ვერძი

ვიღაცისთვის ორშაბათი მძიმე დღეა, თქვენთვის კი წარმატებული და ნაყოფიერი იქნება. პასუხისმგებლობას ნუ გაექცევით, შეგიძლიათ გარისკოთ კიდეც, რადგან პლანეტების ხელსაყრელი განლაგების წყალობით, ნებისმიერ საქმეში წარმატება გელით. ბევრი ვერძი სამსახურში საინტერესო შეთავაზებას მიიღებს. თუ მათ რიცხვში ხართ, შესაძლებლობა უნდა გამოიყენოთ.

კურო

ეცადეთ, სიზარმაცის შეტევები დაძლიოთ და სახლში და სამსახურში დიდი ხნის წინ დაწყებული საქმეები დაასრულოთ. უარი თქვით ახალი პროექტის დაწყებაზე, სანამ ყურადღება ძველი საქმეების დასრულებაზე გაქვთ გადატანილი. დროა, გათავისუფლდეთ ადამიანებისგან, რომლებიც მხოლოდ პრობლემებს გიქმნიან და თქვენს ცხოვრებაში მხოლოდ ტკივილი მოაქვთ. გაუთვალისწინებელი შემთხვევის გამო შეიძლება სამსახურისთვის გამოყოფილი დროის შემცირება დაგჭირდეთ.

ტყუპები

სიახლეები, რომლებსაც ამ დღეს მიიღებთ, განწყობას გაგიუმჯობესებთ. შრომისმოყვარეობა და მონდომება მიზნის მიღწევაში და კარიერულ წინსვლაში დაგეხმარებათ. იაქტიურეთ, მაგრამ ნუ გადაიღლებით, თორემ შეიძლება თავი შეუძლოდ იგრძნოთ. ვიღაც თქვენს გაბრაზებას და კონფლიქტის გამოწვევას ეცდება, მაგრამ პროვოკაციას არ უნდა აჰყვეთ.

კირჩხიბი

ორი კურდღლის დაჭერას ნუ ეცდებით, თორემ შეიძლება ორივე დაკარგოთ. გირჩევთ, პრიორიტეტები დაისახოთ, სამოქმედო გეგმა შეადგინოთ და ეტაპობრივად განახორციელოთ. მნიშვნელოვანი და საინტერესო შეხვედრა გელით, რომელიც თქვენს ცხოვრებას შეცვლის. მოერიდეთ გარშემო მყოფთა კრიტიკას – თქვენს შენიშვნას შეიძლება დაპირისპირება და ურთიერთობის გარკვევა მოჰყვეს.

ლომი

გირჩევთ, წარსულში დატოვოთ შიშები, რომლებიც წინსვლაში ხელს გიშლით. ხელსაყრელი დღეა ადამიანებთან ურთიერთობისთვის, რომლებსაც შეუძლიათ სარგებელი მოგიტანონ. გულწრფელი საუბრით შეიძლება არაკეთილგანწყობილი ადამიანი თქვენს საუკეთესო მეგობრად აქციოთ. ნუ ეცდებით ადამიანებს საკუთარი შეხედულებები თავს მოახვიოთ. გახსოვდეთ, რომ წარსულის შეცდომები არ უნდა გაიმეოროთ.

ქალწული

თუ არ იზარმაცებთ და დროს უსარგებლო საუბრებში არ დაკარგავთ, შეიძლება ისეთ შედეგებს მიაღწიოთ, როგორზეც არასოდეს გიოცნებიათ. შესრულებული სამუშაოს შეფასებისთვის ხელსაყრელი დღეა. გახსოვდეთ, რომ საკუთარი საიდუმლო ან პირადი ინფორმაცია სხვებს არ უნდა გაუზიაროთ. ეცადეთ ოთხ კედელში არ ჩაიკეტოთ და სახლის გარეთ რაც შეიძლება მეტი დრო გაატაროთ. თუ დახმარება გჭირდებათ, ძველი მეგობრებს და გამოცდილ ადამიანებს უნდა მიმართოთ.

სასწორი

ამ დღეს თქვენი იდეებით ყველაზე თავდაჯერებული სკეპტიკოსებიც კი დაინტერესდებიან, ამასთან, თქვენი შრომისმოყვარეობა ღირსეულად დაფასდება და ფინანსურ სარგებელს მიიღებთ. მოერიდეთ უცხო ადამიანებთან ურთიერთობას, რათა უსარგებლო კამათსა და დაპირისპირებაში დრო არ დაკარგოთ. სავარაუდოდ, ახლობელ ადამიანებთან დაკავშირებით სასიამოვნო სიახლეები გელით.

მორიელი

სირთულეები არ გაშინებთ და უკან დახევას არ აპირებთ, თუმცა დაგეგმილი მოლაპარაკებები შეიძლება თქვენგან დამოუკიდებელი მიზეზის გამო ჩაიშალოს. სავარაუდოდ, შესაძლებლობა მოგეცემათ, რომ ფინანსური მდგომარეობა გაიუმჯობესოთ. ნუ გადაიღლებით, რათა ჯანმრთელობა არ დაიზიანოთ. ამ დღეს პირადი ცხოვრების სხვა ადამიანებთან განხილვისგან თავი უნდა შეიკავოთ.

