Home Blog Page 1084

პროკურატურამ ევროკავშირის ქვეყნებში არსებული ბიბლიოთეკებიდან ძვირადღირებული წიგნების ქურდობის ფაქტებთან დაკავშირებით კიდევ ერთი პირი დააკავა

საქართველოს პროკურატურამ, ევროჯასტის მხარდაჭერით შექმნილი საერთაშორისო საგამოძიებო ჯგუფის ჩართულობით, ევროკავშირის ქვეყნებში არსებული ბიბლიოთეკებიდან ძვირადღირებული წიგნების ქურდობის ფაქტებთან დაკავშირებით კიდევ ერთი პირი დააკავა.

უწყების ცნობით, საქმეზე ჩატარებული გამოძიებით დადგენილია, რომ 2022 წლის დასაწყისიდან საქართველოს მოქალაქეებმა შექმნეს ორგანიზებული დანაშაულებრივი ჯგუფი და განიზრახეს ევროპის მასშტაბით, შემდგომი რეალიზაციის მიზნით ფარულად დაუფლებოდნენ მე-19 საუკუნის სხვადასხვა ავტორების ძვირადღირებულ წიგნებს.

ამისათვის, ორგანიზებული ჯგუფის წევრები იყენებდნენ ყალბ პირადობის დამადასტურებელ მოწმობებს, გამოგონილ სახელებს, გვარებს და ორიგინალის ჩასანაცვლებლად წინასწარ გამზადებულ, წიგნების ყალბ ნიმუშებს.

დანაშაულებრივი გეგმის თანახმად, ორგანიზებული ჯგუფის წევრებს საფრანგეთის, გერმანიის, ლატვიის, ლიეტუვის, ესტონეთის, შვეიცარიის, პოლონეთის და ჩეხეთის ეროვნულ და საუნივერსიტეტო ბიბლიოთეკებში წასაკითხად უნდა აეღოთ მე-19 საუკუნის კლასიკოსი მწერლების წიგნები, რასაც ფარულად დაეუფლებოდნენ და მათ – ორიგინალი წიგნების მაღალი ხარისხის ასლებით ჩაანაცვლებდნენ.

აღნიშნული გზით, ორგანიზებული ჯგუფის წევრები 2022-2023 წლებში, ევროპის სხვადასხვა ქალაქების ბიბლიოთეკებიდან ასეულობით ათასი ევროს ღირებულების წიგნებს ფარულად დაეუფლნენ.

დაკავებულს ბრალდება საქართველოს სისხლის სამართლის კოდექსის 177-ე მუხლის მე-4 ნაწილის ,,ა“ და ,,ბ “ ქვეპუნქტებით (ქურდობა, ჩადენილი ორგანიზებული ჯგუფის მიერ და დიდი ოდენობით) წარედგინა, რაც სასჯელის სახედ და ზომად 6-დან 10 წლამდე ვადით თავისუფლების აღკვეთას ითვალისწინებს.

თბილისის საქალაქო სასამართლოს განჩინებით, ბრალდებულს აღკვეთის ღონისძიების სახით პატიმრობა უკვე შეეფარდა.

აღნიშნულ საქმეზე გამოძიებას ევროჯასტის მხარდაჭერით შექმნილი საერთაშორისო საგამოძიებო ჯგუფი ახორციელებს. მიმდინარე გამოძიების ფარგლებში სისხლისსამართლებრივი დევნა უკვე დაწყებულია ორგანიზებული დანაშაულებრივი ჯგუფის სხვა ოთხი წევრის მიმართ.

ერთობლივი ღონისძიების ფარგლებში, შვეიცარიის, საფრანგეთის და ლიეტუვის რესპუბლიკის სამართალდამცავი ორგანოების, საქართველოს პროკურატურის და შინაგან საქმეთა სამინისტროს თანამშრომლებმა საქართველოს ტერიტორიაზე საგამოძიებო მოქმედებები ათეულობით ლოკაციაზე ჩაატარეს.

ფართომასშტაბიან ღონისძიებაში, რომელიც საერთაშორისო პარტნიორებთან ერთად რამდენიმე თვის განმავლობაში მზადდებოდა, ევროკავშირის ქვეყნების და საქართველოს სამართალდამცავი ორგანოების 100-ზე მეტი თანამშრომელი მონაწილეობდა.

