ამ კანონით, თქვენი მიზანი არის თუ არა ევროკავშირზე უარის თქმა? – მთელი ამ დროის განმავლობაში, ტყუილის ტირაჟირება, რომ თითქოს რაიმე არის გაუმჭვირვალე – აქვს თუ არა სახელმწიფოს რაიმე ინსტრუმენტი და თუ აქვს, მაშინ ეს კანონი რა საჭიროა? – ამ კითხვით მიმართა „ერთიანი ნაციონალური მოძრაობის“ თავმჯდომარემ ლევან ხაბეიშვილმა, იურიდიული კომიტეტის სხდომაზე უმრავლესობის ლიდერს, მამუკა მდინარაძეს.

ლევან ხაბეიშვილმა მდინარაძეს ასევე მიმართა კითხვით კანონის მიზანთან დაკავშირებით – „არსებობს თუ არა ერთი ფაქტი, როდესაც რაიმე გადარიცხვა იყო არასწორი, კორუფციული, ან იყო ისეთი შემთხვევა, იყო ისეთი თანხა, რომელიც მოხმარდა სახელმწიფოსთვის საშიშ რაიმე მოქმედებას”.

„მიზანი, ამბობთ, რომ არის გამჭვირვალობა, მე გეკითხებით და უპასუხეთ მოქალაქეებს – არსებობს თუ არა და აქვს თუ არა სახელმწიფო უწყებებს შესაძლებლობა, ინსტრუმენტები იმის, რომ ყველა გადარიცხვა იყოს გამჭვირვალე? ეს არსებობს და დაადასტურეთ. შეუძლია თუ არა ფინანსთა სამინისტროს უზრუნველყოს ყველა ტრანზაქციის ნახვა საჭიროების შემთხვევაში? აბსოლუტურად ყველა გადარიცხვის.

მიზანთან დაკავშირებით ასევე – როდესაც ამბობთ, რომ პრობლემაა გაურკვეველი ფინანსები, ამას ამბობთ სიტყვიერად, როდესაც მიზნებიდან ამოდიხართ, თურმე ვიღაც ამ ფულს სხვა მიზნებისთვის იყენებს – არსებობს თუ არა ერთი ფაქტი მაინც, მოიყვანეთ ერთი მაგალითი, შინაგან საქმეთა სამინისტროს, სახელმწიფო უსაფრთხოების სამსახურს, ფინანსთა სამინისტროს, საგამოძიებო უწყებებს – არსებობს თუ არა ერთი ფაქტი, რომ რაიმე გადარიცხვა იყო არასწორი, რომ რაიმე იყო კორუფციული, ან იყო ისეთი შემთხვევა, იყო ისეთი თანხა, რომელიც მოხმარდა სახელმწიფოსთვის საშიშ რაიმე მოქმედებას – არსებობს თუ არა ასეთი ერთი ფაქტი, დაასახელეთ.

ასევე, როდესაც საუბრობთ მიზნებთან დაკავშირებით, გეცოდინებათ უნგრეთის მაგალითი, შემდეგ ევროპულმა სასამართლომ ეს კანონი გააუქმა, ამიტომ თავიდან რაც დავსვი შეკითხვა, მივდივარ ისევ იქ.

პირველი – მთელი ამ დროის განმავლობაში, ტყუილის ტირაჟირება, რომ თითქოს რაიმე არის გაუმჭვირვალე, გაქვთ თუ არა რაიმე ინსტრუმენტი, სახელმწიფოს სადმე არ აქვს და თუ აქვს, მაშინ ეს კანონი რა საჭიროა? უნდა უპასუხოთ ხალხს.

მეორე – თუ დანაშაული დადგა, ერთი მოიყვანეთ ფაქტად.

მესამე – მიზნებზე როდესაც საუბრობთ, თქვენი მიზანი, გაცხადებული, არის თუ არა ამ კანონით ევროკავშირზე უარის თქმა?“- განაცხადა ლევან ხაბეიშვილმა.

„ამას სიკვდილი, იმას ჩამოხრჩობა” გამახსენდა. არის ასეთი კარგი მულტფილმი. რა დაგემართათ, ცენზურას ნუ აწესებთ! – ასე მიმართა ოპოზიციონერმა დეპუტატმა თეონა აქუბარდიამ იურიდიულ საკითხთა კომიტეტის თავმჯდომარე ანრი ოხანაშვილს, რომელიც ოპოზიციონერ დეპუტატებს, მისი ნებართვის გარეშე საუბრის შემთხვევაში, მიკროფონის გათიშვისა და დარბაზის დატოვების შესახებ აფრთხილებს.

