ახლა ამოცანა არის: ზაფხულში პროტესტის შენარჩუნება, 4 ოქტომბერს ცირკში მონაწილეობაზე უარის თქმა , – ამის შესახებ „კოალიცია ცვლილებისთვის“ ერთ-ერთი ლიდერი, ზურაბ გირჩი ჯაფარიძე საპატიმროდან წერილში წერს, რომელიც მის „ფეისბუქის“ გვერდზე გავრცელდა.

ზურაბ ჯაფარიძე კიდევ ერთხელ განმარტავს ადგილობრივი თვითმმართველობის არჩევნებთან დაკავშირებულ პოზიციას.

“მსჯელობას იმაზე, სწორია თუ არა ე.წ ადგილობრივ არჩევნებში მონაწილეობა, აზრი აღარ აქვს. ყველა არგუმენტი ნათქვამი/დაწერილი მაქვს – უდიდესი შეცდომაა!

მაგრამ რაცაა, ეგაა. სანამ ქუჩაში ვართ, სანამ არ გავტყდით, სანამ წინააღმდეგობა არსებობს, სანამ საღამოს რუსთაველზე ხალხი დგას, ასეთ შეცდომებს მოვინელებთ.

მაგრამ რაღაც სიმართლეები უნდა ითქვას ახლავე:

ვერანაირი ერთიანი ნეიტრალური კანდიდატები ვერ იქნება. ასეთი რამ შეიძლება მოხდეს მხოლოდ ერთობის შემთხვევაში. ერთობა არ არის და ასე არც იკვრება.

ვერანაირი ერთობა ვერ იქნება. სტრატეგიაში ავცდით ერთმანეთს.

ჩვენთვის ყაველაშვილის მიერ ხელმოწერილი დოკუმენტი, რომლითაც იმ ვითომ არჩევნებს დანიშნავს და წულუკიანის მიერ ხელმოწერილი დოკუმენტი, რომლითაც ე.წ კომისიაზე გვიბარებს ერთი ნაგავია. ორივე არავინაა. ორივე კლოუნია.

ამასაც რომ თავი დავანებოთ, ჩვენთვის სტრატეგიულად მნიშვნელოვანია გამოჩნდეს, რომ ამ ცირკში ხალხი არ იღებს მონაწილეობას და მანდ ვცდებით ფუნდამენტურად.

ვერანაირი 3,000 ცხელი წერტილი ვერ იქნება. კი ჟღერს პოეტურად, მაგრამ მხოლოდ ჟღერს და ასეც დარჩება. ეს იცის ყველამ.

ვერანაირი ბრძოლა გამარჯვებისთვის ვერ იქნება. არც ერთი გონიერი არსება არ დაიჯერებს, რომ ოპოზიციის მესამედი, არჩევნებზე, სადაც გამოცხადება ტრადიციულზე დაბალია, მოუგებს რეჟიმს, რომელიც თვითონ წერს რიცხვებს, მაშინ როცა 13 წელია ეს ვერ შეძლო ოპოზიციამ ერთიანად.

ვერანაირი თბილისის მოგება ვერ იქნება. ასეთი რეჟიმები ძალაუფლების კონსოლიდაციის იმ ეტაპზე, რა ეტაპზეც ახლა არიან, არჩევნებით ძალაუფლებას არ თმობენ, არც დედაქალაქებში (არსად).

არანაირი “რეგიონებში გავალთ, ხალხს შევხვდებით” არ იქნება. რაც იქნება, იქნება მედიასპექტაკლები.

და ა.შ

რა იქნება რეალურად?

– აი, რასაც ახლა ვუყურებთ ეგ იქნება, დაემატება მეტი რეპორტაჟი, როგორ დადიან პოლიტიკოსები ქუჩაში და როგორ ხვდებიან პარტაქტივს რეგიონებში.

ასევე დაემატება საარჩევნო სატელევიზიო კლიპები და ქუჩის ბანერები. მეტი არაფერი არ იქნება.

