„ლელო“ „ნაცების“ გარეშე იქნება ყვითელი „ნაცები“ და გვექნება ორი „ნაცები“ – ყვითელი და წითელი, – ამის შესახებ პარტია „გირჩის“ ლიდერმა იაგო ხვიჩიამ განაცხადა.

„ყველა „ნაცური“ პარტია „ლელოს“ ჩათვლით უნდა გაწევრიანდეს „ნაცებში“ ზოგადად და არ დააბნიონ ამომრჩეველი. იმიტომ, რომ დამოუკიდებელი პერსპექტივა მათ ნაკლებად გააჩნიათ იქიდან გამომდინარე, რომ ზედმეტად „ნაცები“ არიან. გახარიები მე მგონი, ჯერ უნდა ჩამოყალიბდნენ რა უნდათ პოლიტიკაში. „ლელო“ ნაცების გარეშე იქნება ყვითელი „ნაცები“ და გვექნება ორი „ნაცები“ – ყვითელი და წითელი. თქვენ კითხულობთ რომელი ნაცები მოერევა და ყვითლებს აქვთ თუ არა შანსებიო. მე მგონია, რომ ნაკლებად უფრო“, – აღნიშნა ხვიჩიამ.

„ნაციონალურ მოძრაობიდან“ წამსვლელთა რაოდენობა ყოველდღიურად იზრდება. მათი უმრავლესობა თავს ნიკა მელიას გვერდით მოიაზრებს, რომელმაც ახალი პარტიის შექმნა უკვე დააანონსა. პარტიაში დარჩენილთა ნაწილი კი, ნიკა გვარამიას გადაწყვეტილებას ელოდება.

აუცილებლად ხაზგასასმელია, რომ ამ ხელისუფლებამ ყველანაირი ძალისხმევა მიმართა იმისთვის, რომ ჩვენ კანდიდატის სტატუსი არ მიგვეღო. ეს იყო, მაგალითად, რუსული კანონმდებლობის მიღება, პრეზიდენტის იმპიჩმენტი და სხვა. ამიტომ, ჩვენ თუ ვიღებთ კანდიდატის სტატუსს, ეს დამსახურება არის მხოლოდ და მხოლოდ საქართველოს მოქალაქეების, რომლის 75%-ზე მეტი ქვეყნის ევროპული ინტეგრაციის მომხრეა, – განაცხადა პარლამენტის წევრმა, ხატია დეკანოიძემ პლენარულ სხდომაზე.

მისივე თქმით, კანდიდატის სტატუსის მინიჭებაზე გავლენას ასევე ახდენს გეოპოლიტიკური რეალობა.

„ძალიან საშიში რეალობიდან, საფრთხეებიდან გამომდინარე, რომელიც არსებობს რეგიონში, ევროკომისიამ გადაწყვიტა, რომ საქართველო ნამდვილად მარტო არ დაეტოვებინა რუსეთთან, საქართველო, რომლის მოქალაქეებს კლავენ მხოლოდ და მხოლოდ იმიტომ, რომ ქვეყანა არის ოკუპირებული და ეთნიკურად ქართველები არიან საოკუპაციო რეჟიმის სამიზნე“, – აღნიშნა ხატია დეკანოიძემ.

ოპოზიციონერი დეპუტატის განცხადებით, 2024 წლის საპარლამენტო არჩევნები იქნება ტესტი საქართველოს დემოკრატიისთვის და ტესტი, გაიხსნება თუ არა საქართველოს ევროკავშირში გაწევრიანების მოლაპარაკების შემდეგი ეტაპი.

საპარლამენტო ოპოზიციის წევრის სალომე სამადაშვილის შეფასებით, მიმდინარე კვირას პარლამენტს საქართველოს და უკრაინის მხარდასაჭერად მრავალპარტიული მხარდაჭერის გამოხატვა შეეძლო და ეს არ გააკეთა.

