ევროპის ჩრდილო-დასავლეთ ნაწილში შტორმ „კიარანს“ ექვსი ადამიანი ემსხვერპლა

110
spot_img

ევროპის ჩრდილო-დასავლეთ ნაწილში შტორმი „კიარანი“ მძვინვარებს. სტიქიას ევროპაში ექვსი ადამიანი ემსხვერპლა. ინფორმაციას „როიტერი“ ავრცელებს.

ორი ადამიანია დაღუპული საფრანგეთში. საფრანგეთის შინაგან საქმეთა მინისტრის ცნობით, ასევე დაშავებულია 15 ადამიანი, მათ შორის შვიდი მეხანძრე-მაშველი. საფრანგეთში ევაკუირებულია 1 300-მდე ადამიანი. ერთი ადამიანი დაღუპულია ესპანეთის დედაქალაქ მადრიდში და კიდევ ერთი ნიდერლანდების სამხრეთ ნაწილში.

სტიქიას ორი ადამიანი ემსხვერპლა ბელგიის ქალაქ გენტში, მათ შორის ხუთი წლის ბავშვი.

შტორმის გამო, სტიქიის ზონაში დახურულია სკოლები, შეფერხებულია სარკინიგზო მიმოსვლა, გაუქმდა ავიარეისები. საფრანგეთში 1,2 მილიონი აბონენტი ელექტროენერგიის გარეშეა დარჩენილი.

ჩრდილოეთ ირლანდიაში, შტორმის გამო, ძლიერი ქარი და წყალდიდობაა. სტიქიამ პრობლემები შექმნა ბრიტანეთის ნორმანდიის კუნძულებზე, სადაც ძლიერმა ქარმა რამდენიმე საცხოვრებელი სახლი დააზიანა. ნიდერლანდების ავიახაზებმა უამინდობის გამო ასობით ავიარეისი გააუქმა, ასევე გაუქმდა სარკინიგზო რეისები ამსტერდამიდან პარიზში. ათობით ავიარეისი გაუქმდა ესპანეთში.