აშშ-ის ახალი ადმინისტრაცია აღიარებს, რომ საგარეო დახმარების ქოლგის ქვეშ ამერიკელების ფულით ფინანსდებოდა გამოგონილი იდეოლოგიების თავს მოხვევა, ცენზურა, შიდა პოლიტიკაში ჩარევა, ხელისუფლებების გადატრიალება და ა.შ. ყველაზე დიდი დონორი როცა აღიარებს ამას, ეს ავტომატურად ეჭვის ქვეშ აყენებს სხვა ქვეყნების მიერ საქართველოში ფულის ხარჯვის კეთილსინდისიერებას, – ამის შესახებ საქართველოს პარლამენტის თავმჯდომარე შალვა პაპუაშვილი სოციალურ ქსელში წერს.

როგორც პაპუაშვილი აღნიშნავს, ახლა ჯერი დანარჩენ დონორ ქვეყნებზეა, მათ უნდა გადაამოწმონ, რაში იხარჯება მათი გადასახადის გადამხდელების ფული.

„ამ ქვეყნების ოპოზიცია და არასამთავრობო ორგანიზაციები ამით განსაკუთრებით უნდა დაინტერესდნენ. მაგალითის მიმცემი კი ბრიუსელი უნდა გახდეს. 2023 წლის შემოდგომაზე წერილით მივმართე ევროკავშირის ელჩს, რომ მას უზრუნველეყო ევროპის დემოკრატიის ფონდის (EED, რომელსაც კულუარებში NED-ის ევროპულ ფილიალს ეძახიან) დაფინანსებების საჯაროობა. რამდენიმე თვიანი ფიქრის შემდეგ, ელჩისგან უარი მივიღე, იმ საბაბით, რომ EED განცალკევებული ორგანიზაციაა. რა თქმა უნდა, ეს მხოლოდ საბაბი იყო. EED სრულად ფინანსდება ბრიუსელის და წევრი ქვეყნების ბიუჯეტიდან და მას რამდენიმე ოდიოზური ევროპარლამენტარი მართავს.

ცალკე საკითხია 2024 წლის არჩევნებზე ბრიუსელიდან და სხვა დედაქალაქებიდან გაცემული თანხების უკანონო ხარჯვა პარტიული საარჩევნო მიზნებისთვის. ყველას გვახსოვს, საგარეო ზეწოლის გამო, როგორ მოუწია ანტიკორუფციულ ბიუროს შეეჩერებინა მისი კვლევა, როდესაც არჩევნებში ჩართული პოლიტიკური ენჯეობის უკან კონკრეტული უცხოური დონორების კვალი გამოიკვეთა.

აშშ-ში მიმდინარე პროცესები აუცილებელს ხდის, რომ ყველა საელჩომ საჯარო გახადოს მისი ქვეყნიდან არჩევნებზე და შიდა პოლიტიკურ პრიცესებზე დახარჯული თითოეული ცენტი“, – წერს შალვა პაპუაშვილი.

მრავალრიცხოვანი რადიკალური, ვოუქისტური, დეზინფორმაციის გამავრცელებელი პარტიებისა და ორგანიზაციების დაფინანსების გამო, NED-ი მართლაც შეიძლება, თაღლითური ორგანიზაცია იყოს, – ამის შესახებ საქართველოს პარლამენტის თავმჯდომარე შალვა პაპუაშვილი სოციალურ ქსელში წერს.

„მას შემდეგ, რაც, როგორც იქნა, NED-ის საკითხი აშშ-ს შიდა პოლიტიკურ დღის წესრიგში დადგა, უნდა გავიხსენოთ, NED-იდან როგორ და ვინ ცდილობდა საქართველოში სიტუაციის არევას.

2020 და 2021 წლებში NED-ი პირდაპირ ერეოდა ქართულ პოლიტიკაში, თითქოსდა „დამოუკიდებელი“ ტელეკომპანია „პირველის“ დაფინანსებით, თითქოსდა მედიის თავისუფლებისა და გამჭვირვალობის გაზრდისთვის. თუმცა, ამ კომპანიას ფლობდნენ და მართავდნენ რადიკალური პოლიტიკური პარტია „ლელო“ და ოლიგარქი ხაზარაძე და მიზნად ისახავდა საქართველოს დემოკრატიულად არჩეული მთავრობის დამხობას.

2021 წლის ადგილობრივ არჩევნებამდე, NED-ის დაფინანსებით, ტელეკომპანია „პირველმა“ გაუშვა პანიკის დამთესავი (ახლა უკვე დადასტურებულად) ყალბი გამოძიებების სერია ორი ახალგაზრდის, ბაჩალიაშვილისა და შაქარაშვილის გარდაცვალების შესახებ, მიზანმიმართულად შეცდომაში შეჰყავდა საზოგადოება, ამ გარდაცვალებებს აკავშირებდა მთავრობის ქმედებებთან ან სავარაუდო გამოძიების ნაკლებობასთან.

