არსებობს ჯერ კიდევ მოუშუშებელი იარები, რომლებსაც ნამდვილად სჭირდება პარლამენტის მხრიდან შესაბამისი შეფასება და ამ მხრივ, კომისიამ, ვფიქრობ, ისტორიული მისია შეასრულა“, – ამის შესახებ პარლამენტის თავმჯდომარემ, შალვა პაპუაშვილმა პლენარულ სხდომაზე განაცხადა, სადაც პარლამენტის დროებითი საგამოძიებო კომისიის დასკვნა მოისმინეს.

მისივე თქმით,  შეიქმნა დოკუმენტი, რომელიც არის ჩვენი ქვეყნისთვის, საზოგადოებისთვის ისტორიული მასალა და უახლესი წარსულის ფაქტებზე დაფუძნებული აღწერა.

„დასკვნა, რომელიც 400 გვერდზე მეტია, ითარგმნება უცხო ენაზე იმისთვის, რომ  ხელმისაწვდომი იყოს ყველასთვის და განსაკუთრებით მათთვის, ვისაც ჯერ კიდევ რაღაც სენტიმენტები აქვს „ნაციონალური მოძრაობის“ რეჟიმთან დაკავშირებით. სამწუხაროა, რომ დღემდე სხვადასხვა, მათ შორის ხელისუფლებების წარმომადგენლების მხრიდან გვესმის არათუ „ნაციონალური მოძრაობის“ რეჟიმის სისასტიკის დაკნინება, არამედ პირიქით, შექებაც კი. ვფიქრობ, ეს არის კარგი შესაძლებლობა, მათ შორის იმ უცხოელებისთვის, რომლებმაც თავის დროზე ხელიდან გაუშვეს შანსი, რომ 2012 წელსვე სათანადოდ შეეფასებინათ ის დიქტატორული რეჟიმი, რომელიც დამყარებული იყო. ახლა, ეს არის ხელმეორე შანსი, რომელიც ეძლევა უცხოელ პოლიტიკოსებს, ხელისუფლებების თუ სხვადასხვა ორგანიზაციების წარმომადგენლებს, რომ გაიაზრონ, როგორ დანაშაულებრივ რეჟიმს უჭერდნენ მხარს თავის დროზე, მფარველობდნენ და დღემდე მფარველობს ზოგიერთი. ეს არის შანსი ქართველი ხალხის წინაშე, ქართველი ხალხის მიერ მიცემული შანსი მათთვის, რომ კიდევ ერთხელ დაგმონ ის რეჟიმი, რომელიც არსებობდა „ნაციონალური მოძრაობის“ სახით, მათ შორის ზოგიერთი უცხოური ძალის განსაკუთრებული ხელშეწყობით“, – განაცხადა შალვა პაპუაშვილმა.

პარლამენტის თავმჯდომარემ საგამოძიებო კომისიის თავმჯდომარეს თეა წულუკიანს, კომისიის წევრებს და პარლამენტის აპარატის თანამშრომლებს, რომლებიც ჩართული იყვნენ კომისიის მუშაობის პროცესში გაწეული საქმიანობისთვის  მადლობა გადაუხადა.

საგამოძიებო კომისიის დასკვნაში შესწავლილია და ფაქტებით, ინფორმაციებით ნათქვამია, რომ „ვარდების რევოლუცია“ სინამდვილეში იყო სახელმწიფო გადატრიალება, – ამის შესახებ პარლამენტის დროებითი საგამოძიებო კომისიის ხელმძღვანელმა, თეა წულუკიანმა პარლამენტში, კომისიის დასკვნის განხილვისას განაცხადა.

წულუკიანის თქმით, „2004 წლის დასაწყისშივე ძველი პარლამენტით, რომელსაც უფლებამოსილება აღარ ჰქონდა, კონსტიტუციაში შევიდა ისეთი ფუნდამენტური ცვლილებები, რომ მთლიანად დისბალანსი მოხდა მიხეილ სააკაშვილის სასარგებლოდ“.

