არამედ ეს კანონი პირწმინდად რუსულია იმიტომაც, რომ სწორედ ამ წუთებში რუსეთი სწორედ ამ კანონის გამოყენებით ოფიციალურად აუქმებს დემოკრატიის ბოლო, ფორმალურ მარცვლებსაც კი – ამის შესახებ “ლელოს” ერთ-ერთმა ლიდერმა გრიგოლ გეგელიამ განაცხადა.

მისი თქმით, ხელისუფლებასაც განზრახული აქვს ათიათასობით ქართველის პოლიტიკურად განეიტრალება მათი “აგენტებად” და მოღალატეებად შერაცხვით.

“დღეს, “ქართული ოცნების” იდეოლოგიურმა მოკავშირემ, კრემლმა უკვე ღიად აუკრძალა არჩევნებში მონაწილეობა ყველა იმ პირს, ვინც რუსეთის დუმას მიერ უცხოეთის გავლენის აგენტადაა შერაცხული.

რუსეთის ავტოკრატიულმა რეჟიმმა დღეს ათასობით ჟურნალისტს, ინტელექტუალს, კულტურის მოღვაწეს, ბიზნესმენს ერთი ხელის მოსმით წაართვა ერთერთი უმთავრესი დემოკრატიული უფლება – არჩევნებში პოლიტიკური ჩართულობის საშუალება.

გარდა საქართველოს ევროპული გზის ჩახერგვისა, სწორედ ეს არის “ქართული ოცნების” რუსული მმართველობის რეალური მიზანი. ხელისუფლებას, რომელიც თავად დგას უცხო, და რაც უარესია ოკუპანტი, ძალის სამსახურში, განზრახული აქვს ათიათასობით ქართველის პოლიტიკურად განეიტრალება მათი “აგენტებად” და მოღალატეებად შერაცხვით.

მინდა ხელახლა მოვუწოდო ჩვენი საზოგადოების იმ ნაწილს, ვინც ჯერ კიდევ კითხულობს, თუ რატომ არის ეს კანონი რუსული. ეს კანონი რუსულია არამხოლოდ იმიტომ, რომ ყველა პარტნიორმა გვითხრა, ან ეს კანონი, ან ევროპული გზაო; არამხოლოდ იმიტომ რომ მას პუტინის და ლავროვის გარდა მსოფლიოში არავინ იწონებს, არამედ ეს კანონი პირწმინდად რუსულია იმიტომაც, რომ სწორედ ამ წუთებში რუსეთი სწორედ ამ კანონის გამოყენებით ოფიციალურად აუქმებს დემოკრატიის ბოლო, ფორმალურ მარცვლებსაც კი.

დადგა დრო, როდესაც რუსეთის მსახურმა ხელისუფლებამ ჰიბრიდული ომი გამოუცხადა საჯუთარ ერს და ჩვენს ყველა მონაპოვარს. ეს არის ბრძოლა, რომელშიც უნდა გაიმარჯვის ქართველმა ერმა და წააგოს პუტინმა”,- აცხადებს გეგელია, რომლის კომენტარსაც “ლელო” ავრცელებს.

ოპოზიცია აკერმანის სცენარის მიხედვით მიჰყვება რევოლუციის განვითარებას, – ამის შესახებ პარტია „ხალხის ძალის“ გენერალურმა მდივანმა, დიმიტრი ხუნდაძემ მედიასთან საუბარში განაცხადა.

ხუნდაძე აქციის მონაწილე ახალგაზრდებსა და მათ მშობლებს სიფრთხილისკენ მოუწოდებს და აღნიშნავს, რომ მათი გულწრფელი ემოცია ოპოზიციამ, შესაძლოა, მათსავე წინააღმდეგ გამოიყენოს.

„პოლიტიკურ უმცირესობას ქართული კანონი და მისი „რუსულობა“ უკვე დაავიწყდა – მის შინაარსში საერთოდ არ შესულან და არც ახლა აპირებენ. ისინი აკერმანის სცენარის მიხედვით მიჰყვებიან რევოლუციის განვითარებას. ფსიქოემოციური აფეთქებისთვის მსხვერპლი სურთ. მათი ეს ზრახვები არის სახიფათო, გარდა იმისა, რომ მიუღებელია. ამიტომ სიფრთხილე მართებთ ახალგაზრდებს, ბავშვებს და მათ მშობლებსაც, რომ გულწრფელი ემოცია არ იყოს გამოყენებული ქვეყნის საწინააღმდეგოდ და იმ ხალხის სასარგებლოდ“, – აღნიშნა დიმიტრი ხუნდაძემ.

