ბავშვებს დაშლით?! დედა გეტირებათ! ხომ ჩემზე უკეთ იცით?! – კატასტროფაა! ჩვენ თუ 27 ქვეყანას დავუპირისპირდით, რუსეთის შესაჭმელად ტოვებთ ქვეყანას, კაცო?! ქვეყანას რას უკეთებთ?!, – ასე მიმართა პარტია „კანონი და სამართლის“ დეპუტატმა, თაკო ჩარკვიანმა უმრავლესობის დეპუტატებს პარლამენტის პლენარულ სხდომაზე.

მისივე თქმით, „უცხოური გავლენის გამჭვირვალობის შესახებ: კანონპროექტი შინაარსით უთუოდ, რუსულია და დასავლური სივრცე გამადიდებელი შუშით გვიყურებს. ჩარკვიანი სიტყვით გამოსვლისას ასევე, კომიტეტის სხდომაზე გუშინ მომხდარ ფიზიკურ დაპირისპირებასაც შეეხო.

„გუშინ მართლაც მძიმე დღე იყო. ნუ შევყვებით ჩვენ რა მართლდება, რა არ მართლდება. ცუდი სანახაობაა ყოველთვის ასეთი ცემა-ტყეპა. მე განმიცდია ეს ყველაფერი ქუთაისის აეროპორტში. მე და ჩემი შვილი ვიყავით და მეუღლე გვახლდა. სამარცხვინო თავდასხმა მოგვიწყვეს. ეს იყო 6-კაციანი თავდასხმა. თავდასხმა ნაკლებად მაინტერესებს, მაინტერესებს პასუხი, რომელიც კახი კალაძემ ტელევიზიით გააკეთა. მაშინ პირველად გავოცდი და ჩავფიქრდი, რომ ეს ბიჭი საზიზღრობის ზღვარს გაცდა. ვციტირებ, „რასაც დასთეს იმას მოიმკიო“. ერთი წამით არ მიფიქრია გუშინ, მაგალითად, რომ ეს მეკადრებინა და მეთქვა მდინარაძისთვის, რომელსაც თხემით ტერფამდე არ ვეთანხმები არც ერთ სიტყვაში, არც ერთ ნააზრევში, შეურაცხმყოფელ გამონათქვამებში, რასაც ის აკეთებს ხოლმე. ჯაჭვია და ამ ჯაჭვის ყველას უნდა ეშინოდეს და ზოგადად ადამიანები ერთმანეთს უნდა გაუფრთხილდნენ. რაც შეეხება კანონს – დიახ, ეს კანონი შინაარსით არის უთუოდ რუსული. სულ ვსვამთ კითხვას – რატომ?! რისთვის არის ფინანსთა სამინისტრო, ეკონომიკის სამინისტრო, საშემოსავლო, აუდიტი, ვერ გავიგე, მიტოვებული გაქვთ აბა ისე ქვეყანა? არაფერს ამოწმებთ? ხომ გასაგებია, რომ ეს თითიდან გამოწოვილია და ნაბრძანებია ამ სიტუაციაში. რას შვრებით ხალხო? მოდით ასე დავალაგოთ – ბავშვებს დაშლით? – დედა გეტირებათ! ხომ ჩემზე უკეთ იცით?! კატასტროფაა! ვისთან ტოვებთ ქვეყანას?! ჩვენ თუ 27 ქვეყანას დავუპირისპირდით რუსეთის შესაჭმელად ტოვებთ ქვეყანას, კაცო?! მომგებიანია ახლა ჩვენთვის ამ კანონის მიღება?! აბა რას აკეთებთ?! ქვეყანას რას უკეთებთ?! არ მჯერა, რომ გამყიდველები ხართ, გეფიცებით…,“ – განაცხადა ჩარკვიანმა.

პარტია „გირჩის“ წევრის ალექსანდრე რაქვიაშვილის განცხადებით, ამერიკასთან დაპირისპირება რუსეთის სასარგებლოდ მოქმედებას ნიშნავს.

რაქვიაშვილის თქმით, „უცხოური გავლენის გამჭვირვალობის შესახებ“ კანონპროექტი, რა დასახელებაც არ უნდა ჰქონდეს მას, შინაარსობრივად ამერიკის წინააღმდეგ მიმართული კანონია.