„დასკვნაში წერია, რომ ედუარდ შევარდნაძეს დღემდე არ აქვს დაწერილი გადადგომის შესახებ განცხადება და ის არც არავის არ გადაუყენებია, თუ არ ჩავთვლით აქ მდგარ ჩაის სმას. ასევე დასკვნაში ნათქვამია, რომ ახლად არჩეული პარლამენტი შედგა და მხოლოდ ამის შემდეგ შემოიჭრნენ ე.წ. რევოლუციონერები ამ დარბაზში და მაინც ძველი პარლამენტით იქნა საკანონმდებლო საქმიანობა გაგრძელებული. ეს ყველაფერი დასკვნაში წერია. ანუ საკითხები არის დაყენებული, რაც არ არის უბრალო საქმე ისტორიისთვის და შემდეგ თუ ვინმე გადაწყვეტს, რომ ეს სამართლებრივად, პოლიტიკურად იკვლიოს, ძალიან კარგი იქნებოდა. აქაც მეცნიერების და ისტორიკოსების როლი იქნებოდა გადამწყვეტი, რადგან თქვენ იცით და ასევე დასკვნაში წერია, 2004 წლის დასაწყისშივე ძველი პარლამენტით, რომელსაც უფლებამოსილება აღარ ჰქონდა, კონსტიტუციაში შევიდა ისეთი ფუნდამენტური ცვლილებები, რომ მთლიანად დისბალანსი მოხდა მიხეილ სააკაშვილის სასარგებლოდ და ძალაუფლება მან ხელში ჩაიგდო უკვე კანონის საფუძველზე. ეს ყველაფერი დასკვნაში არის და მათ შორის უცხოურ წყაროებზე დაყრდნობით ახსნილია, რატომ ჩავთვალეთ, რომ „ვარდების რევოლუცია“ რეალურად სახელმწიფო გადატრიალება იყო. ასევე, ფაქტებზე დაფუძნებით ნათქვამია, მათ შორის ევროპული სასამართლოს გადაწყვეტილებაა მოყვანილი, რომ „ვარდების რევოლუციის“ სახელით ცნობილი სახელმწიფო გადატრიალების შემდეგ, ცესკო-მ, რომელსაც მაშინ ბატონი ჭიაბერაშვილი ხელმძღვანელობდა, ისე შეაჯამა არჩევნების შედეგები, რომ 2 კონკრეტულ ოლქში არჩევნები ჩატარებული არ იყო. თქვენ ალბათ არც კი გინდათ, წარმოიდგინოთ, რა მოხდებოდა, დღეს რომ ეს რომელიმე ჩვენგანს გაებედა ქართველი ხალხისთვის. ეს ყველაფერი დასკვნაში წერია. ასევე წერია, რომ ცესკო-ს ასეთი თავმჯდომარე ჭიაბერაშვილი, მანამდე „ვარდების რევოლუციაში“ მონაწილე პირი იყო, ვინაიდან „ისფედს“ ხელმძღვანელობდა და სწორედ ISFED-ის პარალელური დათვლის შედეგად დაიწყო რევოლუციური და გადატრიალების პროცესები.

ასევე, ჩვენ მოვუსმინეთ – მინდა, მის ხსოვნას პატივი მივაგო – ბატონ ლევან გაჩეჩილაძეს, რომელმაც ისაუბრა სწორედ 2008 წლის გაყალბებულ არჩევნებზე. არის საკითხები დაყენებული, მოხსენიებულია, მაგრამ ბოლომდე ნაკვლევი ვერ იქნებოდა, რადგან სცილდებოდა ჩვენი უფლებამოსილების და ფიზიკური შესაძლებლობების ფარგლებს, თუმცა გულდასაწყვეტი, რა თქმა უნდა, არის“, – განაცხადა თეა წულუკიანმა.

საგამოძიებო კომისიის მიერ გამოკითხულ პირთა მიერ მოწოდებული ცნობებიდან ცალსახად იკვეთება, რომ 2008 წლის აგვისტოში, ქართული ჯარი სამხედრო საქმისგან შორს მყოფი პოლიტიკოსების მიერ მართულ ომში აღმოჩნდა, – ამის შესახებ ნათქვამია პარლამენტის დროებითი საგამოძიებო კომისიის დასკვნაში, რომელიც კომისიის თავმჯდომარე თეა წულუკიანმა პარლამენტში წარადგინა.

თეა წულუკიანის თქმით, პოლიტიკოსების გადაწყვეტილებით, ძირითად მიმართულებაზე სამხედრო ამოცანის შესრულება დაევალა შინაგან საქმეთა სამინისტროს, რამაც თავდაცვის ძალებში დეზორგანიზაცია, ხოლო სამოქალაქო მოსახლეობაში გაურკვევლობა და დაუცველობა გამოიწვია.

