„ჩვენ, ჯანსაღად მოაზროვნე ადამიანებმა, ძალადობას, პოლარიზაციასა და ბულინგს  ხელი უნდა შევუშალოთ იმიტომ, რომ ფიზიკური დაპირისპირება  მიუღებელია“, – ამის შესახებ დედაქალაქის მერმა, კახა კალაძემ მედიასთან ისაუბრა.

მან სამარცხვინო უწოდა გუშინ, პარლამენტში მომხდარ თავდასხმას, რომლის მონაწილეც პარტია „მოქალაქეების“ ლიდერი ალეკო ელისაშვილი იყო.

„ძალიან მძიმე და სამარცხვინო ფაქტი მოხდა გუშინ პარლამენტში, ალეკო ელისაშვილის მონაწილეობით. კიდევ უფრო მეტი უბედურება იყო ის სტატუსები და განცხადებები, რაც პირდაპირ ძალადობის წახალისებაა. ჩვენ ეს არ გვიკვირს, რადგან ეს ადამიანები რადიკალურ დაჯგუფებას წარმოადგენენ. თავიანთი ტელევიზიებით სწორედ ისინი ახალისებენ ქვეყანაში ძალადობას, პოლარიზაციას, ადამიანების ერთმანეთის მიმართ ბულინგს და ა.შ. რა თქმა უნდა, ჩვენ, ჯანსაღად მოაზროვნე ადამიანებმა ამგვარ ქმედებებს ხელი უნდა შევუშალოთ იმიტომ, რომ ფიზიკური დაპირისპირება მიუღებელია“ – განაცხადა თბილისის მერმა.

ამასთან, კახა კალაძემ ისაუბრა ეროვნული ბანკის ყოფილი პრეზიდენტის, გიორგი ქადაგიძის განცხადებაზეც, რომელმაც აქციის მსვლელობისას, მოქალაქეებს ტრიბუნიდან მიმართა, რომ პარლამენტისთვის ალყა შემოერტყათ.

დედაქალაქის მერის თქმით, ქვეყანაში სიტყვისა და გამოხატვის უფლება დაცულია, თუმცა ეს უნდა მოხდეს მშვიდობიანად და კანონის ფარგლებში.

„სამწუხაროდ, ყოველთვის გამოჩნდებიან ხოლმე ადამიანები, რომლებიც მაქსიმალურად ცდილობენ პროვოკაციული სიტუაცია შექმნან. ჩვენ არაერთი ფაქტის მომსწრენი ვართ, როდესაც მსგავსი ტიპის განცხადებები კეთდება. შემდეგ ისინი, ვისაც ახალგაზრდები შეცდომაში შეჰყავს, აქციიდან იპარებიან. რა თქმა უნდა, სიტყვისა და გამოხატვის თავისუფლება ამ ქვეყანაში დაცულია. თუმცა, მინდა ყველას მოვუწოდო, რომ ყველაფერი კანონის ფარგლებში და მშვიდობიანად გააკეთონ. არავინ უნდა გადადგას ისეთი ნაბიჯი, რომელიც კანონს მიღმა იქნება. წინააღმდეგ შემთხვევაში, სახელმწიფოს, კანონის ფარგლებში, შესაბამისი რეაგირება მოუწევს“, – აღნიშნა კახა კალაძემ.

ვერ ვნახეთ, ვერცერთი ფაქტი და მტკიცებულება, რომლითაც დადასტურდება მოსამართლეების დანაშაული, – ამის შესახებ დედაქალაქის მერმა, კახა კალაძემ აშშ-ის სახელმწიფო დეპარტამენტის სპიკერის, მეთიუ მილერის განცხადების შეფასებისას განაცხადა.

კახა კალაძის თქმით, მოსამართლეებთან დაკავშირებით ხელისუფლებამ ვერ მიიღო ბრალდების დამადასტურებელი ვერცერთი ფაქტი.

