცვლილებების პროექტი დაინიცირდება.

საქართველოს მოსახლეობამ და თითოეულმა ჩვენგანმა, უნდა ვიცოდეთ, ესა თუ ის ორგანიზაცია როდის, ვისგან, რისთვის, რატომ, რა რაოდენობით იღებს უცხოეთიდან თანხებს, ტოტალური დამალვა მიდის ამის, – ამის შესახებ დიპლომატმა, პროფესორმა გიგლა ბარამიძემ „დღის ქრონიკაში“ განაცხადა.

მისი თქმით, სწორი და საჭირო ნაბიჯია „გამჭვირვალობის კანონპროექტის“ ინიცირება.

„ხელისუფლებამ ამ შემთხვევაში გაითვალისწინა საზოგადოების ძალიან დიდი ნაწილის სულისკვეთება და ეს კანონი ისევ უნდა ამოქმედდეს. აუცილებელია, რადგან 30 ვერცხლის ფიგურირება წარმოუდგენელია. არ შეიძლება დაფინანსებული ღალატი მისაღები იყოს წარმატებული სახელმწიფოსთვის და საზოგადოების, ამიტომ ეს აუცილებლად გასაკეთებელია. არასამთავრობო ორგანიზაციები აუცილებელია დემოკრატიული წყობისთვის, საზოგადოებრივი ცხოვრებისთვის, მაგრამ, როდესაც არასამთავრობო საზოგადოების გარკვეული ნაწილი რეზიდენტურის ქმედების სახეს იღებს, აუცილებელია დაკონკრეტება. საქართველოს მოსახლეობამ და თითოეულმა ჩვენგანმა, უნდა ვიცოდეთ, ესა თუ ის ორგანიზაცია როდის, ვისგან, რისთვის, რატომ, რა რაოდენობით იღებს უცხოეთიდან თანხებს, ტოტალური დამალვა მიდის ამის“, – აღნიშნა გიგლა ბარამიძემ.

„ღია საზოგადოების ფონდში“ არასამთავრობო ორგანიზაციების წარმომადგენლები იკრიბებიან.

შეკრება უცხოური დაფინანსების გამჭვირვალობაზე „ქართული ოცნების“ საკანონმდებლო ინიციატივას უკავშირდება.

ფონდ ღია საზოგადოების ოფისში მივიდნენ ნინო ლომჯარია, ნინია კაკაბაძე, საქართველოს ახალგაზრდა იურისტთა ასოციაციის წარმომადგენლე

ეს არის კანონი გამჭვირვალობის შესახებ და გამჭვირვალეობა არის ღირებულება, რომელსაც ალტერნატივა არ გააჩნია, – ამის შესახებ ადამიანის უფლებათა კომიტეტის თავმჯდომარემ და საპარლამენტო უმრავლესობის წევრმა, რატი იონათამიშვილმა „დღის ქრონიკაში“ „უცხოური გავლენის გამჭვირვალობის შესახებ“ კანონპროექტზე საუბრისას განაცხადა.