რუსეთის დუმამ „საარჩევნო უფლებების ძირითადი გარანტიების შესახებ“ კანონში ცვლილებები შეიტანა, რომელიც „უცხოელ აგენტებს“ არჩევნებში კანდიდატად მონაწილეობას უკრძალავს, – ამის შესახებ ინფორმაციას რუსული სახელმწიფო საინფორმაციო სააგენტო TASS-ი ავრცელებს.

რუსეთის ფედერაციის სახელმწიფო დუმამ პლენარულ სხდომაზე კანონში „საარჩევნო უფლებების ძირითადი გარანტიების შესახებ“ ცვლილებები მეორე და მესამე მოსმენით დაამტკიცა. კანონის მიხედვით, უცხოელი აგენტის სტატუსის მქონე პირებს კანდიდატად დარეგისტრირება არჩევნების ყველა დონეზე ეკრძალებათ.

ცვლილებების მიხედვით, „უცხოური აგენტების“ რეესტრში შეყვანილი პირები, ასევე ექსტრემისტული ან ტერორისტული ორგანიზაციის საქმიანობაში ჩართული პირები კანდიდატები ან არჩევნების დამკვირვებლები ვერ იქნებიან.

კანონში ცვლილებების შეტანას მხარი 450-დან 409 დეპუტატმა დაუჭირა.

შანტაჟი, მუქარა, რომ ან სახელმწიფოს ინტერესების დაცვაზე უარს იტყვი ან დაგასანქცირებ – არ ჭრის, – ამის შესახებ პარლამენტის იურიდიულ საკითხთა კომიტეტის თავმჯდომარემ, ანრი ოხანაშვილმა განაცხადა.

მისი თქმით, “ქართული ოცნების” საპატიო თავმჯდომარემ, ბიძინა ივანიშვილმა, არაერთხელ დაადასტურა ქვეყნის მიმართ ერთგულება, შესაბამისად, სანქციების დაწესების მუქარა ვერავის შეაშინებს.

ოხანაშვილმა აღნიშნა ისიც, რომ შესაძლოა, პარტნიორები ვერ თანხმდებოდნენ კონკრეტულ საკითხებზე, თუმცა, ეს იმას არ ნიშნავს რომ ისინი უხეშად უნდა ჩაერიონ საქართველოს შიდა საქმეებში.

“ბიძინა ივანიშვილმა არაერთხელ დაადასტურა ჩვენი სამშობლოს მიმართ ერთგულება და შესაბამისად, ვერავითარი მუქარა სანქციების შესახებ, ვერავის ვერ შეაშინებს.

შესაძლებელია არსებობდეს საკითხები, სადაც პარტნიორები ვერ თანხმდებოდნენ, თუმცა, ეს იმას არ ნიშნავს და პარტნიორს არ აძლევს უფლებას, რომ უხეშად ჩაერიოს ქვეყნის შიდა საქმეებში. პარტნიორობა ნიშნავს თანასწორობაზე დაფუძნებულ ურთიერთობას”, – განაცხადა ანრი ოხანაშვილმა.

ერთ დღეს თითქოს ლიტურგიას ესწრებიან, გალობენ, მეორე დღეს პატრიარქს შეურაცხყოფას აყენებენ – კიდევ ერთხელ ნიღაბი ჩამოიხსნეს და საკუთარი სახე დაანახეს საზოგადოებას, – ამის შესახებ იურიდიულ საკითხთა კომიტეტის თავმჯდომარის პირველმა მოადგილემ, დავით მათიკაშვილმა განაცხადა.

„ის რომ „თბილისი პრაიდი“, სუბელიანი, ზოგადად რადიკალები, ფსევდოლიბერალური ღირებულებების პროპაგანდისტები გულწრფელები არ არიან ძალიან მარტივად გამოჩნდა. მათ გულწრფელობას არავინ არ იჯერებს. ერთ დღეს თითქოს ლიტურგიას ესწრებიან, გალობენ, მეორე დღეს პატრიარქს შეურაცხყოფას აყენებენ. კიდევ ერთხელ ნიღაბი ჩამოიხსნეს და საკუთარი სახე დაანახეს საზოგადოებას – თუ რეალურად რა ანტიქართულ, ანტიეკლესიურ ძალასთან გვაქვს საქმე“, – განაცხადა დავით მათიკაშვილმა, რომლის კომენტარსაც “ქართული ოცნება“ ავრცელებს.