„ამასთან დაკავშირებით არაერთხელ გაგვიკეთებია განმარტებები. მიუხედავად იმისა, რომ მოვისმინეთ ეს განცხადებები, ვერ ვნახეთ ვერცერთი ფაქტი, ვერცერთი მტკიცებულება, რა დანაშაული აქვთ ჩადენილი აღნიშნულ მოსამართლეებს. შესაბამისად, ყოველგვარი მტკიცებულებების გარეშე რაიმე ქმედების განხორციელება, გინდ სამართლებრივად, გინდ ადამიანურად, ყველანაირი თვალსაზრისით, არ არის მიზანშეწონილი და გამორიცხულია, ხელისუფლებამ გადადგას ისეთი ნაბიჯი, რომელიც სცდება კანონის ფარგლებს“, – განაცხადა კახა კალაძემ.

ერთხელ და სამუდამოდ გაიწვიეთ რუსული კანონი! საქართველოში რუსული კანონის ადგილი არ არის! – ასე მიმართა საპარლამენტო ფრაქცია „ერთიანი ნაციონალური მოძრაობის“ თავმჯდომარემ თინა ბოკუჩავამ მმართველი გუნდის წევრებს პარლამენტის პლენარული სხდომაზე.

როგორც ბოკუჩავამ განმარტა, “უცხოური გავლენის გამჭვირვალობის შესახებ“ კანონპროექტი დაპირისპირების წყაროა“.

„ხომ ხედავთ, რამხელა პროტესტი გამოიწვია მორიგ ჯერზე რუსული კანონის შემოტანის მცდელობამ. რამხელა ვნებათაღელვაა. რუსული კანონი არის დაპირისპირების წყარო ჩვენი საზოგადოებისთვის, რომელთა აბსოლუტური უმრავლესობა ამბობს: „არა რუსულ კანონს, კი ევროპას“. ქართველი ხალხის არჩევანმა, ამ არჩევანის დაცვამ, მათ შორის, გასული წლის აქციებით მოუპოვა ჩვენს ქვეყანას კანდიდატის სტატუსი. ახლა, მორიგ ჯერზე, ივანიშვილის პარტია ცდილობს ჩვენს ქვეყანას კანდიდატის სტატუსი, ეს დიდი მონაპოვარი წაართვას, გზა ჩაუხერგოს ჩვენს ქვეყანას ევროპისკენ. შეაჩერეთ რუსული კანონის განხილვა! შეაჩერეთ განხილვის პროცესი! არ გამოიტანოთ ეს კანონი არც დღეს, არც ხვალ და არც მომავალ სესიაზე, მომავალ წელს. ერთხელ და სამუდამოდ გაიწვიეთ რუსული კანონი! საქართველოში, რუსული კანონის ადგილი არ არის! საქართველოს მოქალაქეების არჩევანი არის ევროპა“,- აღნიშნა ბოკუჩავამ.

ამასთან, განმარტა, რომ „ივანიშვილის პარტიის წარმომადგენლები სამარცხვინოდ დასცინიან ამერიკის შეერთებული შტატების სახელმწიფო მდივნის წარმომადგენელს“.

„შეისმინეთ მათ შორის ჩვენი საერთაშორისო მეგობრების გამოხმაურებები. სასაცილოდ არ გყოფნიდათ გერმანიის კანცლერის უკიდურესად კრიტიკული განცხადებები, რომელიც გეუბნებათ, რომ ეს არ არის ევროპული კანონი. ივანიშვილის პარტიის წარმომადგენლები სრულიად სამარცხვინოდ დასცინიან ამერიკის შეერთებული შტატების სახელმწიფო მდივნის წარმომადგენელს, სამარცხვინოა, სასაცილო იქნებოდა, სატირალი რომ არ იყოს. ჩვენს ქვეყანას და ჩვენი ქვეყნის ევროატლანტიკურ მომავალს ეხება ეს. კი არ უნდა დასცინოდეთ საერთაშორისო პარტნიორებს, კი არ უნდა უგულებელყოფდეთ მათ მოწოდებებს, ქართველი ხალხის არჩევანს ფეხქვეშ კი არ უნდა თელავდეთ. უნდა უსმენდეთ ქართველ ხალხს“, – აღნიშნა ბოკუჩავამ.

