ამერიკასთან ურთიერთობა ჯერ არ დამძიმებულა. დამძიმება შეიძლება, უფრო სხვანაირად, სხვა კონტექსტში გამოხატულიყო. ვფიქრობ, გარკვეულწილად ამერიკა ჩამოყალიბების პროცესშია, მათ შორის სამხრეთ კავკასიასთან მიმართებაში, – ამის შესახებ პარლამენტის თვითმმართველობის კომიტეტის თავმჯდომარემ, ირაკლი ქადაგიშვილმა განაცხადა.

ქადაგიშვილის თქმით, გასათვალისწინებელია ისიც, რომ უკრაინაში მიმდინარე ომი ერთ-ერთი ყველაზე მნიშვნელოვანი ფაქტორია, რომელიც სამხრეთ კავკასიის რეგიონზეც მოქმედებს.

„ჩვენს რეგიონზე ამერიკა-ირანის ურთიერთობების ფაქტორიც მოქმედებს. ამიტომ, საბოლოო ჯამში, ამ ფაქტორთა ერთობლიობაში უნდა განვიხილოთ ამერიკის შეერთებული შტატების პოლიტიკის ჩამოყალიბება, თუმცა ჩვენ, როგორც დამოუკიდებელ სახელმწიფოს, ჩვენი მყარი პოლიტიკა და მყარი შეხედულებები გვაქვს. არასდროს არ მოვინდომებთ და არ გვენდომება, რომ ჩვენ, რომ იტყვიან, ერთგვარი გეოპოლიტიკური გარიგებების მიმყოლად ვიქნათ მოაზრებული. გეოპოლიტიკური კონტექსტების მიუხედავად, ჩვენ, როგორც დამოუკიდებელ სახელმწიფოს, ყოველთვის გვექნება მყარი პოზიციები. სწორედ ამ სინთეზში, ერთობლიობაში უნდა დავინახოთ საქართველო-აშშ-ის მომავალი ურთიერთობები“, – აღნიშნა ირაკლი ქადაგიშვილმა.

ხალხის მიმართ მილოცვა არის მიღებული ფორმა, მაშია არაფერი უცხო არ არის, – განაცხადა ჟურნალისტებთან საუბრისას პარლამენტის თავმჯდომარის პირველმა მოადგილემ გიორგი ვოლსკიმ ამერიკის სახელმწიფო დეპარტამენტიდან დამოუკიდებლობის დღის ადრესატის გარეშე მილოცვაზე საუბრისას.

„განზრახ იგნორირება მოახდინო, ან მინიშნება გააკეთო, რომ მილიონ ორასი ათასი ადამიანი ხალხი არ არის და ხალხი მხოლოდ ის არის, რომელიც Tbilisi open air-ზე გამოდის, პოლიტიკური მანიპულაცია ჰქვია ამას. მე ვფიქრობ, რომ ამით ოპოზიციურად განწყობილი საზოგადოებაც არ იქნება ამით კმაყოფილი“, – აღნიშნა გიორგი ვოლსკიმ.

პრემიერ მინისტრის განცხადებით, ამერიკის სახელმწიფო დეპარტამენტიდან დამოუკიდებლობის დღის მილოცვა გავრცელდა ადრესატის გარეშე, რაც არასწორი მიდგომაა და „დიფ სთეითის“ გავლენაზე მიუთითებს. ირაკლი კობახიძის თქმით, საქართველოში მოქმედებს ხალხის მიერ არჩეული ხელისუფლება, დაყოფა კი არის არა მხოლოდ ხელოვნური და უსამართლო, არამედ ეს არის ქართველი ხალხის შეურაცხყოფა. მსგავსი შინაარსის მილოცვის წერილებით, ხალხი და ხელისუფლება გამიჯნეს უკრაინის, საფრანგეთის, გერმანიის, პოლონეთის, ლიეტუვის და ბულგარეთის ხელისუფლების წარმომადგენლებმა.

ამ ადამიანს სასამართლოთი დაუმტკიცდა, რომ თაღლითური გზით ასეულობით მილიონი აქვს მოპარული, მითვისებული, ზუსტი კვალიფიკაცია არ მახსოვს და გუშინდელი ჩატარებული ძალიან წარმატებული ღონისძიების შედეგად ეს ადამიანი იქნა დაკავებული. ვულოცავ ანრი ოხანაშვილს და სპეცსამსახურებს ამ წარმატებულ ღონისძიებას, – ამის შესახებ „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა, მამუკა მდინარაძემ „თანაინვესტირების ფონდის“ ყოფილი გენერალური დირექტორის, გიორგი ბაჩიაშვილის დაკავებასთან დაკავშირებით განაცხადა.

