დღეს პრობლემა არის ივანიშვილის და „ქართული ოცნების“ მმართველობა, დემოკრატიული პრინციპების უგულებელყოფა, ოლიგარქიული რეჟიმი, დიქტატორისკენ სწრაფვა, – ამის შესახებ „ერთიანობა ნაციონალური მოძრაობის“ ლიდერმა, ანა წითლიძემ განაცხადა.

მისივე თქმით, ერთადერთი გამოსავალი არის თავისუფალი და სამართლიანი არჩევნები.

„ჩვენ ვიცით, როგორიც არის ივანიშვილის სტილი, მას ეხერხება რაღაც პრობლემა შექმნას, შემდეგ ამ პრობლემის მოგვარებაზე ივაჭროს უფრო დიდი პრობლემის გადასაწყვეტად თავისთვის, ამიტომ მცდელობა, რომ დღეს ის პრობლემები, რაც ქვეყანას ევროპული ინტეგრაციის გზაზე აქვს, მხოლოდ ორი კანონის [„უცხოური გავლენის გამჭვირვალობის“ და „ოჯახური ღირებულებებისა და არასრულწლოვანთა დაცვის შესახებ კანონის“] გაუქმებაზე დაიყვანო, არ არის ის, რაც ამ ქვეყანას უჩერებს ევროპულ მომავალს. დღეს პრობლემა არის ივანიშვილის და „ქართული ოცნების“ მმართველობა – დემოკრატიული პრინციპების უგულებელყოფა, ოლიგარქიული რეჟიმი, დიქტატორისკენ სწრაფვა, „ქართული ოცნების“ ხელში არსებული ყველა სახელმწიფო სტრუქტურა, სასამართლო, პროკურატურა და ა.შ. რომელიც განვითარების შესაძლებლობას ამ ქვეყანას არ აძლევს, ამიტომ ერთადერთი გამოსავალი ამ ყველაფერში არის თავისუფალი და სამართლიანი არჩევნები, რომლის შედეგადაც ამ ქვეყანაში იქნება დემოკრატიული ინსტიტუტები და ეს ქვეყანა დემოკრატიულ განვითარებას და ქვეყნის ევროპულ ინტეგრაციას გააგრძელებს“, – განაცხადა ანა წითლიძემ.

კატეგორიულად ვაცხადებთ, რომ პოლიტიკოსების მიერ გავრცელებული ინფორმაცია ცესკოს მიერ მარკერების შეცვლის შესახებ, არის სრული სიცრუე და საზოგადოების შეცდომაში შეყვანას ისახავს მიზნად,- ამის შესახებ ნათქვამია ცენტრალური საარჩევნო კომისიის მიერ „ფეისბუქზე“ გავრცელებულ განცხადებაში.

როგორც ცესკოში განმარტავენ, საარჩევნო ბიულეტენზე არჩევანის დასაფიქსირებლად გამოყენებული სპეციალური მარკერები საარჩევნო ადმინისტრაციას კომპანია „სმარტმატიკმა“ მოაწოდა.

„აღნიშნულს ადასტურებს კომპანიასთან გაფორმებული ხელშეკრულება და მათ შორის მარკერების მიღება-ჩაბარების აქტები, რომლებიც საჯაროა და განთავსებულია სახელმწიფო შესყიდვების ელექტრონულ სისტემაში.

კატეგორიულად ვაცხადებთ, რომ პოლიტიკოსების მიერ გავრცელებული ინფორმაცია ცესკოს მიერ მარკერების შეცვლის შესახებ, არის სრული სიცრუე და საზოგადოების შეცდომაში შეყვანას ისახავს მიზნად“,- აღნიშნულია ინფორმაციაში.

ცნობისთვის, “ერთიანობა – ნაციონალური მოძრაობის” თავმჯდომარის, თინა ბოკუჩავას განცხადებით, „26 ოქტომბრის არჩევნებისთვის ცესკო-მ უკანონოდ და საკონტრაქტო პირობების დარღვევით „სმარტმატიკის“ ბრენდირებული მარკერები წინა დღით ჩაანაცვლა არაბრენდირებული მარკერებით, რითაც დაირღვა ხმის მიცემის პროცედურის ფარულობა“.