ცნობისთვის, პარლამენტის პლენარული სხდომის დღის წესრიგს “უცხოური გავლენის გამჭვირვალობის შესახებ“ კანონპროექტის განხილვა დაემატა. საკითხი განსახილველად პირველი მოსმენით გადის. მასთან ერთად, პარლამენტს განსახილველად ორი ალტერნატიული საკანონმდებლო პაკეტი – „ოკუპანტი ქვეყნის – რუსეთის ფედერაციის გავლენებისგან დაცვის შესახებ” პროექტი და “სისხლის სამართლის კოდექსში“ შესატანი ცვლილებები, ასევე – „გრანტების შესახებ“ კანონსა და “ბუღალტრული აღრიცხვის, ანგარიშგებისა და აუდიტის შესახებ“ კანონში მომზადებული ცვლილებები წარედგინება. „უცხოური გავლენის გამჭვირვალობის შესახებ” კანონის პროექტის ავტორი და ინიციატორია ფრაქცია “ქართული ოცნება”. ის შინაარსით გასულ წელს ინიციირებული და საპროტესტო აქციების შედეგად „ჩაგდებული” პროექტის ანალოგიურია.

ალეკო ელისაშვილის საქციელი იყოს გაფრთხილება და მაგალითი ყველასთვის. ერთ მუშტს მოიქნევთ? – ათი მოგხვდებათ, – ამის შესახებ საპარლამენტო უმრავლესობის წევრმა, დავით მათიკაშვილმა განაცხადა, რომელიც გუშინ, იურიდიული კომიტეტის სხდომას უძღვებოდა იმ მომენტში, როცა “მოქალაქეების” ლიდერმა ალეკო ელისაშვილმა საპარლამენტო უმრავლესობის ლიდერ მამუკა მდინარაძეს ხელი დაარტყა.

მათიკაშვილის განცხადებით, ის დარწმუნებულია, რომ არც მათ და არც სესიაზე მსხდომ ოპოზიციის წარმომადგენელს არ უნახავთ და არ ახსოვთ, „ვინმე ასე ლაჩრულად, მზაკვრულად, არაკაცურად და ქათმურად მიპაროდეს გამომსვლელს და მისთვის დაერტყას“.

„მერვე წელია საკანონმდებლო ორგანოს წევრი ვარ. ამ კედლებსაც, ქუთაისის პარლამენტის კედლებსაც ბევრი რამ უნახავს, მაგრამ დარწმუნებული ვარ, არც ჩვენ და არც აქ მსხდომ ოპოზიციის წარმომადგენელს არცერთს ის არ უნახავთ და არ ახსოვს, ვინმე ასე ლაჩრულად, მზაკვრულად, არაკაცურად და ქათმურად მიპაროდეს გამომსვლელს და მისთვის დაერტყას.

მთელი დღის განმავლობაში [ალეკო] ელისაშვილი იჯდა ილია ჭავჭავაძის სახელობის დარბაზში, უყურებდა ილია ჭავჭავაძის სურათს და ხმა არ დაუძრავს. ამ ფაქტმა მასში ბერბიჭაშვილის საქციელის ინსპირაცია გამოიწვია.

ასეთი არაკაცური, ლაჩრული საქციელი სადმე გინახავთ? – მე არ მინახავს და არ მახსოვს. თუ თქვენ გახსოვთ რაიმე, გვითხარით. ამ არაკაცობამ სათანადო პასუხი მიიღო და ყველა რადიკალი გაფრთხილდეს. როგორც ეტყობათ, რადიკალები სიტუაციის გამწვავებას და არევას აპირებენ. ელისაშვილის საქციელი იყოს გაფრთხილება და მაგალითი ყველასთვის. ერთ მუშტს მოიქნევთ? – ათი მოგხვდებათ. ეს კარგად გაითვალისწინეთ და გაიგეთ“, – აღნიშნა მათიკაშვილმა.

