ოკუპირებულ აფხაზეთში დაიწყო აქცია „გეორგიევსკის ლენტი“, რომელიც 9 მაისამდე გაგრძელდება. ამის შესახებ სააგენტო „სპუტნიკი“ იუწყება.
„გასულ წელს აფხაზეთში 20 ათასი გეორგიევსკის ლენტი დავარიგეთ. წელსაც ამდენი იქნება. ამ სიმბოლოზე დიდი მოთხოვნილება არსებობს“, – განაცხადა ოკუპირებულ აფხაზეთში „როსსოტრუდნიჩესტვოს“ წარმომადგენელმა ევგენი პავლოვმა.
გეორგიევსკის ლენტებს აფხაზური მილიციის თანამშრომლები საგზაო ავტოინსპექციის საგუშაგოებზე დაარიგებენ.
გეორგიევსკის ლენტი რუსეთის იმპერიის მიერ წმინდა გიორგის ორდენთან ერთად 1769 წელს, რუსეთ-თურქეთის ომის დროს შეიქმნა. ორდენითა და ლენტით რუსეთის იმპერიისადმი გამოჩენილი ერთგულებისა და სიმამაცის გამო აჯილდოებდნენ.