საქმეზე გამოძიება საერთაშორისო საგამოძიებო ჯგუფში ჩართული ქვეყნების კომპეტენტურ უწყებებთან აქტიური თანამშრომლობით გრძელდება ორგანიზებულ-დანაშაულებრივი ჯგუფის საქმიანობაში ჩართული სხვა პირების მხილების და გამოვლენის მიზნით.

ჰააგის სასამართლოს დასანქცირებას განიხილავს ამერიკა, ჰოდა ნურავის გიკვირთ ქართველი მოსამართლეების დასანქცირება და საქართველოს დასჯის მოთხოვნა-ზურაბ ქადაგიძე

„ხალხის ძალის“ წევრი ზურაბ ქადაგიძე სოციალურ ქსელში აშშ-სახელმწიფო მდივნის პოზიციას ეხმიანება, რომლის თანახმად ამერიკის კონგრესი მზადაა ჰააგის სასამართლოს დასანქცირებაზე იმსჯელოს. როგორც ქადაგიძე აღნიშნავს, ამ ფონზე ქართველი მოსამართლეების დასანქცირება და საქართველოს დასჯის მოთხოვნა გასაკვირი არაა.

ქადაგიძე იმასაც აღნიშნავს, რომ ფსევდო-ლიბერალური ზღვარგადასული წესრიგის გამო, შექმნილ ტურბულენტობაში, სამწუხაროდ, საქართველოსაც უწევს ფრენა.

„ატყობთ, რა მასშტაბის ეგზისტენციალურ კატასტროფასთანაა დასავლეთის დღევანდელი პოლიტიკური კონიუნქტურა?! ჰააგის სასამართლოს დასანქცირებას განიხილავენ…(ნუ, მიზეზები, მოტივი და სანქციების შემთხვევაში, სამართლებრივი შედეგი ცალკე კატასტროფის თემაა) ჰოდა – ნურავის გიკვირთ ქართველი მოსამართლეების დასანქცირება და საქართველოს დასჯის მოთხოვნა.

სრულ სიგიჟეშია გადავარდნილი ფსევდო-ლიბერალური წესრიგი, ყველას და ყველაფერს ემუქრებიან, ვინც მათ უსიტყვოდ არ ემორჩილება… ახლა მაინც ხვდებით, რა მასშტაბის ტურბულენტობაში უწევს საქართველოს ფრენა?! ერთი ჭეშმარიტებაა, რომ საქართველოა ის ქვეყანა, რომელმაც ამ ფსევდო-ლიბერალიზმის დემონტაჟი დაიწყო რეგიონში და შესაბამისად, მსოფლიოში!“- წერს ქადაგიძე.

აშშ-ის სახელმწიფო მდივანმა, ენტონი ბლინკენმა განაცხადა, რომ ის მზად იქნება, იმუშაოს სენატის საგარეო კომიტეტის „რესპუბლიკელ“ წევრებთან ჰააგის სასამართლოს წინააღმდეგ კანონმდებლობაზე.

ზაფხულის სანავიგაციო სეზონზე საქართველოსა და ევროპის ქვეყნებს შორის 2500-მდე ავიარეისი შესრულდება

საქართველოს სამოქალაქო ავიაციის სააგენტოში ავიაკომპანიების მიერ წარმოდგენილი განაცხადების და დამტკიცებული განრიგების შესაბამისად, მიმდინარე წლის ზაფხულის აქტიურ სანავიგაციო სეზონზე დაგეგმილია 13 600 ავიარეისის შესრულება. ინფორმაციას საქართველოს ეკონომიკისა და მდგრადი განვითარების სამინისტრო ავრცელებს.

სამინისტროს ცნობით, ივნისი-ოქტომბრის პერიოდში საქართველოდან ყველაზე მეტი – 2480 რეისი ევროპის მიმართულებით შესრულდება, რაც საქართველოდან და საქართველოს მიმართულებით დაგეგმილი ფრენების საერთო რაოდენობის 18%-ს შეადგენს.

„იზრდება ფრენის სიხშირე გალფის ქვეყნების თანამშრომლობის საბჭოს ქვეყნებთანაც (საუდის არაბეთი, ბაჰრეინი, არაბთა გაერთიანებული საემიროები, ქუვეითი, ომანი და კატარი). 2024 წლის ივნის-ოქტომბერში, საქართველოსა და გალფის ქვეყნებს შორის დაგეგმილია 2255 რეისის შესრულება, რაც ფრენების საერთო რაოდენობის 17%-ია.