„სახელმწიფო დეპარტამენტის გუშინდელი განცხადება საბოლოო ჯამში ხსნის, რა ხდება ჩვენს ქვეყანაში. ეს კანონი, რომელზეც ამდენი ბრძოლაა, ვიღაცას არ მოსწონს, რუსულს ეძახიან, ვიღაც მარტო რუსულს ეძახის და ა.შ. შინაარსობრივად ამერიკის წინააღმდეგ მიმართული კანონია. ყოველ შემთხვევაში, ამერიკელების რეაქციაც ასე გამოიყურება და ისიც კი ჩანს, რამ გამოიწვია, რადგან ამერიკელები, ფაქტობრივად, გვეუბნებიან, მიხედეთ სასამართლოსო.  აქვთ თუ არა ამერიკელებს ლეგიტიმური უფლება, ჩაერიონ ჩვენს საქმეში და გვითხრან, შეცვალეთ სასამართლოო. მგონი, ჩვენ ამაზე უნდა ვიმსჯელოთ და ჩემი აზრით, სრული ლეგიტიმაცია აქვთ, რადგან ჩვენ იქეთ ვთხოვთ ამერიკელებს დახმარებას, ვთხოვთ დაცვას, ამერიკელებზე დგას ჩვენი უსაფრთხოება და ზოგადად, ამერიკა არის ის ქვეყანა, რომელიც ჩვენ მოგვწონს. არ ვიცი, თქვენ როგორ მოგწონთ, მაგრამ მე ძალიან მომწონს. მე მომწონს ამერიკის სასამართლო სისტემა და ჩვენ გვინდა, სასამართლოში იყოს როგორც ამერიკაშია – არჩევითი მოსამართლეები, მსაჯულები. მომწონს ამერიკის თავისუფალი ხალხი, რომელიც შეიარაღებული გადიან მიტინგზე და იცავენ თავის თავს, იცავენ თავის შტატს, იცავენ საკუთარ სახლს კრიმინალისგან. მე მიყვარს ამერიკის სიტყვის თავისუფლება. მიყვარს ამერიკის დეცენტრალიზაცია, როცა შტატებს აქვს ნამდვილი თავისუფლება, განსხვავებული წესრიგი მოაწყონ, განსხვავებული მეზობელი შტატებისგან და ცენტრალური მთავრობის სურვილებისგან. კი, ამერიკაშიც ბევრი ცუდი რაღაც ხდება. ისტორიაში არ ყოფილა, ისეთი სოციალისტური ადმინისტრაცია ჰყავთ ახლა და ძალიან ბევრ შეცდომას უშვებენ, მაგრამ ამათზე უკეთესი ქვეყანა უბრალოდ ჯერჯერობით არ არსებობს. კარგი, გადავიმტერეთ ამერიკელები, გადავიმტერეთ ევროპელები, შოლცს არ დავუჯერეთ, სახელმწიფო დეპარტამენტს არ დავუჯერეთ, ელჩებს არ დავუჯერეთ, რა ალტერნატივა არის? რის იმედზე ვართ? ჩვენს რეალობაში ამერიკელებთან დაპირისპირება შინაარსობრივად ხომ რუსობას ნიშნავს? რამე ალტერნატივა არსებობს კიდევ, რომ ვიცოდე? ჩვენ გვაქვს იმხელა ძალა, რომ თავი დავიცვათ ამერიკელების და ევროპელების გარეშე? არ გვაქვს“, – განაცხადა ალექსანდრე რაქვიაშვილმა.

სანქცირებულ ქართველ მოსამართლეებთან დაკავშირებით აშშ-ის სახელმწიფო დეპარტამენტის სპიკერმა, მეთიუ მილერმა განაცხადა:„სანქციებს ვაწესებთ, რათა ხელი შევუწყოთ იმ პირებისთვის პასუხისმგებლობის საკითხის დაყენებას, რომელთაც ისარგებლეს დაუსჯელობით და ასევე, რომლებიც მუშაობენ კანონის უზენაესობისა და საქართველოს მართლმსაჯულების სისტემისადმი საზოგადოების ნდობის ხელყოფისთვის. საქართველოს მთავრობასთან კომუნიკაციის თვალსაზრისით, ჩვენ მოვუწოდებთ მთავრობას, გადადგას ნაბიჯები კორუმპირებული აქტორების პასუხისმგებლობის საკითხის დაყენების უზრუნველსაყოფად“.

მთელი მსოფლიო გვაფრთხილებს, არ დავუშვათ საქართველოში ავტორიტარული რეჟიმის დამკვიდრება და დარწმუნებული ვარ, ქართველი ხალხის ერთიანობა გაიმარჯვებს, – ამის შესახებ „სტრატეგია აღმაშენებლის“ ლიდერმა, გიორგი ვაშაძემ პარლამენტის პლენარულ სხდომაზე განაცხადა.

ვაშაძის თქმით, საქართველო იქნება ერთიანი, ძლიერი ქვეყანა, რომელიც აუცილებლად გახდება ევროკავშირის წევრი.

