“მინდა, პრეზიდენტ ზელენსკის ვუთხრა, აღარასდროს მიაყენოს შეურაცხყოფა პოლონელებს”-მატეუშ მორავიეცკი

520
spot_img

პოლონეთის პრემიერ-მინისტრმა, მატეუშ მორავიეცკიმ უკრაინის პრეზიდენტ ვოლოდიმირ ზელენსკის უთხრა, აღარასდროს მიაყენოს შეურაცხყოფა პოლონელებს.

ამის შესახებ ინფორმაციას „როიტერი“ ავრცელებს.

„მინდა, პრეზიდენტ ზელენსკის ვუთხრა, აღარასდროს მიაყენოს შეურაცხყოფა პოლონელებს, ისე, როგორც მან ეს გაერო-ს გენერალურ ასამბლეაზე გააკეთა”, – განაცხადა მატეუშ მორავიეცკიმ საარჩევნო მიტინგზე გამოსვლისას.

ცნობისთვის, კიევსა და ვარშავას შორის დავა უკრაინული მარცვლეულის პოლონეთში ექსპორტზე დაწესებულ აკრძალვას უკავშირდება.

პოლონეთი მიიჩნევს, რომ დიდი რაოდენობით იაფფასიანი უკრაინული მარცვლეული პოლონური ბაზრის დესტაბილიზაციას ახდენს და ადგილობრივ ფერმერებს აზარალებს.

გაერო-ს გენერალურ ასამბლეაზე სიტყვით გამოსვლისას უკრაინის პრეზიდენტმა უკრაინული მარცვლეულის გარშემო დავას „პოლიტიკური წარმოდგენა” უწოდა, რომელიც „მხოლოდ მოსკოვის წისქვილზე ასხამს წყალს“.

ზელენსკის ამ განცხადება პოლონეთის ხელისუფლების მწვავე რეაქცია მოჰყვა.

პოლონეთის პრემიერ-მინისტრმა მანამდე ისიც თქვა, რომ ვარშავა უკრაინას ახალ შეიარაღებას აღარ გადასცემს და საკუთარი თავდაცვის გაძლიერებაზე იზრუნებს.