„საგამოძიებო კომისიის მიერ გამოკითხულ პირთა მიერ მოწოდებული ცნობებიდან ცალსახად იკვეთება, რომ 2008 წლის აგვისტოში, ქართული ჯარი სამხედრო საქმისგან შორს მყოფი პოლიტიკოსების მიერ მართულ ომში აღმოჩნდა, რომლებმაც, გარე ძალების დახმარების იმედითა და ქართველი სამხედროების აზრის უგულებელყოფით, ქალაქ ცხინვალზე შეტევა განახორციელეს და საომარ მოქმედებათა ძირითად მიმართულებად სწორედ ეს დასახლება განსაზღვრეს. ამასთან, საგამოძიებო კომისიის მიერ დადგენილ იქნა, რომ პოლიტიკოსების გადაწყვეტილებით, ძირითად მიმართულებაზე სამხედრო ამოცანის შესრულება დაევალა შინაგან საქმეთა სამინისტროს, რამაც თავდაცვის ძალებში დეზორიენტაცია და დეზორგანიზაცია, ხოლო სამოქალაქო მოსახლეობაში გაურკვევლობა და დაუცველობა გამოიწვია.

გენერალ მამია ბალახაძის თქმით, ვინაიდან ძირითად მიმართულებაზე ამოცანის შესასრულებლად ორი სხვადასხვა სისტემის დანაყოფები დაიძრნენ, გაურკვეველი დარჩა, ვინ იძლეოდა ბრძანებებს – შინაგან საქმეთა თუ თავდაცვის სამინისტრო. გეგმის განხორციელებაში ერთმანეთის გვერდიგვერდ ჩართულნი აღმოჩნდნენ ისეთი შენაერთები და პირები, რომლებსაც ცოდნა და მომზადება სრულიად განსხვავებული ფუნქციების განსახორციელებლად ჰქონდათ მიღებული და, თუნდაც ერთობლივი სწავლებების გზით, თავსებადობის არავითარი ტესტი წინასწარ გავლილი არ ჰქონდათ.

ამასთან, მიხეილ სააკაშვილმა შეიარაღებულ ძალებს არ მისცა საშუალება, ემოქმედათ პროფესიონალურად, ვინაიდან ის, სხვებს შორის, აყოვნებდა დამტკიცებული გეგმის მიხედვით მოქმედების დაწყებას. აღიქვამდა რა საომარ მოქმედებებს პიარკამპანიად, „ნაციონალური მოძრაობა“ ღია ეთერით გადასცემდა ქართული ჯარის მოქმედებების შესახებ ინფორმაციას და მტერს ცეცხლის კორექტირების საშუალებას აძლევდა, რაც, საგამოძიებო კომისიის მიერ გამოკითხული თითოეული სამხედრო პირის მიერ ზურგიდან ხელშეშლად და ყოვლად დაუშვებლად იქნა მიჩნეული. გარდა იმისა, რომ სატელევიზიო სივრცეში სისტემატურად ჰქონდა ადგილი რუსეთის წინაშე ქართული სამხედრო პოზიციების „გაშიშვლებას“ პირდაპირი ეთერით, მიმდინარეობდა კონფლიქტის ზონაში დარჩენილი მოსახლეობის დეზინფორმაცია არაკომპეტენტურად მომზადებული სიუჟეტებითა და ტოტალური სიცრუის გავრცელებით იმის თაობაზე, თითქოს, საქართველოს ცენტრალური ხელისუფლება კონფლიქტის ზონაში ეფექტურ კონტროლს ახორციელებდა და საერთაშორისო მეგობრები არ დაუშვებდნენ ქვეყანაში კატასტროფას და შეაჩერებდნენ რუსეთის აგრესიას. მეტიც, „ნაციონალური მოძრაობის“ მიერ კონტროლირებულმა მედიამ განსაკუთრებით აქტიური როლი შეასრულა კატასტროფული შედეგების მქონე წაგებული ომის „გამარჯვებად“ გასაღებაში. ზემომოყვანილმა და სხვა გარემოებებმა, ერთობლიობაში, განაპირობა სამდღიანი ომი, მარცხი, დამატებითი ტერიტორიების ოკუპაცია რუსეთის მიერ, დევნილთა რიცხვის ზრდა, გაუმართლებელი მსხვერპლი, როგორც შეიარაღებულ ძალებში, ასევე, სამოქალაქო მოსახლეობაში, და მნიშვნელოვანი მატერიალური დანაკარგი.

2008 წლის აგვისტოს ომის შედეგად, ცხინვალის რეგიონში რუსეთის მიერ მანამდე ოკუპირებულ 363 დასახლებულპუნქტს, 111 ოკუპირებული დასახლებული პუნქტი შეემატა. რუსეთის ოკუპაციის ქვეშ აღმოჩნდა მანამდე ცენტრალური ხელისუფლების მიერ კოტროლირებადი კოდორის ხეობაც. როგორც საგამოძიებო კომისიის წინაშე შინდისის ბრძოლის გმირის ძმამ, ფრიდონ ზოიძემ აღნიშნა, „ნაციონალურმა მოძრაობამ“ ომში დაღუპული ქართველი ჯარისკაცების გადმოსვენებაში მონაწილეობა არ მიიღო და არაერთი ცხედარი ბრძოლის ველზე რჩებოდა. როგორც საყოველთაოდ ცნობილია, მათი გადმოსვენება მოხდა სრულიად საქართველოს კათალიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტი ილია ΙΙ-ის მიერ, მას შემდეგ, რაც ის მეუფეებთან და საქართველოს საპატრიარქოს წარმომადგენლებთან ერთად, ცხინვალის რეგიონში შევიდა და გარდაცვლილთა ცხედრებს უპატრონა“, – ნათქვამია თეა წულუკიანის მიერ წარდგენილ კომისიის დასკვნაში.