ცნობისთვის, გუშინ იურიდიულ საკითხთა კომიტეტის სხდომაზე, სადაც „უცხოური გავლენის გამჭვირვალობის შესახებ“ კანონპროექტს, საპარლამენტო უმრავლესობის ლიდერი, მამუკა მდინარაძე წარადგენდა, „მოქალაქეების“ ლიდერი, ალეკო ელისაშვილი ტრიბუნასთან მას ფიზიკურად დაუპირისპირდა.

დღეს რაზეც მსჯელობს საქართველო, გაცილებით ადრე იყო აქტუალური ევროკავშირისთვის და დღემდე რჩება აქტიური პოლიტიკური დისკუსიის საკითხად, – ამის შესახებ საპარლამენტო უმრავლესობის წევრმა, პარლამენტის ვიცე-სპიკერმა, არჩილ თალაკვაძემ პარლამენტის პლენარულ სხდომაზე განაცხადა.

თალაკვაძის თქმით, მიესალმება ნებისმიერ იდეას, ინიციატივას თუ კრიტიკას, ოღონდ ეს გამჭვირვალედ უნდა იყოს წარმოდგენილი.

„ამასობაში ევროპარლამენტის ახალი ანგარიშიც წამოგვეწია, სადაც ნათქვამია, რომ არასამთავრობო ორგანიზაციებმა და ბენეფიციარებმა, რომლებიც ევროკავშირისგან იღებენ გრანტებს, უნდა უზრუნველყონ სრული გამჭვირვალობა, ანგარიშვალდებულება და დეტალურად წარუდგინონ საზოგადოებას, ევროკავშირს ანგარიში იმასთან დაკავშირებით, როგორ ნაწილდება თანხები. არა მხოლოდ ძირითადი ბენეფიციარები, არამედ ქვეკონტრაქტორებიც რა თანხებს იღებენ და როგორ ხარჯავენ ევროკავშირისგან გამოყოფილ გრანტებს, მათ შორის საუბარია წყაროებზე. ეს კიდევ ერთხელ ადასტურებს, რომ, რაზეც დღეს მსჯელობს საქართველო, გაცილებით ადრე, ჯერ კიდევ გასულ წელს იყო ძალიან აქტუალური ევროკავშირისთვის და იქაც დღემდე რჩება აქტიური პოლიტიკური დისკუსიის საკითხად. ჩვენ მივესალმებით ნებისმიერ იდეას, ინიციატივას თუ კრიტიკას, ოღონდ უნდა იყოს გამჭვირვალედ წარმოდგენილი და საჯარო პროცესში გამჭვირვალედ, ანგარიშვალდებული მონაწილეობით იყოს წარმოდგენილი“, – განაცხადა არჩილ თალაკვაძემ.

ამასთან, თალაკვაძემ განმარტა, რომ „უცხოური გავლენის გამჭვირვალობის“ შესახებ საკანომდებლო ინიციატივა არავის უკრძალავს საქმიანობას.

