დაველოდოთ ვის შეარჩევენ თავიანთ კანდიდატურად, თუმცა ამ ცირკიდან, რომელსაც ჩვენ ვხედავთ, ვფიქრობ, რომ ლოგიკური შედეგი იქნებოდა ამ კანდიდატურის [ალეკო ელისაშვილი] წამოყენება, – ამის შესახებ პარლამენტის თავმჯდომარემ შალვა პაპუაშვილმა „ლელო“ და გახარიას პარტიის თბილისის მერობის კანდიდატად ალეკო ელისაშვილის შესაძლო წარდგენასთან დაკავშირებით განაცხადა.

როგორც პაპუაშვილმა აღნიშნა, კვლევები, მათ შორის „გორბის“ მიერ ჩატარებული, ადასტურებს, რომ ოპოზიციურ პარტიებს ადგილობრივ დონეზეც არ აქვთ საზოგადოების მხარდაჭერა.

„ეს არის იმ ცირკის ლოგიკური გაგრძელება, რასაც ხაზარაძე და გახარია აწყობენ. ასე რომ, კანდიდატურის დასახელება ცირკის ლოგიკური გაგრძელება იქნება. რაც შეეხება შანსებს, შანსი, რა თქმა უნდა, ნულს ქვემოთ არის. ეს კიდევ ერთხელ გამოჩნდება ამ არჩევნებზე.

ერთი მხრივ, ჩვენ გვყავს რადიკალური ოპოზიციის ფრთა, რომელიც დემოკრატიას ემიჯნება. ამ არჩევნებზე ნახავენ, რომ ქართველ ხალხს არ სჭირდება სახელისუფლებო მანდატით, მათ შორის, ადგილობრივ დონეზე, რომელთა ერთადერთი მიზანია ქვეყნის არევა, ქვეყნის ომში შეთრევა, ეკონომიკური ნგრევა, ასეთ ადამიანებს როგორ მისცემენ მანდატებს? ეს კიდევ ერთხელ აჩვენა კვლევამ [გორბის კვლევა]. დაველოდოთ ვის შეარჩევენ თავიანთ კანდიდატურად, თუმცა ამ ცირკიდან, რომელსაც ჩვენ ვხედავთ, ვფიქრობ, რომ ლოგიკური შედეგი იქნებოდა ამ კანდიდატურის [ალეკო ელისაშვილი] წამოყენება“,- განაცხადა პაპუაშვილმა.

შალვა პაპუაშვილის შეფასებით, „გორბის” კვლევის მთავარი შედეგი არის ის, რომ „ქართული ოცნება“ უკვე მეათეჯერ დამაჯერებლად გაიმარჯვებს და ამით გაიმარჯვებს საქართველოს ეროვნული ინტერესები.

მისივე თქმით, კვლევის შედეგები უნდა იყოს გაკვეთილი ყველა იმ უცხოელისთვის, რომელიც ცდილობს, რომ ილაპარაკოს ქართველი ხალხის სახელით.

„ამ კვლევამ ჩემთვის რაც აჩვენა, ეს არის 62%-იანი ნდობა ქართველი ხალხისა პარლამენტის მიმართ. ეს უნდა იყოს გაკვეთილი ყველა იმ უცხოელისთვის, რომელიც საქართველოს, ქართველ ხალხს, მის ხელისუფლებას და საქართველოს პარლამენტს ეპარალელება ან ცდილობს, რომ ელაპარაკოს ქართველი ხალხის სახელით. ამას უპასუხა ქართველმა ხალხმა ამ კვლევის შედეგებიდან გამომდინარე. როდესაც ცდილობენ ვიღაცები, რომ მეურვის როლი ითამაშონ ქართველი ხალხის მიმართ, თითქოს ქართველ ხალხს არ შეუძლია საკუთარი აზრის დაფიქსირება, ქართველმა ხალხმა უთხრა, რომ მე-11 მოწვევის პარლამენტი, მის მიერ გატარებული რეფორმები არის სრულად მხარდაჭერილი ქართველი ხალხის და მისი მოქალაქეების მხრიდან. აიღონ ახლა ეს შედეგები და შეეგუონ ამას რამენაირად.