„ამ დარბაზში შეიძლება ვინმე ზის, რომელსაც სჯერა, რომ დღეს ამ ქვეყნის, თქვენი ბედი, თქვენი შვილების ბედი არ წყდება უკრაინაში. დღეს, როდესაც უკრაინა გადარჩენისთვის იბრძვის, საკუთარი და ჩვენი გადარჩენისთვის.  გასაოცარია, რომ საქართველოს პარლამენტი ხმას არ იღებს უკრაინის მხარდასაჭერად. უკრაინასთან მოლაპარაკებებიც უნდა გახსნას ევროკავშირმა, ევროპამ და ამერიკის შეერთებულმა შტატებმა სამხედრო და ფინანსური დახმარებაც უნდა გამოუყოს და ამის ნაცვლად გვესაუბრებით იმაზე, რომ პუტინის მოკავშირე ორბანი უკრაინას ბლოკავს, მაგრამ ჩვენ არაო და ამაზე საუბრობთ ნიშნისმოგებით. ძალიან ხშირად გწყინთ, როდესაც ვამბობთ, რომ რუსეთის ინტერესებს ემსახურებით და არა ქართველი ხალხის. სამწუხაროდ, მიმდინარე კვირას ამ პარლამენტს  შესაძლებლობა ეძლეოდა ეჩვენებინა მრავალპარტიული, ერთსულოვანი მხარდაჭერა ამ ქვეყნის ევროპული მომავლისთვისაც, უკრაინისთვისაც და ჩვენი მოქალაქეების დაცვის უზრუნველყოფისთვისაც, მაგრამ ამის ნაცვლად ზიზღის და ტყუილების კამპანიას აგრძელებთ. ამიტომ ვამბობთ ჩვენ, რომ თქვენ რუსეთს ემსახურებით და არა ჩვენ სახელმწიფოს და ქართველ ხალხს“, – განაცხადა სალომე სამადაშვილმა.

სულ რამდენიმე დღეა დარჩენილი საქართველოსთვის კანდიდატის სტატუსის მიღების ოფიციალურად გაფორმებამდე, ფაქტობრივად, სულ რამდენიმე საათია დარჩენილი ქართველი ხალხის მნიშვნელოვანი გამარჯვების ოფიციალურად გაფორმებამდე, თუმცა, მთავარი წინ არის, – ამის შესახებ პარტია „საქართველოსთვის“ წევრი მიხეილ დაუშვილი აცხადებს.

მისივე თქმით, საქართველოს მთავარი მიზანი ევროკავშირში სრულფასოვანი გაწევრიანებაა.

„ამისთვის კი, ქვეყანას ძალიან ბევრი აქვს სამუშაო. სწორედ ამ მიზნით 8 ნოემბერსვე, ანუ ევროკომისიის დადებითი რეკომენდაციის მიღებისთანავე, ჩვენმა გუნდმა მივმართეთ ხელისუფლებას, სასწრაფოდ შეექმნა სამუშაო ფორმატები ევროკომისიის უმნიშვნელოვანესი პუნქტების შესასრულებლად. ამის შემდეგ ოფიციალურად წერილობით 2-ჯერ მივმართეთ პარლამენტის თავმჯდომარეს ანალოგიური მოთხოვნით – რომ სასწრაფოდ დაიწყოს ინკლუზიური სამუშაო პროცესი იმ მიზნით, რომ რაც შეიძლება სწრაფად აღიდგინოს ქვეყანამ დაკარგული დრო და რაც შეიძლება სწრაფად გადავიდეს საქართველოს გაფართოების მოლაპარაკებების ეტაპზე, როგორც მაგალითად მოლდოვა. თუმცა, დღემდე არანაირი სამუშაო ფორმატი არ შექმნილა. ამის სანაცვლოდ პოლიტიკური პარტიები, როგორც სახელისუფლებო, ისე ზოგიერთი ოპოზიციური, დაკავებულები არიან კანდიდატის სტატუსის მოპოვების საკუთარ მიღწევად გასაღების.

სინამდვილეში, საქართველოს მიერ სტატუსის მიღებას რამდენიმე მნიშვნელოვანი მიზეზი აქვს – პირველი, რა თქმა უნდა, არის ქართველი ხალხის ურყევი ნება, გახდეს ევროკავშირის სრულფასოვანი წევრი და ეს ხალხმა ძალიან ბევრჯერ ძალიან მკაფიოდ დაანახა მსოფლიოს. დიახ, ჩვენმა მეგობრებმა და პარტნიორებმა ქართველი ხალხის ბრძოლა გაითვალისწინეს. ასევე, აღსანიშნავია, ჩვენი საჯარო მოხელეების წვლილი, რომლებიც მრავალი წელია შრომობენ საქართველოს მიახლოებისთვის ევროკავშირის სტანდარტებთან და მე ვამაყობ ნამდვილად იმით, რომ წარმოვადგენ იმ გუნდს, რომელიც ძალიან ბევრი წლის განმავლობაში საჯარო სამსახურს (სხვადასხვა თანამდებობაზე) ემსახურებოდა და წვლილი მიუძღვის ამ შრომაში“, – აღშნავს დაუშვილი.

