ეროვნული ნაკრების წევრი ნიკა კვეკვესკირი პოლონეთში გაემგზავრა, სადაც თავის კლუბს, „ლეხ პოზნანს“ შეუერთდება. გამგზავრებამდე მან გულშემატკივრებს მხარდაჭერისთვის კიდევ ერთხელ გადაუხადა მადლობა.

„ევროპის ჩემპიონატზეც ვგრძნობდით საქართველოდან წამოსულ პოზიტიურ ენერგიას. სოციალურ ქსელებში ძალიან ბევრ ვიდეოს ვხედავდით, რაც ენერგიით გვავსებდა ჩემპიონატის დროსაც, მაგრამ აქ რაც მოხდა, ყველანაირ მოლოდინს გადააჭარბა. მე მგონი სრული სიგიჟე იყო, რაც ქართველმა გულშემატკივრებმა შეძლეს და კიდევ ერთხელ გაგვაოცეს ჩვენ, ფეხბურთელები და ალბათ მთელი საფეხბურთო ევროპა, იმიტომ რომ ყველგან გავრცელდა ეს კადრები და ყველა შოკში იყო დადებითად, იმით თუ რამდენად უყვართ საქართველოში ფეხბურთი.

რაც შეეხება წასვლას, ასეთი რთული არასოდეს ყოფილა საქართველოს დატოვება, იმიტომ რომ მიხარია, რომ ჩვენს ერს ვხედავ ბედნიერს, ერთიანს და პოზიტიური ენერგიით სავსეს. კიდევ ერთხელ დიდი მადლობა ქართველ გულშემატკივარს ამისთვის“, – განაცხადა კვეკვესკირმა.

ბოლნისის მუნიციპალიტეტში, საქართველოს თავდაცვის ძალების კუთვნილი სუ-25 ტიპის საფრენი აპარატის კატასტროფის ადგილზე, თავდაცვის სამინისტროს სამხედრო პოლიციის დეპარტამენტის წარმომადგენლების მიერ საგამოძიებო და საპროცესო მოქმედებები დასრულდა. ამის შესახებ ინფორმაციას თავდაცვის სამინისტრო ავრცელებს.

მათივე ცნობით, ტერიტორია დატოვეს თავდაცვის ძალების წარმომადგენლებმა და შინაგან საქმეთა სამინისტროს დანაყოფებმა.

„საქმეზე ობიექტური ჭეშმარიტების დადგენის მიზნით, მტკიცებულებების შესაგროვებლად შესაბამისი სამუშაოები 24 საათიან რეჟიმში რამდენიმე ჰექტარ ტერიტორიაზე მიმდინარეობდა.

ექსპერტ-კრიმინალისტების მონაწილეობით მოხდა შემთხვევის ადგილის დეტალური დათვალიერება. შედეგად, ნანახი და ამოღებულია საქმისთვის მნიშვნელოვანი მტკიცებულებები. იდენტიფიცირებულია საფრენი აპარატის ნაწილები და ნაპოვნია შავი ყუთი.

გამოძიების ფარგლებში ამოღებულია მნიშვნელოვანი დოკუმენტაცია, გამოიკითხნენ მოწმეები. დანიშნულია საინჟინრო-ტექნიკური ექსპერტიზა. დაგეგმილია ქიმიური, ბალისტიკური და ვიდეო-ტექნიკური ექსპერტიზები.

მომხდარი ფაქტის გამომწვევი მიზეზების დადგენის მიზნით, თავდაცვის სამინისტროს სამხედრო პოლიციის დეპარტამენტის მიერ, გრძელდება საგამოძიებო, საპროცესო მოქმედებები გენერალური პროკურატურის ზედამხედველობით. მომხდართან დაკავშირებით სისხლის სამართლის საქმე აღძრულია 401-ე მუხლით.