უფრო მეტიც, NED-მა უარი განაცხადა იმ არასამთავრობო ორგანიზაციების სახელების გამჟღავნებაზე, რომლებმაც 2021 წლის შემდეგ, ამერიკელი გადასახადების გადამხდელების ფული მიიღეს NED-ის მეშვეობით. მიუხედავად ჩვენი მრავალჯერადი მოთხოვნისა და მათი დაპირებებისა, NED-ის ხელმძღვანელობამ, მათ შორის NED-ის მაშინდელმა თავმჯდომარემ, კენ ვოლაკმა და რეგიონულმა დირექტორმა მირიამ ლანსკოიმ, არასდროს მოგვაწოდეს თუნდაც მიახლოებითი ინფორმაცია NED-ის ოპერაციების მასშტაბისა და ქართულ პოლიტიკაში ჩარევის შესახებ.

რადიკალური ოპოზიციის მიერ გასულ წელს მოწყობილი საპროტესტო აქციების დროს, NED-ის პრეზიდენტმა, დეიმონ უილსონმა პირადად მიმართა ქუჩაში შეკრებილ ხალხს სიტყვით, რომელიც სერიალ „სამშობლოს“ ესთეტიკას მოგვაგონებდა, სრული მხარდაჭერა აღუთქვა მათ მაშინ, როდესაც ანტისამთავრობო პროტესტები ძალადობრივ ხასიათს იღებდა.

ეს მხოლოდ აისბერგის წვერია, რაც ჩვენთვის ცნობილია. მრავალრიცხოვანი რადიკალური, ვოუქისტური, დეზინფორმაციის გამავრცელებელი პარტიებისა და ორგანიზაციების დაფინანსების გამო, NED-ი მართლაც შეიძლება, თაღლითური ორგანიზაცია იყოს“, – წერს შალვა პაპუაშვილი.

ამერიკელმა მილიარდერმა, აშშ-ის სამთავრობო ეფექტიანობის დეპარტამენტის ხელმძღვანელმა, ილონ მასკმა განაცხადა, რომ „დემოკრატიის ეროვნული ფონდი“ თაღლითობაა, კორუფციითაა გაჟღენთილი და სოცქსელის მომხმარებლებს მოუწოდა, ჩამოთვალონ „ყველა ბოროტება“, რაც NED-მა ჩაიდინა.

როგორც ჩანს, ახლა წარსული USAID-ს თან სდევს არა მხოლოდ საქართველოში, არამედ აშშ-შიც, – ამის შესახებ საქართველოს პარლამენტის თავმჯდომარე შალვა პაპუაშვილი სოციალურ ქსელში წერს.

„USAID-მა, საქართველო-აშშ-ს შორის მეგობრობის განმტკიცების ნაცვლად, დაუშვა გარკვეული სამწუხარო შეცდომები, რომლებიც ჯერ კიდევ სათანადოდ არ არის გამოსწორებული. მე მოვუწოდე აშშ-ის კონგრესს, რომ გამოეძიებინა ეს სავარაუდოდ მიზანმიმართულად დაშვებული შეცდომები, თუმცა უშედეგოდ.

„2020 წლის საქართველოს არჩევნების შემდეგ, USAID-ის მიერ დაფინანსებულმა არასამთავრობო ორგანიზაცია ISFED-მა გაავრცელა ყალბი PVT-ის შედეგები, რომელიც NDI-ის პროგრამული უზრუნველყოფით იყო ჩატარებული და განაცხადა, რომ არჩევნები გაყალბდა. როდესაც „ქართულმა ოცნებამ“, რამდენიმე კვირის განმავლობაში საკითხის დოკუმენტირების შემდეგ, გამოააშკარავა ეს თაღლითობა, ISFED-მა აღიარა „შეცდომა“ და გამოტყდა, რომ USAID-ის ადგილობრივმა განყოფილებამ იცოდა სიცრუის შესახებ, მაგრამ აირჩია დუმილი. ამან გამოავლინა, რომ USAID-ის ადგილობრივი ხელმძღვანელი ადამ შმიდტი, რომელმაც შეხვედრაზე დაგვარწმუნა, რომ ISFED-ის მონაცემებზე ჩატარდა აუდიტი და შეცდომა არ იყო, სინამდვილეში ატყუებდა როგორც საქართველოს მთავრობას, ასევე ხალხს.

ცალკე საკითხია საქართველოში აშშ-ის მაშინდელი ელჩის კეთილსინდისიერება, რომელმაც აიღო შუამავლის ფუნქცია ხელისუფლებასა და ოპოზიციას შორის, მაშინ, როცა, დიდი ალბათობით, იცოდა სიცრუის შესახებ, მაგრამ მაინც დუმდა.

ISFED-ი დღემდე აგრძელებს საქმიანობას საქართველოში უცხოური დაფინანსებით და ახლა კვლავ ამტკიცებს, რომ 2024 წლის არჩევნებიც გაყალბდა, თავიანთი PVT-ის შედეგების გამოქვეყნების გარეშე, რადგან ისინი რეალურად ემთხვევა ცენტრალური საარჩევნო კომისიის მონაცემებს. გვაქვს ინფორმირებული ეჭვი, რომ არგამოქვეყნება მოხდა USAID-ის ზეწოლით.

