ისრაელის პრემიერ-მინისტრი, ბენიამინ ნეთანიაჰუ დღეს აშშ-ში გაემგზავრება, სადაც პრეზიდენტ დონალდ ტრამპს შეხვდება. ინფორმაციას Associated Press-ი ავრცელებს.

გამოცემის ცნობით, ნეთანიაჰუმ გამგზავრებამდე განცხადება გაავრცელა, სადაც აღნიშნულია, რომ ტრამპთან შეხვედრაზე „ჰამასზე“ გამარჯვების, ირანის წინააღმდეგ ბრძოლისა და არაბულ ქვეყნებთან დიპლომატიური ურთიერთობების გაფართოების საკითხებს განიხილავს.

„ვისაუბრებთ „ჰამასზე“ გამარჯვებაზე, ყველა ჩვენი მძევლების გათავისუფლების მიღწევასა და ირანის ტერორისტულ ღერძის ყველა კომპონენტთან გამკლავებაზე“, – აღნიშნულია ნეთანიაჰუს განცხადებაში.

Associated Press-ი წერს, რომ სამშაბათს თეთრ სახლში დაგეგმილი შეხვედრა ტრამპის პირველი შეხვედრა იქნება უცხოელ ლიდერთან თანამდებობაზე მისი დაბრუნების შემდეგ. ეს ხდება მაშინ, როდესაც ამერიკელი და არაბი შუამავლები იწყებენ შეთანხმების მომდევნო ფაზაზე მუშაობას ღაზას სექტორში ომის შეწყვეტისა და ათობით მძევლის გათავისუფლებასთან დაკავშირებით.

შეერთებულ შტატებს სურს უკრაინაში არჩევნების ჩატარება, პოტენციურად წლის ბოლომდე, განსაკუთრებით იმ შემთხვევაში, თუ კიევი შეძლებს რუსეთთან ზავის შეთანხმებას უახლოეს თვეებში. ამის შესახებ Reuters-ს აშშ-ის პრეზიდენტის, დონალდ ტრამპის სპეციალურ წარმომადგენელზე უკრაინასა და რუსეთში, კიტ კელოგზე დაყრდნობით წერს.

მისი თქმით, უკრაინის საპრეზიდენტო და საპარლამენტო არჩევნები, რომლებიც შეჩერებულია რუსეთთან ომის დროს, უნდა ჩატარდეს.

“დემოკრატიული ქვეყნების უმეტესობას აქვს არჩევნები ომის დროს. ვფიქრობ, მნიშვნელოვანია, რომ ისინი ასე მოიქცნენ. ვფიქრობ, ეს კარგია დემოკრატიისთვის. ეს არის მყარი დემოკრატიის მშვენება“, – აღნიშნა კიტ კელოგმა.

ნატო-ს წევრი ქვეყნები ომისთვის უნდა მოემზადონ და მეტი დახარჯონ თავდაცვაზე, წინააღმდეგ შემთხვევაში კრემლი, შეიძლება, შეეცადოს, იგივე გააკეთოს, რაც უკრაინაში, – უკრაინული მედიის ცნობით, ამის შესახებ ნატო-ს გენერალურმა მდივანმა, მარკ რუტემ გამოცემა Welt-თან ინტერვიუში განაცხადა.

„ძალიან გარკვევით გეუბნებით: ჩვენ უნდა მოვემზადოთ ომისთვის. ეს არის საუკეთესო გზა მისი თავიდან ასაცილებლად“, – განაცხადა ალიანსის გენერალურმა მდივანმა.

მისი თქმით, ევროპის ქვეყნებმა რუსეთის მიმართ სისუსტე არ უნდა გამოიჩინონ.

„წინააღმდეგ შემთხვევაში, რუსეთმა შეიძლება რაღაც სცადოს, ისევე როგორც უკრაინაში“, – აღნიშნა რუტემ.

ამასთან, მისი თქმით, საფრთხე მოდის არა მხოლოდ რუსეთიდან, არამედ ჩინეთიდანაც და რომ ჩინელებმა უზომოდ გააფართოვეს თავიანთი სამხედრო შესაძლებლობები.