თავდაცვის სამინისტრო კიდევ ერთხელ გამოხატავს ღრმა მწუხარებას თავდაცვის ძალების ავიაციისა და საჰაერო თავდაცვის სარდლობის პილოტის, ვიცე-პოლკოვნიკ კახაბერ ზურაბაშვილის დაღუპვის გამო და უსამძიმრებს მის ოჯახსა და ახლობლებს“, – ნათქვამია სამინისტროს განცხადებაში.

4 ივლისს ქუთაისში უნალექო დღეს და +37 გრადუსია მოსალოდნელი, ღამით კი +22 გრადუსი იქნება. ოზურგეთში დღისით +37 გრადუსი და მცირე ღრუბლიანობა დაფიქსირდება, ღამით კი +22. ბათუმში დღისით ჰაერი +36 გრადუსამდე გათბება, ხოლო ღამით +23 გრადუსი დაფიქსირდება. დღე უნალექო იქნება.

უნალექო დღეა ფოთში. დღისით +37 გრადუსი დაფიქსირდება, ღამით კი +24 გრადუსია მოსალოდნელი. მზიანი დღეა ზუგდიდშიც, სადაც დღისით ტემპერატურა +38 გრადუსს მიაღწევს, ღამით კი +22 გრადუსია ნავარაუდევი. +35 გრადუსია მოსალოდნელი დღისით სოხუმში, ღამით +22 გრადუსი დაფიქსირდება.

მესტიაში უნალექო დღეა ნავარაუდები. დღისით +27 გრადუსი იქნება, ღამით კი +12 გრადუსი დაფიქსირდება. ამბროლაურში დღეს ჰაერი +33 გრადუსამდე გათბება, ღამით კი +17 გრადუსი დაფიქსირდება.

ჭიათურაშიც უნალექო დღეა. დღისით +35 გრადუსი, ღამით კი +18 გრადუსი დაფიქსირდება. ახალციხეში დღისით ჰაერი +33 გრადუსამდე გათბება, ღამით კი ტემპერატურა +12 გრადუსამდე დაიწევს. იწვიმებს.

ბორჯომშიც წვიმა არის მოსალოდნელი. დღისით +34 იქნება, ღამით კი +14 გრადუსი დაფიქსირდება. ბაკურიანში დღისით +25 გრადუსია მოსალოდნელი, ღამით +10 გრადუსი დაფიქსირდება. იწვიმებს.

გორში დღისით +34 გრადუსი, ღამის განმავლობაში კი +17 გრადუსი დაფიქსირდება. დღე უნალექო იქნება. ცხინვალში დღისით ჰაერს ტემპერატურა +33 გრადუსი იქნება, ღამით კი +16 გრადუსი დაფიქსირდება.

გუდაურში იწვიმებს, დღე +22 გრადუსია ნავარაუდევი, ღამით კი ჰაერის ტემპერატურა +10 გრადუსი იქნება. ომალოში დღისით +21, ღამით კი +10 გრადუსი დაფიქსირდება. მოსალოდნელია წვიმა.

ლაგოდეხში წვიმა ელჭექით არის მოსალოდნელი. ჰაერის ტემპერატურა დღის განმავლობაში +32 გრადუსი იქნება, ღამით კი +22 გრადუსი დაფიქსირდება. თელავში დღისით წვიმიანი ამინდი და +33 გრადუსია მოსალოდნელი, ღამით კი +21 გრადუსია ნავარაუდევი.

გურჯაანშიც წვიმიანი დღე იქნება. დღისით +35 გრადუსი, ღამით კი +21 გრადუსი დაფიქსირდება. სიღნაღში დღისით +34 გრადუსია მოსალოდნელი, ღამით +20 გრადუსი დაფიქსირდება. იწვიმებს.

რუსთავში დღისით +35 გრადუსი და წვიმაა მოსალოდნელი, ღამით კი +22 გრადუსი დაფიქსირდება.

თბილისში ჰაერის ტემპერატურა დღისით +35 გრადუსს მიაღწევს, ღამით კი +21 გრადუსი იქნება. მოსალოდნელია წვიმა.