აღნიშნული განცხადება ბოკუჩავამ მედიასთან საქალაქო სასამართლოში გააკეთა, სადაც საპარლამენტო არჩევნების შედეგების ბათილად ცნობის მოთხოვნით სამი გაერთიანებული სარჩელის განხილვა მიმდინარეობს.

საპარლამენტო უმრავლესობის წევრის, არჩილ გორდულაძის განცხადებით, პარლამენტის წევრობის არცერთ კანდიდატს ან პარტიას, რომელმაც არჩევნების შედეგად მანდატები მოიპოვა, არ აქვს უფლება, პარლამენტის პირველ სხდომამდე ჩახსნას სიები ან უარი განაცხადოს პარლამენტში შესვლაზე.

გორდულაძის თქმით, კოლექტიური „ნაცმოძრაობის“ წარმომადგენლების თავიანთ ამომრჩევლებსაც აღარ სჯერათ.

„არც იმის შესაძლებლობა არსებობს, რომ სიაში შემდგომი ადამიანების უფლებამოსილებები არ იყოს ცნობილი. ის პროცესები, რაც 2020 წლის პარლამენტის არჩევნების შემდეგ არაერთმა ოპოზიციონერმა გააკეთა, როდესაც სიები ჩახსნეს და მათ წევრებს არ მისცეს შესაძლებლობა, პარლამენტის წევრები გამხდარიყვნენ, ახლა სამართლებრივად შეუძლებელია. სულ ორი ვარიანტია – „ახალის“ და „ნაციონალური მოძრაობის“ წევრებმა ან წერა-კითხვა არ იციან და სამართლის ნორმების გაგება არ შეუძლიათ, ან ჩვეულებრივი მატყუარები, მავნებლები არიან და კიდევ ერთხელ ცდილობენ, საზოგადოებას თავს მოახვიონ ცრუ ნარატივი. ეს ყველაფერი ჩვენ ნანახი გვაქვს, უკვე კინოც კი აღარ არის, სერიალში აქვთ გადაზრდილი.

2020 წელს ზუსტად იგივეს ამბობდნენ. კარგად გვახსოვს, გვარამია როგორ აწერინებდა, მაგალითად ე.წ. დაფაზე ხელმოწერებს აფიქსირებინებდა, რომ პარლამენტში აღარ შევიდოდნენ. ნიკა მელია ამბობდა, ვინც პარლამენტში შევა, პუფი იქნებაო და შემდეგ უკვე პუფებად წარმოგვიდგნენ პარლამენტში, როდესაც ისინი პარლამენტში შემოსვლას ჩვენ გვასწრებდნენ. მაშინ საინტერესო შემთხვევაც გვქონდა, რომ ეს ადამიანები განაცდურ ხელფასსაც ითხოვდნენ. იმ ხელფასს, რომელიც არ უნდა მიეღოთ, მაგრამ კაბინეტ-კაბინეტ დადიოდნენ და ხელფასის მიღებას ითხოვდნენ, რაც საბოლოო ჯამში შესრულდა კიდეც და ხელფასიც მშვენივრად აიღეს. დარწმუნებული ვარ, იმავეს გააკეთებენ.

ანა დოლიძის სიტყვები რომ მოვიშველიოთ, ეს ადამიანები ყველანაირად ცდილობენ საზოგადოების გაბრაზებას. არ გამოსდით თავიანთი ამომრჩევლის გაბრაზებაც კი. ძალიან კარგად ვხედავთ, პარლამენტის წინ შეკრებილი ადამიანების რაოდენობა რამდენია. სულ უფრო და უფრო იკლებს. თავიანთ ამომრჩევლებსაც აღარ სჯერათ კოლექტიური „ნაცმოძრაობის“ წარმომადგენლების და ახლა ათასი ტყუილის მოფიქრება უწევთ, მათ შორის ისეთი ტყუილის, თითქოს მათ აქვთ შესაძლებლობა, რომ სიები ჩახსნან და საპარლამენტო მანდატებზე უარი თქვან.

