საქართველოს მესამე პრეზიდენტი, მიხეილ სააკაშვილი პარტიებს ერთიანი სიის შექმნას ურჩევს.

როგორც მან კლინიკა „ვივამედიდან“ სასამართლო სხდომაზე ჩართვისას განაცხადა, საერთო სია პარტიებმა არა რომელიმე პარტიის ქვეშ უნდა შეიმუშაონ, არამედ ნეიტრალურ პლატფორმაზე.

„ჩვენი პოლიტიკოსების ამოცანაა გავერთიანდეთ. მე მხარს ვუჭერ ერთიანი სიის შექმნას. ახლა მთავარია რუსული რეჟიმი მოვიშოროთ და რუსეთის აქ შემოსვლის საფრთხე გავანეიტრალოთ. იმიტომ, რომ რუსეთი ცდილობს შიგნიდან გამოგვჭამოს, ჩვენს ოჯახებშია შემოსული და შიგნიდან გვანგრევს. ეს უნდა განეიტრალდეს ჩვენი ერთიანობით. ყველამ გვერდით უნდა გადავდოთ ყველანაირი ამბიციები, ყველანაირი კუდაბზიკობა, ცხვირაწეულობა, წყენა. მეც ბევრი მაქვს საპრეტენზიო, ბევრთან, ვინც ხელი შეუწყო ამ უბედურების ხელისუფლებაში მოსვლას, მაგრამ ახლა პრეტენზიების დრო არ არის, იმიტომ, რომ ყველანი ისტორიის სწორ მხარეს ვდგავართ. ამიტომ გთავაზობთ საერთო სიის გზით სიარულს ნეიტრალურ პლატფორმაზე, არა რომელიმე პარტიის ქვეშ, არამედ ნეიტრალურ პარტიაზე. რა თქმა უნდა, ჩვენი პარტია „ნაციონალური მოძრაობა“ მუშაობს საკუთარი ძალების გაძლიერებაზე. რა თქმა უნდა, თუ საერთო სია არ გამოვიდა, ჩვენ მაინც ვითანამშრომლებთ სხვებთან და მაინც გვეყოლება ძალიან ძლიერი კანდიდატურები ყველა თანამდებობაზე. უახლოეს პერიოდში უნდა ვიმუშაოთ საერთო სიაზე და ამჯერად აუცილებლად უნდა გამოგვივიდეს. ყველაფერი გვერდით უნდა გადავდოთ, არ ვაპირებ დავას არც ჩემს ჯანმრთელობაზე, ახლა უნდა ვკონცენტრირდეთ არა საკუთარ თავზე, არა საკუთარ ჯანმრთელობაზე, არამედ სხვა რამეზე. ყველაფერს გავაკეთებ ერთიანობისთვის, იმისთვის, რომ საქართველო ვერ ჩაითრიონ ამ ტალახსა და მორევში, საიდანაც ამოსვლა, პრაქტიკულად, შეუძლებელი იქნება“, – განაცხადა მიხეილ სააკაშვილმა.

ევროპული ღირებულება შინაარსში შესვლაა და ზედაპირული საუბარი არ არის, ამიტომ, ყველას მოვუწოდებთ, თუ კონკრეტული კითხვები არსებობს, პრემიერ-მინისტრის შეთავაზება არსებობს, ევროკავშირის წარმომადგენელი მობრძანდეს და შინაარსობრივი კითხვები დასვან, რაზეც პასუხს მიიღებენ, – ამის შესახებ „ხალხის ძალის“ წევრმა, გურამ მაჭარაშვილმა საქართველოს პირველ არხს განუცხადა.

მისი თქმით, გამჭვირვალობა ევროპული კურსიდან გადახვევა არ არის.

„ისინი ქართულ საზოგადოებას შეცდომაში ისევ ვერ შეიყვანენ. გამჭვირვალობა დემოკრატიის ფუნდამენტური საფუძველია. კანონპროექტში მხოლოდ გამჭვირვალობა წერია. ევროპული კურსიდან მათ გადაუხვიეს, ვინც შეურაცხყოფა მიაყენეს პოლიციელებს. ეს არის იმის მაგალითი, რომ ძალადობის წახალისება არ მოხდეს. პარტნიორების მხრიდან ზედაპირული განცხადება არ უნდა გაკეთდეს, რომ კანონპროექტო ხელს არ უწყობს ევროპულ ინტეგრაციას. საქართველოს სუვერენიტეტს ყველამ პატივი სცეს და თქვან, გამჭვირვალობა რატომ არის არაევროპული“, – განაცხადა მაჭარაშვილმა.

