„ლელოს“ პოლიტიკური მდივნის, სალომე სამადაშვილის განცხადებით, ხელისუფლება ხალხს ატყუებს, რომ ეუთო-ს საპარლამენტო ასამბლეის დოკუმენტი საქართველოს ინტერესებს ეწინააღმდეგება, სინამდვილეში კი „დოკუმენტი მტკიცედ უჭერს მხარს საქართველოს ტერიტორიულ მთლიანობას და სუვერენიტეტს“.

როგორც სამადაშვილი სოციალურ ქსელში წერს, აღნიშნული დოკუმენტი კრიტიკულად აფასებს „რუსულ კანონს“ და მოითხოვს, ეუთო-მ სრული მობილიზაცია მოახდინოს არჩევნების დაკვირვების უზრუნველსაყოფად.

მმართველი პარტია, ზუსტად რუსული პროპაგანდის ხერხებით, ანტი-ამერიკულ განცხადებებს აკეთებს – ხალხს ატყუებს, რომ ეუთო-ს საპარლამენტო ასამბლეის დოკუმენტი ეწინააღმდეგება საქართველოს ინტერესებს.

სიმართლე სხვაა – ეს დოკუმენტი მტკიცედ უჭერს მხარს საქართველოს ტერიტორიულ მთლიანობას და სუვერენიტეტს. ამავე დროს, უკიდურესად კრიტიკულად აფასებს რუსი ოლიგარქის რეჟიმის მიერ მიღებულ რუსულ კანონს, მოითხოვს, ეუთო-მ სრული მობილიზაცია მოახდინოს არჩევნების დაკვირვების უზრუნველსაყოფად და საუბრობს დემოკრატიულ გამოწვევებზე საქართველოში.

ამიტომ არ უჭერს მხარს დოკუმენტს რუსული დელეგაცია, რომელიც 26 ოქტომბრამდე ჯერ ისევ საქართველოს სახელით საუბრობს ამ ფორუმზე“,- აცხადებს სამადაშვილი.

ხალხი ზოგჯერ მართალია და ზოგჯერ ცდება – მაგალითად, მართალია, როდესაც კობახიძის მიმართ გარკვეულ პროტესტს გამოხატავენ, მაგრამ ცდება, როცა აღფრთოვანებას ქალბატონი სალომეს მიმართ გამოხატავენ, – ასე გამოეხმაურა “გირჩის” წევრი, იაგო ხვიჩია პრემიერ-მინისტრის, ირაკლი კობახიძის გამოსვლას, ღონისძიებაზე “საქართველოს მადლობა საფეხბურთო ნაკრებს”, შეკრებილი ზოგიერთი გულშემატკივრის მხრიდან უკმაყოფილო შეძახილებს

ხვიჩიას თქმით, სალომე ზურაბიშვილს რეალური საფუძველი არავისთვის არ მიუცია, რომ ის „ქართული ოცნების” და ბიძინა ივანიშვილის წინააღმდეგ იბრძვის.

„ხალხი ზოგჯერ მართალია და ზოგჯერ ცდება. მაგალითად, მართალია, როდესაც კობახიძის მიმართ გარკვეულ პროტესტს გამოხატავენ, მაგრამ ცდება, როცა აღფრთოვანებას ქალბატონი სალომეს მიმართ გამოხატავენ. იმიტომ რომ სალომე ზურაბიშვილს რეალური საფუძველი არავისთვის არ მიუცია, რომ ის „ქართული ოცნების” და ბიძინა ივანიშვილის წინააღმდეგ იბრძვის. ცხადია, რომ ზეიმის დროს ჩვენ ადამიანებს კრიტიკულ ანალიზს ვერ მოვთხოვთ, ყველანაირად ემოციური ამბავია, მაგრამ სიმართლის უგულებელყოფა არ შეიძლება. შეუძლებელია, სალომე ზურაბიშვილი განვიხილოთ, როგორც ხმალამოღებული ოპოზიციონერი და ხალხის გვერდში მდგომი. თუ ეს უნდა ქალბატონ სალომეს, მას ბევრი ინსტრუმენტები გააჩნია. მაგალითად, შეუძლებელია მას არ ესმოდეს, რომ „ქართული ოცნების” ხელისუფლება მისი სასამართლოს მეშვეობით ბევრ ადამიანს ციხეში უკანონოდ ამყოფებს. ის არაფერს არ აკეთებს ამ ხალხის ციხიდან გამოსახსნელად. ამიტომ, ჩემთვის გასაგებია ფეხბურთელების ზეიმზე რომ პოლიტიკოსს უსტვენენ, მაგრამ გაუგებარია როგორ ასხვავებენ ზოგ პოლიტიკოსს დაუსტვინონ და ზოგს არა, მაშინ როცა არც იმ მეორე პოლიტიკოსს არ გაუკეთებია იმის მეათედი, რაც ხალხისთვის შეუძლია”, – აღნიშნა ხვიჩიამ.