სამწუხაროა, რომ რადიკალურ ოპოზიციას, არასაპარლამენტო ოპოზიციას, ჯერ კიდევ ჰყავს გარკვეული რაოდენობა მხარდამჭერებისა. მაშინ, როდესაც ცნობილი გახდა, რა წამების სისტემა ჰქონდა სააკაშვილს შექმნილი მიუხედავად ამისა, წლების განმავლობაში ხმას აძლევენ მის პარტიას და მის ქოლგის ქვეშ არსებულ პარტიებს. ეს სამწუხარო მოცემულობაა“, – განაცხადა შალვა პაპუაშვილმა.

ამასთან, შალვა პაპუაშვილი აცხადებს: – „რადიკალურ ოპოზიციას ჭკუა რომ ჰქონდეს, ამ კვლევიდან გამოიტანდა დასკვნას, რომ აქვთ შანსი, რომ საკრებულოებში წარმომადგენლები ჰყავდეთ. ამ შანსს თუ ხელიდან გაუშვებენ, საერთოდ გაქრებიან და თვითლიკვიდაციას გამოაცხადებენ“.

ზოგადად, ბალტიის ქვეყნების ეს აკვიატება უკვე სერიოზულიც აღარ არის, არ ვიცი, რთულია ხსნა ის განსაკუთრებული აჩემება, რომელიც ქართველი ხალხის მიმართ აქვთ, – განუცხადა ჟურნალისტებს საქართველოს პარლამენტის თავმჯდომარე შალვა პაპუაშვილმა.

მისივე თქმით, ფაქტი ეს არის, მათი მტრული პოლიტიკა ქართველი ხალხის წინააღმდეგ და ეს სამწუხარო რეალობაა, რომელიც დგას.

„სამი ქვეყანა, რომელიც წესით კარგად უნდა ხვდებოდეს თუ რა გამოწვევების წინაშე დგას ჩვენი ქვეყანა, ზუსტად ეს სამი ქვეყანა რატომღაც გადაემტერა ქართველ ხალხს. ეს მხოლოდ კულმინაციაა ამ მტრული პოლიტიკის გამოვლინებისა.

წინა წლები გავიხსენოთ, ვინ იყო სააკაშვილის გულშემატკივარი. იყვნენ ბალტიის პოლიტიკური ელიტა. ვინ იყო, ვინც ყოველთვის ცდილობდა, რომ აერია სიტუაცია იმ მხრივ, რომ სააკაშვილს, მართლა რომ იტყვიან ცხვირში გვტენიდნენ, იყო ბალტიის ქვეყნების პოლიტიკური ელიტა. ასე, რომ ახლა რასაც ვხედავთ, ეს არის კულმინაცია იმ ანტიქართული პოლიტიკასა, რომელიც სამწუხაროდ ბალტიის ქვეყნებში არის გატარებული“, – აღნიშნა შალვა პაპუაშვილმა.

2011 წლიდან მოყოლებული დღემდე „ქართული ოცნების“ მიერ არათუ რუსულ საკითხს და გადაწყვეტილებას, არამედ არაქართულ გადაწყვეტილებას ვერავინ გაიხსენებს, – ამის შესახებ საპარლამენტო უმრავლესობის წევრმა, არჩილ გორდულაძემ განაცხადა.

მისი თქმით, არა მხოლოდ საქართველოში, არამედ მთელი მსოფლიოს მასშტაბით, ყოველგვარი დასაბუთების და საფუძვლის გარეშე, ადამიანებს იარლიყებს აწებებენ და შემდეგ ამ ადამიანებს თავის მართლებას სთხოვენ.