როდესაც შარშან თბილისში შევხვდი USAID-ის ადმინისტრატორის მოადგილეს, შენონ გრინს და მის მოადგილეს, ალექსანდრ სოკოლოვსკის და 2020 წლის სკანდალზე ნათელის მოფენა ვთხოვე, მირჩიეს, დამევიწყებინა წარსული და მომავლისკენ გამეხედა.

როგორც ჩანს, ახლა წარსული USAID-ს თან სდევს არა მხოლოდ საქართველოში, არამედ აშშ-შიც​​​​​​​​​​​​​​“, – წერს შალვა პაპუაშვილი.

ამერიკელმა მილიარდერმა, აშშ-ის სამთავრობო ეფექტიანობის დეპარტამენტის ხელმძღვანელმა, ილონ მასკმა განაცხადა, რომ USAID-ი კრიმინალური ორგანიზაციაა და გააზიარა USAID-ის შესახებ მაიკ ბენცის პოსტი და ვიდეო, რომელშიც თბილისის აქციების კადრებიც არის ნაჩვენები.

სერბეთში, Emaar ჯგუფმა დაიწყო მსხვილი პროექტის განხორციელება და მაშინ იქაური ოპოზიციაც განაწყენდა ამ ყველაფრის გამო,  თუმცა ბოლოს მოხდა ისე, რომ ოპოზიციის წარმომადგენლები ბინებს ყიდულობდნენ  Emaar-ის მიერ აშენებულ საცხოვრებელ კორპუსებში,- ამის შესახებ საქართველოს პრემიერ-მინისტრმა ირაკლი კობახიძემ გადაცემა “იმედის კვირაში” განაცხადა.

პრემიერის თქმით, არაბული ინვესტიციით თბილისში და აჭარაში ორი უმნიშვნელოვანესი ინფრასტრუქტურული სივრცე განვითარდება, საუბარია 3 მილიონ კვადრატულ მეტრზე მეტ სივრცეზე.

„Emaar ჯგუფის წარმომადგენლები გვესაუბრებოდნენ სერბეთის მაგალითზე. სერბეთში, რამდენიმე წლის წინ დაიწყო Emaar ჯგუფმა ძალიან მსხვილი პროექტის განხორციელება და ასეთი რაღაც გვითხრეს, რომ მაშინ იქაური ოპოზიციაც განაწყენდა ამ ყველაფრის გამო, არ მოსწონდათ ის სიკეთე, რომელიც სერბეთმა მიიღო ამ მასშტაბური ინვესტიციის საფუძველზე, თუმცა ბოლოს მოხდა ისე, რომ ამ ოპოზიციის წარმომადგენლები ბინებს ყიდულობდნენ  Emaar-ის მიერ აშენებულ საცხოვრებელ კორპუსებში.

ეს არის კლასიკური საინვესტიციო შეთანხმება, სადაც საუბარია კონკრეტულ პროექტზე, რომელიც უნდა განხორციელდეს არაბული ინვესტიციით ჩვენს ქვეყანაში. საუბარია თბილისში და აჭარაში ორი უმნიშვნელოვანესი ინფრასტრუქტურული სივრცის განვითარებაზე, მთლიანობაში, საუბარია 3 მილიონ კვადრატულ მეტრზე მეტ სივრცეზე, რაც უნდა აშენდეს ორივე ლოკაციაზე. აქ საუბარია არა მხოლოდ საცხოვრებელ სივრცეებზე, არამედ, განვითარდება სასტუმრო ინფრასტრუქტურა, ასევე სამედიცინო, სპორტული, სარეკრეაციო ინფრასტრუქტურა, მათ შორის სკოლები, საბავშვო ბაღები, შოპინგ მოლები, იქნება ძალიან დიდი რეკრეაციული სივრცე, თბილისში, მაგალითად ტერიტორიის 34% დაეთმობა გამწვანებას და რეკრეაციას”, – განაცხადა პრემიერმა.

მზად ვართ, აბსოლუტურად ღია ვართ თანამშრომლობისთვის ევროსაბჭოსთან, მათ შორის, გენერალურ მდივანთან, – განაცხადა საქართველოს პრემიერ-მინისტრმა, ირაკლი კობახიძემ გადაცემაში „იმედის კვირა“.

როგორც მთავრობის მეთაურმა აღნიშნა, გენერალურ მდივანთან კონკრეტულ საკითხებზეც შედგა შეთანხმება.

„საპარლამენტო ასამბლეას მაინც და მაინც დიდი დატვირთვა არ აქვს, მაგრამ ჩვენ ვრჩებით, ბუნებრივია, ევროსაბჭოს წევრად. მზად ვართ, აბსოლუტურად ღია ვართ თანამშრომლობისთვის ევროსაბჭოსთან, მათ შორის, გენერალურ მდივანთან, რომელიც საქართველოში იყო ჩამოსული და მასთან კონკრეტულ საკითხებზეც მივაღწიეთ შეთანხმება. რა თქმა უნდა, ჩვენ ევროსაბჭოსთან თანამშრომლობას განვაგრძობთ ”, – განაცხადა ირაკლი კობახიძემ.