ასევე, გავრცელებულ მოსაზრებაზე, რომ, შესაძლებელია გარიგების შედეგად მომხდარიყო ბაჩიაშვილის დაკავება, მდინარაძე აცხადებს, რომ „არანაირ გარიგებაზე არ არის საუბარი“.

„როგორც ვიცი, შინაგან საქმეთა სამინისტროც იყო ჩართული და მადლობას ვუერთდები ქართული სპეცსამსახურების და ძალიან მიხარია, რომ ქართული სპეცსამსახურები თავიანთ სიმაღლეზე დგანან და ასეთი გადაადგილებების შესახებ ინფორმაციას ფლობენ, იპოვებენ, არსებობენ წყაროები, რომლებიც ამ ინფორმაციას მათ აწვდიან და შესაბამისად რეაგირებენ. ამიტომ, ეს არის წარმატებული ღონისძიება, წარმატებული ოპერაცია, რომელიც თქვენ არ გაგიხარდებოდათ იმიტომ, რომ ეს ადამიანი როგორც აღმოჩნდა ოპოზიციის, დაგეგმილი, დასაგეგმი თუ მიმდინარე აქციების მთავარი დამფინანსებელი იყო და საბოლოო ჯამში ისიც ასრულებდა დავალებებს. სხვანაირად მისი ქმედება, მას რომ ის გაებედა, რაც გაბედა, წარმოუდგენელია. დავალების შემსრულებელი, ადამიანი, რომელმაც დიდი თანხები მოიპარა არის დაკავებული, ეს ძალიან კარგია. რა თქმა უნდა, არანაირ გარიგებაზე არ არის საუბარი“, -განაცხადა მამუკა მდინარაძემ.

გუშინ, ამხელა ორგანიზების, სარეკლამო კამპანიების შემდეგ, 3 ათასი კაცი შეკრიბეს რუსთაველის გამზირზე და სალომე ზურაბიშვილმა ალეკო ელისაშვილისგან ჩაიბარა აღლუმი, – ამის შესახებ პრემიერ-მინისტრმა, ირაკლი კობახიძემ განაცხადა, რითაც ის გუშინ „26 მაისის ეროვნული კომიტეტის“ ორგანიზებით გამართულ დამოუკიდებლობის დღისადმი მიძღვნილ ღონისძიებას გამოეხმაურა.

მისივე თქმით, დღეს „რადიკალური ოპოზიციას“ არც რადიკალიზაციის და არც არჩევნებში მონაწილეობის რესურსი არ აქვს.

„გუშინ კიდევ ერთხელ გამოჩნდა, რომ რადიკალური ოპოზიცია არის სრულად მოშლილი. გუშინ, ამხელა ორგანიზების შემდეგ, სარეკლამო კამპანიების შემდეგ, 3 ათასი კაცი შეკრიბეს რუსთაველის გამზირზე და სალომე ზურაბიშვილმა ალეკო ელისაშვილისგან ჩაიბარა აღლუმი, როგორც ამას წინასწარ ვაანონსებდით. ეს არის ოპოზიციაში დღევანდელი რეალობა. ამიტომ როდესაც საუბარი აქვთ მათ რიგგარეშე საპარლამენტო არჩევნებზე, სინამდვილეში, თვითონაც არ უნდათ ეს არჩევნები, იმიტომ, რომ იციან, არიან აბსოლუტურად დაღუპულები. უკვე საჯაროდ საუბრობენ ამასთან დაკავშირებით. არც კი აწყობთ. რასაც ითხოვდნენ, ის უკვე საერთოდ აღარ აწყობთ, იქიდან გამომდინარე, რომ კიდევ უფრო მძიმედ დამარცხდებიან, ვიდრე დამარცხდნენ გასული წლის ოქტომბერში. ეს არის ოპოზიციის დღევანდელი მდგომარეობა. არავისთვის, მათ შორის არც მათთვის, არც ჩვენთვის არავითარი მნიშვნელობა არ აქვს ეს რადიკალური ოპოზიცია მიიღებს თუ არა არჩევნებში მონაწილეობას, საქართველოში შედგება სრულფასოვანი ადგილობრივი თვითმმართველობის არჩევნები და ეს არჩევნები იქნება კიდევ უფრო მეტად სრულფასოვანი თუ რადიკალური ოპოზიცია მასში არ მიიღებს მონაწილეობას.