ზაფხულის სანავიგაციო სეზონის იგივე საანგარიშო პერიოდში, საქართველოსა და რუსეთის ფედერაციას შორის 1761 რეისის განხორციელება იგეგმება, რაც რეისების საერთო რაოდენობის 13%-ს შეადგენს. ფრენებს სამი ავიაკომპანია ახორციელებს. საქართველოსა და რუსეთის ფედერაციას შორის ფრენები სრულდება მხოლოდ იმ ავიაკომპანიების მიერ, რომლებიც არ იმყოფებიან ევროკავშირის შავ სიაში. ფრენები არ ხორციელდება ასევე, იმ საჰაერო ხომალდებით, რომელთაც საჰაერო ხომალდების მწარმოებლებმა შეუწყვიტეს ტექნიკური მხარდაჭერა, რაც გულისხმობს როგორც ტექნიკურ და საფრენოსნო დოკუმენტაციაზე წვდომის შეზღუდვას, ისე მარაგი ნაწილების მოწოდებას.

აღნიშნული მონაცემების მიხედვით, მიმდინარე წლის ზაფხულის სანავიგაციო სეზონზე დაგეგმილი 13 600 რეისიდან საქართველოდან ევროპაში და პირიქით განსახორციელებელი ფრენები 18%-ს, გალფის ქვეყნებთან – 17%-ს, რუსეთთან – 13%-ს, ხოლო დანარჩენ ქვეყნებთან ჯამურად 52%-ს შეადგენს.

აღსანიშნავია, რომ მიმდინარე წელს, საავიაციო ბაზარზე შემოვიდა ნიდერლანდების სამეფოს დაბალბიუჯეტური ავიაკომპანია Transavia, რომელმაც რეგულარული საჰაერო მიმოსვლის განხორციელება დაიწყო ამსტერდამიდან თბილისის მიმართულებით. ასევე, მრავალწლიანი პაუზის შემდეგ, საქართველოში ოპერირება განაახლა ავსტრიულმა ავიაკომპანია Austrian Airlines-მა ვენა – თბილისი – ვენას საჰაერო ხაზზე. რეგულარული რეისების განხორციელება დაიწყო თურქულმა დაბალბიუჯეტურმა ავიაკომპანია AJET-მა. ზაფხულის სეზონზე საქართველოსა და ევროკავშირს შორის ფრენებს 11 ავიაკომპანია 38 მიმართულებით განახორციელებს.

2024 წლის იანვარ-აპრილში, საქართველოს აეროპორტები რეგულარული და არარეგულარული რეისებით 1 946 881 მგზავრს მოემსახურა, რაც 31%-ით აღემატება 2023 წლის ანალოგიურ პერიოდში მიღებული მგზავრების რაოდენობას და 34%-ით მეტია 2019 წლის იანვარ-აპრილში მიღებული მგზავრების რაოდენობაზე“, – აღნიშნულია ინფორმაციაში.

აშშ-ის წარმომადგენელთა პალატის დაზვერვის კომიტეტი ლოიდ ოსტინს მოუწოდებს, უკრაინის მხრიდან რუსეთის ტერიტორიაზე მდებარე სამიზნეებზე თავდასხმა დაუშვას

აშშ-ის წარმომადგენელთა პალატის დაზვერვის კომიტეტმა გაავრცელა მიმართვა, რომელიც თავდაცვის მდივან ლოიდ ოსტინს მოუწოდებს, უკრაინის მხრიდან რუსეთის ტერიტორიაზე მდებარე სამიზნეებზე თავდასხმა დაუშვას. ინფორმაციას უკრაინული მედია ავრცელებს.

ამასთან, მიმართვაში კონგრესმენთა ჯგუფი მოუწოდებს ოსტინს, გააფართოოს უკრაინელი სამხედროების წვრთების პროცესი ამერიკული „F-16“ ტიპის მოიერიშე თვითმფრინავებზე.

„12 პილოტის მომზადება უბრალოდ არ არის საკმარისი. უკრაინა საომარ მდგომარეობაშია და უკრაინის ადგილები, სხვა ქვეყნებთან შედარებით, პრიორიტეტული უნდა იყოს“, – აღნიშნულია მიმართვაში.

ამერიკელი კანონმდებლები მიიჩნევენ, რომ ბაიდენის ადმინისტრაციის პოლიტიკა უნდა შეიცვალოს, რადგან უკრაინელებს აღნიშნული პოლიტიკა არ აძლევს საშუალებას, თავი ეფექტურად დაიცვან.

