გუშინ რომ დაზიანდა პოლიციელი, კიდევ ერთმა ახალგაზრდამ ქვა ესროლა მას და სასიკვდილოდ გაიმეტა, მასაც მოუწევს პასუხისმგებლობის აღება, – ამის შესახებ საპარლამენტო უმრავლესობის დეპუტატმა ბექა ოდიშარიამ „იმედი LIVE“-ში განაცხადა სალომე ზურაბიშვილის განცხადების კომენტირებისას. კერძოდ, ზურაბიშვილის განცხადებით, “ხელისუფლების დაჟინება, რომ გაიტანოს ეს კანონი მოსახლეობის სურვილის საწინააღმდეგოდ და პარტნიორების პროტესტის მიუხედავად, პირდაპირი პროვოკაციაა – დესტაბილიზაციის რუსული სტრატეგია“.

„როგორც ნინო ლომჯარია იყო, ასეთი აქტიური გახდა სალომე ზურაბიშვილი, ჩემდა სამწუხაროდ. მისი განცხადებები უკვე აბსოლუტურად აცდენილია რეალობას, ქმედებები კი დანაშაულებრივია. ეს ისტორიაში დარჩება. გუშინ რომ დაზიანდა პოლიციელი, კიდევ ერთმა ახალგაზრდამ ქვა ესროლა მას და სასიკვდილოდ გაიმეტა, მასაც მოუწევს პასუხისმგებლობის აღება“, – განაცხადა ბექა ოდიშარიამ.

მისივე შეფასებით, დონორები და მავნე პროექტების პროექტების განმახორციელებლები, პასუხისმგებლები არიან „გრიგორიადისის შექმნაზე“.

„არიან დონორი ორგანიზაციები და განმახორციელებლები ამ მავნე პროექტების, რომლებსაც სემინარებს ვერ დავარქმევ. ეს არის საველე ვარჯიშები, წვრთნები და ეს თვალხილულად ვნახეთ. გრიგორიადისის შექმნისთვის ეს ადამიანებიც არიან პასუხისმგებლები. თუმცა, მას არ ვათავისუფლებ პასუხისმგებლობისგან, ის არის დამნაშავე ადამიანი. როგორ შეიძლება, ზრდასრულმა კაცმა ცეცხლი გადაასხა შენს თანამემამულეს და მით უმეტეს პოლიციელს“, – განაცხადა დეპუტატმა.

სიგიჟეა, რაც ხდება – პარლამენტის წევრს არ მიშვებენ პარლამენტში – ეს არ “მოსულა”, – ამის შესახებ “გირჩის” დეპუტატმა იაგო ხვიჩიამ “ინტერპრესნიუსს” პარლამენტთან მიმდინარე აქციაზე განუცხადა.

მისი თქმით, ისინი, ვინც მას პარლამენტში არ უშვებენ, სისხლის სამართლის დამნაშავეები არიან.

“სიგიჟეა, რაც ხდება – პარლამენტის წევრს არ მიშვებენ პარლამენტში. ვდგავარ და ველოდები, რომ შემიშვან. ეს ადამიანები შინაარსობრივად სისხლის სამართლის დამნაშავეები არიან. ამაზე სკანდალური ვერაფერი მოხდება. ოთახში უნდა ავიდე, გასაღები მაქვს ასაღები. უბრალოდ, გიჟებივით, პარლამენტს იცავენ პარლამენტის წევრისგან. ეს აჩვენებს იმას, როგორ ქვეყანაში ვცხოვრობთ. ისინი ამას ბედავენ. ჩემი მხრიდან ყველას მიმართ პატივისცემისა, ეს არ “მოსულა”. რაღაც მისტიური საფრთხისგან იცავ პარლამენტს – ჩემგან იცავ? მე ქართველმა ხალხმა შემიშვა აქ. ეს არის ჩემი აზრით, მთავარი ამბავი, რაც დანარჩენ სიგიჟეს განაპირობებს. ცხადია, ამას მოაწყობენ, აბა რას იზამენ?! ბოლოს, ცოტა ხანში პაპუაშვილთან დავრეკავ, რომ პარლამენტში შემიშვან”, – განაცხადა იაგო ხვიჩიამ.

რაც შეეხება იმას, აქვს თუ არა ოპოზიციას ერთობლივი გეგმა პროტესტთან დაკავშირებით, ხვიჩია ამბობს, რომ ამ თემაზე კოლეგებთან არ უსაუბრია.