„ეს არ ეხება ფიზიკურ პირებს და მათ შემოსავლებს. არც ფერმერებს, არც პედაგოგებს, მეცნიერებს და არც ნებისმიერი სხვა პროფესიის ადამიანს. არ ეხება ჩვენი თანამემამულეების მიერ განხორციელებულ გადმორიცხვებს საზღვარგარეთიდან. ეხება მხოლოდ იმ არასამთავრობო ორგანიზაციებს, არასამეწარმეო იურიდიულ პირებს, რომელთაც 20%-ზე მეტი დაფინანსება აქვთ საზღვარგარეთიდან. გუშინ მთელი დღის განმავლობაში გვესმოდა ბრალდებები ყველა ბრუნვაში – რუსული, რუსულმა, რუსულს. ბრალდებები გვესმოდა მათ შორის, იმ ხალხისგან, ფულს იხდიდა იმაში, რომ საქართველოს არ მიეღო კანდიდატის სტატუსი. დადიოდა ევროპაში და  ჩვენს პარტნიორებს არწმუნებდა, რომ საქართველოსთვის არ უნდა მიეცათ კანდიდატის სტატუსი. ვინც ევროპული მომავლის საბოტაჟით იყო დაკავებული, ის ადამიანები ბედავენ და გვაბრალებენ, თითქოს რაღაც რუსული პროექტი არის შემოტანილი. სინამდვილეში, ევროპული პერსპექტივა სწორედ ჩვენმა ხელისუფლებამ დააბრუნა ამ ქვეყანაში საზოგადოების მხარდაჭერით. ჩვენ მივიღეთ უვიზო მიმოსვლა, ჩვენ გავაფორმეთ თავისუფალი ვაჭრობის ხელშეკრულება, მივიღეთ კანდიდატის სტატუსი. მედია, ბიზნესი დღეს არის თავისუფალი და ადამიანის უფლებების დაცვა, პატივისცემა დაბრუნდა ქვეყანაში“, – აღნიშნა თალაკვაძემ.

ევროპარლამენტში „ევროპის სახალხო პარტიის“ ჯგუფის ვებგვერდზე – eppgroup.eu გამოქვეყნდა ანგარიში, სადაც ნათქვამია, რომ ნებისმიერმა ორგანიზაციამ, რომელიც იღებს დაფინანსებას ევროკავშირისგან, უნდა გაამჟღავნოს როგორ იყენებს ამ თანხებს. ეს მოთხოვნა უნდა გავრცელდეს არასამთავრობო ორგანიზაციებზე, რომელთა დაფინანსება ჯერჯერობით მხოლოდ შეზღუდულ შემოწმებას ექვემდებარება.

სალომე ზურაბიშვილმა პირი კარგად გამოირეცხოს, როცა საქართველოს და ქართველი ხალხის ინტერესებზე საუბრობს, – ამის შესახებ საპარლამენტო უმრავლესობის წევრმა, ალუდა ღუდუშაურმა განაცხადა.

ღუდუშაურმა კომენტარი გააკეთა ზურაბიშვილის იმ პოსტზე, სადაც მან აღნიშნა: „სპეცნაზელები“ მზადყოფნაში არიან, ევროპული მომავლის დამცველი მოქალაქეების წინააღმდეგ დაიწყონ მოქმედება, საქართველო ხელახალ გასაბჭოებას არ დაუშვებს“.

„შეგახსენებთ ერთ-ერთ ჟურნალისტთან გაკეთებულ კომენტარს, რომ მისთვის მისაბაძი თუ საყვარელი პოლიტიკოსია ლავროვი. ამიტომ სალომე ზურაბიშვილმა პირი კარგად გამოირეცხოს, როცა საქართველოს და ქართველი ხალხის ინტერესებზე საუბრობს. მართლაც ჩვენ ვდგავართ ჩვენი ქვეყნის ინტერესების სადარაჯოზე. რუსეთი ოკუპანტია და სალომე ზურაბიშვილმა პირი გამოირეცხოს“, – განაცხადა ალუდა ღუდუშაურმა.

ამასთან, მედიის წარმომადგენლებმა ღუდუშაურს კითხვა დაუსვეს, როგორ შეაფასებდა ალექსანდრ დუგინის განცხადებას, რომლის მიხედვითაც, „საქართველო სწორ გზაზეა“.

„დუგინი, ელისაშვილი, სალომე ზურაბიშვილი, ლავროვები – ამ ადამიანებს ერთი მამოძრავებელი აქვთ, დააზიანონ ჩვენი ქვეყნის ინტერესი. პირდაპირ გეუბნებით, ფეხზე მკიდია, რას ფიქრობს დუგინი. ჩვენ ვფიქრობთ ჩვენს ქვეყანაზე, ხალხზე და რას ფიქრობს დუგინი, ეგ უთხარით სალომე ზურაბიშვილს“, – განაცხადა ალუდა ღუდუშაურმა.