საქართველოს მიმართ სანქციები არ მოქმედებს, – ამის შესახებ პარტია „ხალხის ძალის“ აღმასრულებელმა მდივანმა, გურამ მაჭარაშვილმა საქართველოს პირველ არხს განუცხადა.

მისი თქმით, სანქციები უკვე გაცვეთილია და რაც უფრო მეტად გაზრდიან მასშტაბს, მით უფრო ექნება უკუეფექტი.

„ევროკავშირის ერთ-ერთმა თანამდებობის პირმა თქვა, რომ სანქციები და უვიზო მიმოსვლის შეჩერება უკუეფექტს იწვევს და თავი ხომ არ შევიკავოთო. მიხვდნენ, რომ ქართულ საზოგადოებაში მათი პოლიტიკის მიმართ უკუეფექტი ჩნდება, რადგან საქართველოს ევროკავშირში იმიტომ უნდა, რომ მშვიდობა, ეკონომიკა და მეგობრობა გაიზარდოს. იმას თუ ამბობენ, რომ ვიდრე კაცების ქორწინება არ დაკანონდება და ომს არ დაიწყებთ ქვეყანაში, მანამდე ევროკავშირში არ შემიგიშვებთო, რა თქმა უნდა, ამაზე ქართული საზოგადოება უარს იტყვის, რადგან რეალურ ევროპულ ღირებულებებს კარვად ვიცნობთ. სანქციები უკვე გაცვეთილია და რაც უფრო მეტად გაზრდიან მასშტაბს, მით უფრო ექნება უკუეფექტი“, – განაცხადა გურამ მაჭარაშვილმა.

მოღალატეთა ჯგუფის თავმჯდომარედ კობახიძის არჩევა მოსალოდნელიც იყო. ივანიშვილს ძალიან შეზღუდული აქვს იმ ადამიანების წრე, რომლებსაც შეუძლია ენდოს ქვეყნის ღალატის საკითხში, – ამის შესახებ „ერთიანობა – ნაციონალური მოძრაობის“ პოლიტიკურმა მდივანმა, გიორგი ბარამიძემ განაცხადა.

გიორგი ბარამიძის განცხადებით, „ქართული ოცნება“ ხავსს ეჭიდება, თითქოს „მეგობარი აქტი“ არ იქნება მიღებული და ხელმოწერილი ტრამპის მიერ.

„ამ მოღალატეთა ჯგუფის თავმჯდომარედ კობახიძის არჩევა მოსალოდნელიც იყო. ივანიშვილს ძალიან შეზღუდული აქვს იმ ადამიანების წრე, რომლებსაც შეუძლია ენდოს ქვეყნის ღალატის საკითხში და ამავდროულად ისიც ჩანს, რომ ხავსს ეკიდებიან, თითქოს აშშ-ში კვლავ კობახიძის და ივანიშვილის ჭკუაზე გაივლის ვინმე და „მეგობარი აქტი“ არ იქნება მიღებული და ხელმოწერილი ტრამპის მიერ. როგორც მიიღო კონგრესის ქვედა პალატამ „მეგობარი აქტი“, ისე მიიღებს სენატიც ამ აქტს და პრეზიდენტი ტრამპიც მოაწერს ხელს. მას შემდეგ, რაც ეს მოღალატეთა ბანდა დამარცხდება ქართველ ხალხთან, ყველა კარგად დავინახავთ, თუ როგორ აგებენ პასუხს იმ ყველაფრის გამო, რასაც ჩადიან ჩვენი სახელმწიფოს და ჩვენი ქვეყნის მოსახლეობის წინააღმდეგ“, – განაცხადა გიორგი ბარამიძემ.

როდესაც შენ მუქარის დონეზე აუქმებ პარტნიორობას, რას ემსახურება ეს, ვის წისქვილზე ასხამს წყალს? შენ თუ გვეუბნები, რომ ჩვენი პარტნიორი ხარ, ვის პირისპირ გვტოვებ მარტო, ვის ეხმარები ამით? რუსეთს ხომ არა?!, – განაცხადა „დღის ქრონიკასთან“ „ერთიანი ნეიტრალური საქართველოს“ წევრმა ლევან ნიკოლეიშვილმა, აშშ-ს მიერ საქართველოსთან მიმართებაში სტრატეგიული პარტნიორობის გაუქმებასთან დაკავშირებით.

მისი თქმით, იმ ფონზე, როდესაც საქართველო გამოირჩეოდა აშშ-ს მიმართ უპრეცედენტო მხარდაჭერით, მათ შორის ავღანეთის და ერაყის მისებში, არ შეიძლება ამ ქვეყანასთან ასე ხელაღებით შეწყვიტო სტრატეგიული პარტნიორობა.