მმართველი პარტია ქართული სახელმწიფოს ინტერესებს იცავს, ქვეყანაში მილიონობით დოლარი გაურკვეველი ფონდებიდან გაურკვეველი მიზნებით და ამოცანებით შემოდის, სწორედ ამაზე უნდა იყოს გამჭვირვალობა, როგორც ევროპის ბევრ ქვეყანაშია, – ამის შესახებ „ქართული ოცნების“ წევრმა, ირაკლი ზარქუამ განაცხადა.

მისი თქმით, გამჭვირვალეობა სწორედ ევროპულობაა.

„ეს მარგინალები და მათი დამკვეთები, მათი პატრონები ყველაფერს აკეთებენ, რომ პროცესი ჩაშალონ. დევი ჭაკვეტაძისგან განცხადება მოვისმინეთ, რომ მოლოდინი აქვთ, რომ იქნებ, სისხლი დაიღვაროს, იქნებ, მსხვერპლი მოჰყვეს. რატომ? – სააკაშვილის ჩანაწერი გაიხსენეთ, სადაც მის მეგობარ გოგონას ეუბნებოდა, რომ აბა, როგორ გინდა, თუ სისხლი არ დაიღვარაო, თუ ვინმე არ მოკვდა, დემოკრატია რანაირადო? მათ დემოკრატია სწორედ ასე მიაჩნიათ. სამართალდამცველებს მადლობას ვეუბნები, რომელთაც გუშინ ღირსეულად დაიცვეს საზოგადოებრივი ინტერესები და მოქალაქეების უფლებები. ესენი არიან უსამშობლოები. ამათ ჰგონიათ, ქართულ საზოგადოებას დაავიწყდა, „ნაცების“ ხელწერა, დარბევები, 7 ნოემბერი. მილიონები, რაც ამ უსამშობლოებში იხარჯება, ღია და გამჭვირვალე უნდა იყოს“, – განაცხადა ზარქუამ.

პროტესტისა და გამოხატვის უფლება ყველას აქვს, მხოლოდ ერთი დათქმით, ეს უნდა იყოს მშვიდობიანი. წერტილი! არავის არავითარი ლეგიტიმაცია არ აქვს კანონის დარღვევის, ჭიშკრების მტვრევის და პოლიციისთვის შეურაცხყოფის მიყენების, ეს არის ანტიქართული ქცევა და რაც არაქართულია, ის ანტიევროპულია, – ამის შესახებ პარლამენტის თავმჯდომარე შალვა პაპუაშვილმა გუშინ პარლამენტთან გამართულ აქციასთან დაკავშირებით ჟურნალისტებს განუცხადა.

პაპუაშვილს შეფასებით, პროტესტი მშვიდობიანი იყო, თუმცა აქციაზე იყვნენ ჯგუფები, „რომელთაც ჰქონდათ ამოცანა, პროვოცირება მოეხდინათ და ძალადობისკენ გადასულიყვნენ“.

მისივე თქმით, „დღეს ხელს უგრეხენ საქართველოს პარლამენტს, ანუ ქართველ ხალხს“.

„გუშინ იყო მშვიდობიანი აქცია, პოლიცია შესაბამისად იცავდა ამ აქციის უსაფრთხოებასაც. ყველაფერი მიდიოდა ისე, როგორც ქართულ საპროტესტო მოძრაობებს ეკადრება ხოლმე. იყო ჯგუფები რომელთაც ჰქონდათ ამოცანა, პროვოცირება მოეხდინათ და ძალადობისკენ გადასულიყვნენ. ვნახეთ, რაც გააკეთეს საბოლოოდ – პიკეტირება. კვლავ მოწოდება. იგივე „ნაციონალური მოძრაობის“ ლიდერები იყვნენ, ვინც საბოლო ჯამში ლიდერობდნენ აქციას. რომ ხედავენ, რომ საქართველოს მოქალაქეების მშვიდობიანი აქციაა, იმ წამსვე გადადიან მოწოდებაზე, რომ იყოს ალყა, პიკეტირება და ძალადობისკენ წასვლა. შინაგან საქმეთა სამინისტრომ არაერთხელ მიუთითა, რომ მათი პასუხისმგებლობაა, რომ პარლამენტის საქმიანობას ხელი არ შეეშალოს, ამიტომ – აქცია აქციად, პარლამენტის საქმიანობა, პარლამენტის საქმიანობად. ერთი მეორეს ხელს არ უშლიდეს“,- განაცხადა შალვა პაპუაშვილმა.