„მინდა, წაგიკითხოთ ერთი ციტატა, რომელიც ქართული წარმოშობის, ჩვენს თანამემამულეს უკავშირდება. „საქართველოს არ ეყოლება მეგობრები პუტინის რუსეთის გარდა. კეთილი იყოს თქვენი მობრძანება ორთავიანი არწივის ფრთის ქვეშ. ქართველებო, ეს არ დაგემართოთ, იზრუნეთ თავისუფლებაზე“ – ეს სიტყვები ეკუთვნის ბორის აკუნინს, ქართული წარმოშობის, მსოფლიო მასშტაბის მწერალს, რომელმაც ძალიან კარგად იცის, რა მოიტანა ამნაირმა კანონმა რუსეთში. სწორედ ამიტომ, მთელი მსოფლიო გვაფრთხილებს, არ დავუშვათ საქართველოში ავტორიტარული რეჟიმის დამკვიდრება და დარწმუნებული ვარ,  ქართველი ხალხის ერთიანობა გაიმარჯვებს. მჯერა, საქართველო იქნება ერთიანი, ძლიერი ქვეყანა, რომელიც აუცილებლად წავა ევროკავშირისკენ. ნუ გეშინიათ, ნუ ნერვიულობთ. ევროკავშირის წევრი გახდება ეს ქვეყანა. ჩვენ შემოვიტანთ ევროპულ და ამერიკულ ინვესტიციებს. ჩვენ ავაყვავებთ საქართველოს ეკონომიკას. თქვენთვისაც, თქვენი შვილებისთვისაც იქნება ძალიან კარგი ქვეყანა და თქვენგან განსხვავებით, არასდროს მოვახდენთ საქართველოს ეროვნული ინტერესების საბოტაჟს, ყოველთვის ხალხის ინტერესებს გავატარებთ. ხალხნო, დავდგეთ ერთად, როგორც ბორის აკუნინი მოგვმართავს. ქართველებო, ეს არ დაგვემართოს და არ მივცეთ ამ ადამიანებს შესაძლებლობა, გადაგვახვევინონ ევროპული ინტეგრაციის გზიდან. საქართველო იქნება ევროკავშირის წევრი და თქვენ ამ ლაქას, რასაც ახლა აკეთებთ, ვერასდროს ჩამოირეცხავთ“, – აღნიშნა გიორგი ვაშაძემ პარლამენტის პლენარულ სხდომაზე, სადაც „უცხოური გავლენის გამჭვირვალობის შესახებ“ კანონპროექტს განიხილავენ.

დედაქალაქის მერის, კახა კალაძის განცხადებით,  ქვეყანაში მშვიდობის შენარჩუნებას ალტერნატივა არ გააჩნია. ამის შესახებ მან მედიასთან ისაუბრა.

როგორც კახა კალაძემ აღნიშნა, საერთაშორისო ანალიტიკური ცენტრის „ეკონომიკისა და მშვიდობის ინსტიტუტი“ (IEP) მიერ გამოქვეყნებული კვლევა, რომლის მიხედვითაც, პოზიტიური მშვიდობის ინდექსით, საქართველო 50 საუკეთესო ქვეყანას შორის არის, სწორედ „ქართული ოცნების“ პოლიტიკით არის განპირობებული.

„ჩვენი პოლიტიკა ზუსტად იმისკენ არის მიმართული, რომ ქვეყანაში იყოს სიმშვიდე. ხედავთ, რა ხდება მთელ მსოფლიოში, რეგიონში, როგორი დაძაბული და რთული გეოპოლიტიკური მდგომარეობაა. შესაბამისად, ის პრაგმატული პოლიტიკა, რომელიც აქვს „ქართულ ოცნებას“ არჩეული, სასიცოცხლოდ მნიშვნელოვანია ჩვენი ქვეყნისთვის და ხვალინდელი დღისთვის.

მშვიდობას არ აქვს ალტერნატივა, მიუხედავად იმისა, რომ ევროპარლამენტარები და ყველა ის ადამიანი, ვინც დღეს გამჭვირვალობის კანონს აკრიტიკებს, მოგვიწოდებდნენ სანქციებზე მიერთებისკენ, მეორე ფრონტის გახსნაზე და ა.შ., მშვიდობის შენარჩუნება ამ ქვეყანაში მცხოვრები ნებისმიერი ადამიანისთვის, განურჩევლად მათი პოლიტიკური შეხედულებისა, არის უმნიშვნელოვანესი. სწორედ ამ მშვიდობით მოვახდენთ ქვეყნის განვითარებასა და წინსვლას“, – აღნიშნა თბილისის მერმა.