პარლამენტის პირველი სხდომა როცა იქნება, შეიკრიბებიან „ქართული ოცნების“ წარმომადგენლები, 89 დეპუტატი, რაც სავსებით საკმარისია, რომ სხდომა გაიხსნას, უფლებამოსილი იყოს პარლამენტი, რომ დაიწყოს და შეუდგეს საქმიანობას. 89 დეპუტატი ცნობს პარლამენტის 150-ვე წევრის უფლებამოსილებას. ზუსტად ისევე, როგორც ეს 2020 წელს მოხდა. საუბრობდნენ არაერთ მოგონილ ფაქტთან დაკავშირებით, თითქოს არჩევნები არ ჩატარდა კანონის შესაბამისად და ახლა გადავიდნენ ისეთ ტყუილებზე, როგორიცაა სიების ჩახსნა. ეს ადამიანები მერამდენედ უნდა ვამხილოთ ტყუილში. მათ ტყუილებს წუთების სიცოცხლეც კი აღარ აქვთ და არ შეუძლიათ, რომ საზოგადოება მოატყუონ. სხვათა შორის, მათ ამ ტყუილში თავისივე კლასტერში შემავალი პარტიები ამხელენ. გვახსოვს გუშინდელი განცხადებები, რასაც მაგალითად, გახარიას გუნდის წარმომადგენლები აკეთებდნენ. ეს კიდევ ერთი მცდელობაა, თითქოს საზოგადოებაში ამ ორ ძალას შორის რაიმე დაპირისპირება წარმოაჩინონ, რათა გახარია გადარჩეს, თითქოს ის „ნაცი“ არ არის. გახარია ისეთივე „ნაცი“ და ისეთივე აგენტურის წარმომადგენელია, როგორც მაგალითად, ბოკუჩავა, გვარამია, მიხელ სააკაშვილი და „ნაციონალური მოძრაობის“ სხვა წევრები“, – განაცხადა არჩილ გორდულაძემ.

შეგვიძლია ოპოზიციას პარლამენტში ადგილი გამოვუყოთ – შექმნან ალტერნატიული პარლამენტი, ითამაშონ, ახალი წელი მოდის და შეიძლება ნაძვის ხეც მივუტანოთ, – ამის შესახებ ჟურნალისტებს უმრავლესობის წევრმა გურამ მაჭარაშვილმა განუცხადა.

მაჭარაშვილის შეფასებით, ოპოზიცია კომიკურ მდგომარეობაში იმყოფება.

„ოპოზიციას, მათ ექსპერტებს და არასამთავრობო ორგანიზაციებს რომ დავუჯეროთ, დღეს გიორგი ვაშაძეა პრემიერ მინისტრი, ოპოზიცია საკონსტიტუციო უმრავლესობაშია. ველოდები, რომ ცოტა ხანში პირველ სხდომასაც გამართავენ, ოღონდ თავმჯდომარეზე შეიძლება გაუჭირდეთ შეთანხმება”, – განაცხადა გურამ მაჭარაშვილმა.

მაჭარაშვილი მიიჩნევს, რომ არჩეულ დეპუტატებს შორის პარლამენტში შესვლის საკითხზე ერთგვაროვანი აზრი არ არის.

ის ოპოზიციას მიმართავს, რომ თუ პარლამენტის წევრობა არ სურთ, მათ პარლამენტში შემოსვლას არავინ დააძალებს, ოღონდ უფლებამოსილების შეწყვეტაზე პარლამენტს მხოლოდ მას შემდეგ მიმართონ, რაც მათი სადეპუტატო სტატუსი იქნება ცნობილი.

„პარლამენტის პირველ სხდომამდე რამდენიმე დღეა დარჩენილი. მაინტერესებს, რატომ ვერ ითმენენ პირველ სხდომამდე? – უფლებამოსილების შეწყვეტის შესახებ განცხადებებით პირველ სხდომაზე მობრძანდნენ და მას შემდეგ, რაც მათ სადეპუტატო სტატუსს ვცნობთ, ეს განცხადებები დატოვონ პარლამენტის კანცელარიაში. ამას რატომ არ აკეთებენ?! – არ აკეთებენ იმიტომ, რომ განცხადებას ყველა ოპოზიციონერი დეპუტატი არ დაწერს. სწორედ ამიტომ რაღაც მოჩვენებით სპექტაკლებს დგამენ. კარგად ვხედავთ, მხოლოდ ოპოზიციის ნაწილი ამბობს, რომ პარლამენტში არ შევა’, – განაცხადა მაჭარაშვილმა.

მისივე თქმით, 26 ოქტომბრის არჩევნების გაყალბების თაობაზე არც ერთი კონკრეტული მტკიცებულება არ არსებობს და ყველაფერი მხოლოდ ოპოზიციის აღქმების დონეზეა.