მან უპასუხა ასევე კითხვას პლენარულ სხდომაზე გუშინ, ოპოზიციონერი დეპუტატის დევი ჭანკოტაძის მიერ გაკეთებულ განცხადებაზე, რომ კანონის მიღება „ცუდ მოვლენებს გამოიწვევს“.

პაპუაშვილის თქმით, „განსაკუთრებით სამხედროს მხრიდან, ასეთი სახის განცხადებები აბსოლუტურად დაუშვებელია“.

„რას ჰქვია, რაღაც რომ მოხდეს? საღამოს, რაც მოხდა, მენიშნა“,- აღნიშნა პაპუაშვილმა.

მისივე თქმით, ეს განცხადება წამოცდენა იყო.

„იყო წამოცდენა, რომ ერთადერთი, ვისგანაც ვისგანაც შეიძლება აგრესია მოდიოდეს, ეს არიან რადიკალური ჯგუფები. ვნახეთ, რომ ისინი გუშინ მომზადებულები იყვნენ მისულები, აირწინაღებით. მოწოდებებიც ვნახეთ. „ენჯეოები“, რომლებიც თანამონაწილეები არიან, ისტერიას თესავენ. რუსეთი რუსეთის ძახილით, საბოლოოდ გააფერმკთალეს საფრთხეები, რაც რუსეთიდან მომდინარეობს. ყველა მეორე წინადადებაში უკონტექსტოდ რუსეთის ძახილით საბოლოოდ, აზრს უკარგავენ თავის ნათქვამს. ვნახეთ გუშინაც და გუშინწინაც, რომ ძალადობა იწყებოდა ამ ჯგუფებისგან, პოლიცია მოქმედებდა პროფესიონალურად. შინაგან საქმეთა სამინისტრო ზრუნავს, რომ ერთი მხრივ, უზრუნველყოს აქციის მონაწილეების უსაფრთხოება, მეორე მხრივ საზოგადოებრივი წესრიგი, მაშინ როდესაც ეს წესრიგი ირევა, ამაზე შსს-ის შესაბამისი დანაყოფები რეაგირებენ იმ პროტოკოლით, რომელიც აქვთ“,- განაცხადა შალვა პაპუაშვილმა.

სწორია, როცა ჩვენი პოლიტიკოსები ცდილობენ, საგარეო გავლენა გაზარდონ, თუმცა მიშელს ისეთი ტვიტი და ცალსახა პოზიცია ჰქონდა, მეტი რა ქნას, – ამის შესახებ „გირჩის“ წევრმა, ალექსანდრე რაქვიაშვილმა განაცხადა.

რაქვიაშვილი გამოეხმაურა პრეზიდენტის ადმინისტრაციის ინფორმაციას, რომლის მიხედვითაც, სალომე ზურაბიშვილმა შარლ მიშელსა და ემანუელ მაკრონს მიმართა, საქართველოში განვითარებული მოვლენები ევროპული საბჭოს სხდომაზე განიხილონ.

„მიშელი ისედაც გვეხმარებოდა, ჩამოდიოდა, უამრავი ენერგია, დრო დახარჯა. არ ვიცი, კიდევ რა უნდა გააკეთონ ევროპელებმა. რაც მაკლია, ამერიკელების მკაფიო პოზიციაა. ამერიკელი მაღალჩინოსნის, უფრო მაღალი დონის განცხადებაა საჭირო, რომ ეს შეიცვალოს, რადგან შინაარსობრივად, პირველ რიგში, ამ კანონით ამერიკელებს უფრო ვებრძვით, ვიდრე ევროპელებს. ევროპელებმა უკვე ყველაფერი ქნეს, ყველაფერი გაკეთებულია. ვინმეს რამე თუ აინტერესებდა ევროპის ნაწილში, ცალსახაა“, – განაცხადა რაქვიაშვილმა.