“ამ თემასთან დაკავშირებით ოპოზიციასთან არ მიკონტაქტია. არ ვიცი, რას აპირებენ. მე ვაპირებ, ხვალ მოვიდე ჩვეულებრივ და პარლამენტის სხდომაში მივიღო მონაწილეობა”, – განაცხადა ხვიჩიამ.

„სახალხო დამცველის აპარატი ადგენს დაკავებულების, მათ შორის, ირაკლი კუპრაძის ადგილსამყოფელს“ – ამის შესახებ ინფორმაციას საქართველოს სახალხო დამცველის აპარატი ავრცელებს:

„სახალხო დამცველის აპარატი ადგენს დაკავებულების, მათ შორის, ირაკლი კუპრაძის ადგილსამყოფელს, მათი მონახულებისა და მათი უფლებების დარღვევის ფაქტებზე რეაგირების მიზნით.

უფლებადარღვევის შემთხვევებზე შეტყობინების მიღების მიზნით, სახალხო დამცველ

ტელეკომპანია „იმედის“ გადამღებ ჯგუფებზე თავდასხმამ, დღეს, კიდევ ერთხელ მიიღო პერმანენტული და ძალადობრივი სახე, – აღნიშნულის შესახებ ტელე „იმედის“ მიერ გავრცელებულ განცხადებაშია აღნიშნული.

ტელე „იმედი“ ოპოზიციის ლიდერებსა და აქციის ორგანიზატორებს მოუწოდებს, მაქსიმალურად გააკონტროლონ მათ მიერ პარლამენტთან მობილიზებული ჯგუფები.

„პარლამენტის წინ მიმდინარე აქციის მონაწილე რადიკალური ჯგუფები, გარდა იმისა, რომ ხელს უშლიან მათ პროფესიული მოვალეობის შესრულებაში, ფიზიკურად ესხმიან თავს „იმედის“ ჟურნალისტებს.

მოვუწოდებთ რადიკალური ოპოზიციის ლიდერებს და აქციის ორგანიზატორებს, მაქსიმალურად გააკონტროლონ მათ მიერ პარლამენტთან მობილიზებული ჯგუფები, რომ ჩვენს გადამღებ ჯგუფებს ხელი არ შეუშალონ პროფესიული მოვალეობის შესრულებაში.

ჟურნალისტური საქმიანობის ხელის შეშლა სისხლის სამართლის დანაშაულია. ასევე, მოვუწოდებთ სამართალდამცველებს უზრუნველყონ ჟურნალისტების უსაფრთხოება. მივმართავთ სახალხო დამცველს, ადამიანის უფლებათა დამცველ ორგანიზაციებს-გამოხატონ საკუთარი პოზიცია მედიაზე თავდასხმის ფაქტებზე.

ტელეკომპანია „იმედმა“, დღეს მიმართა დიპლომატიურ კორპუსსაც, თუმცა ამ დრომდე მათგან პასუხი არ მიგვიღია“, – ნათქვამია განცხადებაში.

აშშ-ის სახელმწიფოს მორიგი, რიგით მეშვიდე განცხადება რუსულ კანონზე – მეთიუ მილერი ამბობს, რომ  კვლავ გამოხატავს შეშფოთება ,უცხოური გავლენის გამჭვირვალობის შესახებ“

კანონის პარლამენტში ინიციირებასთან დაკავშირებით. პრესსპიკერი ეხმაურება აქციებს და აცხადებს, რომ შეერთებული შტატები მხარს უჭერს სიტყვისა და გამოხატვის თავისუფლებას.

“ეს კანონპროექტი კვლავ რჩება კანონპროექტად და ჩვენ ვნახეთ წარსულში, რომ, გარკვეული ნაბიჯების შემდეგ, ის ვერ იქცა კანონად, ამიტომ არ ვფიქრობ, რომ ამ ეტაპზე რაიმე წინასწარ შემიძლია ვთქვა. გავიმეორებ, რომ ჩვენ ვართ შეშფოთებულები ამ კანონპროექტით. რაც შეეხება დემონსტრანტებს საქართველოში და ყველგან მსოფლიოში, რა თქმა უნდა, ამერიკის შეერთებული შტატები მხარს უჭერს სიტყვისა და გამოხატვის თავისუფლებებს”- თქვა მილერმა.

