მადლობელი ვარ ჯო ბაიდენის ძლიერი გამოსვლისთვის. ჩვენ ერთად არ დავუშვებთ, რომ სიძულვილმა გაანადგუროს თავისუფლება და ტერორისტებმა გაანადგურონ დემოკრატია, – ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.
მისივე თქმით, მხარდაჭერის გამო, უკრაინა ამერიკის მადლიერია.
„უკრაინა მადლიერია აშშ-ის მხარდაჭერისთვის და ურყევი რწმენისთვის, რომ ჰუმანიზმი, თავისუფლება, დამოუკიდებლობა და საერთაშორისო წესრიგი, რომელიც წესებზეა დაფუძნებული, ყოველთვის გაიმარჯვებს“, – წერს ზელენსკი „ტვიტერზე“.
ზელენსკიმ აღნიშნა, რომ უკრაინისა და აშშ-ის საერთო მიზანია, დაიცვას თავისუფალი ცხოვრების წესი ყველა ადამიანისთვის. მისივე თქმით, ქვეყნებს, რომლებიც ებრძვიან აგრესიას და ტერორიზმს, საერთო თავისუფლების შესანარჩუნებლად, აშშ-ის ლიდერობის იმედი აქვთ.
„აშშ-ის ურყევი მხარდაჭერა წარმოუდგენლად ამხნევებს ყველა ჩვენს მეომარს და მთელ ჩვენს ერს. აშშ-ის ინვესტიცია უკრაინის დაცვაში უზრუნველყოფს გრძელვადიან უსაფრთხოებას მთელი ევროპისა და მსოფლიოსთვის“, – წერს ვოლოდიმირ ზელენსკი.
აშშ-ის პრეზიდენტმა, ჯო ბაიდენმა განაცხადა, რომ აპირებს, ისრაელისა და უკრაინის მხარდასაჭერად გადაუდებელი ბიუჯეტის მოთხოვნა კონგრესს გაუგზავნოს.