„ჩვენ, ჯანსაღად მოაზროვნე ადამიანებმა, ძალადობას, პოლარიზაციასა და ბულინგს  ხელი უნდა შევუშალოთ იმიტომ, რომ ფიზიკური დაპირისპირება  მიუღებელია“, – ამის შესახებ დედაქალაქის მერმა, კახა კალაძემ მედიასთან ისაუბრა.

მან სამარცხვინო უწოდა გუშინ, პარლამენტში მომხდარ თავდასხმას, რომლის მონაწილეც პარტია „მოქალაქეების“ ლიდერი ალეკო ელისაშვილი იყო.

„ძალიან მძიმე და სამარცხვინო ფაქტი მოხდა გუშინ პარლამენტში, ალეკო ელისაშვილის მონაწილეობით. კიდევ უფრო მეტი უბედურება იყო ის სტატუსები და განცხადებები, რაც პირდაპირ ძალადობის წახალისებაა. ჩვენ ეს არ გვიკვირს, რადგან ეს ადამიანები რადიკალურ დაჯგუფებას წარმოადგენენ. თავიანთი ტელევიზიებით სწორედ ისინი ახალისებენ ქვეყანაში ძალადობას, პოლარიზაციას, ადამიანების ერთმანეთის მიმართ ბულინგს და ა.შ. რა თქმა უნდა, ჩვენ, ჯანსაღად მოაზროვნე ადამიანებმა ამგვარ ქმედებებს ხელი უნდა შევუშალოთ იმიტომ, რომ ფიზიკური დაპირისპირება მიუღებელია“ – განაცხადა თბილისის მერმა.

ამასთან, კახა კალაძემ ისაუბრა ეროვნული ბანკის ყოფილი პრეზიდენტის, გიორგი ქადაგიძის განცხადებაზეც, რომელმაც აქციის მსვლელობისას, მოქალაქეებს ტრიბუნიდან მიმართა, რომ პარლამენტისთვის ალყა შემოერტყათ.

დედაქალაქის მერის თქმით, ქვეყანაში სიტყვისა და გამოხატვის უფლება დაცულია, თუმცა ეს უნდა მოხდეს მშვიდობიანად და კანონის ფარგლებში.

„სამწუხაროდ, ყოველთვის გამოჩნდებიან ხოლმე ადამიანები, რომლებიც მაქსიმალურად ცდილობენ პროვოკაციული სიტუაცია შექმნან. ჩვენ არაერთი ფაქტის მომსწრენი ვართ, როდესაც მსგავსი ტიპის განცხადებები კეთდება. შემდეგ ისინი, ვისაც ახალგაზრდები შეცდომაში შეჰყავს, აქციიდან იპარებიან. რა თქმა უნდა, სიტყვისა და გამოხატვის თავისუფლება ამ ქვეყანაში დაცულია. თუმცა, მინდა ყველას მოვუწოდო, რომ ყველაფერი კანონის ფარგლებში და მშვიდობიანად გააკეთონ. არავინ უნდა გადადგას ისეთი ნაბიჯი, რომელიც კანონს მიღმა იქნება. წინააღმდეგ შემთხვევაში, სახელმწიფოს, კანონის ფარგლებში, შესაბამისი რეაგირება მოუწევს“, – აღნიშნა კახა კალაძემ.

ვერ ვნახეთ, ვერცერთი ფაქტი და მტკიცებულება, რომლითაც დადასტურდება მოსამართლეების დანაშაული, – ამის შესახებ დედაქალაქის მერმა, კახა კალაძემ აშშ-ის სახელმწიფო დეპარტამენტის სპიკერის, მეთიუ მილერის განცხადების შეფასებისას განაცხადა.

კახა კალაძის თქმით, მოსამართლეებთან დაკავშირებით ხელისუფლებამ ვერ მიიღო ბრალდების დამადასტურებელი ვერცერთი ფაქტი.

„ამასთან დაკავშირებით არაერთხელ გაგვიკეთებია განმარტებები. მიუხედავად იმისა, რომ მოვისმინეთ ეს განცხადებები, ვერ ვნახეთ ვერცერთი ფაქტი, ვერცერთი მტკიცებულება, რა დანაშაული აქვთ ჩადენილი აღნიშნულ მოსამართლეებს. შესაბამისად, ყოველგვარი მტკიცებულებების გარეშე რაიმე ქმედების განხორციელება, გინდ სამართლებრივად, გინდ ადამიანურად, ყველანაირი თვალსაზრისით, არ არის მიზანშეწონილი და გამორიცხულია, ხელისუფლებამ გადადგას ისეთი ნაბიჯი, რომელიც სცდება კანონის ფარგლებს“, – განაცხადა კახა კალაძემ.