წარმომადგენელთა პალატის დაზვერვის კომიტეტის თავმჯდომარის, მაიკ ტერნერის განცხადებით, უკრაინას შესაძლოა, მიეცეს „გარკვეულ პირობებში“ რუსეთის ტერიტორიაზე სტრატეგიულ სამიზნეებზე თავდასხმის ნებართვა.

კანონმდებლები ასევე მიუთითებენ, რომ კიევი ითხოვს დამატებით, სულ მცირე, „პატრიოტის“ შვიდ სისტემას „დიდი ურბანული ტერიტორიების“ დასაცავად.

რუსეთში ბირთვული იარაღის გამოყენებით, სამხედრო სწავლება მიმდინარეობს

რუსეთის სამხრეთ სამხედრო ოლქში არასტრატეგიული ბირთვული იარაღის გამოყენებით, სამხედრო სწავლების პირველი ეტაპი დაიწყო.

თავდაცვის სამინისტროს მიერ გავრცელებულ ცნობაში ნათქვამია, რომ სამხრეთის ოლქის სარაკეტო შენაერთების პირადი შემადგენლობა, სწავლების ფარგლებში, ისეთ მანევრებს ახორციელებს, როგორიცაა „ისკანდერის“ ტაქტიკური სარაკეტო სისტემებისთვის სპეციალური საბრძოლო მასალების მოპოვება, აღჭურვა და გამშვებ პუნქტებზე მათი ფარულად გადატანა.

უწყების ცნობით, საჰაერო კოსმოსური ძალების საავიაციო ქვედანაყოფების ჯარისკაცები წვრთნას გადიან ჰიპერბგერითი „კინჟალის“ რაკეტების განთავსებაში.

ბოლოს უკვე ვენეციის კომისიასაც კი ათქმევინეს, რომ გამჭვირვალობა ყოფილა ცუდი -გურამ მაჭარაშვილი

პარტია „ხალხის ძალის“ წევრის, გურამ მაჭარაშვილის განცხადებით, „უცხოური გავლენის გამჭვირვალობის შესახებ“ კანონზე ვენეციის კომისიის დასკვნაში, სამართლებრივი შენიშვნების ნაცვლად, პოლიტიკური პროცესი იყო აღწერილი, რაც სცილდება კომისიის კომპეტენციას.

„სალომე ზურაბიშვილმა არ დატოვა განხილვის სივრცე. ზურაბიშვილმა ვეტო დაადო ორი კვირით ადრე, ვიდრე მას ამის ვადა ჰქონდა, ამავდროულად, ვამბობდით, რომ ვენეციის კომისიის დასკვნასაც არ დაელოდა. აქედან გამომდინარე, ამ დასკვნას ჩვენ კი გავეცნობოდით, თუმცა შეუძლებელი იქნებოდა თუნდაც რაიმე თეორიული შენიშვნების გათვალისწინება. მაგრამ ვნახეთ ვენეციის კომისიის დასკვნა, ბოლოში რომ მიეწერათ – „არა რუსულ კანონს“, აი, ეს იყო შინაარსი. სამართლებრივი შენიშვნების გარდა, მთელი პოლიტიკური პროცესი იყო აღწერილი, რაც თავიდან ბოლომდე სცილდება ვენეციის კომისიის კომპეტენციას. ეს არის ორგანიზაცია, რომელიც კანონპროექტთან დაკავშირებით წერს სამართლებრივ დასკვნას. ანუ, სამართლებრივ შენიშვნებს წერს კანონპროექტებთან დაკავშირებით.  ორი-სამი წინადადების გარდა, ჩვენ ვიხილეთ პრაქტიკულად პოლიტიკური აქცია – „არა რუსულ კანონს“, რომელიც, რეალურად, საქართველოში ჩავარდა. ვნახეთ, რომ აღარც პარლამენტში, აღარც ქუჩაში საზოგადოება ამას უკვე მხარს აღარ უჭერს, აღარც კი აქცევენ ყურადღებას. ბოლოს ვენეციის კომისიასაც კი ათქმევინეს, რომ გამჭვირვალობა ცუდი ყოფილა. წარმოიდგინეთ, რა დონეზე მივიდნენ, გამჭვირვალე რომ იყოს არასამთავრობო სექტორი, ეს ყოფილა ცუდი და ანტიდემოკრატიული, მაშინ, როდესაც იგივე ევროპის ინსტიტუცია, ევროკავშირის მართლმსაჯულების სასამართლო პირდაპირ წერს გადაწყვეტილებაში, რომ არასამთავრობო სექტორი გარკვეულ გავლენას ახდენს საზოგადოებაზე, ამიტომ მისი გამჭვირვალობა საზოგადოების აღმატებული უფლებაა. პირდაპირ წერია ეს ევროკავშირის მართლმსაჯულების სასამართლოს გადაწყვეტილებაში. მეორე ინსტიტუცია, ვენეციის კომისია ამბობს, თურმე გამჭვირვალობა არის ანტიდემოკრატიული. ამ დონემდე მივიდნენ, რასაც, რა თქმა უნდა, საქართველოს საზოგადოება არ მიიღებს, რადგან ჩვენ გვინდა სუვერენიტეტი, ჩვენ გვინდა გამჭვირვალობა, რომელიც არის ევროპული ღირებულება“, – განაცხადა გურამ მაჭარაშვილმა.