მარკ რუტემ ხაზი გაუსვა, რომ გერმანიამ, ნატო-სა და ევროკავშირის წამყვანმა წევრმა, თავდაცვის ხარჯები უნდა გაზარდოს და თანმიმდევრულად განაგრძოს მის მიერ არჩეული გზა როგორც ევროპაში, ასევე უკრაინაში.

„გერმანიის ეკონომიკის სიდიდის გათვალისწინებით, ჩვენ გვინდა, რომ მათ გაცილებით მეტი გააკეთონ“, – აღნიშნა ნატო-ს გენერალურმა მდივანმა.

ევროპელი ლიდერები სიამოვნებით ასრულებდნენ ვაშინგტონის ნებისმიერ ბრძანებას ჯო ბაიდენის დროს – ისინი დონალდ ტრამპს აქტიურად ებრძოდნენ და დაიბნენ, როდესაც გაიმარჯვა – ვლადიმერ პუტინი

წარსულში ევროპელ ლიდერებს ჰქონდათ გამბედაობა, ებრძოლათ საკუთარი აზრისთვის, დღეს ასეთი ადამიანები პრაქტიკულად არ არსებობენ, -ამის შესახებ რუსეთის პრეზიდენტმა, ვლადიმერ პუტინმა ტელეარხ „რასია 1“-თან ინტერვიუში განაცხადა.

“ევროპაში იყვნენ ისეთი გამოჩენილი პოლიტიკური მოღვაწეები, როგორებიცაა დე გოლი, მიტერანი, ხოლო თანამედროვეობაში – შირაკი. გერმანიაში – ვილი ბრანდტი, კოლი, შრედერი – მე მათ იმავე რიგში დავაყენებდი, ესენი არიან ადამიანები, რომლებსაც ჰქონდათ საკუთარი აზრი და გამბედაობა, ებრძოლათ ამ აზრისთვის, გამოეთქვათ ეს აზრი, დღეს იქ ასეთი ხალხი, პრაქტიკულად, აღარ არ არის“, – განაცხადა პუტინმა.

მისი მტკიცებით, ევროპა სიამოვნებით ასრულებდა ვაშინგტონის ნებისმიერ ბრძანებას აშშ-ის ყოფილი პრეზიდენტის, ჯო ბაიდენის დროს.

„ამჟამად მიმდინარეობს რაღაც დავიდარაბა ევროპის პოლიტიკურ ელიტასა და ახლად არჩეულ პრეზიდენტ დონალდ ტრამპს შორის. შეიცვალა რამე ბაიდენის დროიდან? არაფერი შეცვლილა. ისინი სიამოვნებით ასრულებდნენ ვაშინგტონის ნებისმიერ ბრძანებას ბაიდენის დროს“, – აღნიშნა პუტინმა.

მისი თქმით ევროპულ ელიტებს უფრო მეტად მოსწონდათ ჯო ბაიდენი, ხოლო ამერიკის ახალ ლიდერს, დონალდ ტრამპს განსხვავებული წარმოდგენები აქვს იმის შესახებ, თუ რა არის კარგი და რა არის ცუდი.

„უბრალოდ, მათ არ მოსწონთ ტრამპი, აქტიურად იბრძოდნენ მის წინააღმდეგ, ნამდვილად ერეოდნენ აშშ-ის პოლიტიკურ ცხოვრებაში და საარჩევნო პროცესებში, შემდეგ კი დაიბნენ, როცა ტრამპმა მოულოდნელად გაიმარჯვა. მათ მენტალურად ბაიდენი უფრო მოსწონდათ. ტრამპს კი განსხვავებული წარმოდგენები აქვს იმის შესახებ, თუ რა არის კარგი და რა არის ცუდი, მათ შორის გენდერულ პოლიტიკაში და ზოგიერთ სხვა საკითხში. როგორც ჩანს, მათ ეს არ მოსწონთ”, – განაცხადა პუტინმა.

კანადამ და მექსიკამ, დონალდ ტრამპის მიერ ტარიფების დაწესების საპასუხოდ, აშშ-დან იმპორტირებულ პროდუქტებზე ტარიფების დაწესება გამოაცხადეს, – ინფორმაციას Fox News-ი ავრცელებს.