პარლამენტში, იურიდიულ საკითხთა კომიტეტზე, სადაც „უცხოური გავლენის გამჭვირვალობის შესახებ“ კანონპროექტი მეორე მოსმენით განიხილება, ოპოზიციასა და ქართული ოცნების“წარმომადგენლებს შორის სიტყვიერი დაპირისპირების ფონზე მიმდინარეობს. სხდომის თავმჯდომარემ ანრი ოხანაშვილმა ოპოზიციონერ დეპუტატებს მოუწოდა, რომ ისაუბრონ მხოლოდ კანონპროექტზე და შესაბამის მუხლებზე, წინააღმდეგ შემთხვევაში კი, მათ მიკროფონით სარგებლობის საშუალება ჩამოერთმევათ.

„სხდომის ჩაშლის მცდელობა ვისაც ექნება, გამოვიყენებ რეგლამენტით ყველა პროცედურას. თუ გსურთ, მეორე მოსმენით დადგენილი წესით ვიმსჯელოთ, აქ ამისთვის ვართ შეკრებილი. ამიტომ, გთხოვთ, მიკროფონის გარეშე საუბარს თავი დავანებოთ. ყველას მოგეცემათ საშუალება, რომ შეკითხვები დასვათ“, – მიმართა ოხანაშვილმა დეპუტატებს.

„პირველ რიგში, ძალიან დიდი მადლობა, რომ ქალბატონო და ბატონოთი მოგვმართეთ და არა, “ძვირფასო კოლეგებოთი“, – მიმართა ოხანაშვილს ანი წითლიძემ.

თავად ოხანაშვილმა კი, წითლიძეს მოუწოდა, რომ თუ მუხლთან დაკავშირებით არ დასვამდა შეკითხვას, მიკროფონით სარგებლობის საშუალებას ჩამოერთმეოდა. საბოლოო ჯამში კი, ანი წითლიძეს სხდომაზე მიკროფონით გამოსვლის საშუალება ჩამოერთვა. ამის შემდგომ სიტყვით გაოსვლის საშუალება მიეცა კიდევ ერთ ოპოზიციონერ დეპუტატს, თეონა აქუბარდიას, რომელსაც ასევე მხოლოდ შესაბამის მუხლთან დაკავშირებით საუბრისკენ მოუწოდა ოხანაშვილმა.

„ამას სიკვდილი, იმას ჩამოხრჩობა” გამახსენდა. ასეთი კარგი მულტფილმი არის… ნუ ნერვიულობთ, კარგი, რა დაგემართათ. ცენზურას ნუ აწესებთ“, – მიმართა აქუბარდიამ ოხანაშვილს, რის შემდეგაც მამუკა მდინარაძესთან კითხვით გადავიდა:

„სანამ თავს წამაცლიდნენ, იქნებ, კითხვის დასმა მოვასწრო. პირველი მუხლის ორივე პუნქტთან დაკავშირებით მაქვს კითხვა. პირველ რიგში, რას ნიშნავს, უცხოური ძალის ინტერესის გატარება, როდესაც მოცემულობაში ვიცით, რომ მაგალითად რუსეთი, რომელიც არის ოკუპანტი ქვეყანა, ის პირდაპირ ფინანსურ გადმორიცხვებს ვერ აკეთებს საქართველოში და შესაბამისად, ეს კანონი არ ეხება რუსეთს და ეხება ამ შემთხვევაში, დასავლურ ფონდებს. ამ მოცემულობაში ვის წინააღმდეგ არის ეს კანონი? კიდევ ერთხელ ნათლად, თუ განმარტავთ“, – განაცხადა აქუბარდიამ.

იურიდიულ საკითხთა საპარლამენტო კომიტეტის თავმჯდომარე ანრი ოხანაშვილმა ოპოზიციონერი დეპუტატი გიორგი ვაშაძე სხდომიდან გააძევა.

ანრი ოხანაშვილის განმარტებით, მისი არაერთგზის მოწოდების მიუხედავად, გიორგი ვაშაძე რეგლამენტს მუდმივად არღვევდა.

„ბატონო გიორგი, დატოვეთ სხდომათა დარბაზი! არა ერთგზის მოგიწოდეთ, რომ მიკროფონის გარეშე არ გესაუბრათ. გაგაფრთხილეთ რამდენჯერმე, გთხოვთ, გაბრძანდით! გთხოვთ, დატოვეთ სხდომათა დარბაზი!“ – მიმართა ოხანაშვილმა ვაშაძეს, რაზეც კომიტეტის თავმჯდომარეს უპასუხა: „ჩუმად ვიჯდები“.