ვენეციის კომისიამ „უცხოური გავლენის გამჭვირვალობის შესახებ“ კანონთან დაკავშირებით შეფასება  გამოაქვეყნა.

 ვფიქრობ, არასწორია „ჰამასის“ ხელმძღვანელობისა და ისრაელის დემოკრატიულად არჩეული ლიდერის გათანაბრება – დევიდ ქემერონი

ვფიქრობ, უბრალოდ, არასწორია „ჰამასის“ ხელმძღვანელობისა და ისრაელის დემოკრატიულად არჩეული ლიდერის მორალური გათანაბრება, – ამის შესახებ ბრიტანეთის საგარეო საქმეთა მინისტრმა, დევიდ ქემერონმა განაცხადა.

მისი შეფასებით, სისხლის სამართლის საერთაშორისო სასამართლოს პროკურორის მოთხოვნილი დაკავების ორდერი „უბრალოდ, არასწორია“.

როგორც ქემერონმა აღნიშნა, საერთაშორისო სისხლის სამართლის სასამართლომ უნდა იფიქროს შედეგებზე და, მისი თქმით, ამ ორდერის გაცემა ვერ შეუწყობს ხელს მძევლების გათავისუფლებას.

„ერთი წუთითაც არ მჯერა, რომ ამ ორდერების გაცემა ხელს შეუწყობს მძევლების დაბრუნებას. ის არ შეუწყობს ხელს ჰუმანიტარული დახმარების მიღებას და მდგრად ცეცხლის შეწყვეტას“, – განუცხადა ქემერონმა ლორდთა პალატას.

სისხლის სამართლის საერთაშორისო სასამართლოს პროკურორი კარიმ ხანი ისრაელის პრემიერ-მინისტრის, ბენიამინ ნეთანიაჰუს და თავდაცვის მინისტრის, იოავ გალანტის, ასევე „ჰამასის“ სამი ლიდერის დაკავების ორდერის გაცემას ითხოვს.

პირველადი შეფასებებიდან ჩანს, რომ ვენეციის კომისიის დასკვნაში პოლიტიკური მოტივაცია მეტია, ვიდრე სამართლებრივი, არის რიგი ფაქტობრივი დამახინჯებები -ირაკლი ქადაგიშვილი

პირველადი შეფასებებიდან ჩანს, რომ ვენეციის კომისიის დასკვნაში პოლიტიკური მოტივაცია უფრო მეტია, ვიდრე სამართლებრივი. ასევე არის მთელი რიგი ფაქტობრივი დამახინჯებები, ამას უზუსტობასაც ვერ დავარქმევთ, – ამის შესახებ საპარლამენტო უმრავლესობის წევრმა, ირაკლი ქადაგიშვილმა განაცხადა.

მისივე შეფასებით, აქედან ჩანს, რომ ეს არის ორკესტრირებული პოლიტიკური პოზიციის ნაწილი.

„ამ დასკვნის კიდევ უფრო ღრმა შესწავლა გრძელდება და შევხედავთ, კიდევ რა შეიძლება, სამართლებრივად ღირებული იყოს და ამის შემდეგ იქნება უფრო კონკრეტული საუბარი დასკვნის სამართლებრივ მხარეზე. ფასეულია თუ არა, კიდევ დრო სჭირდება, რომ საბოლოოდ იყოს ყველაფერი კარგად გაანალიზებული, მაგრამ პირველადი გაცნობა ამ სურათს ხატავს, რაზეც მოგახსენეთ“, – განაცხადა ქადაგიშვილმა.

როგორც ქადაგიშვილმა აღნიშნა, „უცხოური გავლენის გამჭვირვალობის შესახებ“ კანონი ქართულია და ქვეყნის სუვერენიტეტს ემსახურება.

