ეუთო-ს თავმჯდომარეობის სამეული 2024 წლის შემაჯამებელ განცხადებას ავრცელებს, რომელშიც სხვა თემებთან ერთად, საქართველოზეც არის საუბარი.

ეუთო-ს ე.წ. სამეული, რომლის შემადგენლობაშიც ჩრდილოეთ მაკედონია, მალტა და ფინეთი შედიან, აცხადებს, რომ რუსეთის მიერ უკრაინის წინააღმდეგ მიმდინარე აგრესია ევროპის უსაფრთხოებას, ნორმებისა და ღირებულებების საერთო სისტემას ძირს უთხრის.

განცხადებაში ხაზგასმულია საქართველოს სუვერენიტეტისა და ტერიტორიული მთლიანობის მიმართ მხარდაჭერა.

„ჩვენ ვადასტურებთ ჩვენს მტკიცე მხარდაჭერას საქართველოს სუვერენიტეტისა და ტერიტორიული მთლიანობის მიმართ. ჩვენ აღვნიშნავთ ჟენევის საერთაშორისო დისკუსიების მნიშვნელობას და მხარს ვუჭერთ კონფლიქტის შედეგად დაზარალებული თემებისთვის რეალური შედეგების მიღწევის მნიშვნელობას, რაც 2024 წელს ყურადღების ცენტრში იყო. ჩვენ ერთგული ვრჩებით დადგენილი ძალისხმევისა და ინიციატივების, მათ შორის ინციდენტების პრევენციისა და მათზე რეაგირების მექანიზმებზე მუშაობის“, – ნათქვამია განცხადებაში.

როგორც კი სიაში მოხვდებით, იქ სამუდამოდ დარჩებით, არც ფული, არც მოგზაურობა, – ამის შესახებ ჰელსინკის კომისიის თავმჯდომარე, რესპუბლიკელი კონგრესმენი და „მეგობარი აქტის“ ავტორი ჯო უილსონი სოციალურ ქსელში წერს.

„თუ თქვენ კორუმპირებული „ქართული კოშმარის“ ჩინეთისკენ, ირანისა და რუსეთისკენ მიმავალ მატარებელში იმყოფებით, ახლა ჩამოსვლის დროა. ივანიშვილი პირველი იყო, მაგრამ უკანასკნელი არ იქნება. ჯერ კიდევ არის დრო საკუთარი თავის გადასარჩენად, მაგრამ როგორც კი სიაში მოხვდებით, იქ სამუდამოდ დარჩებით! არც ფული, არც მოგზაურობა!“, – წერს ჯო უილსონი.

რადიკალურმა ოპოზიციამ, მარტო დეკემბრის თვეში, მინიმუმ 7-ჯერ უსინდისოდ და უტიფრად მოატყუა საკუთარი ამომრჩეველი, – ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე, რატი იონათამიშვილი, სოციალურ ქსელში წერს.

მისი განცხადებით, ოპოზიცია, სხვა დაპირებებთან ერთად, საკუთარ მხარდამჭერებს ჰპირდებოდა, რომ არ დაუშვებდნენ XI მოწვევის პარლამენტის შეკრებას, არ დაუშვებდნენ საქართველოს მეექვსე პრეზიდენტის არჩევას და მის ინაუგურაციას. იონათამიშვილის თქმით, საინტერესოა, ოპოზიციონერი პოლიტიკოსების მსგავსად, მხარდამჭერებიც არაფერს შეიმჩნევენ თუ მოსთხოვენ მათ პასუხს.

„რადიკალურმა ოპოზიციამ, მარტო დეკემბრის თვეში, მინიმუმ 7-ჯერ უსინდისოდ და უტიფრად მოატყუა საკუთარი ამომრჩეველი. კერძოდ, მათ გასცეს დაპირება, რომ:

არ დაუშვებდნენ

XI მოწვევის პარლამენტის შეკრებას;

არ დაუშვებდნენ პარლამენტის მხრიდან მთავრობისათვის ნდობის გამოცხადებას;

არ დაუშვებდნენ 2025 წლის სახელმწიფო ბიუჯეტის დამტკიცებას;

არ დაუშვებდნენ საქართველოს მეექვსე პრეზიდენტის არჩევას;

არ დაუშვებდნენ მეექვსე პრეზიდენტის ინაუგურაციას;

სალომე ზურაბიშვილი არ გამოვიდოდა პრეზიდენტის სასახლიდან;

არ ცნობდნენ საპარლამენტო არჩევნების ლეგიტიმაციას და შესაბამისად, არ აიღებდა 26 ოქტომბრის არჩევნების შედეგად მიღებულ დაფინანსებას.