მისივე თქმით, სტატუსის მიღება მათ შორის იმის დამსახურებაცაა, რომ ჩვენი ქვეყანა მრავალი წლის განმავლობაში იყო ასოცირებული ტრიოს ლიდერი.

„ჩვენ, ისევე როგორც ჩვენი მეგობრები და პარტნიორები ამაყობდნენ ამით. ჩვენ ვიყავით იმ ასოცირებული ტრიოს ლიდერი, რომელიც სწორედ ოცნების ხელისუფლების ინიციატივით შეიქმნა წლების წინ და სწორედ იმისთვის შეიქმნა, რომ საქართველოს ინტერესებში შედიოდა. დღეს კი ოცნების ზოგიერთი წარმომადგენელი გამოდის და ევროკავშირს აბრალებს, რომ ასოცირებული ტრიო დაიშალა. რეალურად, კი ასოცირებულ ტრიოში მრავალი წლის ლიდერობაა ერთ-ერთი მიზეზი, რომ ჩვენ კანდიდატის სტატუსი გვაქვს.

დიახ, საქართველოს კანდიდატის სტატუსი აქვს, თუ რაიმე სიურპრიზი არ მოუწყო ჩვენს ქვეყანას სააკაშვილისა და ღარიბაშვილის ახლო მეგობარმა ორბანმა.

ჩვენი გუნდი ყველა ფორმატში აუცილებლად იზეიმებს წინგადადგმულ მნიშვნელოვან ნაბიჯს. მაგრამ კიდევ ერთხელ შევახსენებთ ხელისუფლებას – მთავარი სამუშაო არის წინ და ეს სამუშაო, რაც შეიძლება დროულადაა გასაწევი. ვინაიდან, დიახ, ქართველ ხალხს ეჩქარება გახდეს ევროკავშირის სრულფასოვანი წევრი“, – აცხადებს დაუშვილი.

ჩვენ რაში გვჭირდება მასთან {სალომე ზურაბაშვილთან} ერთობა, როდესაც „ქართული ოცნების“ მთავარი მონაპოვარია და იმედი მაქვს, ეს გამოცხადდება და დამტკიცდება 2 დღეში, რომ ქვეყანა მიიღებს კანდიდატის სტატუსს – ამიტომ ჩვენ არავისთან არ გვჭირდება ამის დამტკიცება და არავისთან შეერთება. ყოფილ პრემიერებს, პრეზიდენტებს თუ სურთ აღნიშნულ აქტში მონაწილეობა, მათი არჩევანია, – ამის შესახებ საქართველოს განათლების მინისტრმა, გიორგი ამილახვარმა 13 დეკემბერს, ორბელიანების სასახლეში დაგეგმილ ღონისძიებასთან დაკავშირებით განაცხადა.

მისივე თქმით, პრეზიდენტის მიერ ინიცირებულ ღონისძიებასთან დაკავშირებით მოსაწვევიც არ მიუღია.

„რას უნდა შევუერთდეთ? მე არ ვიცი, რას გულისხმობს პრეზიდენტი და თქვენ ამ კითხვაში, ვისაც უნდა მივიდეს და მოაწეროს ხელი. ჩვენ რაში გვჭირდება მასთან ერთობა, როდესაც „ქართული ოცნების“ მთავარი მონაპოვარია და იმედი მაქვს, ეს გამოცხადდება და დამტკიცდება 2 დღეში, რომ ქვეყანა მიიღებს კანდიდატის სტატუსს. ქართველი ერის 80%-ზე მეტი უჭერს მხარს ამ მიმართულებას, რომელიც მისმა ხელისუფლებამ – “ქართულმა ოცნებამ” აღასრულა. ამიტომ ჩვენ არავისთან არ გვჭირდება ამის დამტკიცება და არავისთან შეერთება და ყოფილ პრემიერებს, თუ პრეზიდენტებს თუ სურთ აღნიშნულ აქტში მონაწილეობა, მათი არჩევანია.

მე ხელი მოვაწერე ამ გადაწყვეტილებას, ყველა იმ კომპონენტში, მათ შორის დღევანდელ პრეზენტაციაში, სადაც მათ შორის, იქნება ევროპული ღირებულებები დამკვიდრებული სასკოლო განათლებაში, ეს არის ჩემი ხელწერა და კონკრეტული აქტებით დადასტურება, მათ შორის, პრეზიდენტთან, ეს ჩემი და ჩვენი სტილი არ არის. მე მოსაწვევი არ მიმიღია”, – განაცხადა ამილახვარმა.