ამასთან, დასკვნის თანახმად, საგამოძიებო კომისიის მუშაობის შედეგად, საბოლოოდ დადგინდა, რომ „ნაციონალური მოძრაობის“ ხელისუფლებამ, სულ ცოტა, 2008 წლის ივლისის ბოლოდან იცოდა, რომ კონფლიქტის ზონაში დაძაბულობა უმაღლეს ნიშნულზე იყო, მაგრამ არავითარი ზომა არ მიიღო, რომ მშვიდობიანი მოსახლეობა საომარი არეალიდან დროულად გამოეყვანა.

„მეტიც, როგორც გრიგოლ ვაშაძემ განაცხადა, მოსახლეობის დროული ევაკუაცია რეჟიმის მიზანს არ წარმოადგენდა. მოგვიანებით, „ერთიანი ნაციონალური მოძრაობის“ დეპუტატებმა, გიორგი კანდელაკმა, დავით დარჩიაშვილმა, გიორგი (გოკა) გაბაშვილმა და ჩიორა თაქთაქიშვილმა, ხოლო „ქრისტიან-დემოკრატიული მოძრაობიდან“ გიორგი თარგამაძემ ხმა მისცეს ევროსაბჭოს საპარლამენტო ასამბლეის N1633 რეზოლუციას, რითაც 2008 წლის 7-8 აგვისტოს ღამით „ცხინვალის დაბომბვა“ აღიარეს და საკუთარი ქვეყნის ჯარი ომის შესაძლო დანაშაულის ჩადენაში უსაფუძვლოდ დაადანაშაულეს“, – აღნიშნულია საგამოძიებო კომისიის დასკვნაში.

„2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებითი საგამოძიებო კომისიის“ ხელმძღვანელმა, თეა წულუკიანმა პარლამენტში, დღევანდელ პლენარულ სხდომაზე საგამოძიებო კომისიის დასკვნა წარადგინა.

თეა წულუკიანმა დასკვნაში არსებულ შეფასებებზე გაამახვილა ყურადღება.

როგორც წულუკიანმა აღნიშნა, საგამოძიებო კომისიამ მისთვის განსაზღვრული უფლებამოსილების ფარგლებში, განიხილა და შეაფასა მის ხელთ არსებული ინფორმაცია და ამ შეფასების და გაანალიზების შედეგად, დაადგინა, რომ 2004-2012 წლებში, „ნაციონალური მოძრაობის“ მიერ „ნულოვანი ტოლერანტობის“ სისხლის სამართლის პოლიტიკის განხორციელების შედეგად, საქართველოს შინაგან საქმეთა სამინისტროს სტრუქტურებსა და სასჯელაღსრულების სისტემაში დაკავებულ პირთა და პატიმართა, ბრალდებულთა/მსჯავრდებულთა მიმართ წამება და არაადამიანური მოპყრობა იყო სისტემატური და სისტემური.

„ეს ევროპული სასამართლოს არაერთ გადაწყვეტილებაშიც არის ნათქვამი. დაკავებულ პირთა და პატიმართა მიმართ წამება და არაადამიანური მოპყრობა ატარებდა საყოველთაო ხასიათს და იყო პოლიტიკური თანამდებობის პირების, პირველ რიგში კი – მიხეილ სააკაშვილის მიერ დამკვიდრებული და სახელმწიფო პოლიტიკის რანგში აყვანილი ქმედება. ეს დანაშაულები იყო არა ერთეულ პირთა გადაცდომა, არამედ კარგად ორგანიზებული და თანამონაწილეობაზე დაფუძნებული ტერორი, რომელშიც მონაწილეობდნენ სხვადასხვა რანგის მაღალი თანამდებობის პირები, რაც მათ ძალადობრივ რეჟიმად აქცევდა. თითოეული მონაწილის, თითოეული ორგანიზატორის გვარი, სახელი არის აღწერილი ჩვენს დასკვნაში.

