“კეზერაშვილი და ის ხალხი კი, რომელიც ხან გარედან ანგრევდა პარტიას და ხან შიგნიდან, არ და ვერ იქნება ჩემთვის პარტია”

113
spot_img

არასდროს გამიკრიტიკებია „ნაციონალური მოძრაობა“, კეზერაშვილი და ის ხალხი კი, რომელიც ხან გარედან ანგრევდა პარტიას და ხან შიგნიდან, არ და ვერ იქნება ჩემთვის პარტია, – ამის შესახებ „ნაციონალური მოძრაობის წევრი ნიკა მელია „ფესიბუქის“ გვერდზე წერს.

ნიკა მელია გამოეხმაურა „ნაციონალური მოძრაობის“ წევრის, პეტრე ცისკარიშვილის განცხადებას, სადაც მან აღნიშნა: „ნიკა მელია თვეებია, „ნაციონალურ მოძრაობას“ თავს ესხმის. მას სძულს ყველაფერი, რაც „ნაციონალურ მოძრაობასთან“ არის დაკავშირებული, თვითონ აყენებს თავს ამ პარტიის მიღმა“.

ნიკა მელიას თქმით, არის და იქნება იქ, სადაც ცვლილებები იქნება შესაძლებელი.

„ადამიანს პასუხი რომ გასცე, როგორც მინიმუმ, საკუთარ აზრს უნდა გამოხატავდეს და საკუთარი, თუნდაც სუსტი, არგუმენტები ჰქონდეს; გუშინ მოვისმინეთ დავით კეზერაშვილის მიერ გაკეთებული განცხადებები პეტრე ცისკარიშვილის პირით, თურმე მე პარტიას ვლანძღავ. ლანძღვასა და კრიტიკას შორის დიდი სხვაობაა, ფორმაშიც და მოტივაციაშიც; არასდროს გამიკრიტიკებია პარტია, მისი იდეურად მებრძოლი ნაწილი; კეზერაშვილი და ის ხალხი კი, რომელიც, პირადი გამორჩენის მიზნით, ხან გარედან ანგრევდა პარტიას და ხან შიგნიდან, არ და ვერ იქნება ჩემთვის პარტია.

ასევე, ყურადღების მიღმა ვერ დავტოვებ კობახიძისა და კეზერაშვილის იდენტურ „სურვილს“ – თუ მივდივარ, წავიდე. მათგან განხვავებით, მე მხოლოდ ხალხის აზრის კარნახით ვმოქმედებ, ვიყავი, ვარ და ვიქნები იქ, სადაც ცვლილებები იქნება შესაძლებელი და რეალური. ვიყავი და ვარ იქ, სადაც სიმართლეა და პოლიტიკაში ხდება ხალხის ინტერესების ასახვა და არა ფულის; სადაც დაპირება არის რეალური, შესრულებადი და სადაც ადამიანი პასუხს აგებს თავის სიტყვაზე. არა ისე, როგორც ვისმენთ ბატონი კეზერაშვილის ბიზნეს ადიუტანტ ცისკარიშვილისგან – თუ სააკაშვილი იქნება გარეთ, მოვიგებთ, მაშინ როდესაც იცი, რომ ჯერ უნდა მოიგო, რომ სააკაშვილის გარეთ ყოფნა იყოს შესაძლებელი“, – წერს ნიკა მელია.