„ის ადამიანები, ვინც დეზინფორმაციით ცდილობდნენ, რომ ეს პრინციპები შეელახათ, ვფიქრობ, რომ დღეს ძალიან მძიმე სიტუაციაში არიან, ვინაიდან მათ გაბედეს და ჩვენი საზოგადოების შეცდომაში შეყვანა სცადეს. დღეს ეს არ გამოუვათ. ჩვენ საზოგადოების ინფორმირებას მუდმივად ვცდილობდით განსაკუთრებით ისეთ საკითხებზე, რომელიც შეიძლება რისკის შემცველი იყოს ჩვენი ეროვნული მიზნებისა და უსაფრთხოებისთვის. დღეს, ეს გამოწვევა არა მხოლოდ ჩვენს ქვეყანას, არამედ თანამედროვე დემოკრატიებს უდგათ. სწორედ აქედან არის განპირობებული, რომ იგივე კანონი დაინიცირებულია ევროკავშირში, მოწონებულია ევროკომისიის მხრიდან და დასამტკიცებლად გადაგზავნილია ევროპარლამენტში. ეს მეტყველებს იმაზე, რომ გამჭვირვალეობის პრინციპს ალტერნატივა არ გააჩნია და გამჭვირვალეობა იცავს საზოგადოებას და სახელმწიფოს მავნე ზეგავლენებიდან. ის აჟიოტაჟი, რასაც ჩვენთან ვხედავთ, ლუსტრაციის პროცესს იწვევს. გამოჩნდებიან ადამიანები, ვისაც რაღაც აქვთ თურმე დასამალი და გამჭვირვალეობას ეწინააღმდეგებიან, მაგრამ ვერცერთი მათგანი ვერ სცემს პასუხს კითხვას – რატომ არიან გამჭვირვალეობის წინააღმდეგი“, – აღნიშნა რატი იონათამიშვილმა.

საპარლამენტო უმრავლესობამ მიიღო გადაწყვეტილება „უცხოური გავლენის გამჭვირვალობის შესახებ“ კანონპროექტი პარლამენტში ხელახლა წარადგინოს.

„ჩვენ გვსურს თბილისთან ურთიერთობების ნორმალიზება“. ამის შესახებ სოხუმის დე ფაქტო ლიდერმა ასლან ბჟანიამ გამოცემა „არგუმეწტი ი ფაქტისთვის“ მიცემულ ინტერვიუში განაცხადა. ინფორმაციას „ეხო კავკაზა“ ავრცელებს.

„ეს ოდესღაც მოხდება. ჩვენ გვსურს, რომ ეს ახლო მომავალში მოხდეს. ქართველი ხალხის მიმართ არანაირ აგრესიას არ ვგრძნობთ. ეს უბრალო ადამიანები არიან, და კიდე არსებობს ქართული სახელმწიფო და მისი ხელისუფლება. ჩვენ გვესმის, რომ საქართველოში არსებობს ოპოზიცია და ამიტომ პოლიტიკოსებს აფხაზეთის აღიარება არ შეუძლიათ. როდესაც საქართველოს ხელისუფლება ამ გადაწყვეტილებას მიიღებს, ყველა საკითხი მოხსნილი იქნება. ფრანგები თავის დროზე გერმანელებს დაუმეგობრდნენ. სსრკ დაუმეგობრდა გერმანიას. და რა მოხდა ორივე შემთხვევაში? გერმანიამ დამარცხება და საკუთარი დანაშაული აღიარა. არავისი შეურაცხყოფა არ მსურს. მაგრამ ასეთია რეალობა, ასეთია ფაქტები და ამის აღიარებაა აუცილებელი. ჩვენ კი რას ვხედავთ? საქართველო ჩვენს ახალგაზრდულ გუნდებს საერთაშორისო შეჯიბრებაში მონაწილეობის უფლებას არ აძლევს. ბავშვები რა შუაში არიან? ასეთი ზომები ნდობის აღდგენას ხელს ნამდვილად არ უწყობს“, – განაცხადა მან.

ბჟანიამ ასევე კომენტარი გააკეთა აფხაზეთისა და მოსკოვის ურთიერთობებზე.

„ჩვენი მოქალაქეების, აფხაზების, რუსების, სომხების ინტერესებშია რუსეთთან მეგობრობა და ამ მეგობრობის გამყარება. სხვა გზა არ გვაქვს. მსოფლიოს არც ერთ რუკაზე არ არსებობს სახელმწიფო სახელად აფხაზეთი. დიახ, გარკვეულ საკითხებზე ჩვენი და მოსკოვის შეხედულებები ერთმანეთს არ ემთხვევა. მაგრამ ეს პრინციპული აზრთა სხვაობა არ არის. ჩვენი ურთიერთობების გაუმჯობესებაში მთელი აფხაზი ხალხია დაინტერესებული და ამაზე ჩვენი ბავშვების მომავალია დამოკიდებული“, – განაცხადა ასლან ბჟანიამ.