„ადამიანები და პოლიტიკური ძალა, რომელიც „დიფ სთეითის“ წისქვილზე წყალს არ ასხამს, აუცილებლად თავდასხმის ობიექტი ხდება და მასზე, „დიფ სთეითის“ დავალებით, რუსულის და რუსეთუმეს იარლიყის მიწებებას შეეცდებიან ხოლმე. იგივე იყო „ქართული ოცნების“ შემთხვევაში, 2011 წლიდან მოყოლებული დღემდე არათუ რუსულ საკითხს და გადაწყვეტილებას, არამედ არაქართულ გადაწყვეტილებას ვერავინ გაიხსენებს. სამაგიეროდ, ჩვენი ქვეყნის ავის მოსურნეების საწინააღმდეგო გადაწყვეტილებები, მათ შორის, მიღებული იყო პარლამენტში მიმდინარე სესიის განმავლობაში. არა მხოლოდ საქართველოა თავდასხმის ობიექტი, არამედ ასეთი კამპანია მთელი მსოფლიოს მასშტაბით მიმდინარეობს. ყოველგვარი დასაბუთების და საფუძვლის გარეშე, ადამიანებს იარლიყებს აწებებენ და შემდეგ ამ ადამიანებს თავის მართლებას სთხოვენ. ჩვენ ვხედავთ, რომ, „დიფ სთეითის“ დავალებით, ამ ყველაფერს ტრამპის ადმინისტრაციის მიმართ ყოფილი პრეზიდენტი აღასრულებდა. ამერიკის შეერთებულ შტატებში საერთაშორისო სკანდალია, სადაც უნდა გამოიკითხოს ყოფილი პრეზიდენტი და შესაძლებელია, სხვადასხვა პირის მიმართ პასუხისმგებლობის საკითხიც დადგეს“, – განაცხადა არჩილ გორდულაძემ.

ექსტრემისტულ ჯგუფებად ქცეულ ჩვენს ოპონენტებს სურთ საქართველოს ნგრევა და იმ პროცესში მონაწილეობა, რასაც რუსეთთან დაპირისპირება ჰქვია, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.

ვოლსკის თქმით, საზოგადოების დიდ ნაწილს მიაჩნია, რომ ეს საქართველოს მომავლისთვის საფრთხის შემცველია.

„რევოლუციური პროცესის განვითარება როცა იგეგმება რომელიმე ქვეყანაში – და ამ შემთხვევაში საქართველოში – რამდენიმე საკითხია, რომლებიც კონკრეტული სამოქმედო გეგმითაა გაწერილი. ეს მზაკვრული სამოქმედო გეგმაა, რადგან ქართული საზოგადოების ინტერესებს უკავშირდება. რუსული პოლიტიკის გატარების თემა ერთ-ერთი მთავარი მექანიზმია, რომელიც ამ მზაკვრულ სცენარშია გაწერილი. ის 2012 წლიდან გამოიყენება და ამ თემით საკუთარი ქვეყნის შერყევა ვერანაირად ვერ მოახერხეს. ახლა ამას დაემატა არჩევნების გაყალბების თემა, რომელიც ასევე არათუ არ დასტურდება, არამედ აბსოლუტურად სხვა ვითარებაა შექმნილი. ახლა კიდევ გაწირეს თავიანთი მარიონეტები იმისთვის, რომ სახელმწიფოში შეიქმნას არასტაბილური ვითარების განცდა. გაწირეს იმ თვალსაზრისით, რომ კანონს დააპირისპირეს, რომელიც არა „ქართულმა ოცნებამ“ მიიღო, არამედ დიდი ხანია, საქართველოში არსებობს და რამდენიმე ადამიანი გარკვეული პერიოდის განმავლობაში ამ სასჯელს ციხეში მოიხდის. ამ ვითარებიდან უნდათ ამ სცენარის განვითარება, რასაც, საბოლოო ჯამში, საქართველოს უკრაინიზაცია უნდა მოჰყვეს. ეს სურათი იმდენად ნათელია, რომ ამასთან დაკავშირებით ეჭვი არ ეპარება არც ოპოზიციას და არც იმ ხალხს, ვინც უმრავლესობას მხარს უჭერს, მაგრამ კონკრეტული პოლიტიკა ჩამოყალიბდა. ექსტრემისტულ ჯგუფებად ქცეულ ჩვენს ოპონენტებს სურთ საქართველოს ნგრევა და მონაწილეობა იმ პროცესში, რასაც ჰქვია რუსეთთან დაპირისპირება. არსებობს საზოგადოების დიდი ნაწილი, რომელსაც მიაჩნია, რომ ეს საქართველოს მომავლისა და ჩვენი ოჯახებისთვის საფრთხის შემცველია. არჩევნები მოდის, ეს არჩევნები კიდევ ერთხელ იქნება სერიოზული ინდიკატორი იმისა, დავასკვნათ, რომელია მართალი მხარე“, – აღნიშნა გია ვოლსკიმ.