აღმოჩნდა, რომ დაფინანსება, განსაკუთრებით პოლიტიკასთან პირდაპირ დაკავშირებული „ენჯეოებისა“, ხმარდება სწორედ რევოლუციების მოწყობას ქვეყანაში და რადიკალიზმის გაღვივებას. აქედან გამომდინარე, რა თქმა უნდა, ამის გასაჯაროება არ უნდათ და აკრიტიკებენ ქვეყანას – რატომ გინდათ, რომ ქვეყანაში პროცესები იყოს გამჭვირვალე, დემოკრატიული და არჩევნების გზით წყდებოდეს. აი ეს არის ის რეალობა, ორმაგი სტანდარტი, რომელიც გამოაშკარავდა, – ამის შესახებ საპარლამენტო უმრავლესობის წევრმა, საპროცედურო საკითხთა კომიტეტის თავმჯდომარემ, ირაკლი ქადაგიშვილმა განაცხადა.

ქადაგიშვილის თქმით, ერთადერთი რამ რასაც „უცხოური გავლენის გამჭვირვალობის შესახებ“ კანონპროექტი ითვალისწინებს, არის გამჭვირვალობა და ფინანსების საჯაროობა და ამაზე პირდაპირ უარის თქმა იყო რთული, ამიტომ ოპონენტებმა აღმართეს კედელი, რომელსაც დაარქვეს „რუსული კანონი“.

„ერთადერთი რამ რასაც ეს კანონპროექტი ითვალისწინებს, არის გამჭვირვალობა და ფინანსების საჯაროობა. სხვა ამ კანონპროექტში რაიმე განსაკუთრებული არაფერი არ არის ჩადებული, რაც ან ოდნავ შეაფერხებს მუშაობას არასამთავრობო სექტორის, ან მედიისას, ან რომელიმე ადამიანზე იქონიებს გავლენას, მხოლოდ და მხოლოდ გამჭვირვალობა არის. ასე რომ ძალიან რთული იყო თავიდანვე უარის თქმა პირდაპირ გამჭვირვალობასთან დაკავშირებით, ამიტომ აღმართეს ეს კედელი, რომელსაც დაარქვეს „რუსული კანონი“ და ამის იქით არც ქვეყნის შიგნით და არც ქვეყნის გარეთ არავის აღარ სურდა რაიმე დამატებითი არგუმენტი წარმოეჩინა“, – აღნიშნა ქადაგიშვილმა, რომლის კომენტარსაც „ქართული ოცნება“ ავრცელებს.

არაერთხელ გვითქვამს, რომ „ნაციონალური მოძრაობა“ აკერმანის სტრატეგიის მიხედვით ყველაფერს გააკეთებს, რათა ის ინსტრუმენტები გამოიყენონ, რაც მათთვის უკვე ცნობილია, მათ შორის მაიდანის რევოლუციური სცენარებიდან გამომდინარე და ბევრი სხვა ინსტრუქცია, რომელიც აკერმანიდან აქვთ მიღებული, – განაცხადა „ქრონიკასთან“ საქართველოს პარლამენტის ვიცე-სპიკერმა ნინო წილოსანმა.

დეპუტატი ზურაბ ჭიაბერაშვილის განცხადებას გამოეხმაურა.

„ნაციონალური მოძრაობის“ საერთაშორისო მდივანმა დააანონსა შესაძლებლობა, რომ ფატალური შემთხვევა მოხდეს აქციების დროს. ეს არის უმნიშვნელოვანესი და ყურადსაღები თავად აქციაში მონაწილე ადამიანებისთვის. ჩვენი მხრიდანაც არაერთხელ გვითქვამს, რომ „ნაციონალური მოძრაობა“ აკერმანის სტრატეგიის მიხედვით ყველაფერს გააკეთებს, რათა ის ინსტრუმენტები გამოიყენონ, რაც მათთვის უკვე ცნობილია, მათ შორის მაიდანის რევოლუციური სცენარებიდან გამომდინარე და ბევრი სხვა ინსტრუქცია, რომელიც აკერმანიდან აქვთ მიღებული. თავისთავად, უსაფრთხოების მაქსიმალური დაცვა ხდება სამართალდამცველების მხრიდან. მოვუწოდებთ ყველას, მათ შორის „ნაციონალური მოძრაობის“ და მასთან აფილირებული პარტიების წარმომადგენლებს, აიღონ პასუხისმგებლობა იმ აქციების განვითარებასთან დაკავშირებით, რომელსაც თავადვე აორგანიზებენ“, – აღნიშნა წილოსანმა.