პირადად, შინაგან საქმეთა მინისტრს მოვუწოდებ, რომ ჩაერიოს და დაუყოვნებლივ გაათავისუფლოს ირაკლი კუპრაძე და ყველა დაკავებული ახალგაზრდა – უდანაშაულო ადამიანებზე ძალადობა უნდა შეწყდეს, – ამის შესახებ “ლელოს” ერთ-ერთმა ლიდერმა, ბადრი ჯაფარიძემ პარლამენტთან მიმდინარე აქციაზე განაცხადა.

მისივე თქმით, უდანაშაულო ადამიანების დაჭერა კიდევ უფრო მეტ პროტესტს გამოიწვევს, ამიტომ შსს-ს დაკავებულების დაუყოვნებლივ გათავისუფლებისკენ მოუწოდებს.

როგორც ჯაფარიძე აღნიშნავს, მისი პარტიის გენერალური მდივანი ირაკლი კუპრაძე ნაცემია.

“ჩვენ გვაქვს ინფორმაცია, რომ ფიზიკურად უსწორდებიან [აქციის მონაწილეებს]. ყველა პოლიციელი, რომელიც გადაამეტებს თავის უფლებამოსილებას, უნდა დაისაჯოს კანონის სიმკაცრით. მოვუწოდებ შინაგან საქმეთა სამინისტროს, პირადად მინისტრს, რომ ჩაერიოს და დაუყოვნებლივ გაათავისუფლოს ირაკლი კუპრაძე და ყველა დაკავებული ახალგაზრდა. უდანაშაულო ადამიანებზე ძალადობა უნდა შეწყდეს,” – განაცხადა ჯაფარიძემ.

„ხალხის ძალის“ თავმჯდომარე სოზარ სუბარი აცხადებს, რომ „ნაციონალური მოძრაობის“ წევრის დევი ჭანკოტაძის განცხადება ძალიან ცუდად ენიშნა. ამის შესახებ სოზარ სუბარმა „იმედი LIVE“-ის ეთერში ისაუბრა.

„ძალიან სახიფათო განცხადება გააკეთა დღეს დევი ჭანკოტაძემ, პარლამენტის წევრმა და თან ხაზი გაუსვა, რომ ამ განცხადებას აკეთებდა, როგორც სამხედრო პირი, როგორც გენერალი და გააკეთა ვეტერანების სახელით.

ჯერ ერთი, ნუ ლაპარაკობს ვეტერანების სახელით, ამის უფლება არ აქვს ამ მოღალატე ადამიანს. ვეტერანები სხვაგან არიან და სხვაგან არის მათი ინტერესი და ვეტერანების სახელით ვერ ილაპარაკებს. მან თქვა პირდაპირ, რომ „გაფრთხილებთ, რომ ერთი ადამიანიც რომ დაიღუპოს, ყველაფერი შეიძლება ძალიან ცუდად დამთავრდესო“ და ეს ამათი ხელწერაა. გვახსოვს ძალიან კარგად ორ გვამს როგორ ითხოვდა ვანო მერაბიშვილი და შემდეგ როგორ აღასრულეს კიდევაც, როგორ ჩაცხრილეს კრიალაშვილი და სრულიად შემთხვევით გადარჩა ოთანაძე. ძალიან კარგად გვახსოვს ის სატელეფონო საუბრებიც, როდესაც ტელეკომპანია „რუსთავი 2“-ის წინ, მაშინ ჯერ კიდევ ტელეკომპანია „რუსთავი 2“ მიტაცებული იყო, როცა იქ აქციები იყო და ბარიკადებს მართავდნენ, როგორ ურეკავდა ნიკა გვარამიას მიხეილ სააკაშვილი და როგორ ითხოვდა მისგან კატეგორიულად, რომ რამდენიმე ადამიანი უნდა მოკვდეს, იმისთვის, რომ შედეგს მივაღწიოთ და ხალხი ქუჩაში გამოვიყვანოთო და ძალიან ცუდად მენიშნა ახლა ეს განცხადებაც“, – აღნიშნა მან.

პლენარულ სხდომაზე „ნაცმოძრაობის“ წევრმა დევი ჭანკოტაძემ განაცხადა: „ჩემი, როგორც გენერლის რჩევაა, გაიტანეთ ეს კანონი. ეს გამოიწვევს ძალიან ცუდ მოვლენებს. ერთი ადამიანიც, რომ დაიღუპოს, ეს ყველაფერი ძალიან ცუდად დამთავრდება“.