ლისის ტბის მიმდებარე ტერიტორიიდან „პრაიდის კვირეულის“ მთავარი ღონისძიების მონაწილეების ევაკუაცია განხორციელდა. ინფორმაციას ამის შესახებ Tbilisi Pride-ი ავრცელებს.
„ყურადღება! მოგვიწია ტერიტორიის დატოვება. სამართალდამცველებმა ვერ შეძლეს ტერიტორიის დაცვა. განხორციელდა ევაკუაცია სამარშუტო ტაქსებით“, – აღნიშნულია ინფორმაციაში.
მეგობრებო, არ ამოხვიდეთ არავინ! – ამის შესახებ „თბილისი პრაიდის“ თანადირექტორი, მარიამ კვარაცხელია „ფეისბუქზე“ წერს.
მარიამ კვარაცხელიას განმარტებით, ფესტივალის ტერიტორიიდან ევაკუაცია განხორციელდა და არავინ დაშავებულა.
„მოხდა ფესტივალის ტერიტორიიდან ევაკუაცია. არავინ დაშავებულა”, – წერს მარიამ კვარაცხელია.
„პრაიდ ფესტივალის“ მოწინააღმდეგეებმა პოლიციის კორდონი გაარღვიეს და ლისის ტბის ტერიტორიაზე შეიჭრნენ, სადაც „პრაიდ ფესტივალი“ უნდა გაიმართოს. აღნიშნულს პოლიციასა და აქციის მონაწილეებს შორის დაპირისპირება რამდენჯერმე მოჰყვა. არსებული ინფორმაციით, დაკავებულია რამდენიმე პირი.
