საქართველოს პარლამენტთან, სადაც „უცხოური გავლენის გამჭვირვალობის“ კანონპროექტის პირველი მოსმენით მიღებას აპროტესტებენ, აქციის მონაწილეებმა „პოსტივის“ გადამღებ ჯგუფს აქციის დატოვება მოსთხოვეს.

თავდაპირველად, ამასთან დაკავშირებით განცხადება ლაშა ბუღაძემ გააკეთა, რის შემდეგაც „პოსტივის“ გადამღები ჯგუფის მისამართით აქციის მონაწილეებისგან გაისმა შეძახილები – წადი, წადი.

„აქ, ჩვენს სცენასთან აღმოჩნდა რუსული ტყუილების გამავრცელებელი „პოსტივი“. შევძახოთ – წადი, წადი. გავუკეთოთ მათ დერეფანი, კორიდორი გავუკეთოთ პროპაგანდისტებს“, – განაცხადა ლაშა ბუღაძემ.

გაა***ს დროზე რა, სანამ კიდე კაი ხასიათზე ვართ, თორემ მაგას ხეზე დავკიდებთ, თავის ბაობაბზე, – ასე უპასუხა საპროტესტო აქციაზე მყოფმა მწერალმა კოტე ყუბანეიშვილმა ჟურნალისტის კითხვას, თუ რას ეტყოდა ბიძინა ივანიშვილს.

ყუბანეიშვილის თქმით, ბიძინა ივანიშვილს კადაფივით მოუწევს, ისევე როგორც მამუკა მდინარაძეს.

„გაა***ს დროზე რა, სანამ კიდევ კაი ხასიათზე ვართ, თორემ მაგას ხეზე დავკიდებთ, თავის ბაობაბზე, ეს არ არის მხატვრულად ნათქვამი, კადაფივით მოუწევს, ვერ გაასწრებს აქედან, ვერანაირი ავტო ის ვერ უშველის, ვერანაირი დრონი, ეს ხალხის მოთმინება არ ამოიყვანოს ყელიდან. მე, რა თქმა უნდა, პირადად არაფერს ვპირდები, ისტორია გაასამართლებს, ისევე როგორც მდინარაძეს. ხომ ყველაფერს წარმოიდგენდა, მაგრამ ელისაშვილი თუ მოსდებდა? – განაცხადა ყუბანეიშვილმა

ირაკლი კობახიძე – გუშინდელ აქციაზე არ მომხდარა არავითარი დარბევა, დარბევა იყო 2011 წლის 26 მაისს, როდესაც რამდენიმე ცხედარი განათავსეს ჯიხურების თავზე

გუშინდელ აქციაზე არ მომხდარა არავითარი დარბევა, დარბევა როდის იყო იცით? – 2011 წლის 26 მაისს, როდესაც რამდენიმე ცხედარი განათავსეს ჯიხურების თავზე, – ამის შესახებ საქართველოს პრემიერ-მინისტრმა, ირაკლი კობახიძემ განაცხადა.

როგორც ირაკლი კობახიძემ აღნიშნა, გუშინდელ აქციაზე იყო სამი სამწუხარო ინციდენტი, ხუთი ადამიანის ჰოსპიტალიზება გახდა საჭირო და დაზიანებებზე დეტალური ინფორმაცია გაავრცელა ჯანდაცვის სამინისტრომ.

„შეკრების დაშლა საზოგადოდ მოხდა უმაღლესი ევროპული სტანდარტებით, იყო სამი სამწუხარო ინციდენტი, როდესაც ალბათ, პოლიციელებს უმტყუნა ნერვებმა, მაგრამ რაც შეეხება დაზიანებებს, ხუთი ადამიანის ჰოსპიტალიზება გახდა საჭირო და დაზიანებებზე დეტალური ინფორმაცია გაავრცელა ჯანდაცვის სამინისტრომ, რაც ეფუძნება ექიმების მიერ შედგენილ დასკვნებს”, – განაცხადა ირაკლი კობახიძემ.

