გადაწყვეტილებების მიღების დროა, მოგიწოდებთ ყველას, მოდით სამიტზე კომპრომისის სულისკვეთებით, კოლექტიური პასუხისმგებლობის გრძნობით, წინ დააყენეთ ევროკავშირის ინტერესები და ღირებულებები, – ამის შესახებ ნათქვამია ევროპული საბჭოს პრეზიდენტის, შარლ მიშელის წერილში, რომელიც მან ევროკავშირის ქვეყნების ლიდერებს სამიტზე მისაწვევად გაუგზავნა.
„ჩვენს წინ გველოდება ევროპული საბჭოს გადამწყვეტი სხდომა. გადაწყვეტილებების მიღების დროა. მოგიწოდებთ ყველას, მოდით კომპრომისის სულისკვეთებით, კოლექტიური პასუხისმგებლობის გრძნობით, წინ დააყენეთ ევროკავშირის ინტერესები და ღირებულებები. მოუთმენლად ველოდები ბრიუსელში თქვენს ნახვას“, – აღნიშნულია შარლ მიშელის წერილში.
ევროპული საბჭოს პრეზიდენტი აღნიშნავს, რომ ევროკავშირი უნდა შეთანხმდეს უკრაინასთან წევრობის შესახებ მოლაპარაკებების დაწყებაზე და მიიღოს მნიშვნელოვანი გადაწყვეტილებები წევრობის სხვა პრეტენდენტებისთვის.
„2022 წლის 21 თებერვალი ევროპის ისტორიაში გარდამტეხი მომენტი იყო. ჩვენს კონტინენტზე ომის დაწყების შემდეგ ჩვენ მივიღეთ რამდენიმე უპრეცედენტო გადაწყვეტილება უკრაინის მხარდასაჭერად და, პარალელურად, ევროპის სუვერენიტეტის გასაძლიერებლად. 19 თვის შემდეგ ჩვენ კვლავ ვდგავართ თამამი გადაწყვეტილებების მიღების საჭიროების წინაშე. ეს საჭიროებს ჩვენს კოლექტიურ სიძლიერეს და სიმტკიცეს, ასევე სწორი არჩევანის გაკეთების გამბედაობას. ჩვენ უნდა შევასრულოთ ჩვენი ვალდებულებები უკრაინის წინაშე, გავაგრძელოთ სანდო და ძლიერ პარტნიორად ყოფნა. ჩვენ უნდა გავაგრძელოთ უკრაინის მდგრადი პოლიტიკური, ფინანსური და სამხედრო მხარდაჭერა და, კერძოდ, შევათანხმოთ 50 მილიარდი ევროს გამოყოფა მისი გრძელვადიანი სტაბილურობისთვის. ჩვენ ასევე უნდა შევთანხმდეთ უკრაინასთან წევრობის მოლაპარაკებების დაწყებაზე და ამით გავგზავნოთ აუცილებელი სიგნალი, რომ დავაახლოოთ ის უფრო მეტად ევროპულ ოჯახთან. ჩვენ ასევე უნდა მივიღოთ მნიშვნელოვანი გადაწყვეტილებები წევრობის სხვა პრეტენდენტებისთვის. ამავე დროს, ვიმუშაოთ, რათა ჩვენი კავშირი იყოს მზად მომავლისთვის და ახალი წევრების მისაღებად“, – ნათქვამია შარლ მიშელის წერილში.
შარლ მიშელის ცნობით, სამიტზე დღის წესრიგში იქნება ასევე ახლო აღმოსავლეთში მიმდინარე მოვლენები.