სასჯელაღსრულების სისტემაში არსებული პატიმრობის პირობები, საყოფაცხოვრებო პირობები, ადეკვატური კვებისა და სამედიცინო დახმარების არარსებობა, პირადი და ოჯახური ცხოვრების ხელყოფა, დაცვის უფლების ხელყოფა, გარე სამყაროსთან კონტაქტის აკრძალვა, ძალადობის ფაქტების გახმაურების აკრძალვა და მრავალი სხვა, ცალკე აღებული, უტოლდებოდა წამებასა ან არაადამიანურ მოპყრობას“, – განაცხადა თეა წულუკიანმა.

წულუკიანის განმარტებით, ასევე, საგამოძიებო კომისიამ დაადგინა, რომ პატიმართა მიმართ წამებისა და არაადამიანური მოპყრობის სხვადასხვა, სასტიკი მეთოდების გამოყენებას ჰქონდა თითქმის ყოველდღიური ხასიათი.

„დაკავებულ პირთა და პატიმართა მიმართ წამება და არაადამიანური მოპყრობა – იგულისხმება შსს-ს სისტემასა და სასჯელაღსრულების სისტემაში მოპყრობა, რომელიც გამოიყენებოდა ცალკე ან საპროცესო შეთანხმების ინსტიტუტთან კომბინაციაში, ისახავდა სხვადასხვა მიზანს, მათ შორის, კონკრეტულ სისხლის სამართლის საქმეზე სასურველი შედეგის მიღწევას, ქონების უკანონოდ ჩამორთმევას, პოლიტიკურ ანგარიშსწორებას, შურისძიებას და სხვ. მიმდინარეობდა ციხეში მყოფი პატიმრების შენიღბული და მიზანმიმართული განადგურება, რასაც მოწმობს, ერთი მხრივ, ის ფაქტი, რომ ციხეებში ყოველწლიურად ტუბერკულოზის 2 000-მდე ახალი შემთხვევა ფიქსირდებოდა და ჯანმრთელი და გადამდები დაავადების მქონე პატიმრები ერთ საკანში იყვნენ განთავსებულნი.

ერთად განთავსების ეს დამკვიდრებული  პრაქტიკა იყო ზოგჯერ მიზანმიმართულადაც – ჯანმრთელი პატიმრის დათრგუნვის ან მასზე შურისძიების მიზნით განხორციელებული; მეორე მხრივ, C ჰეპატიტის მკურნალობის ხელოვნურად შეფერხება, მეტიც, ამ დაავადების სკრინინგის აკრძალვა, რათა საზოგადოებისათვის დაფარული ყოფილიყო ციხეებში ამ დაავადების ფართო გავრცელება, იქცა პრაქტიკად. პროკურატურა, როგორც წამყვანი სამართალდამცავი ორგანო, არამცთუ არ ასრულებდა მისთვის კანონით დაკისრებულ მოვალეობებს და არ ატარებდა სრულყოფილ და ობიექტურ გამოძიებას წამებისა და არაადამიანური მოპყრობის ფაქტებზე, პირდაპირ იყო თავად ჩართული პატიმართა მიმართ ადამიანის უფლებების დარღვევაში;

საგამოძიებო კომისიამ იმ მრავალი საქმის განხილვის შედეგად, რომელიც თქვენ წინაშე წარმოდგენილ დასკვნაშია მოცემული, ასევე დაადგინა, რომ დაუსჯელობის სინდრომი იყო გამეფებული და მაღალი პოლიტიკური მხარდაჭერა ჰქონდათ სამართალდამცავ სტრუქტურებს ძალადობის განხორციელებისას.  ამიტომაც, ძალადობა მთავარი მამოძრავებელი ძალა იყო. ამას მოწმობს ისიც, რომ, მიუხედავად იმ ფაქტებისა, რაც წინამდებარე დასკვნაშია მოყვანილი, მიხეილ სააკაშვილმა არაერთი პირი, რომელიც თავად სჩადიოდა წამებას ან არაადამიანურ მოპყრობას ან სათავეში ედგა ძალადობრივ სისტემას, საპრეზიდენტო ორდენებით დააჯილდოვა. მოცემულ პირთა გვარ-სახელები და მათთვის გადაცემული ჯილდოების ნუსხები მოცემულია თქვენ წინაშე წარმოდგენილ დასკვნაში და საგამოძიებო კომისია მიიჩნევს, რომ უნდა ეთხოვოს საქართველოს პრეზიდენტს, სხვა შესაბამისი ორგანოების ხელშეწყობით, უზრუნველყოს 2004-2013 წლებში გაცემული ჯილდოების საკითხის გადასინჯვა, განსაკუთრებით კი, იმ პირების შემთხვევაში, რომელთაც ადამიანის წინააღმდეგ დანაშაული აქვთ ჩადენილი. სასამართლო ხელისუფლება არ რეაგირებდა წამებისა და არაადამიანური მოპყრობის ფაქტებზე, რითაც უხეშად არღვევდა საქართველოს კანონმდებლობასა და საერთაშორისო ნორმებს, მათ შორის ევროპულ კონვენციას; ხელისუფლების მიერ კონტროლირებადი მასობრივი საინფორმაციო საშუალებები უარს ამბობდნენ წამებისა და არაადამიანური მოპყრობის ფაქტების გაშუქებაზე;