გერმანიის ელჩმა გაავრცელა არასწორი ინფორმაცია, თითქოს გერმანიაში სამივე შეხვედრაზე ჩვენს დელეგაციას უთხრეს, რომ კანონი ცუდია და არ უნდა მივიღოთ. „ლელოსთან“ ერთად დადის ხოლმე და შეიძლება, იქ მიიღო ეს ინფორმაცია, – ამის შესახებ საქართველოს პრემიერ-მინისტრმა, ირაკლი კობახიძემ მთავრობის ადმინისტრაციაში გამართულ ბრიფინგზე განაცხადა.

პრემიერის თქმით, ჯობდა, ელჩს გადაემოწმებინა არასწორად გავრცელებული ინფორმაცია.

„ბუნდესტაგის თავმჯდომარესთან შეხვედრაზე დაისვა კითხვები, რომლებსაც პასუხი გავეცით. პრეზიდენტს რეაგირებაც არ ჰქონია. უბრალოდ კითხვა დასვა, მიიღო პასუხი და არ გაგვიგრძელებია საუბარი, შემდეგ გადავედით ორმხრივ ურთიერთობებზე. რაც შეეხება ბუნდესტაგის პრეზიდენტს, მან დასვა კითხვები. თქვა, რომ ბუნდესტაგში მის კოლეგებს ჰქონდათ შეშფოთება ამ კანონთან დაკავშირებით, რომ არ იყო შესაბამისობაში ევროკავშირის კანონმდებლობასთან, პრინციპებთან და ა.შ. ამის შემდეგ მე გავუზიარე ჩემი არგუმენტები, რის შემდეგაც მან განაცხადა, რომ გაგრძელდება მსჯელობა ამასთან დაკავშირებით. წარმოიდგინეთ, ჩადიხართ გერმანიაში პარლამენტის თავმჯდომარესთან. მილიონი საკითხი აქვთ ჩვენს კოლეგებს სხვა ქვეყნებში. ვერც პარლამენტის თავმჯდომარე, ვერც კანცლერი მით უმეტეს, კანონს ვერ წაიკითხავს. ქართულ კანონს ვერ წაიკითხავს. მას მიაწოდეს ინფორმაცია და მან ამის საფუძველზე დასვა კითხვა.

რაც შეეხება კანცლერს, მან განაცხადა, ამას ვადასტურებ. რაც იყო არასწორად გავრცელებული ელჩის მხრიდან, ჯობდა, გადაემოწმებინა, მათ შორის ჩემთან, რადგან არასწორი ინფორმაცია გაავრცელა. „ლელოსთან“ ერთად დადის ხოლმე საარჩევნო აგიტაციის ფარგლებში და შეიძლება, იქ მიიღო ეს ინფორმაცია, არ ვიცი. კანცლერმა ნამდვილად ბრძანა, რომ მისი აზრით, კანონი ევროკავშირის პრინციპებთან არ იყო შესაბამისობაში. რაც არ მომხდარა ორ დანარჩენ შეხვედრაზე, ეს თქვა ნამდვილად გერმანიის კანცლერმა. რაზეც ერთი არგუმენტი მე ვუთხარი, რომ თვითონ ევროკომისიამ მოიწონა და ა.შ. მან მიპასუხა, რომ მას თვითონ ევროკომისიის და ფრანგული კანონიც არ მოსწონს. არ მოსწონს გასაგებია, მაგრამ ევროკავშირის წევრმა ქვეყანამ მიიღო და რჩება ევროკავშირის წევრ ქვეყნად. არავის გაუკრიტიკებია საფრანგეთი ამისთვის. ანუ გასაგებია, რომ ეს არგუმენტი არ არის.

