ისრაელის სამხედროებმა ღაზის სექტორში 3 ისრაელელი მძევალი შეცდომით მოკლეს. ამის შესახებ განცხადებას ისრაელის თავდაცვის ძალების სპიკერი დანიელ ჰაგარი ავრცელებს.
“შეჯაიაში [ჩრდილოეთ ღაზა] ბრძოლების დროს ისრაელის თავდაცვის ძალებმა შეცდომით მოახდინა სამი ისრაელელი მძევლის, როგორც საფრთხის იდენტიფიცირება, შედეგად, სამხედროებმა მათი მიმართულებით გაისროლეს და მოკლეს…
ტერიტორიაზე, სადაც ინციდენტი მოხდა, ძიებებისა და გადამოწმებების დროს გარდაცვლილთა იდენტობებთან დაკავშირებით ეჭვი გაჩნდა. ცხედრები ისრაელის ტერიტორიაზე გადაიტანეს შემოწმებისთვის, რის შემდეგაც დადასტურდა, რომ ეს სამი ისრაელელი მძევალი იყო”, – განაცხადა ჰაგარიმ.
ჰაგარიმ გარდაცვლილთა ოჯახებს სამძიმარი გამოუცხადა და აღნიშნა, რომ ისრაელის თავდაცვის ძალებმა დაუყოვნებლივ დაიწყეს ინციდენტის განხილვა.
“ისრაელის თავდაცვის ძალები ხაზს უსვამს, რომ ეს აქტიური ბრძოლების ზონაა, სადაც ბოლო დღეების განმავლობაში ბრძოლები მიმდინარეობდა. დასკვნები დაუყოვნებლივ იქნა გამოტანილი და ისინი ისრაელის თავდაცვის ძალების ყველა სამხედროს გადაეცა”, – განაცხადა ჰაგარიმ.