ვერძი

გირჩევთ ამბიციები მოთოკოთ, თორემ შედეგის ნაცვლად, პრობლემებს მიიღებთ. მშვენიერი დღეა შინაგანი პოტენციალის გამოსავლენად. გადაღლის გამო მოსალოდნელია ქრონიკული დაავადების გამწვავება. დაივიწყეთ სიჯიუტე და ნერვიულობა, რასაც ცუდი შედეგები მოჰყვება. ამ დღეს მიღებული ინფორმაცია აუცილებლად გამოგადგებათ. მალე იპოვით შესაძლებლობას, რომ საკუთარი ცოდნა ფულად აქციოთ.

კურო

თქვენს წამოწყებებს დიდი მომავალი აქვს. ეს როგორც სამსახურს, ისე პირად ურთიერთობებსაც ეხება. ამ დღეს საყვარელ ადამიანს ახალი, ძალიან მიმზიდველი მხრიდან დაინახავთ. ეცადეთ რომანტიკული განწყობა რაც შეიძლება დიდხანს შეინარჩუნოთ და უსაზღვრო ბედნიერების განცდა დიდხანს გაგყვებათ. ინტიმურ ურთიერთობებში გირჩევთ ვნებები მოთოკოთ.

ტყუპები

გირჩევთ დრო და სასიცოცხლო ენერგია უსარგებლოდ არ დახარჯოთ. ამ კვირაში ყველა ჩანაფიქრს განახორციელებთ, განსაკუთრებით იმას, რომელიც მოგზაურობას და ბიზნესს ეხება. ეცადეთ გარშემო მყოფთა კრიტიკულ კომენტარებს ყურადღება არ მიაქციოთ და ასეთი კომენტარების გაკეთებას თავადაც მოერიდოთ. დროა, გუნდური თამაშის წესები ისწავლოთ, რადგან შექმნილი ვითარება თქვენგან გუნდურ თამაშს მოითხოვს.

კირჩხიბი

ამ დღეს უამრავი საქმე გაქვთ გასაკეთებელი. გირჩევთ სიმტკიცე გამოიჩინოთ და უარი თქვათ ყველაფერზე, რაც გამძიმებთ და კმაყოფილებას არ მოაქვს. წარმატების მისაღწევად გირჩევთ გავლენიან მეგობრებს მხარდაჭერისთვის მიმართოთ – ისინი უარს არ გეტყვიან. თუ მოგზაურობას გეგმავთ, დღეს ამისთვის საუკეთესო დროა. მოგზაურობისას შეიძლება ახალი იდეა გეწვიოთ, რომელსაც მოგვიანებით განახორციელებთ.

ლომი

პლანეტების ხელსაყრელი განლაგების წყალობით ყველაზე რთულ და დახლართულ საქმესაც კი ადვილად უმკლავდებით. ეცადეთ, რაღაც ახალი ისწავლოთ – შეძენილი ცოდნა და უნარები ძალიან მალე გამოგადგებათ. შეგიძლიათ მნიშვნელოვანი ფინანსური საკითხები მოაგვაროთ – როდესაც საქმე ფულს ეხება, თქვენი ინტუიცია განსაკუთრებით კარგად მუშაობს.

ქალწული

საკმაოდ დაძაბული დღეა. გირჩევთ ცვლილებებისთვის მოემზადოთ და ცვალებად გარემოებებთან შეგუება ისწავლოთ. ფინანსური მდგომარეობის უმნიშვნელო გაუმჯობესება გელით. თუ ვინმე თქვენი ყურადღების მიპყრობას დაჟინებით ცდილობს, ფხიზლად უნდა იყოთ – სავარაუდოდ, ის თქვენი ნდობის მოპოვებას ცდილობს, რათა საკუთარი მიზნებისთვის გამოგიყენოთ. საღამოს საყვარელ ადამიანთან ერთად დროს სასიამოვნოდ გაატარებთ.

