“ღვთის შეწევნით, კარგად ვარ” – მეუფე შიო

საქართველოს კათალიკოს-პატრიარქის, ილია მეორის მოსაყდრე, მუფე შიო აცხადებს, რომ თავს კარგად გრძნობს.

„მადლობა ღმერთს, ყველას გილოცავთ დღევანდელ დღეს, პეტრე-პავლობას. ღვთის შეწევნით, კარგად ვარ“, – განაცხადა მეუფე შიომ.

კითხვის საპასუხოდ, მეუფე შიომ აღნიშნა, რომ ალბათ ხელახალი კვლევები ჩატარდება. „დიახ, ალბათ, ექიმები გვირჩევენ“, – განაცხადა მეუფე შიომ.

კითხვაზე, „სად არის კერა?“, – მეუფე შიო პასუხობს: „ვერ გეტყვით, ეს არის ყოფითი რაღაც, მოწამვლა არის, თუ გარკვეული ზემოქმედება“.

რამდენიმე ქართულ მედიასაშუალებაში გავრცელდა ინფორმაცია, რომ სრულიად საქართველოს კათალიკოს-პატრიარქის, ილია მეორის მოსაყდრე, სენაკისა და ჩხოროწყუს მიტროპოლიტი, მეუფე შიო მუჯირი მოწამლეს. ამასთან, საპატრიარქოს საზოგადოებასთან ურთიერთობის სამსახურის ხელმძღვანელმა, დეკანოზმა ანდრია ჯაღმაიძემ ჟურნალისტებს განუცხადა, რომ „მეუფე შიოს მოწამვლის შესახებ ინფორმაციას, შესაძლოა, ჰქონდეს ნაწილობრივი საფუძველი, რადგან სისხლის ანალიზში მძიმე მეტალების დაშვებულზე მეტი შემცველობა აღმოჩნდა“. მეუფე შიო მუჯირის მოწამვლის შესახებ გავრცელებულ ინფორმაციაზე შსს-მ გამოძიება განზრახ მკვლელობის მცდელობის მუხლით დაიწყო.