კითხვაზე, როგორ ფიქრობს, რამდენად არსებობს თეორიული შანსი, ევროპულმა საბჭომ დღეს საქართველოს საკითხი განიხილოს, რაქვიაშვილმა აღნიშნა: „წარმოდგენა არ მაქვს, პროცედურულ ნაწილში როგორ არის, მაგრამ შარლ მიშელს თუ უნდა გაკეთება, მგონი, ეს შესაძლებელია“.

ეს საერთოდ სასწაულია – ქალბატონი სალომე უკვე ყველანაირ ზღვარს სცდება. რა გამოდის, რომ საკუთარ ხელისუფლებას უჩივის სხვა ქვეყნის ხელისუფლებაში? – ამის შესახებ საქართველოს პარლამენტის თავმჯდომარე შალვა პაპუაშვილმა ჟურნალისტებს განუცხადა, რითაც გამოეხმაურა სალომე ზურაბიშვილის მხრიდან შარლ მიშელისა და ემანუელ მაკრონისადმი თხოვნას, რომ საქართველოში მიმდინარე პროცესები ევროპული საბჭოს სხდომაზე განიხილონ.

პაპუაშვილის შეფასებით, საქართველოს მიმართ სალომე ზურაბიშვილს „გაუგონარი დამოკიდებულება აქვს“.

“ასეთი რამე, ასეთი გამოცდილება თუ არსებობს ისტორიაში, არ ვიცი. გვახსოვს, როდესაც საქართველო 30 წლის უკან იყო ნაწილი საბჭოთა კავშირის და ცენტრში მიდიოდა ჩივილები. თუ ეს მიდგომა აქვს, რომ ვიღაცას უნდა უჩივლოს სხვა სახელმწიფოში, საფრანგეთის პრეზიდენტი რა შუაშია საერთოდ საქართველოს პარლამენტის საქმიანობასთან? აბსოლუტურად გაუგონარი დამოკიდებულებაა ქალბატონი სალომეს მხრიდან ქვეყნის მიმართ. როგორც ჩანს, სახელმწიფოდ არ თვლის ამ ქვეყანას. პარლამენტმა უნდა მიიღოს გადაწყვეტილება, რომელიც ხალხის წარმომადგენელია. ფიქრობს, რომ უცხო ქვეყნის ლიდერებთან უნდა იჩივლოს ქართველი ხალხის წინააღმდეგ, რომ შემდეგ, ქართველი ხალხის ლიდერები დაარწმუნონ, რა კანონი მიიღონ და რა – არა. საქართველოს დამოუკიდებლობისთვის ძირის გამოთხრაა, როდესაც ჩვენი ქვეყნის ყოფნა საერთაშორისო თანამეგობრობაში ქალბატონ სალომეს და ბევრს, ამ ჯგუფიდან, ისე მიაჩნია, რომ საქართველოს უნდა უკარნახონ სხვა ქვეყნის ლიდერებმა, რა აკეთონ და რა – არა. არცერთი არგუმენტი არ წარმოადგინეს ამ საკითხთან დაკავშირებით. ერთადერთი, რაც გვესმის, ისაა, რომ ვიღაცამ თქვა, რა კანონი უნდა მივიღოთ და რა – არა. მთელი ამ პერიოდის განმავლობაში უმარტივეს საკითხებზეა მსჯელობა – თუ დააკვირდებით რადიკალურ ჯგუფებს, რომლებიც ამ დღეების განმავლობაში აგრესიაში იყვნენ ჩართულები, ყველას უკან წყაროდ ნახავთ NED-ის, EED-ის დაფინანსებას. გამოაქვეყნონ, რას უმალავენ ქართველ ხალხს?“,- განაცხადა შალვა პაპუაშვილმა.

შეგახსენებთ, რომ საქართველოს პრეზიდენტმა სალომე ზურაბიშვილმა შარლ მიშელსა და ემანუელ მაკრონს მიმართა, საქართველოში განვითარებული მოვლენები ევროპული საბჭოს დღევანდელ სხდომაზე განიხილონ, მიუხედავად იმისა, რომ საკითხი სხდომის დღის წესრიგში შეტანილი არ არის.