რაც შეეხება შინაარსს. შოლცს განვუმარტე, რომ ეს კანონი ითვალისწინებს ერთადერთ რამეს, ეს არის ყოველწლიური დეკლარაციები. ამასთან დაკავშირებით გვქონდა გარკვეული გაცვლა მოსაზრებების. შემდეგ იყო საერთო შეხვედრა დელეგაციასთან ერთად, სადაც კიდევ ერთხელ წარვადგინე არგუმენტები. იქ საერთოდ არ ყოფილა დისკუსია. არსებობდა წინასწარ გამზადებული ტექსტი, რაც ასევე გავრცელებული პრაქტიკაა, ვერავის გაამტყუნებ ამისთვის და ბუნებრივია, ეს ტექსტი წაკითხული იქნა ამ ბრიფინგზე. ამიტომ ვამბობ, საჯარო დისკუსია არის მნიშვნელოვანი. არ არის სწორი, როდესაც ცალმხრივად ხდება განცხადებების გავრცელება, მით უმეტეს, როცა ეს განცხადებები არ შეიცავს არგუმენტებს. ეს დაახლოებით იგივეა, როცა ალეკო ელისაშვილი გვერდიდან მიეპარა ერთ-ერთ დეპუტატს და დაარტყა. გვერდიდან მიპარვა არ არის სწორი. ვინმეს თუ არგუმენტები აქვს და აქვს საკუთარი პოზიცია წინ უნდა დაგიდგეს და შემოვიდეს შენთან ღია დისკუსიაში. ანუ ელისაშვილივით არ შეიძლება მოქცევა. ამიტომ ჩვენ ყველას ვთავაზობთ, რომ ერთად დავსხდეთ. ელჩები არიან აქ წარმოდგენილი. თუ არსებობს არგუმენტები ამ კანონის წინააღმდეგ, ჩვენ მზად ვართ, განვიხილოთ ეს ყველაფერი ღია დისკუსიის რეჟიმში. იმედია, ელჩები ამ შეთავაზებას დათანხმდებიან. თვითონ გერმანიის ელჩი გაჰყვა ბოლნისში „ლელოს“ ლიდერებს, როცა მათ ჰქონდათ პარტიული ვიზიტი. ცუდი შემთხვევაა. მე არ მინდა, ისეთი გადახვევა გავაკეთო, მაგრამ, რა თქმა უნდა, არასწორია, პირველ რიგში, როცა თან ხაზარაძის სახლი გაქვს ნაქირავები და მერე თან დაჰყვები ხაზარაძეს ბოლნისში პოლიტიკური კამპანიის ფარგლებში. ეს უბრალოდ არასწორია. შესაბამისად, მე არ მიკვირს, რომ ერთ-ერთი რადიკალური პარტიის ერთ-ერთი სახე ჰყავდათ მათ დაქირავებული თარჯიმნად“, – განაცხადა პრემიერმა.

უხეში მცდელობები, ჩაერიონ ჩვენს სუვერენიტეტში, მოითხოვონ აქ რევოლუცია და ა.შ. არის კიდევ ერთი მკაფიო დასტური იმისა, თუ რატომ არის საჭირო საქართველოში უცხოური გავლენის გამჭვირვალობა, – ამის შესახებ პრემიერ-მინისტრმა ჟურნალისტის კითხვის პასუხად განაცხადა, რომელიც ევროპარლამენტარების მხრიდან რევოლუციაზე მოწოდებებს შეეხებოდა.

მთავრობის მეთაურის განცხადებით, გარე ჩარევით საქართველოში რევოლუციას ვერავინ მოაწყობს და ამას არ დაუშვებს ხელისუფლება.

„თუ ვინმეს რევოლუცია მოუნდება ამ ქვეყანაში, თქვენ გახსოვთ, 2012 წელს პრაქტიკულად რევოლუციური არჩევნები ჩატარდა და ქართველი ხალხის მიერ შეიცვალა ხელისუფლება, მაგრამ რა თქმა უნდა, ვერავის გარე ჩარევით ვერავინ აქ რევოლუციას ვერ დაუშვებს და ვერც მოაწყობს. თუმცა ამისთვის ნაბიჯებიც არის გადასადგმელი და ერთ-ერთი მთავარი მიზანი, რასაც ეს კანონი ემსახურება, არის სწორედ ასეთი პროცესების თავიდან აცილება. ეს შესაბამისი ძალებისთვისაც დამზღვევია. შეიძლება, ვიღაცას ჰქონდეს ცდუნება, რომ საქართველოში სცადოს ვითარების არევა, მაგრამ გამჭვირვალე თუ იქნება უცხოური გავლენა, ამ შემთხვევაში ეს ცდუნება შემცირდება და ძალიან ბევრი თვალსაზრისით დადებით როლს შეასრულებს ეს კანონი,”- განაცხადა პრემიერმა.

