მათ იციან, რომ არჩევნებში გამარჯვებას ვერ მოიპოვებენ, ამიტომ ცდილობენ, რომ მაქსიმალურად ესკალაციით, დესტაბილიზაციით, სიტუაციის დაძაბვით რამენაირად მივიდნენ რევოლუციურ სცენარამდე“ , – განაცხადა „დღის ქრონიკაში“ ექსპერტმა ლევან ნიკოლეიშვილმა ოპოზიციის შესახებ.
„რეალურად ხდება ყველაფერი იმისათვის, რომ არჩევნებამდე არ მივიდეს პროცესი, ყოველ შემთხვევაში, ასე აქვთ ამ ძალებს წარმოდგენილი, ვინაიდან ერთი მარტივი მიზეზი არსებობს. მათ იციან, რომ არჩევნებში გამარჯვებას ვერ მოიპოვებენ, ამიტომ ცდილობენ, რომ მაქსიმალურად ესკალაციით, დესტაბილიზაციით, სიტუაციის დაძაბვით რამენაირად მივიდნენ რევოლუციურ სცენარამდე. მათ იციან, რომ არჩევნებში ძალები არც ეყოფათ და გამარჯვება არც უწერიათ“, – განაცხადა ლევან ნიკოლეიშვილმა.
მან ასევე აღნიშნა, რომ მოქალაქეებმა კარგად შეიგრძნეს მშვიდობა და სტაბილურობა, რომელიც არის საქართველოში.
„ხალხი, მოსახლეობის ძალიან დიდი ნაწილი მათ მხარს არ უჭერს ბევრი მიზეზიდან გამომდინარე. ჩვენმა მოქალაქეებმა შეიგრძნეს, დატკბნენ მშვიდობით და სტაბილურობით, რომელიც ჩვენ დღეს გაგვაჩნია, ამით გამორჩეული ვართ კავკასიაში, რეგიონში. გავიხედოთ, სად რა ხდება, თითქმის ყველგან დაძაბულობის კერა არის საგარეო პოლიტიკურ ველზე და ფრონტზე. ის, რომ საქართველოში მშვიდობაა, არ აწყობთ არც შიდა აქტორებს, არც გარე აქტორებს ბევრი მიზეზიდან გამომდინარე“, – მიაჩნია ლევან ნიკოლეიშვილმა.
მისივე შეფასებით, გამჭვირვალობის კანონპროექტი მხოლოდ მიზეზად არის გამოყენებული.
„აქციაზე მყოფმა ბევრმა ადამიანმა შესაძლოა, მართლაც არ იცოდეს, რა წერია იქ და ამის გამო სპონტანურად უწოდებენ რუსულ კანონს, მაგრამ ლიდერებმა მშვენივრად იციან, რას ეხება ეს კანონი, ამ კანონის მიღებით როგორ მოხდება შავი ფულის შეჩერება და მათი საბოლოოდ გაპარტახება. სწორედ ამიტომ ეწინააღმდეგებიან ისინი ამ კანონს. ახლა ფიქრობენ, რომ ეს გარკვეული მუხტი, რაც არსებობს, თავისთვის სასარგებლოდ გამოიყენონ. დღეს გაკეთდა განცხადება იმის თაობაზე, რომ „ნაციონალური მოძრაობა“ ფიქრობს, ამ ძალებით, რომელიც აქციაზეა წარმოდგენილი, სათავისოდ გამოიყენოს, ყვარყვარესავით სათავეში ჩაუდგეს და წარმართოს პროცესები. არ გამოვრიცხავ, რომ შემდეგი ლოზუნგი არა მხოლოდ „არა რუსულ კანონს“ იქნება, არამედ მთავრობის გადადგომა, სააკაშვილის გარეთ გამოშვება, უკრაინისთვის საომარ მოქმედებებში მხარდაჭერა აქტიურად და არა სიტყვით და ასე შემდეგ. ეს არის საკმაოდ ძნელი, მაგრამ სახიფათო თამაში, რომელიც წამოიწყეს რადიკალებმა, რომლებსაც ასევე აქვთ გარკვეული იმედი უცხოეთიდანაც – ვხედავთ ჩვენ მხარდამჭერ განცხადებებს საკმაოდ მაღალი პოლიტიკური ლიდერებისგან“, – განაცხადა ლევან ნიკოლეიშვილმა.