გუშინ, როგორც ჩანს, მაინც ჰქონდათ იმედი, რომ ცოტა მეტი ადამიანი მოვიდოდა. თუმცა 3 ათასი კაცის ფონზე, რა თქმა უნდა, მას გაუჭირდა რაიმე ღირებულის თქმა. ეს არის რადიკალური ოპოზიციის დღევანდელი მდგომარეობა. არაფრის რესურსი არ აქვთ. არც რადიკალიზაციის, არც არჩევნებში მონაწილეობის, არაფრის რესურსი არ აქვთ. აქამდე მიიყვანეს საკუთარმა პატრონებმა რადიკალური ოპოზიციის წარმომადგენლები“, – განაცხადა კობახიძემ.

მე რაც მითხრა მაკრონმა ალბანეთში, თავის არსით წინააღმდეგობაშია იმ განცხადებასთან, რომელიც გავრცელდა, აქედანაც ჩანს, რომ ადამიანები დამოუკიდებლად ვერ იღებენ გადაწყვეტილებებს, – განაცხადა საქართველოს პრემიერ-მინისტრმა ირაკლი კობახიძემ ჟურნალისტებთან.

როგორც მთავრობის მეთაურმა აღნიშნა, სამი ქვეყნის მიერ 26 მაისს გავრცელებული განცხადებით პირდაპირ ჩანს, რომ ევროპაში მძლავრობს „დიფ სთეითი“.

„ჯერ მარტო ეტიკეტის ამბავია, რომ 26 მაისს ასეთი ტიპის განცხადება არ გაავრცელო, 26 მაისი არის საზეიმო დღე და საზეიმო დღეს მიღებულია საზეიმო წერილების გამოგზავნა, საზეიმო განცხადებების გაკეთება. პროტოკოლსა და ეტიკეტსაც კი არ იცავენ, აქედან ჩანს, რომ ისინი ვერ მოქმედებენ რეალურად ობიექტური ინტერესების შესაბამისად, თუნდაც საკუთარი ობიექტური ინტერესების შესაბამისად და მათ უწევთ ისეთი ხაზით მუშაობა, რაც არ შეესაბამება მათ ინტერესებს, ეს არის დასანანი და სამწუხარო. მე რაც მითხრა მაკრონმა ალბანეთში, თავის არსით წინააღმდეგობაშია იმ განცხადებასთან, რომელიც გავრცელდა, აქედანაც ჩანს, რომ ადამიანები დამოუკიდებლად ვერ იღებენ გადაწყვეტილებებს, არის ძალიან სერიოზული გავლენა ევროპაში, ევროპის ქვეყნებზე, შესაბამისად, ეს ყველაფერი იწვევს იმ აღრევას, რომელსაც ყველა ვხედავთ“, – განაცხადა პრემიერ-მინისტრმა.

სცენიდან ზურაბიშვილმა გამოხატა ძალიან ბუნდოვანი პოზიცია ადგილობრივ არჩევნებზე არშესვლასთან დაკავშირებით და კითხვის ნიშნები დატოვა, – დაწერა „ახალის“ წევრმა ნიკა მელიამ სოციალურ ქსელში გუშინდელ აქციაზე სალომე ზურაბიშვილის განცხადებასთან დაკავშირებით.

„დღეს, სცენიდან ზურაბიშვილმა გამოხატა ძალიან ბუნდოვანი პოზიცია ადგილობრივ არჩევნებზე არშესვლასთან დაკავშირებით და კითხვის ნიშნები დატოვა, პირად პოზიციას აჟღერებდა თუ პლატფორმაზე არსებული ყველა პარტიის სახელით საუბრობდა. იმედს ვიტოვებ, რიგი პოლიტიკური პარტიები ახლა მაინც დააფიქსირებენ მკაფიო პოზიციას. ერთობა და კოორდინაცია მნიშვნელოვანია იყოს მკაფიო და მყარ პრინციპზე დაფუძნებული“, – წერს მელია.