„არა, არა პროცედურას ნუ არღვევთ-მეთქი არაერთგზის გთხოვეთ. ყველაფერს აქვს თავისი წესი. დატოვეთ დარბაზი!“ – განაცხადა ოხანაშვილმა.

კომიტეტის სხდომაზე „უცხოური გავლენის გამჭვირვალობის შესახებ“ კანონპროექტი მეორე მოსმენით, მუხლობრივად იხილება.

არის დრო ერთად დგომის და შემართების, შენი არჩევანის დაცვის, შენი განვლილი ცხოვრების და ბრძოლის შეფასების, შენი ხვალინდელი დღის რწმენის გამოხატვის, შენთვის ძვირფასის და სანუკვარის შენარჩუნების, – ამის შესახებ საქართველოს პარლამენტის თავმჯდომარე შალვა პაპუაშვილი წერს.

როგორც შალვა პაპუაშვილი აღნიშნავს, ქართველი ერი ღირსეული და ბრძენია, მოთმინებით და ჭკუით შეჰყურებს ათას „კეთილმოსურნეს” და ელოდება თავის დროს, რადგან იცის რომ სიმართლე უძლეველია.

მისი თქმით, დადგა დრო, ამ ქვეყნის შვილები დავდგეთ ერთად, შევიგრძნოთ ეს „უდიდებულესი წამი” და ვთქვათ – ძალა ერთობაშია.

„არის დრო ერთად დგომის და შემართების, შენი არჩევანის დაცვის, შენი განვლილი ცხოვრების და ბრძოლის შეფასების, შენი ხვალინდელი დღის რწმენის გამოხატვის, შენთვის ძვირფასის და სანუკვარის შენარჩუნების, სიყვარულის და თანადგომის გამოხატვის მათ მიმართ, ვისთანაც გაერთიანებს ერთი სიტყვა – სამშობლო.

არც ისე ხშირად, თუმცა საქართველოს უახლეს ისტორიაში რამდენჯერმე, დამდგარა დრო ერის ერთობის აუცილებლობის, და ყოველ ასეთ დროს საქართველომ დაამტკიცა რომ მას აქვს ღირსება, რომ ხიდი წარსულსა და მომავალს შორის არ ჩამტყდარა, რომ ქვეყნის გული კვლავაც მედგრად ძგერს.

ჩვენ ვიამაყებთ დღევანდელი ერთად დგომით, და ჩვენ შვილებს ვეტყვით, რომ ვიდექით იქ, სადაც ქვეყნის დამოუკიდებლობას, მის სუვერენიტეტს, ქართულ სახელმწიფოს დასჭირდა ჩვენი ყოფნა.

ჩვენი ხალხი ღირსეული და ბრძენია, მოთმინებით და ჭკუით შეჰყურებს ათას „კეთილმოსურნეს” და ელოდება თავის დროს, რადგან იცის რომ სიმართლე უძლეველია.

დადგა დრო, ამ ქვეყნის შვილები დავდგეთ ერთად, შევიგრძნოთ ეს “უდიდებულესი წამი” და ვთქვათ – ძალა ერთობაშია.

შევხვდებით დღეს, რუსთაველის გამზირზე, ჩვენი სამშობლოს სამშვიდობოს გასაყვანად, კიდევ ერთხელ საქართველოს დასაცავად.

გაუმარჯოს დამოუკიდებელ საქართველოს!” – წერს პარლამენტის თავმჯდომარე.

მინდა მივმართო ქართულ ბიზნესს, როგორც არასდროს, ისეა საჭირო გაერთიანება და „რუსული კანონის“ დაგმობა! დაგმეთ და წინ აღუდექით საქართველოს რუსიფიკაციას! – ვერ დავუშვებთ, რომ ჩვენმა შვილებმა რუსეთის გუბერნიაში გაიღვიძონ!, – ამის შესახებ პარტია „ლელოს“ ლიდერი, მამუკა ხაზარაძე სოციალურ ქსელში წერს.

როგორც ხაზარაძე აღნიშნავს, ნათელია, რომ „რუსული კანონი“, რომლის მიღება პირდაპირი სვლაა რუსეთისკენ, სრულად დაგვაშორებს ევროპას და ევროპულ პერსპექტივას.