„არაფერი შეცვლილა, ორი თვის განმავლობაში გვესმის, კანონი რუსულია და გაიწვიეთ, ეს პოლიტიკური განცხადებაა. სხვა არანაირი კონკრეტული სამართლებრივი შეფასება არ გვინახავს. აქედან გამომდინარე, ამასთან დაკავშირებით, ჩვენი პოზიცია ცნობილია, ეს არის ქართული კანონი, ემსახურება გამჭვირვალობას და ქვეყნის სუვერენიტეტს“, – განაცხადა ირაკლი ქადაგიშვილმა.

ვენეციის კომისიამ „უცხოური გავლენის გამჭვირვალობის შესახებ“ კანონთან დაკავშირებით შეფასება დღეს გამოაქვეყნა.

როგორი ამინდია მოსალოდნელი დღეს საქართველოში

22 მაისს ქუთაისში +27 გრადუსი და უნალექო დღეა მოსალოდნელი, ღამით კი +17 გრადუსი იქნება. ოზურგეთშიც იწვიმებს. დღისით +27 გრადუსი დაფიქსირდება, ღამით კი +15. ბათუმში დღისით ჰაერი +25 გრადუსამდე გათბება, ხოლო ღამით +15 გრადუსი დაფიქსირდება.

უნალექო დღეა ფოთშიც. დღისით +25 გრადუსი დაფიქსირდება, ღამით კი +15 გრადუსია მოსალოდნელი. ზუგდიდში დღისით ტემპერატურა +28 გრადუსს მიაღწევს, ღამით კი +13 გრადუსია ნავარაუდევი. მაღალია წვიმის ალბათობა. +26 გრადუსია მოსალოდნელი დღისით სოხუმში, ღამით +14 გრადუსი დაფიქსირდება.

მესტიაში წვიმიანი დღეა ნავარაუდები. დღისით +19 გრადუსი იქნება, ღამით კი +5 გრადუსი დაფიქსირდება. იწვიმებს ამბროლაურშიც, სადაც დღეს ჰაერი +24 გრადუსამდე გათბება, ღამით კი +9 გრადუსი დაფიქსირდება.

ჭიათურაშიც წვიმიანი დღეა. დღისით +26 გრადუსი, ღამით კი +13 გრადუსი დაფიქსირდება. ახალციხეში დღისით ჰაერი +23 გრადუსამდე გათბება, ღამით კი ტემპერატურა +6 გრადუსამდე დაიწევს.

ბორჯომშიც წვიმიანი დღეა მოსალოდნელი. დღისით +22 იქნება, ღამით კი +8 გრადუსი დაფიქსირდება. ბაკურიანში დღისით +17 გრადუსია მოსალოდნელი, ღამით +4 გრადუსი დაფიქსირდება. იწვიმებს.

გორში დღისით +23 გრადუსი, ღამის განმავლობაში კი +12 გრადუსი დაფიქსირდება. მოსალოდნელია მზიანი დღე. ცხინვალში დღისით ჰაერს ტემპერატურა +22 გრადუსი იქნება, ღამით კი +11 გრადუსი დაფიქსირდება.

გუდაურშიც იწვიმებს, დღე +13 გრადუსია ნავარაუდევი, ღამით კი ჰაერის ტემპერატურა +2 გრადუსი იქნება. ომალოში დღისით +13, ღამით კი +3 გრადუსი დაფიქსირდება. მოსალოდნელია წვიმა.

ლაგოდეხში ნალექიანი დღეა მოსალოდნელი. ჰაერის ტემპერატურა დღის განმავლობაში +22 გრადუსი იქნება, ღამით კი +12 გრადუსი დაფიქსირდება. თელავში დღისით წვიმიანი ამინდი და +21 გრადუსია მოსალოდნელი, ღამით კი +11 გრადუსია ნავარაუდევი.

გურჯაანშიც წვიმიანი დღე იქნება. დღისით +22 გრადუსი, ღამით კი +12 გრადუსი დაფიქსირდება. სიღნაღში დღისით +20 გრადუსია მოსალოდნელი, ღამით +10 გრადუსი დაფიქსირდება. იწვიმებს.

რუსთავში დღისით +22 გრადუსი და წვიმაა მოსალოდნელი, ღამით კი +12 გრადუსი დაფიქსირდება.

თბილისში ჰაერის ტემპერატურა დღისით +22 გრადუსს მიაღწევს, ღამით კი +12 გრადუსი იქნება. წვიმის ალბათობა ნაკლებია.