– იქნება რაღაც უბადრუკი საკრებულოს ადგილები;

– ძალიან მაღალი ალბათობით, მაგ პარტიებისთვის იქნება იმაზე ნაკლები ხმები, ვიდრე 26 ოქტომბერს აიღეს (ნომინალში) ;

– იქნება მეტი უნდობლობა პოლიტიკურ მოთამაშეებს შორის;

– იქნება ქოცების პროპაგანდა, რომ ოპოზიციის მნიშვნელოვანმა ნაწილმა აღიარა ამ პარლამენტის ლეგიტიმაცია, რადგან ამ პარლამენტის მიერ დანიშნული პრეზიდენტის მიერ დანიშნულ არჩევნებში ჩაერთო.

– იქნება პრობლემები გარეთ კომუნიკაციაში, რადგან შარშან ოქტომბრის შემდეგ პირველი შემთხვევა იქნება, როცა მნიშვნელოვან საკითხზე პოზიციები გაიყო ოპო ფლანგზე.

– 4-ში ღამითვე დაიწყება რუსული რეჟიმის პროპაგანდა, რომ პროდასავლური ოპოზიცია გააფარჩაკეს და დადებენ თავიანთ რიცხვებს.

– მონაწილე პარტიების მხრიდან იქნება სპეკულაცია, რომ “აი, ერთად რომ მიგვეღო მონაწილეობა, დავლეწავდით კრამიტებს”

ეს ყველაფერი იქნება.

აი, 5 ოქტომბრიდან რა იქნება, ეგ ჯერ გაუგებარია.

მაგრამ დასაკიდებელია.

ახლა ამოცანა არის:

ზაფხულშიპროტესტისშენარჩუნება

4-ში ცირკში მონაწილეობაზე უარის თქმა”, – წერს ჯაფარიძე.

ეროვნული ღირებულება ყველაფერზე მაღლა დგას, აქ ეშლება „დიფ სთეითსა“ და ევროკავშირის დღევანდელ ბიუროკრატიას, – ამის შესახებ „ხალხის ძალის“ აღმასრულებელმა მდივანმა, გურამ მაჭარაშვილმა განაცხადა.

მაჭარაშვილის თქმით, ქართველმა ხალხმა და სახელმწიფომ ვიზალიბერალიზაცია დამსახურებულად მიიღეს.

„ქვეყანამ ყველა ის კრიტერიუმი დააკმაყოფილა, რაც არსებობდა და შედეგად ვიზალიბერალიზაცია მივიღეთ. იქ არსად არ ეწერა, რომ გამჭვირვალობის კანონს თუ მიიღებ ან არასრულწლოვანებსა და ტრადიციებს დაიცავ, ამ შემთხვევაში, უვიზო მიმოსვლა შეჩერდებაო. ევროკავშირის არც ერთ ნორმატიულ აქტში მსგავსი რამ არც დღეს წერია. ეს შანტაჟის მექანიზმია, რაც ყოველდღე ვლინდება უცხოური, აქაური „ენჯეო“ თუ ვითომ პოლიტიკოსებისა და ტელევიზიების მხრიდან. ბოლო დღეების განმავლობაში ვხედავთ, რომ ძალიან გააშარჟეს და ამბობენ, რომ არასერიოზულია ლგბტ პროპაგანდის აკრძალვა საქართველოში, ეს არ არის პრობლემა საქართველოში და არაფერ შუაშია მიმდინარე პოლიტიკურ პროცესებთანო. ჩვენც მაგას ვამბობთ, რომ არაფერ შუაში არ არის ეს კანონები ვიზალიბერალიზაციის არათუ მიღებასთან, უკვე მიღებული სარგებლის შეჩერებასთანაც კი. ევროკავშირის ელჩს ვკითხოთ, რა კავშირი აქვს უკვე მიღებულ ვიზალიბერალიზაციის შეჩერების საკითხთან კაცების გათხოვება ოფიციალურად იქნება თუ არა ან ლგბტ პროპაგანდა იქნება თუ არა, ასევე „გამჭვირვალობის კანონი“ იქნება თუ არა? ამ კითხვას რატომ არ სვამთ? ხომ გინდათ, რომ ვიზალიბერალიზაცია არ შეჩერდეს? სამწუხაროდ, დღევანდელი ევროკავშირის ბიუროკრატიის უმრავლესობა ცდება, როდესაც ქართულ მენტალიტეტს არასწორად აფასებს, ქართულ ღირებულებას, მათ შორის ევროპულ ღირებულებას. ქართველ კაცს როცა ეუბნები, ქვეყანაში გეიაღლუმებს თუ არ მოაწყობ, კაცების ქორწინებას არ დააკანონებ, გაუმჭვირვალედ არ დათანხმდები რევოლუციების დაფინანსებას, მაშინ შეგიჩერებ უვიზო რეჟიმს, რაც 2017 წელს დამსახურებულად მიიღეო, ამას საქართველოს ნებისმიერი მოქალაქე შეურაცხყოფად მიიღებს, მიუხედავად პოლიტიკური გემოვნებისა.