„თეთრი სახლის მიერ განხორციელებულმა ქმედებებმა, გაერთიანების ნაცვლად, ერთმანეთს დაგვაშორა“, – განაცხადა კანადის პრემიერ-მინისტრმა, ჯასტინ ტრუდომ და დასძინა, რომ კანადა აშშ-დან იმპორტირებულ საქონელზე, მათ შორის შორის ალკოჰოლსა და ხილზე, 25%-იან ტარიფს დააწესებს.

ტრუდოს თქმით, აშშ-ის მიერ დაწესებული ტარიფები „ეკონომიკურ ტკივილს“ გამოიწვევს და კანადელებს მოუწოდა, ამერიკული სერვისების და პროდუქტების ნაცვლად კანადური აირჩიონ.

ამასთან, აშშ-ის წინააღმდეგ საპასუხო ტარიფები გამოაცხადა მექსიკის პრეზიდენტმა, კლაუდია შინბაუმმაც.

„ჩვენ კატეგორიულად უარვყოფთ თეთრი სახლის ცილისწამებას იმის შესახებ, რომ მექსიკის მთავრობას კრიმინალურ ორგანიზაციებთან ალიანსები აქვს“, – განაცხადა მექსიკის პრეზიდენტმა და დასძინა, რომ ეკონომიკის მინისტრს აშშ-ის მიერ დაწესებულ ტარიფებზე რეაგირება დაავალა, რომელიც მოიცავს საპასუხო ტარიფებს და სხვა ზომებს.

შეგახსენებთ, დონალდ ტრამპმა ხელი მოაწერა აღმასრულებელ ბრძანებას, რომელიც კანადიდან და მექსიკიდან იმპორტზე 25%-იანი დამატებითი ტარიფის, ჩინეთიდან იმპორტზე კი 10%-იანი დამატებითი ტარიფის დაწესებას ითვალისწინებს. ამასთან, კანადიდან იმპორტირებული ენერგორესურსები, მათ შორის ნავთობი, ბუნებრივი აირი და ელექტროენერგია, დამატებით 10%-ით დაიბეგრება.

უკრაინის პრეზიდენტის, ვოლოდიმირ ზელენსკის გაცხადებით, უკრაინაში ომის შესახებ აშშ-სა და რუსეთს შორის მოლაპარაკებებიდან უკრაინის გამორიცხვა ძალიან საშიში იქნება, – შესაბამისი განცხადება ზელენსკიმ Associated Press-თან ინტერვიუში გააკეთა.

მისი თქმით, რუსეთს არ სურს ცეცხლის შეწყვეტის შესახებ მოლაპარაკებებში ჩართვა ან რაიმე სახის დათმობების განხილვა.

ამასთან, ზელენსკი მიიჩნევს, რომ აშშ-ის პრეზიდენტს, დონალდ ტრამპს შეუძლია რუსეთის პრეზიდენტის, ვლადიმერ პუტინის მოლაპარაკებების მაგიდასთან მიყვანა რუსეთის ენერგეტიკული და საბანკო სისტემის წინააღმდეგ სანქციების მუქარით, ისევე როგორც უკრაინის სამხედრო მხარდაჭერის გაგრძელებით.

”ვფიქრობ, ეს არის უახლოესი და ყველაზე მნიშვნელოვანი ნაბიჯები. მათ შეიძლება ჰქონდეთ საკუთარი ურთიერთობები, მაგრამ უკრაინის შესახებ ჩვენს გარეშე საუბარი ყველასთვის საშიშია“, – განაცხადა ზელენსკიმ.

უკრაინის პრეზიდენტის მტკიცებით, მისი გუნდი კონტაქტშია ტრამპის ადმინისტრაციასთან, მაგრამ ეს დისკუსიები მიმდინარეობს ზოგად დონეზე და სჯერა, რომ უფრო დეტალური შეთანხმებების შესამუშავებლად მალე პირადი შეხვედრები გაიმართება.

„ჩვენ მეტი უნდა ვიმუშაოთ ამაზე”, – დასძინა ზელენსკიმ.

უკრაინის პრეზიდენტის ეს განცხადება დონალდ ტრამპის კომენტარს მოჰყვა, რომლის თქმითაც, ამერიკელი და რუსი ოფიციალური პირები უკვე საუბრობენ ომის დასრულების საკითხზე და რომ მისი ადმინისტრაცია რუსეთთან ძალიან სერიოზული დისკუსიას აწარმოებს.