მშვილდოსანი

ამ დღეს გარემოებები თქვენ სასარგებლოდ განვითარდება, ამიტომ საკუთარი საქმეების გარდა, გარშემო მყოფთა პრობლემების მოგვარებას, მათთვის რჩევების მიცემას და გამოცდილების გაზიარებას შეძლებთ. სხვისი საიდუმლო გაგება, პრობლემების გარდა, არაფერს მოგიტანთ, ამიტომ რაც უფრო სწრაფად დაივიწყებთ, მით უკეთესია. დროა სახლისა და სამუშაო სივრცის მოწესრიგებაზე იზრუნოთ და უსარგებლო ნივთებისგან გათავისუფლდეთ.

თხის რქა

მცირე გაუგებრობა და უსიამოვნო მოვლენები ხასიათს ვერ გაგიფუჭებთ. ამასთან, მალე სიტუაცია უკეთესობისკენ შეიცვლება. გამორიცხული არ არის, რომ ძველი შეცდომა ბუმერანგივით დაგიბრუნდეთ და ცხოვრება გაგირთულოთ. საყვარელი ადამიანის მხარდაჭერა დაგეხმარებათ, რომ ამ პრობლემისგან ერთხელ და სამუდამოდ გათავისუფლდეთ. იზრუნეთ ჯანმრთელობაზე და ეცადეთ, პროფილაქტიკური მკურნალობის ან ვარჯიშისთვის დრო გამონახოთ.

მერწყული

ამ დღეს შეგიძლიათ რთული და დამღლელი საქმეები სამომავლოდ გადადოთ და სასიამოვნო საქმეებით დაკავდეთ. სავარაუდოდ, მნიშვნელოვანი გადაწყვეტილების მიღება მოგიწევთ, რომელიც თქვენს ცხოვრებაში ბევრ რამეს შეცვლის. როგორი მაცდურიც არ უნდა ჩანდეს, შეთავაზებაზე პასუხის გაცემა არ იჩქაროთ და მოფიქრებისთვის დრო ითხოვეთ. ასევე, ნუ იჩქარებთ გარიგებების დადებას, სანამ არ დარწმუნდებით, რომ ნამდვილად მოგებიანია.

თევზები

უსმინეთ საკუთარ ინტუიციას, რომელიც ამ დღეს შეუმცდარად მუშაობს. გახსოვდეთ, რომ დღევანდელი პრობლემები გუშინდელი შეცდომების შედეგია და ეცადეთ, შექმნილი ვითარების გამოსწორება შეძლოთ. ფრთხილად იყავით – გამორიცხული არ არის, რომ ვიღაცამ თქვენი მოტყუება სცადოს. ხელსაყრელი დღეა ყოველდღიური ცხოვრების ორგანიზებისა და ოჯახურ ცხოვრებასთან დაკავშირებული საკითხების განხილვისთვის.

უფალი ყოველთვის მიდის იმასთან, ვინც უფალს ეძებს, უფალთან შეხვედრას ეძებს და ვისაც მისი დანახვა სურს. მაგრამ როგორ უნდა დავინახოთ ქრისტე? – თუ დავიცავთ მის მცნებებს, შევუდგებით მას და გავხდებით მისი მოწაფეები, აი, მაშინ ვიხილავთ უფალს, – ამის შესახებ საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა შიომ (მუჯირი) ქადაგებისას განაცხადა.

მისივე თქმით, ადამიანი სრულიად იცვლება, სრულიად სხვანაირი ხდება ქრისტეს შეხვედრის შემდეგ, ვიდრე იყო მანამდე.

“სახელითა მამისათა და ძისათა და სულისა წმინდისათა.

ძვირფასო მამებო, ძმებო და დებო, გილოცავთ დღევანდელ კვირა დღეს, გადმოგცემთ სრულიად საქართველოს კათოლიკოს-პატრიარქ ილია II-ის ლოცვა-კურთხევას.

დიდი მარხვის დაწყებამდე ერთი თვით ადრე მართლმადიდებელი ეკლესია იწყებს ჩვენს მომზადებას მარხვისთვის და გვახსენებს იმას, რისი გაგებაც მრავალ ადამიანს უჭირს, რომ უამრავი ცხოვრებისეული საზრუნავის გარდა, არსებობს კიდევ ზრუნვა სულზე, ჩვენს შინაგან სამყაროზე და რომ სწორედ ეს საზრუნავი არის პირველხარისხოვანი, უფრო მნიშვნელოვანი.

დღეს წმინდა სახარება მოგვითხრობს ერთ ძალიან მდიდარ კაცზე, რომელიც იყო გადასახადების ამკრეფთა უფროსი, სახელად ზაქე. იმ ეპოქაში ზაქეს ეს პროფესია დაკავშირებული იყო გამომძალველობასთან, მექრთამეობასთან, უსამართლობასთან, უწესობასთან. ამიტომ, რა თქმა უნდა, ეს მეზვერეები ადამიანებს სძულდათ.

