კახეთში ცეცხლსასროლი იარაღით სამი ადამიანი დაჭრეს.
შემთხვევა თელავის მუნიციპალიტეტის სოფელ ლაფანყურში მოხდა.
ადგილობრივების ინფორმაციით, თანასოფლელები ერთად ქეიფობდნენ, რა დროსაც მათ შორის სიტყვიერი დაპირისპირება დაიწყო და მოგვიანებით, იარაღით გარჩევაში გადაიზარდა.
სუფრასთან მყოფმა ერთმა პირმა, სანადირო თოფიდან რამდენიმე გასროლით სამი თანამესუფრე დაჭრა.
სამივე დაჭრილი საავადმყოფოშია გადაყვანილი.
ექიმების განმარტებით, მათ სხეულის სხვადასხვა სახის დაზიანებები აქვთ მიღებული და პაციენტების ჯანმრთელობის მდგომარეობა სტაბილურად მძიმეა.
რა მოტივით დაიწყო სუფრასთან დაპირისპირება, ამ ეტაპზე უცნობია.
შემთხვევის ადგილზე შესაბამისი საგამოძიებო მოქმედებები ხორციელდება.