დარწმუნებული ვარ, რომ იმ ყურადღებას მივიღებთ, რომელიც საჭიროა – ამის შესახებ საქართველოს პრეზიდენტმა, სალომე

ზურაბიშივლმა France24-თან ინტერვიუში განაცხადა.

მან ისაუბრა ბრიუსელში ევროკავშირის წევრი ქვეყნების ლიდერების შეხვედრაზე, კერძოდ ევროპული საბჭოს სხდომაზე და კომენტარი გააკეთა იმაზე, რომ საქართველოს საკითხი სამიტის ფორმალურ დღის წესრიგში არ არის.

“კომუნიკაცია მაქვს ზოგიერთ ლიდერთან და ვფიქრობ, რომ ყველამ ძალიან კარგად იცის, რომ აქ ვითარება დაძაბულია და ყურადღებას იმსახურებს. ნათელია, რომ უმთავრესი პრიორიტეტი არ ვართ და ეს ძალიან კარგი ნიშანია, არ მინდა, რომ საქართველო უმთავრეს პრიორიტეტში იყოს, ამას სულ სხვა მნიშვნელობა ექნებოდა. მაგრამ დარწმუნებული ვარ, რომ იმ ყურადღებას მივიღებთ, რომელიც საჭიროა, რათა არჩევნებამდე მივიდეთ და ევროპულ მომავალზე კონსოლიდაცია მოვახდინოთ”, – განაცხადა ზურაბიშვილმა.

სად არის რუსული ჩვენს კანონში, სააკაშვილმა დაამკვიდრა ეს სტანდარტი, რომ შეიძლება საერთოდ არ გქონდეს არგუმენტი, მაგრამ ურცხვად მოიტყუო, ცრუპენტელობა უნდა შევამციროთ ქართულ პოლიტიკაში, – ამის შესახებ საქართველოს პრემიერ-მინისტრმა, ირაკლი კობახიძემ გამჭვირვალობის კანონპროექტთან დაკავშირებით დასმული შეკითხვის საპასუხოდ განაცხადა.

კობახიძის თქმით, არავითარი შინაარსობრივი თანხვედრა არ არსებობს რუსულ და ქართულ კანონებს შორის.

„ეს არ არის რუსული კანონი. არავითარი შინაარსობრივი თანხვედრა არ არის ამ კანონსა და რუსულ კანონს შორის. მათ შორის, შემიძლია, დეტალურად განგიმარტოთ, რა წერია რუსულ კანონში. მაგალითად, რუსეთში რაც მოქმედებს, ამ კანონის საფუძველზე შეიძლება შევიდეს სახელმწიფო კონტროლი, პირდაპირ ჩაჯდეს შესაბამის ორგანიზაციაში და რაღაც თუ არ მოეწონება, შეუძლია, საერთოდ აკრძალოს შესაბამისი არასამთავრობო ორგანიზაცია; გამოიყენება ტერმინი უცხოელი აგენტი. ეს ტერმინი გამოიყენება, მათ შორის ფიზიკური პირების, ადამიანების მიმართ; გამოიყენება ბრენდირების მექანიზმი, რაც ნიშნავს, რომ, მაგალითად, შესაბამისი პირი როცა გამოდის ტელევიზიით, ეთერით, ქვემოთ, ტიტრებში მითითებული უნდა იყოს, რომ ეს ადამიანი, კონკრეტული ფიზიკური პირი არის უცხოელი აგენტი; შესაძლებელია აღიძრას სისხლის სამართლის საქმე შესაბამისი პირის თუ ორგანიზაციის მიმართ. სად არის რუსული ჩვენს კანონში? ამ კანონს რუსულს როცა ეძახით, ეს არის უბრალოდ არა ტყუილი, არამედ ცრუპენტელობა. არავითარი საერთო არ აქვს ამ კანონს რუსულ კანონთან. ეს სააკაშვილმა დაამკვიდრა თავის დროზე ქართულ პოლიტიკაში, მანამდე ასე სამარცხვინოდ არ იტყუებოდნენ არც პოლიტიკოსები და არც ჟურნალისტები. პირადად სააკაშვილმა დაამკვიდრა ეს სტანდარტი, რომ შეიძლება, საერთოდ არ გქონდეს არგუმენტი, მაგრამ ურცხვად მოიტყუო. ცრუპენტელობა არის ერთ-ერთი, რაც უნდა შევამციროთ ქართულ პოლიტიკაში, მათ შორის მედიაში“, – განაცხადა ირაკლი კობახიძემ.