როგორც დღეს შეგვიძლია ვთქვათ, თითოეული ეს დაპირება აღმოჩნდა მოკლევადიანი ტყუილი, რომელიც ყველაზე უპასუხისმგებლო და უშინაარსო პოლიტიკურმა ჯგუფებმა შეიძლება იკადრონ.

ცხადია, ამდენი ტყუილის შემდეგაც, ამ ე.წ. პოლიტიკოსებს არ გაუჭირდებათ საკუთარ მხარდამჭერებთან ისე დადგომა, თითქოს არაფერი მომხდარა და უკადრებელი არ უკადრიათ, მაგრამ მათი მხარდამჭერებიც არაფერს შეიმჩნევენ, თუ მოსთხოვენ პასუხს, ეს უფრო საინტერესოდ მიმაჩნია”, – წერს რატი იონათამიშვილი.

შენობასთან არანაირად არაა დაკავშირებული ლეგიტიმაცია, ყაველაშვილი თუ შევა იმ შენობაში, საქართველოს პრეზიდენტი ვერ გახდება,- ამის შესახებ „სტრატეგია აღმაშენებლის“ წევრმა, პაატა მანჯგალაძემ განაცხადა.

მისი თქმით, არალეგიტიმური ხელისუფლება დიდხანს ვერ გაძლებს.

„შენობასთან დაკავშირებით, ჩვენ არანაირი რევოლუციური გეგმა არ გვქონია, შესაბამისად, არავინ იმედგაცრუებული არ არის. ხალხი ქუჩაშია, ხვალაც, ახალ წელს ძალიან ბევრი ადამიანი იქნება საქართველოსთვის ქუჩაში. ეს იმედს გვაძლევს, რომ არალეგიტიმური ხელისუფლება დიდხანს ვერ გაძლებს. ასეთი გაგებით, თქვენ რომ ამბობთ, გეგმა არ არსებობს. გეგმა არის ხალხი ქუჩაში, რომ პროტესტი იყოს უწყვეტი, სანქციები დაედოს ყველა მავნებელს და ვიბრძოლოთ გამარჯვებამდე. რაც შეეხება იმას, რომ სალომე ამბობს, რომ იქნება ხალხთან, ჩვენ ვართ ხალხთან, ხალხი არის საქართველოსთან, ანუ, ყველა ერთად ვართ. საოცარი პროპაგანდაა. ბელარუსის გაკვეთილები კარგად შევისწავლეთ, თქვენ უნდა თქვათ, რომ ხალხი არ დადის, უნდა თქვათ, რომ იმედგაცრუებულია ოპოზიცია, ჩვენ არ ვართ იმედგაცრუებული, პირიქით, ჩვენი ხალხის იმედი გვაქვს. რატომ გინდათ, რომ ლეგიტიმაციის საკითხი, ან პრეზიდენტი ვინ იქნება, დაკავშირებული იყოს რაიმე შენობასთან? საერთოდ არ ვფიქრობ, რომ შენობაში ყოფნა-არ ყოფნით რაიმე იცვლება“, – განაცხადა მანჯგალაძემ.

სრულიად საქართველოს კათოლიკოს-პატრიარქი ილია მეორე საქართველოს პრეზიდენტს მიხეილ ყაველაშვილს პრეზიდენტად არჩევას ულოცავს.

ილია მეორე მიხეილ ყაველაშვილს მომავალ საქმიანობაში წარმატებებს უსურვებს.

„გულითადად გილოცავთ ქრისტეს შობის დიდებულ დღესასწაულს და ახალ წელს. გილოცავთ საქართველოს პრეზიდენტად არჩევას და გისურვებთ წარმატებებს თქვენს მაღალ მსახურებაში“, – აღნიშნულია მისალოც წერილში.