„გავიხსენოთ სტრატეგიული პარტნიორობის შეწყვეტა, გნებავთ თავდაცვის სფეროში, ჩვენ ვართ ის ქვეყანა ვინც ყველაზე დიდი მეგობრობა გამოვიჩინეთ თუნდაც თავდაცვის სფეროში შეერთებულ შტატებთან მიმართებაში იგივე ერაყში, იგივე ავღანეთში. უამრავი დაჭრილი, უამრავი დახოცილი და ა.შ. უფრო ძლიერი პარტნიორი ვისაც ჰქვია, მათ შორის ნატო-ს წევრები შეიძლება ითქვას მიზერულად მონაწილეობდნენ ამ ღონისძიებებში. ჩვენ რასაც იქ ვაკეთებდით, ეს იყო ერთგვარი ჩვენი საერთაშორისო ვალდებულება მაგრამ მთავარი იყო აქ მხარდაჭერა შეერთებული შტატებისთვის. მე, პირადად არაერთხელ მომისმენია, ამერიკელი მაღალჩინოსანი გენერლებისგან თუ როგორ ამაყობენ ისინი ქართველი სამხედროების მონაწილეობით, მათი მომზადების დონით და ა.შ. როდესაც შენ ამ ქვეყანასთან მუქარის დონეზე აუქმებ პარტნიორობას, სწავლებას არ ჩავატარებ და ა.შ. რას ემსახურება ეს, ვის წისქვილზე ასხამს წყალს? შენ თუ გვეუბნები, რომ ჩვენი პარტნიორი ხარ, ვის პირისპირ გვტოვებ მარტო, როცა აუქმებ ამ პარტნიორობას და ვის ეხმარები ამით? რუსეთს ხომ არა?!

შეერთებული შტატები არის ერთ-ერთი მოწინავე ქვეყანა მსოფლიოში, რომელსაც გააჩნია მულტი საშუალებები ინფორმაციის მიღების, ყველანაირი – ღია წყაროებით, დახურული წყაროებით, აგენტურით და ა.შ. წესით თავიდან ბოლომდე უნდა ფლობდეს იმ სურათს, რაც არის საქართველოში და იმ სურათიდან გამომდინარე რეალობის აღქმა უნდა გქონდეს და გაანალიზებისა თუ როგორ იქნება ეს ქვეყანა. აქედან გამომდინარე, ყველა ნორმალური პარტნიორი იფიქრებდა იმაზე, როგორ გააუმჯობესოს ამ ქვეყანასთან ურთიერთობა და როგორ გააკეთოს ისე, რომ ამ ხელისუფლებასთან საერთო მიზნები, საერთო ინტერესები გამოიყოს. მითუმეტეს, ჩვენ, ჩვენი გეოგრაფიული მდებარეობიდან გამომდინარე საკმაოდ ხელსაყრელი პოზიციები გვიჭირავს იგივე აღმოსავლეთსა და დასავლეთს შორის და აღმოსავლეთი, როგორც ჩანს ამის გამოყენებას საკმაოდ რაციონალურად აკეთებს. თუ დასავლეთი ამაზე არ ფიქრობს, ეს მათთვის უფრო ცუდია ვიდრე ჩვენთვის“, – განაცხადა ლევან ნიკოლეიშვილმა.

სალომე ზურაბიშვილის კურატორს, „მაკკეინის ინსტიტუტის“ წარმომადგენელს წამოსცდა, ამდენი ხანია და ერთი სისხლი არ დაღვრილაო, სისხლისღვრას საკრალური მნიშვნელობა და ძალა აქვს, – ამის შესახებ პარლამენტის თვითმმართველობის კომიტეტის თავმჯდომარემ, ირაკლი ქადაგიშვილმა საქართველოს პირველ არხს განუცხადა.

მისი თქმით, 26 მაისი იქნება თუ სხვა საბაბი, შეეცდებიან, სისხლისღვრის პროვოცირება მოახდინონ.

„ამ ადამიანებს სისხლისღვრის კადრები არ ყოფნით. სალომე ზურაბიშვილის კურატორს, „მაკკეინის ინსტიტუტის“ წარმომადგენელს წამოსცდა – ამდენი ხანია და ერთი სისხლი არ დაღვრილაო. მათი მიზანი ეს იყო და ეს არის. მათი ამოცანაა, ქვეყანაში რამენაირად დაპირისპირება გაღვივდეს. სხვა მიზანი არ გააჩნიათ. სისხლისღვრას საკრალური მნიშვნელობა და ძალა აქვს. ამიტომ, ისინი შეეცდებიან, რომ 26 მაისი იქნება თუ სხვა საბაბი, ამის პროვოცირება მოახდინონ“, – განაცხადა ირაკლი ქადაგიშვილმა.