„მინდა მივმართო ქართულ ბიზნესს, იმ ადამიანებს, რომლებთან ერთადაც, ბოლო 30 წლის განმავლობაში უამრავი სირთულის, ომების და სხვადასხვა გამოწვევების ფონზე, მაინც მოვახერხეთ, ალბათ, შეუძლებელიც, შევქმენით წარმატებული კომპანიები, დავასაქმეთ ათასობით ადამიანი. ჩვენი კომპანიების წყალობით ივსებოდა და ივსება ბიუჯეტი, ამ ბიუჯეტით კი – ფინანსდება ჩვენი ჯარი, პოლიცია, რიგდება პენსიები, მასწავლებლების ხელფასები, იგება გზები და უამრავი რამ. ჩვენ გავუძელით თითქმის ყველა მთავრობის შემოტევას. საუბედუროდ, ამ ბიუჯეტს დღეს კორუფციონერი პოლიტიკოსები ჭამენ.

თითქმის ყველა წარმატებულ ბიზნესს ვიცნობ საქართველოში, გიცნობთ თქვენ, ვინც ამას ყოველდღიური შრომით, თქვენს თანაგუნდელებთან ერთად აშენებთ. ოთხი წელია ამ სფეროს სრულად ჩამოვშორდი, ახლა პოლიტიკაში ვარ და ერთი მიზანი მამოძრავებს – ჩემმა ხუთმა შვილმა, ისევე, როგორც ყველა თქვენგანის შვილებმა, თავისუფალ და დამოუკიდებელ საქართველოში იცხოვრონ.

ჩვენ საბჭოთა კავშირი გვახსოვს და არავის გვინდა იქ დაბრუნება. ასევე ნათელია, რომ ეს „რუსული კანონი“, რომლის მიღება პირდაპირი სვლაა რუსეთისკენ, სრულად დაგვაშორებს ევროპას და ევროპულ პერსპექტივას. ამის შესახებ მკაფიოდ გაგვაფრთხილეს ამერიკიდან, ევროპის ყველა ტრიბუნიდან, თითქმის ყველა თქვენგანის შვილები ევროპაში იღებენ განათლებას, ყველა თქვენი ძირითადი ბიზნეს კავშირი და პარტნიორი ევროპულია.

თქვენთვის კარგადაა ცნობილი, რომ საქართველოში ფინანსების, მათი წარმოშობის და მოძრაობის გამჭვირვალობის საკითხი არ დგას, რაზეც “ოცნების” ხელისუფლება აპელირებს. ეს ბლეფია, ეს მიზეზია, მიზეზი, რომ გაკონტროლდეს თავისუფალი აზრი, დაწესდეს ცენზურა და დამყარდეს ტოტალური კონტროლი, ის, რაც მოხდა რუსეთში.

ახლა სხვა გამოწვევაა, ახლა ქვეყნის გეოპოლიტიკურ ცვლილებასთან გვაქვს საქმე. ვერ დავუშვებთ, რომ ჩვენმა შვილებმა რუსეთის გუბერნიაში გაიღვიძონ!

მოგმართავთ, როგორც არასდროს, ისეა საჭირო გაერთიანება და „რუსული კანონის“ დაგმობა. დაგმეთ და წინ აღუდექით საქართველოს რუსიფიკაციას! არა, „რუსულ კანონს“! ჩვენი შვილების გვერდით დავდგეთ და ერთად გავიმარჯვოთ! თქვენი სიტყვა გადამწყვეტია!“ – წერს ხაზარაძე.

„უცხოური გავლენის გამჭვირვალობის შესახებ“ კანონპროექტს დღეს პარლამენტში, იურიდიულ საკითხთა კომიტეტზე, მეორე მოსმენით, მუხლობრივად განიხილავენ. „ერთიანმა ნაციონალურმა მოძრაობამ” და „სტრატეგია აღმაშენებელმა“ ერთობლივი განცხადება გაავრცელეს და მმართველ გუნდს მოუწოდეს, პროვოკაციებისა და სხვა გართულებების თავიდან აცილების მიზნით, საკომიტეტო მოსმენა გადადონ.

მათივე თქმით, თუ ხელისუფლება არ გაითვალისწინებს ამ გონივრულ რჩევას და არ გადადებს საკომიტეტო მოსმენას, ყველა გართულებაზე და მის შედეგზე პასუხისმგებლობა „ქართულ ოცნებას“ დაეკისრება. აღნიშნული განცხადება სახელისუფლებო პარტიისთვის იმის დასტურია, რომ ოპოზიცია შეშინებულია და დისკუსიაში შესვლის უნარი არ გააჩნიათ

გგონიათ, რომელიმე პოლიტიკოსის გამო არიან მოსული ეს ბავშვები აქ? ჩვენ იმიტომ ვართ, რომ არ გართულდეს, ჩვენ რომ არ ვიყოთ, შეიძლება, მართლა გართულდეს, – ამის შესახებ „სტრატეგია აღმაშენებლის“ წევრმა, პაატა მანჯგალაძემ პარლამენტის შენობასთან განაცხადა, სადაც აქცია მიმდინარეობს.