ენტონი ბლინკენს სენატში სიტყვით გამოსვლა პალესტინის მხარდამჭერებმა რამდენიმეჯერ შეძახილებით შეაწყვეტინეს

აშშ-ის სახელმწიფო მდივანს, ენტონი ბლინკენს სენატის საგარეო ურთიერთობათა კომიტეტზე სიტყვით გამოსვლა პალესტინის მხარდამჭერებმა შეძახილებით რამდენიმეჯერ შეაწყვეტინეს.

„მას ხელებზე სისხლი აქვს“, „ომის დამნაშვე“, – სკანდირებდნენ პალესტინის მხარდამჭერები.

პოლიციამ მომიტინგეებს სენატის შენობა მალევე დაატოვებინა.

ამასთან, გამოსვლისას ენტონი ბლინკენმა ისრაელის მიმართ მხარდაჭერა კიდევ ერთხელ გამოხატა და აღნიშნა, რომ შეერთებული შტატები ორიენტირებულია ღაზაში ჰუმანიტარული კრიზისის შემსუბუქებაზე.

„ჩვენ ვდგავართ ისრაელის გვერდით მათ ძალისხმევაში, რომ ის, რაც 7 ოქტომბერს მოხდა, აღარასოდეს განმეორდეს. ყველაფერს ვაკეთებთ, რათა ბოლო მოეღოს ღაზაში ადამიანთა საშინელ ტანჯვას და თავიდან ავიცილოთ კონფლიქტის გავრცელება. აშშ-ის პრეზიდენტმა მკაფიოდ აღინიშნა, ისრაელთან როგორც საჯაროდ, ასევე სხვებთან საუბარში, რომ ჩვენ არ დავუჭერთ მხარს რაფაჰში მასშტაბურ სამხედრო ოპერაციას“, – აღნიშნა ბლინკენმა გამოსვლისას.

მისივე განცხადებით, ბაიდენის ადმინისტრაცია სიამოვნებით იმუშავებს კონგრესთან, რათა ჩამოაყალიბონ პასუხი ისრაელის ლიდერების წინააღმდეგ დაპატიმრების ორდერის გაცემასთან დაკავშირებით.

დღეს ქართული მართლმადიდებელი ეკლესია ნიკოლოზობას ზეიმობს

22 მაისი ნიკოლოზ სასწაულმოქმედის წმინდა ნაწილების მირონლუკიიდან ბარში გადასვენების დღეა.
წმინდა ნიკოლოზი მცირე აზიაში, ლუკიის მხარის ქალაქ პათარაში, ქრისტეს შობიდან 257 წელს დაიბადა. მან სასწაულმოქმედების უნარი ბავშვობიდანვე გამოამჟღავნა. ყრმობიდანვე ღრმად შეისწავლა საღმრთო წერილი, მთელი დღე ტაძარში ატარებდა და ღამით ლოცულობდა. პათარის ეპისკოპოსმა იგი ჯერ მედავითნედ დანიშნა, შემდეგ კი მღვდლად აკურთხა. სულიწმიდით აღვსილმა მღვდელმთავარმა ამ დღეს ასე მიმართა ხალხს: „ ძმანო, მე ვხედავ ახალ მზეს, ამომავალს ქვეყნად, რომელი მონანულთა ნუგეშს მოჰფენს. კურთხეულ არს სამწყსო, რომლის მოძღვარიც იგი იქნება, რამეთუ ცოდვილთა სულებს კეთილად უწინამძღვრებს და ჭირთა შინა შემწედ მოევლინება“.

წმინდანი დიდი სიყვარულით შეუდგა დაკისრებულ მოვალეობის შესრულებას. მშობლების გარდაცვალების შემდეგ, მათგან მემკვიდრეობით მიღებული ქონება ღარიბებს დაურიგა. ცდილობდა, არცერთი ადამიანის გაჭირვება და უბედურება არ გამორჩენოდა მხედველობიდან. იგი დაუღალავად ქადაგებდა ღვთის სიტყვას, თავადაც მაგალითი იყო ქრისტიანული ცხოვრებისა და მოღვაწეობისა. წმინდანის ცხოვრება ღვთაებრივი ნათლით იყო გაბრწყინებული. მის ლოცვასა და შემწეობას მრავალი ადამიანი უხსნია ხორციელი თუ სულიერი სიკვდილისგან, მრავალი გადაურჩენია ზღვაში დახრჩობას და მრავალიც განუკურნავს.