რა თქმა უნდა, ეროვნული ღირებულება ყველაფერზე მაღლა დგას. აქ ეშლება „დიფ სთეითსა“ და ევროკავშირის დღევანდელ ბიუროკრატიას. ქართველ ადამიანს თუ ეუბნები, რომ შენი ღირებულებები განულებული იქნება და მხოლოდ მაშინ მოგცემ ვიზალიბერალიზაციას, რად უნდა იმ ადამიანს ვიზალიბერალიზაცია ან სადმე წასვლა, თუ ქართველობა აღარ ექნება. ქართველობა როგორ არ ექნება? – იმით არ ექნება, რომ ბაღსა და სკოლაში ბავშვებს რომ ასწავლიან, იქ მიიყვანონ არატრადიციული ორიენტაციის ადამიანები საჯაროდ. ეს ყველაზე დიდი უბედურებაა და ამაზე ქართველი ხალხი უკან არ დაიხევს“, – განაცხადა გურამ მაჭარაშვილმა.

კობახიძე-მდინარაძემ აიღო პასუხისმგებლობა ბიძინასთან, რომ რიჟვაძის „საქმეს” მიხედავენ და „ატვეჩაიშიც” ჩადგნენ – გასაგებია, რომ რიჟვაძე ვერ გასწირავს მის ოჯახსა და გარემოცვას მკვლელ ივანიშვილთან დაპირისპირებაში და გააკეთებს იმას, რა ინსტრუქციაც მიუვა, – ამის შესახებ „ნაციონალური მოძრაობის“ პოლიტსაბჭოს თავმჯდომარე, ლევან ხაბეიშვილი სოციალურ ქსელში წერს.

როგორც ის აღნიშნავს, იგეგმება თავისუფლებისა და სიცოცხლის სანაცვლოდ, თორნიკე რიჟვაძეს შესთავაზონ გარიგება და მან სიმართლის ნაცვლად ყველაფერი დააბრალოს ოპოზიციასა და ოპოზიციურ მედიებს.

„კობახიძე-მდინარაძემ აიღო პასუხისმგებლობა ბიძინასთან, რომ რიჟვაძის “საქმეს” მიხედავენ და “ატვეჩაიშიც” ჩადგნენ. შესაბამისად, კობახიძის დავალებით ფაქტობრივ მძევლობაში ჰყავთ თურქეთის საავადმყოფოში და ელოდებიან მისი მდგომარეობის გაუმჯობესებას, რომ თავისუფლებისა და სიცოცხლის სანაცვლოდ შესთავაზონ გარიგება (ოჯახმა ცხადია იცის უკვე პირობები) – სიმართლის ნაცვლად ყველაფერი დააბრალოს ოპოზიციასა და ოპოზიციურ მედიებს. მხოლოდ ამიტომ არის, რომ ერთი ოფიციალური განცხადება არ გაუვრცელებია არც პროკურატურას და არც „შსს-ს“.

უნდა ესმოდეს ყველას, რომ საქმე გვაქვს ბანდფორმირებასთან, მკვლელებთან, რომლებსაც ნებისმიერ დროს შეუძლიათ “კილერის” დაქირავება და ადამიანის მკვლელობა! გასაგებია, რომ რიჟვაძე ვერ გაწირავს მის ოჯახსა და გარემოცვას მკვლელ ივანიშვილთან დაპირისპირებაში და გააკეთებს იმას, რა ინსტრუქციაც მიუვა“,- წერს ხაბეიშვილი.