ამ „რუსულ კანონს“ ბოლო დღეების განმავლობაში მხარი რუსებმა დაუჭირეს, მაშინ როდესაც ყველა ჩვენი ევროპელი და ამერიკელი პარტნიორი ამბობს, რომ ის შეფერხება იქნება ჩვენს ევროპულ გზაზე. ამის შესახებ საქართველოს პრეზიდენტმა სალომე ზურაბიშვილმა ტელეარხ France24-თან ინტერვიუში განაცხადა.

ზურაბიშვილმა ასევე უპასუხა რუსეთის პრეზიდენტის პრესსპიკერი, დიმიტრი პესკოვის განცხადებას, რომლის თქმითაც საქართველოში “ანტირუსული სენტიმენტები” გარე აქტორებისგან მოდის.

“არ ვიცი ვის გულისხმობენ, მაგრამ იმას გეტყვით, რომ ანტირუსულ სენტიმენტებს საქართველოში ის აღვივებს, ვინც ჩვენი ტერიტორიის 20%-ის ოკუპაციას ახდენს, და სხვა არავინ. ასე რომ, ეს ძალიან ნათელია საქართველოს მთლიანი მოსახლეობისთვის, თუ ვინაა მტერი და ვინ არიან პარტნიორები, რომლებიც მხარს უჭერდნენ საქართველოს დემოკრატიზაციას, საქართველოს ინსტიტუტებს, საქართველოს განვითარებას წლების მანძილზე.

ძალიან გასაკვირია, რომ ამ რუსულ კანონს ამ ბოლო დღეების განმავლობაში მხარი რუსებმა დაუჭირეს, მაშინ როდესაც ყველა ჩვენი ევროპელი და ამერიკელი პარტნიორი ამბობს, რომ ის შეფერხება იქნება ჩვენს ევროპულ გზაზე. ასე რომ, ვფიქრობ, ყველაფერი ძალიან-ძალიან ნათელია”, – განაცხადა ზურაბიშვილმა.

დონორს შეიძლება არ უხარია მისი თანხების გამჭვირვალობა, მაგრამ ჩვენ უნდა გვიხაროდეს ის, რომ დღეს რომ არ აქვს მოქალაქეს ინფორმაცია, მაგალითად იმასთან დაკავშირებით, საიდან ფინანსდება „ფრანკლინის კლუბი”, „სირცხვილია” ან სხვა რადიკალური ორგანიზაცია, ინტერესი არის ის, რომ ხვალ გავაგებინოთ, საიდან მიიღო ორგანიზაციამ ფული და რაში დახარჯა, – ამის შესახებ საქართველოს პრემიერ-მინისტრმა ირაკლი კობახიძემ მთავრობის ადმინისტრაციაში გამართულ პრესკონფერენციაზე განაცხადა.

მთავრობის მეთაურის შეფასებით, არავის უხარია გამჭვირვალობა, როცა ფულს ხარჯავს.