ერთხელ, როდესაც უფალი იესო ქრისტე ქალაქში შედიოდა, ზაქემ მოინდომა მისი დანახვა, მაგრამ იმდენად ტანდაბალი იყო, რომ ამას ვერ ახერხებდა. ამიტომ მან გააკეთა ის, რაც იყო გმირობის ტოლფასი. იმდენად უნდოდა ქრისტეს დანახვა, რომ პატარა ბიჭივით ხეზე ავიდა, რათა იქიდან დაენახა უფალი. ე.ი. მთელი ამ ქალაქის თვალწინ (ყველა იცნობდა მას, რა თქმა უნდა), ის არ დაეძებდა, რომ ამისთვის შეიძლება დაეცინათ, დაემცირებინათ, ოღონდ მაცხოვარი ენახა.

გულთამხილველმა უფალმა, რა თქმა უნდა, შეამჩნია მისი ასეთი განწყობა; ამან მიიპყრო ქრისტეს ყურადღება და როდესაც ჩამოუარა ზაქეს, მოიხმო თავისთან და შემდეგ სახლშიც კი ესტუმრა მას. ზაქეზე იმდენად იმოქმედა უფლის გულმოწყალებამ, ლმობიერებამ, რომ მასში მოხდა ის, რასაც ეწოდება სინანული. მან უთხრა ქრისტეს, რომ მე ცოდვილი კაცი ვიყავი, მაგრამ ამიერიდან მინდა ჩემი ცხოვრება გამოვასწორო; ჩემი ქონების ნახევარს დავურიგებ გლახაკებს და თუ ვინმესთვის რამე გამომიძალავს, ოთხმაგად ავუნაზღაურებ, ოთხმაგად მივაგებო. უფალმა უთხრა: “დღეს მოვიდა ამ სახლის ხსნა, რადგან ესეც შვილი აბრაამისი არის“ (ლკ. 19,9). აი, ასე მოხდა ზაქეს ფერისცვალება.

აი, ასეთ ცოდვილ კაცში, რომელიც ყველას სძულდა და მუდამ სცოდავდა, გაიღვიძა ქრისტეს ხილვის წყურვილმა. მას ეს წყურვილი ჰქონდა ძალიან დიდი. ბევრი ადამიანი დადის ეკლესიაში, მაგრამ ასეთი წყურვილი ქრისტეს დანახვისა ბევრს არ აქვს. ადამიანები მოდიან სხვადასხვა პრობლემით, ზოგს შვილი ავად გაუხდა, ზოგს პატიმრობა ემუქრება, ზოგს რაღაც მძიმე აზრები აწუხებს, ან ნაწყენია და ამ წყენით მოცულია, ან შური აწუხებს, ან რაღაც სხვა პრობლემები და უნდათ ამისგან გათავისუფლება და ღმერთს სთხოვენ, მაგრამ რა იშვიათია, ძმებო და დებო, რომ ადამიანს ეთქვას: “მე მინდა ქრისტეს დანახვა!”. სწორედ ამიტომაც არ გვესმის, ჩვენც არ გვეუბნება უფალი იმ სიტყვებს, რომლებიც უთხრა ამ კაცს: “ზაქე, სწრაფად ჩამოდი, მე დღეს შენს სახლში უნდა დავრჩე” (ლკ. 19,5). რატომ უთხრა ეს? მხოლოდ იმიტომ, რომ ზაქემ მოინდომა მისი დანახვა და მასთან შეხვედრა.

ამდენად, უფალი ყოველთვის მიდის იმასთან, ვინც უფალს ეძებს, უფალთან შეხვედრას ეძებს და ვისაც მისი დანახვა სურს. მაგრამ როგორ უნდა დავინახოთ ქრისტე? – თუ დავიცავთ მის მცნებებს, შევუდგებით მას და გავხდებით მისი მოწაფეები, აი, მაშინ ვიხილავთ უფალს.

მაშასადამე, რას გვასწავლის დღევანდელი სახარება? – თუ რაში მდგომარეობს სულის გადარჩენა, სულის ცხონება. ის მდგომარეობს იმაში, რომ ადამიანი სრულიად იცვლება, სრულიად სხვანაირი ხდება ქრისტეს შეხვედრის შემდეგ, ვიდრე იყო მანამდე. მაგრამ ამისთვის საჭიროა, ზაქეს მსგავსად, ჩვენი ცხოვრების მთავარი მისწრაფება იყოს ქრისტეს დანახვა და მასთან დაახლოება. მხოლოდ ასეთი ადამიანი, ვინც მიაღწევს თავისი პიროვნების ფერისცვალებას, იმკვიდრებს ღმერთის სასუფეველს.

აი, ძვირფასო ძმებო და დებო, სწორედ ეს არის ქრისტიანობა. ამინ!

დღეს სრულიად საქართველოს კათოლიკოს-პატრიარქ ილია II-ის კურთხევით, ილოცება ელისაბედაშვილების გვარი. ღმერთმა გაგახაროთ, გამრავლოთ და გაგაძლიეროთ.

ჩვენთან არს ღმერთი“, – განაცხადა მეუფე შიომ.