ბევრ სხვა მტკიცებულებასთან ერთად, საქართველოს პარლამენტის იურიდიულ საკითხთა კომიტეტის თავმჯდომარის, პავლე კუბლაშვილის 2012 წლის 19 ივნისის საპარლამენტო გამოსვლის სულისკვეთება და შინაარსი ცალსახა დასტურია იმისა – ეს გამოსვლა, ხაზს ვუსვამ, თარიღდება 2012 წლის 19 ივნისით – ცალსახა დასტურია, რომ მიხეილ სააკაშვილის მიერ 2006 წელს გამოცხადებული „ნულოვანი ტოლერანტობის“ სისხლის სამართლის პოლიტიკა 2012 წელსაც, არჩევნების წინ ურყევი იყო და „ნაციონალურ მოძრაობას“ მის მიერ საქართველოში დამკვიდრებული სასჯელაღსრულების არაადამიანური სისტემის შეცვლის, გამრუდებული სისხლის სამართლის მართლმსაჯულების გამოსწორებისა და გაჰუმანურების არავითარი ნება და სურვილი არც მომავალში არ გააჩნდა.

ნიშანდობლივია, რომ პატიმრებს, რომლებსაც მოუწიათ ფსიქოლოგიური შემოწმების გავლა, სამხარაულის ექსპერტიზის ბიუროს მიერ გაცემული დასკვნის თანახმად, მრავალი წლის მერეც პრაქტიკულად უცვლელი დარჩათ მათთვის „ნაციონალური მოძრაობის“ რეჟიმის მმართველობის დროს მიყენებული მორალური ზიანის და ტკივილის კვალი.

2004-2009 წლებში, სახალხო დამცველის აპარატი იყო ერთადერთი სახელმწიფო სტრუქტურა, რომელიც სწრაფად რეაგირებდა საჩივრებზე, გამოავლენდა წამებისა და არაადამიანური მოპყრობის ფაქტებს და სისტემატურად ითხოვდა მათზე სათანადო რეაგირებას. საგამოძიებო კომისიის მიერ არ ჩატარებულა თითქმის არცერთი სხდომა, რომელზეც  ნათლად არ დადასტურებულა, რომ, სახელმწიფო სტრუქტურებს შორის, მსხვერპლებს მხოლოდ ამ ინსტიტუტის იმედი ჰქონდათ, რაც, 2010-2012 წლებში, ბატონი გიორგი ტუღუშის საქმიანობისას მნიშვნელოვნად შესუსტდა. ამის მაგალითებიც მოცემულია დასკვნაში“, – განაცხადა თეა წულუკიანმა.

„პარლამენტის საშემოდგომო სესია გაიხსნა და ქვეყნის პოლიტიკური ცხოვრება მომდევნო ფაზაში გადადის, იმის გათვალისწინებითაც, რომ 2025 წლის თვითმმართველობის არჩევნები კიდევ ერთი ახალი პოლიტიკური ციკლი იქნება რეგიონების და თვითმმართველობებისთვის. როგორც პრემიერ-მინისტრმა განაცხადა ამ, მე-10 საიუბილეო გამარჯვებასაც იზეიმებს „ქართული ოცნება“ და ქვეყნის მშვიდობიანი და მასშტაბური განვითარების, ეკონომიკური წინსვლის მომდევნო ოთხწლედს ავითვლით“, – განაცხადა პლენარულ სხდომაზე პარლამენტის თავმჯდომარის მოადგილემ ნინო წილოსანმა.

მისი თქმით, საზოგადოება „ქართულ ოცნებას“ მხარს უჭერს, რადგან საქართველო არის უსაფრთხო და დაცული ქვეყანა, მიმზიდველი საბაზრო ეკონომიკით ეფექტიანი მთავრობით და დამოუკიდებელი სასამართლო სისტემით, ძლიერი სახელმწიფო ინტიტუტებით.

„ამას ამბობს ევროკომისიის 2024 წლის ანგარიშები, მსოფლიო ბანკი და სხვა რეპუტაციული კვლევითი ორგანიზაციები“, – განაცხადა ნინო წილოსანმა.