ცნობისთვის, 7 ივლისს შინაგან საქმეთა სამინისტრომ გაავრცელა ინფორმაცია, რომ საგარეჯოს „ჯეოჰოსპიტალსში“, შეყვანილი იქნა ა/რ მთავრობის ყოფილი თავმჯდომარე თორნიკე რიჟვაძე, რომელსაც გულმკერდის არეში ცეცხლნასროლი ჭრილობა აღენიშნებოდა. უწყების ინფორმაციით, თორნიკე რიჟვაძეს ჩაუტარდა გადაუდებელი სამედიცინო დახმარება. მოგვიანებით რიჟვაძე საგარეჯოდან პირველ საუნივერსიტეტო კლინიკაში გადაიყვანეს. საბოლოოდ კი ის მკურნალობისთვის თურქეთის ერთ-ერთ კლინიკაშია გადაყვანილი. თორნიკე რიჟვაძის საქმეზე, ცეცხლსასროლი იარაღის დაუდევრად შენახვისთვის, ბრალდებულის სახით ალექსი ახვლედიანი დააკავეს, რომელსაც სასამართლომ 30 000-ლარიანი გირაო შეუფარდა და დარბაზიდან გაათავისუფლა.

ევროკავშირის ფარგლებში არიან სახელმწიფოები, რომლებიც აცნობიერებენ, რომ საქართველოსთან დაკავშირებით უსამართლო გადაწყვეტილება, თავად ევროკავშირის სამართლიანობის პრინციპს დაანგრევს, – ამის შესახებ პარლამენტის ვიცე-სპიკერმა, ნინო წილოსანმა განაცხადა.

წილოსანის თქმით, ვიზალიბერალიზაციის შეჩერების საკითხი ქართველი ხალხის მიმართ მიზანმიმართული შანტაჟია.

„ევროკავშირის ფარგლებში არიან სახელმწიფოები, რომლებიც საქართველოს ნამდვილი მეგობრები არიან. ეს სახელმწიფოები არიან იტალია, ავსტრია, თუ სხვები. ისინი კარგად აცნობიერებენ, რომ უსამართლო გადაწყვეტილება, რომელიც საქართველოსთან დაკავშირებით იქნება მიღებული, თავად ევროკავშირის სამართლიანობის პრინციპს დაანგრევს. საქართველოსთან დაკავშირებით უსამართლო მიდგომა წარმოებს. რა თქმა უნდა, ვიზალიბერალიზაციის შეჩერების პროცესი სრულიად დეზინფორმაციული რიტორიკის და იმ ბრალდებების ფონზე მიმდინარეობს, რომელსაც არანაირი საფუძველი არ აქვს და იმ კანონების გაუქმების მოთხოვნით დგება, რომელსაც მხოლოდ ჩვენი ქვეყნის მასშტაბით, ჩვენი ქვეყნის იდენტობისთვის აქვს მნიშვნელობა და სხვას არაფერს აზიანებს, მათ შორის არც ადამიანის უფლებებს. ვიზალიბერალიზაციის შეჩერება და ამ ორ პროცესს შორის რაღაც კავშირის დანახვა ქართველი ხალხის მიმართ მხოლოდ მიზანმიმართული შანტაჟია. რას ემსახურება წინასაარჩევნოდ ვიზალიბერალიზაციის თემის წამოწევა? – ალბათ, გაიხსენებთ, რომ წინა არჩევნების დროს, თითქმის ყველა იარაღი და ყველა საშუალება იყო გამოყენებული, რათა ხელისუფლებაში „ნაციონალური მოძრაობა“ მოეყვანათ. ახლა ყველაზე მძლავრი ინსტრუმენტი, რაც მათ ხელთაა, რამაც შეიძლება, მართლაც გული დაწყვიტოს და აღაშფოთოს ქართველი ხალხი, ვიზალიბერალიზაციის შეჩერებაა. ვარწმუნებთ, რომ ვიზალიბერალიზაციის შეჩერების შედეგად, ქართველი ხალხი აღშფოთდება იმ უსამართლობის მიმართ, რომელსაც ევრობიუროკრატია გამოიყენებს და არა „ქართული ოცნების“ მიმართ, რომელიც ამ ქვეყნის ინტერესებს იცავს“, – განაცხადა წილოსანმა.