„მაგალითად, ჩვენ მთავრობაში ჩვენი ინიციატივით მივიღეთ ეს გადაწყვეტილება, მაგრამ ჩვენც გვქონდა გაცნობიერებული, რომ გამჭვირვალობას მოსდევს თავისი რისკები. მაგალითად, როგორც კი მივიღე გადაწყვეტილება იმის შესახებ, რომ ყველა განკარგულება უნდა გასაჯაროებულიყო, ერთ კვირაში ერთ-ერთმა ტელევიზიამ, მართალია უსაფუძვლოდ, მაგრამ ააგორა სპეკულაცია ერთ-ერთ განკარგულებასთან დაკავშირებით. უხერხულობას ჩვენც გვიქმნის ეს, მიუხედავად იმისა, რომ სუფთად ვაკეთებთ ყველაფერს. არც ერთ ფულის გამცემს არ უხარია გამჭვირვალობა, შესაბამისად ეს გასაგებია, მაგრამ ჩვენ ხომ ჩვენი  ინტერესები გვაქვს. დონორს შეიძლება არ უხარია მისი თანხების გამჭვირვალობა, მაგრამ ჩვენ უნდა გვიხაროდეს ის, რომ დღეს რომ არ აქვს მოქალაქეს ინფორმაცია, მაგალითად იმასთან დაკავშირებით, საიდან ფინანსდება „ფრანკლინის კლუბი”, „სირცხვილია” ან სხვა რადიკალური ორგანიზაცია, ინტერესი არის ის, რომ ხვალ გავაგებინოთ, საიდან მიიღო ორგანიზაციამ ფული და რაში დახარჯა ეს ფული”, – განაცხადა პრემიერმა.

ირაკლი კობახიძის თქმით, არსებობს პროექტები, რომლებიც ემსახურება მაგალითად სოფლის მეურნეობის გაძლიერებას საქართველოში და ამ შემთხვევაში, შესაბამისი ორგანიზაცია, რომელიც ამ მიზნით იღებს უცხოურ დაფინანსებას, ატარებს უცხოური ძალის კეთილშობილურ ინტერესს.

„არსებობს უცხოური ძალა, ამ შემთხვევაში ეს შეიძლება იყოს ევროკავშირი, აშშ-ის მთავრობა და ა.შ. მას აქვს ინტერესი, რომ საქართველოში განვითარდეს სოფლის მეურნეობა. ამ შემთხვევაში, შესაბამისი ორგანიზაცია ატარებს უცხოური ძალის ამ კეთილშობილურ ინტერესს. როდესაც მთავრობა დააფინანსებს მაგალითად სოფლის მეურნეობას, ეს იქნება ჩვენი ინტერესების გამტარებელი ორგანიზაცია, რომელიც სოფლის მეურნეობას გააძლიერებს ქვეყანაში, მაგრამ თუ მთავრობა დააფინანსებს ორგანიზაციას, რომელიც მიზნად დაისახავს მაგალითად, პირობითად რომელიმე რელიგიურ გაერთიანებაზე თავდასხმას, ესეც იქნება ჩვენი ინტერესების გამტარებელი ორგანიზაცია, მაგრამ იქნება ცუდი ინტერესების გამტარებელი ორგანიზაცია. გამჭვირვალობის მთავარი ინტერესი რა არის – ხალხმა უნდა გაარჩიოს, სად არის კარგი ინტერესი და სად – ცუდი ინტერესი. დარწმუნებული ვარ, ამ თანხების ძალიან დიდი ნაწილი, პირობითად 70-80% იხარჯება სწორედ კარგ ინტერესებზე – სოფლის მეურნეობა, შშმ პირები და ა.შ. მაგრამ 20-30% სადაც ფული იხარჯება ცუდ ინტერესებზე. დღეს საქართველოს მოქალაქეს არ აქვს ინფორმაცია ამ დაფინანსებასთან დაკავშირებით”, – განაცხადა პრემიერ-მინისტრმა.

„რადიო თავისუფლების“ ევროპის ბიუროს რედაქტორი რიკარდ იოზვიაკი აცხადებს, რომ ევროპარლამენტი მომავალ კვირას კენჭს უყრის უცხოური აგენტების შესახებ კანონის არასავალდებულო რეზოლუციას.

„ევროკავშირის ზოგიერთმა ლიდერმა შესაძლოა დღეს საღამოს ევროკავშირის სამიტზე არაფორმალურად დააყენოს დღის წესრიგში საქართველოში არსებული ვითარება. სავარაუდოდ, ევროკავშირის საგარეო საქმეთა მინისტრები მას ორშაბათს განიხილავენ.

ამასთან, ევროპარლამენტი მომავალ კვირას კენჭს უყრის უცხოური აგენტების შესახებ კანონის არასავალდებულო რეზოლუციას“, – აღნიშნა რიკარდ იოზვიაკმა.