ეს არის ზუსტად „ფიცი მწამს ბოლო მაკვირვებსო” – ამერიკიდან გვეუბნებიან, რომ პარტნიორული ურთიერთობა უნდათ და ამ დროს რუსეთის საქმეს აკეთებენ ამ რეზოლუციის მიღებით – ცალკე წერია აფხაზეთი და ცალკე სამაჩაბლო, – ამის შესახებ „ხალხის ძალის” წევრმა, გურამ მაჭარაშვილმა ჟურნალისტებთან საუბრისას განაცხადა.

მისი თქმით, ამერიკის მხარემ ისეთი რეზოლუციის პროექტი შეიტანა, რომელსაც „ნაციონალურმა მოძრაობამაც” არ დაუჭირა მხარი.

მაჭარაშვილის განმარტებით, ასეთი ტიპის რეზოლუციები მათი მხრიდან ყოველთვის დაგმობილი იქნება.

„სამწუხაროდ, სწორედ ამ რეზოლუციაში ასეთი ტიპის ცვლილებით გამოჩნდა ვინ აკეთებს რუსეთის საქმეს და ვინ ასხამს რუსეთის წისქვილზე წყალს. ჩვენ ქართულ კანონებს ვიღებთ, ქართულ ინტერესებს ვიცავთ. გვეუბნებიან, რომ რუსეთთან ურთიერთობაში პრაგმატულები ვართ, ამ დროს, სამწუხაროდ, რეზოლუციაში ეუთოს საპარლამენტო ასამბლეაზე ამერიკის მხარემ ისეთი ცვლილებები შეიტანა, რომელიც რუსეთის წისქვილზე ასხამს წყალს. აქ ცალკე წერია აფხაზეთი და ცალკე სამაჩაბლო. ასევე, წერია რომ თურმე რუსეთი ყოფილა დაინტერესებული ამ მოლაპარაკებების მოგვარებით და მარტო რუსეთი ვერაფერს გააკეთებს. წარმოიდგინეთ, ამერიკის მხარემ შეიტანა ეს ცვლილება, რომელიც ჩვენ მეგობრობას გვიმტკიცებს და გვეუბნება, რომ დეოკუპაციის პროცესში გვეხმარება და გვსაყვედურობს, რომ რუსეთთან არ გვქონდეს რაიმე პრაგმატული პოლიტიკა და გვქონდეს სამხედრო კონფლიქტი. ეს არის რეალობა, რომელიც საზოგადოებას აუცილებლად უნდა ავუხსნათ.

თან ამერიკის მხარემ ისეთი რეზოლუციის პროექტი შეიტანა, რომელსაც კოლექტიურმა „ნაცმოძრაობამაც” კი არ დაუჭირა მხარი, რომელიც ღიად ებრძვის საკუთარ ქვეყანას. მაგრამ ეს მოღალატეობრივი რეზოლუცია იმდენად ღია იყო, რომ თვითონ “ნაცმოძრაობის” წარმომადგენლებმა არ დაუჭირეს მხარი. ეს არის ზუსტად “ფიცი მწამს ბოლო მაკვირვებსო”. ამერიკიდან გვეუბნებიან, რომ პარტნიორული ურთიერთობა უნდათ, რისთვისაც ყოველთვის მზად ვართ, და ამ დროს რუსეთის საქმეს აკეთებენ ამ რეზოლუციის მიღებით. ეს არის ორმაგი სტანდარტი, რომელსაც არ ვეთანხმებით.

ასეთი ტიპის რეზოლუციები ჩვენი მხრიდან ყოველთვის იქნება დაგმობილი, მაგრამ ეს ფაქტი ზუსტად იმას ადასტურებს, რომ ჩვენ ვიყავით და ვართ მართლები, როდესაც იმ უცხოურ ძალაზე ვსაუბრობთ, რომელიც ებრძვის საქართველოს და მის სუვერენიტეტს”, – განაცხადა გურამ მაჭარაშვილმა.

ცნობისთვის, “ქართულმა ოცნებამ” გაავრცელა ინფორმაცია, სადაც აღნიშნავს, რომ ეუთო-ს საპარლამენტო ასამბლეის რეზოლუცია შემაშფოთებელია, შესწორებები მიკერძოებულია და სახელმწიფო ინტერესების შელახვის გამო, დელეგაცია რეზოლუციის წინააღმდეგ მისცემს ხმას.

პარტიის ცნობით, რეზოლუციაში სახელწოდებით: „ეუთო-ს როლი მიმდინარე უსაფრთხოების არქიტექტურაში: საპარლამენტო პერსპექტივა“, კონკრეტული ფორმულირების შეტანა ეწინააღმდეგება საქართველოს ტერიტორიული მთლიანობის პრინციპს და ეუთო-სა და აშშ-ის გაცხადებულ პოლიტიკას.