მისივე განცხადებით, უსაფრთხოებისა და დაცულობის ინდექსით საქართველო ევროპის საუკეთესო ოცეულშია.

მისი თქმით, მთავრობის ეფექტიანობის გაუმჯობესებით საქართველო 21-ე საუკუნის საუკეთესო სამეულშია.

„მთავრობის ეფექტიანობით საქართველო უსწრებს ევროკავშირის ყველა კანდიდატს, „დიდი შვიდეულის“ ერთ, ევროკავშირის და ნატო-ს წევრ 16 სახელმწიფოს. კარგად ფუნქციონირებადი მთავრობის ინდექსით, საქართველო ევროკავშირის და ნატო-ს წევრ 10 სახელმწიფოს უსწრებს. ამავე რეიტინგში საქართველო პირველ ადგილს იკავებს კავკასიასა და შავიზღვისპირეთში. საქართველო სასამართლოს დამოუკიდებლობით ევროპის საუკეთესო ოცეულშია.
საქართველოში სასამართლოს ეფექტიანობის წლიური შეფასება გაუმჯობესდა და ევროკავშირის და ნატო-ს წევრ 4 ქვეყანას უსწრებს. მიმზიდველი საბაზრო ეკონომიკის ინდექსით საქართველომ ახალი ისტორიული მაქსიმუმი დააფიქსირა, მსოფლიოში 30-ე ადგილზე გავიდა და ევროპის საუკეთესო ოცეულში მოხვდა“, – განაცხადა ნინო წილოსანმა და დასძინა, რომ შეფასებებისას მათ იხელმძღვანელეს ისეთ კრიტერიუმებით, როგორიცაა – საკუთრების უფლების დაცვა, რომელიც „ქართული ოცნებისთვის“ ფუნდამენტური ღირებულებაა და რომელიც „ნაციონალურმა მოძრაობამ“ გათელა.

„შემდეგი კომპონენტები, სადაც ჩვენი წარმატება აღიარეს ინვესტიციების მოზიდვა, ლოჯისტიკური კომპეტენცია, სტაბილური ბიზნეს რეგულაციებია. სწორედ სტაბილური ბიზნეს რეგულაციების მაჩვენებლით მე-15 პოზიცია დაიკავა ჩვენმა ქვეყანამ“, – განაცხადა ნინო წილოსანმა.

მისი თქმით, განსაკუთრებულად მაღალი შეფასება მიიღო საქართველოს მთავრობამ ინვესტიციების მოზიდვის მიმართულებით და საქართველო მსოფლიოში მე-4 ადგილზე გავიდა, ხოლო ევროპაში მესამე პოზიცია დაიკავა.

მისივე თქმით, კეთილსაიმედო კანონმდებლობის და პოლიტიკის ინდექსით საქართველოს ხელისუფლება ევროპის საუკეთესო ოცეულშია. საქართველო კანონის უზენაესობით მსოფლიოს საუკეთესო ორმოცდაათეულში მოხვდა; სასამართლოს ხარისხით მსოფლიოში 27-ე ადგილზე გავიდა. საქართველომ გამჭვირვალობით მსოფლიოში მე-12 პოზიცია დაიკავა, მმართველობითი რეგულაციებით კი 29 -ე ადგილზე გამწესდა.

„ამის ფონზე როცა უცხო ქვეყნის რეზიდენტი „გახარიას გუნდის წევრები“ ამომრჩეველთან მივლენ, ან „თაღლითების პარტიის“ მერობის წარმომადგენელი მორიგ თაღლითობას შესთავაზებს ამომრჩეველს ან ევროკომისიის პრეზიდენტი ჩვენი რეგიონის სიძლიერეზე საქართველოს გარეშე ისაუბრებს, ან ევროინსტიტუციების რიგი წარმომადგენლები მორიგ თავდასხმას განახორციელებენ- ჩვენი პასუხი იქნება ძლიერი და მშვიდობიანი საქართველო, რომელიც ჩვენს ამომრჩეველთან ერთად შევქმენით“, – განაცხადა ნინო წილოსანმა.

ეს დასკვნა არის ჩვენი ქვეყნის უახლესი ისტორიის ფაქტებზე დაფუძნებული ანალიზი და ამიტომ, პირველი ვინც ამისგან სარგებელს მიიღებს, მიიღებს ქართველი ხალხი და ჩვენი სახელმწიფო, – განაცხადა პარლამენტის თავმჯდომარე შალვა პაპუაშვილმა, რითაც უპასუხა კითხვას – „საგამოძიებო კომისიის დასკვნაში საუბარია 2008 წლის ომში ქართული მხარის პასუხისმგებლობაზე, ფიქრობთ თუ არა, რომ ამ დასკვნის მხარდაჭერა, იქნება კრემლისთვის სასარგებლო საქმის გაკეთება?“.