მისი თქმით, აქციის მონაწილეებს პარლამენტის შენობის წინ დამონტაჟებულ სცენაზე საქართველოსა და ევროკავშირის დროშების გასაკრავად უნდოდათ ასვლა.

„საკულტო ნაგებობაა, თუ რა არის, ვერ გავიგე. ადამიანებმა ითხოვეს, სამი კაცი ავალთ, გავაკრავთ საქართველოსა და ევროკავშირის დროშას და ჩამოვალთო. ამაზე მშვიდობიან აქციას მსოფლიოში ვერ ნახავ. ახალგაზრდები მღერიან, ტაშს უკრავენ. რამდენჯერ უნდა მოვიდნენ, ხომ უნდა მოუსმინოს ვიღაცამ. რა პასუხისმგებლობზეა ლაპარაკი. გგონიათ, რომელიმე პოლიტიკოსის გამო არიან მოსული ეს ბავშვები აქ? ჩვენ იმიტომ ვართ, რომ არ გართულდეს, სინამდვილეში. ჩვენ რომ არ ვიყოთ, შეიძლება, მართლა გართულდეს და რაზე ავიღო პასუხისმგებლობა. კობახიძემ აიღოს პასუხისმგებლობა“, – აღნიშნა პაატა მანჯგალაძემ.

ქართულ ჯიგრულ პონტში სცენა უნდა ეთხოვებინათ 2-3 საათით, ამის მაგივრად, დაუპირისპირდნენ ხალხს, ზუსტად ისევე, როგორც აპირებენ, ხვალ მიტინგი მოუწყონ ქართულ საზოგადოებას, – ამის შესახებ „ნაციონალური მოძრაობის“ წევრმა, პეტრე ცისკარიშვილმა განაცხადა.

ცისკარიშვილის თქმით, მთავრობა ხალხს ძალით ჩამოყვანილი საჯარო მოხელეებით უწყობს მიტინგს.

„არასანქცირებული კიარა, ეტყობა, ამათ დაავიწყდათ მათი ერთ-ერთი ყოფილი პრემიერ-მინისტრის მიდგომები, ქართულ ჯიგრულ პონტში ეს სცენა უნდა ეთხოვებინათ 2-3 საათით, რადგან აქ მოვიდა ათიათასობით ადამიანი, არ იყო გახმოვანება, ვერ ჩატარდა საპროტესტო მიტინგი, არ იყვნენ გამომსვლელები, არ ხდებოდა არაფერი, ამან გამოიწვია აგრესია. იმის მაგივრად, სცენა ეთხოვებინათ სულ რაღაც 2-3 საათით, პირიქით, დაუპირისპირდნენ ხალხს, ზუსტად ისევე, როგორც ისინი აპირებენ, ხვალ მიტინგი მოუწყონ ქართულ საზოგადოებას. ქართველ ხალხს თავისი მთავრობა უწყობს მიტინგს, აქციას, ხელოვნურად, ძალით ჩამოყვანილი საჯარო მოხელეებით“, – განაცხადა პარლამენტთან აქციაზე მყოფმა პეტრე ცისკარიშვილმა.

პარლამენტთან „უცხოური გავლენის გამჭვირვალობის შესახებ“ კანონპროექტის საწინააღმდეგო აქციაზე ვითარება რამდენჯერმე დაიძაბა. აქციის მონაწილეები პარლამენტის წინ, „ქართული ოცნების“ მიერ 29 აპრილს დაანონსებულ შეკრებასთან დაკავშირებით დამონტაჟებულ სცენასთან მისვლას ითხოვდნენ და პოლიციის კორდონის გარღვევას ცდილობდნენ.

პარლამენტთან განვითარებულ მოვლენებთან დაკავშირებით განცხადება გაავრცელა თბილისის მერიამ, სადაც აღნიშნულია, რომ არსებობს კანონის შესაბამისი გაფრთხილება, 27 აპრილიდან 30 აპრილამდე „ქართულ ოცნებას“ დაკავებული აქვს პარლამენტის მიმდებარე ტერიტორია, სადაც ეწყობა მსუბუქი კონსტრუქციის სცენა, მონტაჟდება ეკრანები და სხვადასხვა აპარატურა. მერიაში განმარტეს, რომ აქციის იმ მონაწილეთა შეკრება, რომლებიც ახლა პარლამენტთან იმყოფებიან, არის არასანქცირებული და მოუწოდეს მათ, თავი შეეკავებინათ პროვოკაციებისგან.