ასლან ბჟანიამ კვლავ განაცხადა, რომ აფხაზეთი რუსეთ-ბელარუსის სამოკავშირეო სახელმწიფოში გაწევრიანებაშია დაინტერესებული.

საქართველოს საპარლამენტო უმრავლესობის დეპუტატის, დავით მათიკაშვილის შეფასებით, პრეზიდენტ სალომე ზურაბიშვილის დღევანდელი გამოსვლა, სამარცხვინო იყო.

მათიკაშვილის თქმით, სალომე ზურაბიშვილი დიდი ხანია საკუთარი ხალხის და ერის ინტერესებს აღარ გამოხატავს.

როგორც დავით მათიკაშვილმა აღნიშნა, “ქვეყნის ძალიან დიდი ბრძოლით, 9 აპრილით, მანიპულირება, რომელმაც ქვეყანას დამოუკიდებლობა მოუტანა, არის სალომე ზურაბიშვილის და კოლექტიური “ნაცმოძრაობის” სტილი.”

“სრულიად სამარცხვინო გამოსვლა ჰქონდა დღეს საქართველოს ე.წ პრეზიდენტს. ის დიდი ხანია საკუთარი ხალხის და ერის ინტერესებს აღარ გამოხატავს. მას შემდეგ, რაც პირველ რიგში, კონსტიტუცია უტიფრად დაარღვია, რომელზე ხელის დადებითაც მან ფიცი დადო ქვეყნის წინაშე. ეს იყო ანტიეროვნული, ანტიევროპული, ანტიქართული გამოსვლა. სალომე ზურაბიშვილისგან, სამწუხაროდ, ჩვენ მეტს არაფერს ველოდებით. მას არ აინტერესებს ქვეყნის ინტერესები, ქვეყნის სუვერენიტეტის დაცვა. მისთვის მთავარია საკუთარი პატრონების წინაშე ვალი მოიხადოს და მათთვის მაამებელი განცხადებები გააკეთოს. მანიპულირება 9 აპრილით, ქვეყნის ძალიან დიდი ბრძოლით, რომელმაც ქვეყანას დამოუკიდებლობა მოუტანა, არის სალომე ზურაბიშვილის და კოლექტიური “ნაცმოძრაობის” სტილი. ისე, რომ კარგად ჩაჯდა ზურაბიშვილი ამ სტილში. ამით კიდევ ერთხელ ხაზი გაუსვა იმას, რომ სამწუხაროდ, ქვეყანას დღეს ჰყავს არა ის პრეზიდენტი, რომელსაც საზოგადოება ენდობა და ხმა მისცა, არამედ პრეზიდენტი, რომელიც ქვეყნის ფარგლებს გარედან სულდგმულობს იმ ენერგიით, რომელიც საქართველოში მას ნამდვილად აღარ ეკუთვნის”, – აღნიშნა დავით მათიკაშვილმა.

ცნობისთვის, დღეს საქართველოს პრეზიდენტმა, სალომე ზურაბიშვილმა ბრიფინგი გამართა, რა დროსაც მან აღნიშნა, რომ “ქართული ოცნებისთვის” “მისალოცია” ე.წ რუსული კანონის 31 მარტიდან 9 აპრილამდე თარიღში დამთხვევა.

„რუსული კანონის“, ინიცირება იმ კვირას, რომელიც მიდის 31 მარტიდან 9 აპრილამდე, რომელიც საქართველოს უახლოესი ისტორიისთვის არის, ალბათ, ყველაზე დატვირთული ეროვნული სულისკვეთებით, მაგრამ ეს ხომ თქვენ არ გაგაჩნიათ – არც ეროვნული და არც ევროპული”, – აღნიშნა პრეზიდენტმა.