„დასრულდა აღქმების სამყარო და დადგა რეალობის სამყარო – ამას შეეგუონ!” – დასძინა გურამ მაჭარაშვილმა.

არ შეიძლება, ამ ოპოზიციით ქვეყანა დიდხანს აგრძელებდეს პოლიტიკურ ცხოვრებას. ეს ოპოზიცია უნდა ჩანაცვლდეს ახალი, ჯანსაღი პოლიტიკური ძალებით და, რეალურად, აქეთკენ მიჰყავთ მათ საკუთარი ხელით პროცესები, – ამის შესახებს აქართველოს პრემიერ-მინისტრმა, ირაკლი კობახიძემ ბაქოში ჟურნალისტებს განუცხადა.

პრემიერის თქმით, ოპოზიცია არის მძიმე მდგომარეობაში და, სახელმწიფო დეპარტამენტის მოწოდების მიუხედავად, ისინი ვერც პროკურატურასთან ვერ თანამშრომლობენ.

„იცით, რომ ბუნებაში არ არსებობს მტკიცებულება. რაც შეეხება წინასაარჩევნო პერიოდს, იყო უპრეცედენტოდ მშვიდი გარემო და წინასაარჩევნო პერიოდში რაიმე არსებითი დარღვევა არ დაფიქსირებულა. რაც შეეხება არჩევნების დღეს, პროცედურები წარიმართა, არსებითად, ელექტრონული წესით. ამომრჩეველთა 90%-ზე მეტმა ხმა მისცა ელექტრონული წესით, მანამდე რეგისტრაცია გაიარა ელექტრონული წესით და მათი ხმებიც დაითვალა ელექტრონული წესით. აქედან გამომდინარე, ოპოზიცია შეეჯახა ელექტრონულ აპარატებს და ვერას გახდა ამ ყველაფერთან დაკავშირებით, გამომდინარე იქიდან, რომ ყველაფერი წარიმართა აბსოლუტური სიზუსტით, ძალიან სწრაფი ტემპით დაითვალა არჩევნების შედეგები. შესაბამისად, შესადავებელი საერთოდ არაფერია. აქედან გამომდინარე, ოპოზიცია, ბუნებრივია, არის მძიმე მდგომარეობაში, ამიტომ ვერ თანამშრომლობენ ვერც პროკურატურასთან, მიუხედავად სახელმწიფო დეპარტამენტის მოწოდებისა. ისინი თავიანთი ხელით აკეთებენ იმ საქმეს, რაც ჩვენ უნდა გაგვეკეთებინა. ამ ოპოზიციით ქვეყანა, არ შეიძლება, დიდხანს აგრძელებდეს პოლიტიკურ ცხოვრებას. ეს ოპოზიცია უნდა ჩანაცვლდეს ახალი, ჯანსაღი პოლიტიკური ძალებით და, რეალურად, მათ საკუთარი ხელით აქეთკენ მიჰყავთ პროცესები“, – განაცხადა პრემიერმა.

ჩვენ 4 წლის თავზე ანგარიშს ჩავაბარებთ ქართულ საზოგადოებას, ჩვეულებრივად მშვიდად, წყნარად გრძელდება პროცესები, დანარჩენი არის ქარიშხალი ჭიქაში, რის დადგმასაც ცდილობს ახლა ოპოზიცია, – ამის შესახებ საქართველოს პრემიერ-მინისტრმა ირაკლი კობახიძემ ბაქოში ქართველ ჟურნალისტებს განუცხადა.

როგორც მთავრობის მეთაურმა აღნიშნა, რასაც ახლა ოპოზიცია აკეთებს, არის ცარიელი პიარი და სინამდვილეში ასეთ აქტებს ვერავითარი ეფექტი ვერ ექნება.

„ყველაფერი არის მშვიდად, წყნარად, შეჯამდება არჩევნების შედეგები, აქედან მეათე დღეს გაიმართება პარლამენტის სხდომა, ამის შემდეგ დაიწყება საპარლამენტო ცხოვრება.  აქედან ძალიან მალევე, სავარაუდოდ, იანვრის დასაწყისში გაიმართება პრეზიდენტის არჩევნებში, ამის შემდეგ შედგება პრეზიდენტის ინაუგურაცია. ქვეყანა ჩვეულებრივად აგრძელებს ცხოვრებას, გრძელდება არაერთი პროექტის განხორციელება, ვიწყებთ ჩვენი 4-წლიანი პროგრამის შესრულებას.