წმინდა ნიკოლოზმა სარწმუნოებისთვის დევნა და პატიმრობაც დაითმინა. 325 წელს , იგი ნიკეის I მსოფლიო საეკლესიო კრებაზე მონაწილეობდა, სადაც სამების ერთარსობების დოგმატი დაამტკიცეს. კრების სხვა 318 წმინდა მამასთან ერთად, იგი შეურიგებლად ამხელდა იმ ხანებში ფართოდ გავრცელებულ არიოზის ცრუმოძღვრებასა და ერეტიკოსების წინააღმდეგ აქტიურად იბრძოდა.

წმინდანი 342 წლის 6 დეკემბერს, 85 წლის ასაკში მიებარა უფალს. ადგილობრივ საკათედრო ტაძარში მისი წმინდა ნაწილები დიდხანს უხრწნელად იყო დაცული. მათგან წმინდა მირონი მოედინებოდა , რომლითაც მრავალი სასწაულებრივად იკურნებოდა. 1087 წელს , წმინდა ნაწილები იტალიის ქალაქ ბარის მცხოვრებლებმა თავიანთ ქალაქში გადაასვენეს, რადგან მირონლუკიაში მას საფრთხე დაემუქრა, მაჰმადიანების მხრიდან. წმინდა ნაწილთა გადასვენებისას მრავალი სასწაულებრივი კურნება მოხდა. ერთი წლის შემდეგ, აშენდა წმინდა ნიკოლოზის სახელობის ეკლესია, რომელიც პაპმა ურბან I I- მ აკურთხა.
ნიკოლოზობა წელიწადში ორჯერ 19 დეკემბერს და 22 მაისს აღინიშნება.

ვოლოდიმირ ზელენსკიმ ილჰამ ალიევთან უსაფრთხოებისა და თანამშრომლობის საკითხები განიხილა

უკრაინის პრეზიდენტ ვოლოდიმირ ზელენსკისა და აზერბაიჯანის პრეზიდენტ ილჰამ ალიევს შორის სატელეფონო საუბარი შედგა.

როგორც ზელენსკი სოციალურ ქსელში წერს, მხარეებმა უსაფრთხოებისა და თანამშრომლობის საკითხები განიხილეს.

„ჩვენ გვაქვს პერსპექტიული პროექტები ენერგეტიკის, ვაჭრობისა და სხვა სფეროებში. დავავალეთ გუნდებს, გაააქტიურონ სამუშაოები მათ განხორციელების მიზნით და კოორდინირება გაუწიონ მომავალ ერთობლივ ღონისძიებებს“, – წერს ზელენსკი სოციალურ ქსელში.

აზერბაიჯანის პრეზიდენტის, ილჰამ ალიევის ოფისი უკრაინის პრეზიდენტთან, ვოლოდიმირ ზელენსკისთან სატელეფონო საუბრის შესახებ ინფორმაციას ავრცელებს.

როგორც ინფორმაციაშია აღნიშნული, ორი ქვეყნის ლიდერმა ორმხრივი თანამშრომლობის საკითხები განიხილეს.

„სატელეფონო საუბრისას სახელმწიფოს მეთაურებმა რეგიონული უსაფრთხოებისა და ენერგეტიკის, ვაჭრობისა და სხვა სფეროებში ორმხრივი თანამშრომლობის საკითხები განიხილეს. საუბრისას აღინიშნა, რომ გაიცემა მითითებები ორივე ქვეყნის შესაბამის ინსტიტუტებს შორის ერთობლივი თანამშრომლობის პროექტების განსახორციელებლად“, – აღნიშნულია აზერბაიჯანის პრეზიდენტის, ილჰამ ალიევის ოფისის მიერ გავრცელებულ ინფორმაციაში.

სატელეფონო საუბრის შესახებ ინფორმაცია გაავრცელა უკრაინის პრეზიდენტმა, ვოლოდიმირ ზელენსკიმაც და აღნიშნა, რომ აზერბაიჯანის პრეზიდენტთან უსაფრთხოებისა და თანამშრომლობის საკითხები განიხილა.

1...1,0831,0841,085...2,858Page 1,084 of 2,858
ჩვენი არქივი

კონტაქტი

მის: ქ.თბილისი, მ.კოსტავას 59

ტელ: +995 32 93 44 05

ელ.ფოსტა: editor@geotimes.ge

ნავიგაცია

ონლაინ გაზეთი Geotimes.ge

დამატებითი რესურსი