სასწორი

დამღლელი დღეა. ურთიერთობების შესანარჩუნებლად დიდი ძალისხმევა უნდა გამოიჩინოთ. თავი შეიკავეთ დაპირებების მიცემისგან, რადგან მათი შესრულება გაგიჭირდებათ. სანამ გადაღლა ნერვიულ სტრესამდე მიგიყვანთ, გირჩევთ ხელმძღვანელობას დაელაპარაკოთ და პასუხისმგებლობის ნაწილი კოლეგებს გაუნაწილოთ.

მორიელი

ამ დღეს უფრო საკუთარი სიამოვნებისთვის მუშაობთ, ვიდრე შედეგისა და მოგებისთვის. თქვენი მუშაობის შედეგები ღირსეულად დაფასდება, მაგრამ მომდევნო დღეებში შეიძლება თქვენს ავტორიტეტს საფრთხე დაემუქროს. დღის მეორე ნახევარში საყვარელი საქმიანობა და ძველი მეგობრები დაგეხმარებიან ემოციურად განიტვირთოთ და სამსახურის პრობლემები დაივიწყოთ.

მშვილდოსანი

ამ დღეს ჯანმრთელობას განსაკუთრებული ყურადღება უნდა მიაქციოთ. ეცადეთ დილა შრომატევადი საქმეებით არ დაიწყოთ, თორემ საღამოს დაღლილობას ვერ გაუმკლავდებით. მოსალოდნელია თავის ტკივილი და საჭმლის მომნელებელი სისტემის პრობლემები. დღის განმავლობაში მოსაწყენი სამუშაოს შესრულება მოგიწევთ, მაგრამ მიზნის მისაღწევად ეს მნიშვნელოვანი იქნება.

თხის რქა

ძალიან რთული დღეა. მოთმინება გამოიჩინეთ, რომ დღე მშვიდობიანად დაასრულოთ. ადამიანები, რომლებსაც დღეს შეხვდებით, უსიამოვნო ენერგიას ატარებენ. მცირე პრობლემების გამო ნუ შეშინდებით – მალე ყველაფერი მოგვარდება და გამარჯვებას მიაღწევთ. გაუფრთხილდით ჯანმრთელობას და ნუ გადაიღლებით. ახალ ნაცნობებს მოერიდეთ და საღამო ძველ მეგობრებთან ერთად გაატარეთ.

მერწყული

ამ დღეს მთავარია, ნაჩქარევი გადაწყვეტილება არ მიიღოთ. საკუთარი თავით კმაყოფილი ხართ და ყველაფერი გამოგდით. გეგმის განხორციელებაში კოლეგები დაგეხმარებიან, თქვენ კი ეცადეთ, რომ იმედი არ გაუცრუოთ. საქმიან ქაღალდებთან მუშაობის დროს და ძვირფას ნივთებთან განსაკუთრებული სიფრთხილე უნდა გამოიჩინოთ – მოსალოდნელია შეცდომები და ფინანსური ზარალი. ეცადეთ მავნე ჩვევებისგან გათავისუფლდეთ, რომლებიც საყვარელ ადამიანთან ურთიერთობას აფუჭებს.

თევზები

ვარსკვლავები გაფრთხილებენ, რომ დღევანდელი მუშაობა სასურველ შედეგს ვერ მოგიტანთ. შრომისმოყვარეობისა და პასუხისმგებლობით სავსე დამოკიდებულების მიუხედავად, სიტუაციის თქვენს სასარგებლოდ შემობრუნებას ვერ შეძლებთ. დღის მეორე ნახევარში მოგეცემათ შანსი, რომლითაც აუცილებლად უნდა ისარგებლოთ. საყვარელი საქმიანობა და ძველი მეგობრები დაგეხმარებათ ემოციურად განიტვირთოთ და სამსახურის პრობლემები დაივიწყოთ.