მოვუწოდებ კომიტეტის წევრებს და ზოგადად ასამბლეას, სრული მხარდაჭერა გამოუცხადონ საქართველოს თავისუფლებისმოყვარე ხალხს და აქტიურად ჩაერთონ იმ არჩევნების სადამკვირვებლო მისიაში, რომელიც საქართველოს ევროატლანტიკურ ინტეგრაციას გადაწყვეტს, – ამის შესახებ „ერთიანი ნაციონალური მოძრაობის“ თავმჯდომარემ, თინა ბოკუჩავამ ეუთოს საპარლამენტო ასამბლეაზე სიტყვით გამოსვლისას განაცხადა.

მისი თქმით, საქართველოს ხელისუფლება ქვეყნის ევროატლანტიკური გზიდან გადახვევას ცდილობს.

„კრიტიკული ხმების ჩაგვრა ან განეიტრალება არის ის, რითაც ძლიერდებიან ავტორიტარები და ცდილობენ შეინარჩუნონ ძალაუფლება ხალხის ნების საწინააღმდეგოდ. სწორედ ამ ჩაგვრის გზას ადგას საქართველოს ხელისუფლება და ცდილობს საქართველოს ევროატლანტიკური გზიდან გადახვევას. თუმცა ეს სახიფათო ცვლილება შეიძლება ოქტომბრის საკვანძო არჩევნებით შეიცვალოს და ამ კომიტეტის წევრებს და ზოგადად ასამბლეას მოვუწოდებ, სრული მხარდაჭერა გამოუცხადონ საქართველოს თავისუფლებისმოყვარე ხალხს და აქტიურად ჩაერთონ იმ არჩევნების სადამკვირვებლო მისიაში, რომელიც საქართველოს ევროატლანტიკურ ინტეგრაციას გადაწყვეტს“, – განაცხადა თინა ბოკუჩავამ, რომლის კომენტარსაც „ნაციონალური მოძრაობა“ ავრცელებს.

„ნაციონალური მოძრაობის“ ინფორმაციითვე, ეუთოს საპარლამენტო ასამბლეაზე, ასევე სიტყვით გამოვიდა სენატორ უოკერი, რომელმაც განაცხადა, რომ „საქართველოს მმართველი პარტია ღიად უპირისპირდება ქართველი ხალხის დემოკრატიულ და ევროპულ არჩევანს“.

„ძალაუფლების შენარჩუნების სურვილითაა ნაკარნახევი თავდასხმები სამოქალაქო საზოგადოებაზე, დემოკრატიული ინსტიტუტების განადგურება და რაც მთავარია, „უცხოელი აგენტების შესახებ“ რუსული სტილის კანონის მიღება, საქართველოს ყველაზე სანდო პარტნიორებზე თავდასხმებთან ერთად. ამ ორგანიზაციამ მსგავსი ქმედებები ერთხმად უნდა დაგმოს“, – განაცხადა სენატორმა, რომლის თარგმანსაც „ერთიანი ნაციონალური მოძრაობა“ ავრცელებს.

როდესაც შენს მოქალაქეებზე ფიზიკურად და ფსიქოლოგიურად ძალადობ, შემდეგ ეს რეაქცია აღარ უნდა გაგიკვირდეს, – ასე გამოეხმაურა „გახარია საქართველოსთვის” წევრი, მიხეილ დაუშვილი, გუშინდელ შემთხვევას, როდესაც პრემიერ-მინისტრის, ირაკლი კობახიძის ღონისძიებაზე „საქართველოს მადლობა საფეხბურთო ნაკრებს“ გამოსვლას შეკრებილი ზოგიერთი გულშემატკივრის მხრიდან უკმაყოფილო შეძახილები მოჰყვა.

მისი თქმით, ეს „ქართული ოცნების“ ქცევის შედეგია.

„როდესაც შენს მოქალაქეებზე ფიზიკურად და ფსიქოლოგიურად ძალადობ, შემდეგ ეს რეაქცია აღარ უნდა გაგიკვირდეს. ეს მოხდა გუშინ. ეს არის იმის შედეგი, როგორც იქცეოდა, განსაკუთრებით ბოლო რამდენიმე თვე, იქცეოდა „ოცნება“. კობახიძეზე რა გითხრათ – რაც არის, ეგ არის.

ჩვენს მოქალაქეებს ძალიან კარგი ხედვა აქვთ, ვინ არის კატეგორიულად მიუღებელი და ვინ მისაღები ფიგურა.

საერთოდ, არანაირი ძალადობა უკვალოდ და უშედეგოდ არ ქრება. ეს არის იმ აგრესიისა და ძალადობის კონკრეტული შედეგი, რომელიც „ოცნებამ“ ჩვენი მოქალაქეების მიმართ განახორციელა. გუშინ ამის შედეგი დავინახეთ.

ცალსახად მინდა გითხრათ, რომ ეს ძალიან სამწუხაროა. “ოცნება” რა დონემდე დაეშვა, რომ ეს ვნახეთ გუშინ და როგორი მიუღებელი გახდა ხალხისთვის”, – განაცხადა დაუშვილმა.