ჩვენ პასუხისმგებელი ვართ იმაზე, რომ 4 წლის თავზე შესაბამის ანგარიშს ჩავაბარებთ ქართულ საზოგადოებას, ჩვეულებრივად, მშვიდად, წყნარად გრძელდება პროცესები, დანარჩენი არის ქარიშხალი ჭიქაში, რის დადგმასაც ცდილობს ახლა ოპოზიცია”, – განაცხადა პრემიერ-მინისტრმა.

საქართველოს კონსტიტუციაში ძალიან მკაფიოდ წერია, რომ პარლამენტის პირველი სხდომა არჩევნების შემდეგ უნდა შედგეს შემაჯამებელი ოქმის გამოქვეყნებიდან არაუგვიანეს მე-10 დღისა, – ამის შესახებ პრემიერ-მინისტრმა ჟურნალისტის კითხვის პასუხად განაცხადა, რომელიც  „საერთაშორისო გამჭვირვალობის” განცხადებას შეეხებოდა, თითქოს პარლამენტი პრეზიდენტის მოწვევის გარეშე ვერ შეიკრიბება.

 მისივე თქმით, პრეზიდენტის აქტი ვერავითარ შემთხვევაში ვერ გადაფარავს საქართველოს კონსტიტუციას და თუ ვინმე საპირისპიროს ამტკიცებს მას აქვს პრობლემა კვალიფიკაციასთან, ან კეთილსინდისიერებასთან, ან ორივესთან ერთად.

 „პრეზიდენტის აქტი ვერავითარ შემთხვევაში ვერ გადაფარავს საქართველოს კონსტიტუციას. ვინც ერკვევა ელემენტარულ იურისპუდენციაში, რა თქმა უნდა, დაადასტურებს იმას, რომ საქართველოს კონსტიტუცია გადაფარავს პრეზიდენტის აქტს. აქედან გამომდინარე, თუ ვინმე საპირისპიროს ამტკიცებს მას აქვს პრობლემა ან კვალიფიკაციასთან, ან კეთილსინდისიერებასთან, ან ორივესთან ერთად,”- განაცხადა პრემიერმა.

გაეროს კლიმატის ცვლილების კონფერენცია იყო ძალიან მაღალ დონეზე ორგანიზებული, რაც მინდა მივულოცო ჩვენს აზერბაიჯანელ მეგობრებს, – ამის შესახებს აქართველოს პრემიერ-მინისტრმა ირაკლი კობახიძემ ბაქოში ჟურნალისტებს განუცხადა.

მთავრობის მეთაურის თქმით, საქართველო დიდ ყურადღებას უთმობს გარემოს დაცვისა და ეკოლოგიის საკითხებს, ქვეყნის კონსტიტუციაში უმაღლეს დონეზე გარანტირებულია შესაბამისი ძირითადი უფლება და ყველაფერი გაკეთდება იმისათვის, რომ შესაბამისი მიზნები იქნას მიღწეული.

„კონფერენცია იყო ძალიან მაღალ დონეზე ორგანიზებული, რაც მინდა მივულოცო ჩვენს აზერბაიჯანელ მეგობრებს. მნიშვნელოვანია, რომ ჩვენს რეგიონში ტარდება ეს მნიშვნელოვანი ღონისძიება. რაც შეეხება ჩვენს გზავნილებს, საქართველო ძალიან დიდ ყურადღებას უთმობს გარემოს დაცვისა და ეკოლოგიის საკითხებს. ჩვენს კონსტიტუციაში უმაღლეს დონეზე გარანტირებულია შესაბამისი ძირითადი უფლება და ყველაფერი გაკეთდება იმისათვის, რომ შესაბამისი მიზნები იქნას მიღწეული. ამ კუთხით ჩვენ აქტიურად ვითანამშრომლებთ გაეროსთან და ევროკავშირთან. მუდმივ რეჟიმში მიმდინარეობს ჩვენი კანონმდებლობის და სტანდარტების დაახლოება ევროპულ კანონმდებლობასა დსა სტანდარტებთან. ეს არის ჩვენი მთავარი გზავნილი“, – განაცხადა კობახიძემ.