„ყველა საკითხთან დაკავშირებით ეს დასკვნა ამბობს სიმართლეს, რომელიც შეეხება როგორც იმ სისტემას, რომელიც შექმნილი იყო, ასევე იმ ღალატს, რომელსაც უცხო ქვეყნიდან დასმული და მართული სახელმწიფოს მმართველობა ქვეყნის წინაშე ჩადიოდა, მათ შორის 2008 წლის ომთან დაკავშირებით“, – აღნიშნა მან.

კითხვაზე – სად არის ქართული მხარის დანაშაული 2008 წლის ომში – პაპუაშვილმა ასე უპასუხა:

„მარტივი ანალიზი არის საჭირო იმისთვის, რომ მიხვდე – იგივე ძალა – სააკაშვილი და ნაციონალური მოძრაობა რომ ყოფილიყო ხელისუფლებაში 2022 წელს საქართველო დღეს ომში კი არ იქნებოდა, უკვე დიდი ხანია დანგრეული, ომგამოვლილი ქვეყანა იქნებოდა და არ ვიცი რამდენად იქნებოდა საერთოდ სახელმწიფო. ეს ხალხი გარანტირებულად შეიყვანა საქართველოს ომში და შეჰყავდათ კიდევაც; შეგახსენებთ, აქ პარლამენტის წინ იდგნენ და ითხოვდნენ მოხალისეების გაგზავნას ფრონტზე, სანქციების დაწესებას და ასე შემდეგ. 2008 წელს ხელისუფლებაში რომ ყოფილიყო არა ნაციონალური მოძრაობის გარედან მართული მარიონეტული რეჟიმი, არამედ ყოფილიყო ქართული ოცნების მსგავსი პატრიოტული ხელისუფლება, ომი არ იქნებოდა. არ მივიდოდა ამ საკითხამდე, როგორც არ მივიდა 2022 წელს. რაც შეეხება ვინ რა დაიწყო – ეს დღეები ძალიან კარგად გვახსოვს, ძალიან კარგად ვიცით, ჩვენ როგორც მოქალაქეებმა, რას გვეუბნებოდა 2008 წლის 8 აგვისტოს ღამეს, გამთენიას მიხეილ სააკაშვილის რეჟიმი, რომ სამშვიდობო ძალები ამ ყველაფერში არ ერთვებიან, რომ კონსტიტუციური წესრიგის აღდგენა მიდის. საომარი მდგომარეობს გამოცხადებასთან დაკავშირებით მიხეილ სააკაშვილის ბრძანებაზე გადაწყვეტილება იქნა მიღებული პარლამენტის მიერ 2008 წლის 8 აგვისტოს. თავად მიხეილ სააკაშვილის დავალებით მისმა წარმომადგენლებმა სტრასბურგში ევროსაბჭოს რეზოლუციას მისცეს ხმა და დაუჭირეს მხარი, სადაც ზუსტად არის ასახული, როგორ იყო დაწყებული ახალი ეტაპი იმ ომში, რომელიც დიდი ხანია გრძელდება და ვინ გაისროლა მასშტაბურად მაშინ. ეს კითხვის ნიშნის ქვეშ არც არასდროს ყოფილა, დაახლოებით 2017-18 წლამდე ამაზე ამაზე თავადაც საუბრობდნენ, მათ შორის ის გენერლები, რომლებიც იყვნენ ჩართული და რომლებიც შემდეგ ნაციონალური მოძრაობის წევრები გახდნენ. დღეს რომ ოპოზიცია თავს იგიჟებს, ისინი თავად საუბრობდნენ, რომ სააკაშვილის რეჟიმმა ქვეყნის ღალატით დაიწყონ ის ახალი ეტაპი სამხედრო დაპირისპირებისა, რომელიც მასშტაბურ ომში გადაიზარდა. რამდენიმე წლის წინ რატომაც გადაწყვიტეს შემოეტრიალებინათ საკითხი და თითქოს რაღაც სიახლეა ამ ყველაფერში. 2008 წელს სააკაშვილის რეჟიმმა ჩაიდინა დანაშაული ქართველი ხალხის წინააღმდეგ. ზუსტად იმავეს გააკეთებდნენ 2022 წელს, ზუსტად ისევე შევიდოდით ომში და მერე გერკვიათ ვინ გაისროლა პირველმა, ვინ მეორემ, მაგრამ ფაქტი ხომ ეს არის, რომ აღმოჩნდებოდა საქართველო ისეთივე დანგრეული როგორც 2008 წელს“, – განაცხადა პაპუაშვილმა.